Maruku 9 - Ma Jou ai Demo-demo o Totobelohoka

¹ De o Yesusu ka wotemohi onangika wato, “Naa duru tagou-goungu tinihingahu abe naga utu nia hidogoronaka naa abe ona ko yohonenguahi de gea ona iwimakeoka de manga lako abe Ma Jou duru de ai kuahaka wahikoano o nyawaika.”

O Yesusu womahimatoko ai dararono

² De o wange butaanga ipahaika de ahao o Yesusu wao o Peturusu, de o Yakobusu, de o Yohanese, la ona yaruata gea yomakiniiki. De o Yesusu wahihira-hira la yodoa o loku kohagurutiye, de ka ona dika naga dakenangoka. Ho yomahiadonoka genangiye de ahao o Yesusu ai rupa idadi o fara moioli manga himangoka.

³ De ai pakeanga gea idadi duru iarehoka hiadono hoiletongo, abe nako o duniaka ko imakadaenua ma medebini abe hokogea ma magarehe yofoka.

⁴ De abe ma oraha ona yaruange iwilega-lega Unangika de ahao ka itodokanino de yamake naga o Elia de o Musa abe ma dodihiraino yodadi Ma Jou ai uru ma dodofanga. Ho ona yahinooto de o Yesusu yomakoketemo abe iwinii-niiki manga hima-himangoka.

⁵ De ahao o Peturusu witemo o Yesusika wato, “Guru, naa duru irahai abe ngone naga nenangoka! Ho koaho ngomi o hijai-jai ma tau o gahumu hange midiai nenangoka, moi to Ngona, moi to Elia, de moi to Musa.”

⁶ O Peturusu ka hokogea dika wotemo angamoi yakokitomomonoka de duru yohawana de o kiahi wato wotemo ma ko wohiorikokaua.

⁷ De ahao yamake o lobi abe yakokihawoka o Yesusu de o Musa de o Elia. De ahao Ma Jou wotemo abe yoihene o lobino ma ilingi itemo ato, “Naa to Ngohi ahi Ngofaka de duru tidora, ho kiani Unangika niwihigihene.”

⁸ Ka de yoihene ma ilingi gea de yomalega arihonongaika masara ka o Yesusokahi iwimake angamoi o Elia de o Musa ka aiaho, ko yakokimakeokaua, ho o Yesusu dika nagahi.

⁹ De ipaha de ahao o Yesusu de ona yaruange yoliouku. De manga gogiriaka youti o lokuku de o Yesusu watemo onangika wato, “Gea kangano abe niamakeoka ngarouahi niahingahu o nyawa utuika, e? Masara nako hiadono Ngohi, o Nyawa ma Ngofaka tomomikoka ahi honengino de gea ahao ka idadi niade-ade abe kangano niamakeoka.”

¹⁰ Ho gea o Yesusu ai behehongo onangika iwihingounu hiadono ai demo ka agogono dika manga hiningaka. Masara ona yaruange dika yomakokeleha ato, “Ka o kia ma titi gea wotemo, abe wato womomikoli ai honengino?”

¹¹ De ahao ona iwileha ato, “Adodoa ho ona abe yotobadoto-dotoko o Musa ai Paretaino inadotoko ato, ‘O Elia kiani wohira woboa, de ahao nanga Koano o Mesia wihidoduruino?’”

^12-13 De wapaluhu wato, “Gea ona yagoungu. Kiani o Elia wohira la wato o nyawa manga wowangoka wahitiaiokahi de ahao nanga Koano o Mesia wihidoduruino. Ho naa tinihingahu dika, igoungu una gea abe iwihiromanga o Elia, una woboaka, de o kia naga dika o nyawa manga wowangoka ma dorou, gea iwihipake unangika. De gea manga dorou unangika idadi duru imaketero hoka ma dodihiraka ihitulihukuoka Ma Jou ai Demo-demoka.” “Ho naa Ngohioli tinileha nginika. Naga Ma Jou ai Demo-demoka ihitulihukuoka ma titi Ngohi o Nyawa ma Ngofaka, abe ahao ihidohata de ihioluku de hiadono ihihikangela ma ngoe. Ho gea ma titi o kia? Abeika gea niafikirohi.”

O ngofaka iwikokitokata de hiadono wohone-honenge de o Yesusu widuhunu hiadono ai tokata wohititoko

¹⁴ De o Yesusu de yaruange iwinii-niikino yomahiadonuku o loku ma igaruku. De genanguku naga manga dodiawo yahiwo, de nagali yamake o nyawa yowoe-woe yomatoomuino yahiwoka. De o nyawa manga ngoeoka yamuruono naga abe yotobadoto-dotoko o Musa ai Paretaino, de ona de iwinii-niiki yomaketeribuutu.

¹⁵ De o Yesusu de yaruange gea ona yomahitigi onangika, de yowoe-woe gea iwimake o Yesusu. De ka de iwimake de duru yokokiheranga, ho yomapopaata iwibuhuku de yotemo ato, “Mia Baluhu!”

¹⁶ De ahao Una waleha onangika wato, “Ngini de ona abe yotobadoto-dotoko o Musa ai Paretaino gea nimaketeribuutu de ma titi o kia?”

¹⁷ De womatengo yowoe-woeino wipaluhu wato, “Ahi Guru, marai hokonaa ma titi hiadono yomaketeribuutu. Ngohi naa ahi hidee la ahi ngofaka tiao Ngonaika angamoi iwikitokatoka, de ma tokata gea iwihidiai la hiadono womouoka.

¹⁸ Ho abe ma oraha ma tokata iwibarene, gea iwihirubauku ma tonakuku ahi ngofaka, de ai uruoka naga ai kibiri iuihi, de nagali ai ingiri ka ihikaika wohikagoli, de nagali ai badangoli duru itiri-tirihoka. Ho kangano togahoko yahiwoika abe ininii-niiki la tato ma tokata yahititoko unangino, masara ona ko yakunua.”

¹⁹ De ahao o Yesusu wataere onangika wato, “Adoo, ngini naa totokia? Ka muruonoka de ahao ngini naga de nia ngongakuoka Ngohino? De hokokiahi ma dekana abe Ngohi de ngini homahidogogere moi la hiadono ngini niakunu nimaaduru hoka to Ngohioli ahi datoro? Ho ibooto. Ai ngofaka gea niwiaoino Ngohino!”

²⁰ De ma ngofaka gea iwiaoino, masara ka de ma tokata iwimake o Yesusu, de ena gea iwihifafara ma ngofaka de hiadono iwihiruba ma tonakuku. Iwihirubauku de ahao iwilu-lulu aika aino, de ai kibiri iuihi ai uruino.

²¹ De ahao ai babaika o Yesusu wileha wato, “Ho naa ka furuono iwidubuku?” De wato, “Naa una ka ai etetekohi de iwidubukoka ka hiadono ma wange naa ka iwihikangelahi.

²² Nengokadau ma ngoeoka iwiumo o ukuika de o akerikaoo la ato iwihohonenge. Ho nako Ngona ka nakunu niduhunu, tanu duru migahoko la nomidora ngomi naa de nomiduhunu.”

²³ De o Yesusu wato, “Mode ngona nohileha nato, ‘Nako Ngona ka nakunu?’ Angamoi o kia dika o nyawa yomagahoko Ma Jouino, gea mata-mata ka wakunu wodiai, iti o nyawa gea iwingaku Unangika.”

²⁴ Ka de wotemo ibooto de ai baba wopoaka wato, “Ahi Baluhu, ahi ngongaku naga, masara ka ikurangohi. Ho ngohi tomagahoko la nohiduhunu la ahi ngongaku ka idogo iputurungu!”

²⁵ De o Yesusu womalegaika de wamake naga manga ngoe yomulaenge yomapopaatino ma ngofakino. Ho ma tokatika wataeroka o Yesusu wato, “Ngona o tokata ma dorou abe o nyawa nahidiai la yodadioka yomou de yatopongono, ngona naa tonihuloko la naa naga nohupuoka unangino de ibootohi nowohamika ai badanga ma goronaika ka hiado-adonika.”

²⁶ De ma tokata gea ihaangara, de duru iwihifafara ma ngoe hiadono ihupu unangino. Masara ihupuoka de ma ngofaka gea duru womakelu-keluokaua, de ona iwimake hoka ai honenge dika. Iwimake hokogea de ahao naga yamuruono yomakoketemo ato, “O, marai wohonengoka.”

²⁷ Masara o Yesusu wiso ai giamika de wihimomikiye, de una gea duru wotogumoka.

²⁸ De ipaha gea de o Yesusu de iwinii-niiki yoiki yowohama o tau moiika de genangoka ko iwa o nyawa, de ahao ona iwileha ato, “Kangano gea adodoa ho ngomi ko miakunua mihititoko unangino ma tokata gea?”

²⁹ De wopaluhu wato, “Nako naga ma tokata hokogea, kiani homaniatokahi de ahao ka idadi hohititoko o nyawaino. Masara nako ko homaniatikaua de hohititoko, gea ko hakunua.”

O Yesusu wahingahu ma titi ai honenge

^30-31 De ipaha de yosobo ato yohidotobiki o Galilea ma tonakoka. Masara o Yesusu ai mau wato duru wadotoko ka yangimoi de yahinootoika dika, ho yoiki yomatohikoka la ato ufa o nyawa utu yahioriki. De manga dodagioka de Una wadotoko wato, “Masara naa tinihingahu abe Ngohi o Nyawa ma Ngofaka ahao ihihidoaka o nyawaika la ahao ona gea ihihohonenge. Ihihohonengoka masara de ma futu hange ipahaika de ahao tomomikokali ahi honengino.”

³² Masara yangimoi de yahinooto gea ai demo ko yataokua, de ko yomoroinua iwileha ai demo ma titi.

Ka onagonahi de duru yokurutiye?

³³ De ipaha de ahao o Kapenaumu ma kapongika yomahiadonoka de o tau moi ma goronaika yowohama. De o tau ma goronaka de o Yesusu waleha wato, “Kangano nanga dodagi ma goronaka de ngini nimakokeleha o kia?”

³⁴ Masara ona ka yomarii-riidoka dika, angamoi gea kanganohi ka ona dika yomaketeribuutoka ato, “Nako ngone inangimoi de inahinootoino, ka onagonahi de duru hokurutiye?” Gea ho hiadono yamaleke de hiadono o Yesusika ko iwipaluhua.

³⁵ De wogogeruku de yangimoi de yahinooto wakokiahokino de wadotoko onangika wato, “Onagona dika ato yomahikurutiye Ma Jou ai himangoka, kiani ona gea duru yomahitipokouku de o nyawa mata-mataika kiani yaleleani onangika. De nako hokogea yomahitipokouku, gea ahao Ma Jou waetongo wato, ‘Ona yokurutiye.’”

³⁶ Gea wotemo ibooto de ahao naga o ngofaka ma eteteke womatengo witauru la womaokoino manga hidogoronaka. De ahao o Yesusu wikooino de ai giama de wadotoko onangika ma titi ufa yairiki yokokurutiye dika. Ho Una wato,

³⁷ “Onagona dika nginioka abe ma titi nihiniiki Ngohi de hiadono o nyawa niadafongo, ngaro o nyawa gea ka yotipokouku dika hoka o kokawaaha dika, masara gea imaketero abe hoka ngini nihidafongoka Ngohi. Abe ngaro hoka o ngofaka ma eteteke naa, nako niwidafongo ma titi nihiniiki Ngohi, gea imaketero Ngohioo nihidafongoka. De nako Ngohi nihidafongoka, gea ko Ngohiua dika nihidafongo masara Una wohihidingo-dingotino, Unangoo niwidafongoka.”

Womatengo o tokata wohitito-titoko o nyawaino

³⁸ De ahao o Yohanese witemo o Yesusika wato, “Ahi Guru, ma moiuku de wiwimake naga o nyawa womatengo, abe una gea o toka-tokata ma dorou wohitito-titoko o nyawaino. Masara ngomi miheranga angamoi wohitito-titoko gea una wafetongo to Ngona ani romanga. Masara una ko wonanii-niikua ngone naa ho gea ngomi wiwihuloko la ibootohi hokogea wodiai.”

³⁹ De o Yesusu Una wotemo wato, “Una gea niwihigunoa dika de ufa niwitaere. Abeika tinileha. Ka idadi o nyawa ahi romanga yafetongo la o heheranga yodiai de ka ma moi ahi romanga ihipeseke! Duru ko idadiua! Ho Ngohi tato una naa ko wohipesekua to Ngohi ahi romanga.

⁴⁰ Ho gea Ngohi tato onagona dika abe ko inalawanua, gea ona de ngone homakomotekika.”

O nyawa utu yaduhunu Ma Jou ai nyawaika, masara utuoli yahiatara to Una ai nyawaika

⁴¹ De o Yesusu Una ka wodotokohi wato, “De nako onagona dika iniduhunu nginika, ngaro hoka o akere o mangko moi dika inihidoaka, ma nako gea inihioriki ngini nihiniiki Ngohi o Kristusu, de genangino ma titi hiadono iniduhunu, ona gea ahao kiani yamake ma owa Ma Jouoka de aino.”

⁴² “Masara nako o nyawa ihingakuoka Ngohino, ngaro ona gea ka yotipokouku dika, masara onagona dika abe yahiatara la hiadono ihingaku-ngaku yorehene Ma Jouino, ona yahiata-atara, ona gea duru Ma Jou wahohowono. De abe ona yahiata-atara duru manga hohowono kohadubuho ho ngaro manga tomarino ihidilikoino de yadideuku o hakaru kohaamoko de yahidutumo o gahi ma lukuku, ma ko kia-kiaua. Hongoli nako ihingaku-ngakuoka de yahiata-atara, duru to onangohi manga hohowono itubuho.”

⁴³ De Una wotemohi onangika wato, “Nako de ani giama ma hononga inihiatara la nako norehene Ma Jouino, gea ani giama nafokoka dika. Angamoi koaho inihipoloka la idadi ani toba genangino la ahao namake o wowango ka hiado-adonika. Masara nako ko notobaua de kiani o Narakaika nowohamika, abe genangoka ma uku ko ihone-honengua, genangoka ngaro ani giama ma gahumu nagahi, ma, done o kiaka ma utumu namake ani giamino?

⁴⁴ [Abe daenangoka ‘O gai-gaili ka ihikaika yahikangela o nyawaika. De nagali genangoka ma uku ka ihikaika iwango-wango, ko ihonengua.’]

⁴⁵ De nako ma titi ani lou dika inihitagi la genangoka naika de norehene Ma Jouino, gea ho ani lou nafokoka dika. Koaho inihiluguoka la idadi ani toba genangino de ahao namake o wowango. Masara nako kiani iniumouku o Narakauku, genangoka ngaro nagahi ani lou ma gahumu, ma, done o kiaka ma utumu namake ani louino?

⁴⁶ [Abe daenangoka ‘O gai-gaili ka ihikaika yahikangela o nyawaika. De nagali genangoka ma uku ka ihikaika iwango-wango, ko ihonengua.’]

⁴⁷ De nako ani lako ma hononga inihiatara la nako norehene Ma Jouino, gea ani lako ma gomono nahuputoka de naumo dika. Koaho inihirafioka la idadi ani toba genangino de ahao nodoa o Horogaiye. Masara nako hiadono noiki o Narakaika, genangoka ngaro ani lako ma gahumu nagahi, ma, done o kiaka ma utumu namake ani lakoino?

⁴⁸ Abe daenangoka ‘O gai-gaili ka ihikaika yaolomo la yahikangela o nyawaika. De nagali genangoka ma uku ka ihikaika iwango-wango, ko ihonengua.’”

⁴⁹ “De abe ma titi o uku, nagahi moi toigo tinidotoko nginika. Abe onagona dika ihinii-niiki Ngohi, ona gea mata-mata Ma Jou wahitebini de o uku. Abe ma titi Una ka idadi wahitebini de o kangela la utuohi yotebini ai himangoka. Ho gea ngade-ngade hoka yodadi o huhuba moi Ma Jouika abe duru iwihisanangi.”

⁵⁰ “De nako o huhuba, gea kiani naga de ma gahioka la imakiniiki de o huhuba ma hiaturu. De o gahi gea duru irahai. Masara nako o gahi la imakasapuroka de o tonaka, done sarakia nidiai la ma gahi ireeukuoli? De hokogenangoo imaketero hoka ngini naa. Abe ngini kiani nihiniiki Ngohi de nia hininga ma gahumu. Ho ufa nimahisapurika de o peseke, la gea ngini ka niakunu nihiniiki Ngohi de nia hininga ma gahumu. De moioli ahi behehongo, kiani ngini nimakao irahai.” De hokogea o Yesusu ai dodotoko abe iwinii-niikika la manga wowango duru itebini Ma Jou ai himangoka.