Maruku 8 - Ma Jou ai Demo-demo o Totobelohoka

Utuoli o nyawa yosana de o Yesusu wahiolomo

¹ De ipahaino o wange moiuku naga o nyawa ko manga ngoe yomatoomuinoli o Yesusoka, masara manga inomo duru ko iwa. Ho o Yesusu ona iwinii-niiki wahokino Unangino. Wahokino de wotemo onangika wato,

² “Ngohi ahi hiningaka de tamao ahi dora ma hiokoo duru itagi o nyawa manga ngoeika naa, angamoi ona naga de de Ngohi o futu hangeinoo de manga inomo duru ko iwaka.

³ De nako ona gea ko hahiolomua de ona ka de manga hafinokahi de tahuloko yokokilio, de ahao done manga hininga ka ihihihanga, de utu kohagurutika manga dodagi.”

⁴ De ona yopaluhu Unangika ato, “Ho naa done sarakia angamoi ngone naga ma hoanoka ho done o kiaino hamake o roti la hato hahikawedono o nyawa mata-mataika naa yolomo?”

⁵ De woleha onangika wato, “Ga naga nia roti muruonohi?” De yopaluhu ato, “Mia roti naga o gahumu tumidohi.”

⁶ De ahao o Yesusu wahuloko o nyawa manga ngoe-ngoeika gea wato, “Ngini nikokigogerukuohi.” De ona yokokigogeruku de ahao Una waleino ma roti tumidi gea de wohitarimakaseohi Ma Jouiye. Wohitarimakase ibooto de ahao ma roti wakokabelaka de wahikokodoku abe iwinii-niikika la onangoli yahikodoku o nyawa manga ngoe-ngoeika gea.

⁷ De onangoka nagaoo o nawoko ma hohumuduru muruono naga, ho enangoo wohitarimakase Ma Jouiye de ahao wahuloko la ona yahikodoku o nyawa mata-mataika ma nawoko gea.

⁸ Ho gea o nyawa mata-mata yolomo ka hiadono yakokipunuhoka. Yolomo ibooto de ahao o inomo ma hou yagorakino de yonoa o tupa ma ago-agomuku. De yagoraka ipaha de naga ma tupa ma gahumu tumidi aomangiye de manga inomo ma hou.

⁹ Ho ona yolo-olomo gea naga yasana iata. Gea ipaha de o Yesusu o nyawa wahuloko la yokokilio.

¹⁰ Ka de yokokisoboka de o Yesusu de iwinii-niiki yokokifarene o ngotiroko, de onangoo yosobo yoiki o Dalmanuta ma tonakika.

Nihidodiai o Farisi ma nyawa de o Herodese ai nyawa

¹¹ De ma oraha gea naga o Farisi manga doomuino ma nyawa yoboa o Yesusino de iwiribuutu Unangika la ato iwihitaili de to ona manga demo. De iwitemo ato, “Ngomi marai migahoko la o heheranga nomihimatoko mia himangoka naa la ka idadi miamake de mihioriki ngona o Horogaka de nauku eko koua.”

¹² De manga demo gea woihene de ai hininga ihuha de wowomaha waamo-amokiye de ahao wopaluhu wato, “Adodoa ho hiadono ngini naa o heheranga nigaho-gahoko? Ngohi tagou-goungu tinihingahu abe Ngohi naa duru toluku o heheranga todiai nia himangoka abe hoka ngini naa nioigo todiai.”

¹³ De gea watemo ibooto de wanoaikaka de wofarenoli ma ngotiroko de Una de yangimoi de yahinooto yosobo yato yomahihorali doka ma akere ma ngooto ma honongaikali.

¹⁴ Ho de ma oraha yosobo de manga bilaono o roti yawohangika, ho naga moi dika manga roti manga ngotiroka gea.

¹⁵ De manga dodagi ma goronaka de o Yesusu wahitiari iwinii-niikika ma titi o nyawa manga dodotoko wato, “Ngini kiani nihidodiai o Farisi ma nyawa manga ragi de o Herodese ai nyawa manga ragioo kiani nihidodiai.”

¹⁶ De ai demo gea yoihene ma ko ihiorikua ho yomakoketemo ato, “Bote ai demo gea ma titi ma roti abe ko homagaoua.”

^17-21 De ona yomakoketemo gea o Yesusu wohioriki ho wataere onangika wato, “Adodoa ho nimakoketemo abe ma titi nia roti ko iwa? Bote niataoko ihowono gea totemoka! Mode ko niohiningakaua abe tahiolomo o nau-nauru yasana motoa de o roti motoa dika? De naa tinileha, gea o inomo ma hou abe niagorakino, gea o tupa muruono aomangiye?” De ona iwipaluhu ato, “O tupa ngimoi de hinooto miagorakino.” De ahao Una wato, “De mode genangoo ko niohiningakaua abe ma oraha Ngohi ma roti tumidi gea tahikodoku o nyawaika abe yasana iata? Genangoo tinileha, sarakia, naga o tupa ma ago-agomo muruono niagorakino, abe ma dola manga inomo ma hou?” De iwipaluhu ato, “Marai o tupa tumidi.” De ahao wataere wato, “Ho marai nia pea itogowinoka! Kangano abe ma ragi tafetongo, gea duru ko mangaleua ma titi Ngohi topusingi de o roti! Ngini naa nagau nia lako de nagau nia ngauku, de mode gea ko niihenuahi de ko niamakeuahi abe de nia lako? De ngini niamakeoka ahi kuaha abe todiaioka nia himangoka de ma titi gea ko niataokuahi? Ho gea de ka nipusingohi ma titi nanga inomo naa?” Hokogea wataere onangika.

Womatengo worafioka de o Yesusu wihitogumu la ka idadi womahioriki

²² De ipaha de o Yesusu de iwinii-niiki yomahiadonikaka o Besaida ma kapongika. De genangoka naga womatengo iwiaoino o Yesusino abe worafioka. Iwiaoino Unangino de ona duru yogahoko la ato o Yesusu wiso worafi-rafika la wihitogumu.

²³ De o Yesusu wiso de wihihupu ma hoanika, abe ma kapongino gea yohupuohi. De genangoka worafi-rafi gea ai lakoika waobiri o Yesusu, de ahao wasoika ai lakoika. Gea ibooto de ahao wileha wato, “Sarakia, nomahioriki?”

²⁴ De una womalegaika ma hoanika de ihohauramo, de wato, “Koua, ka idadi tomahioriki abe o nyawa tamake, masara ona tamake hoka o gota dika itagi-tagi.”

²⁵ De ahao wasoikali ai lakoika o Yesusu. Wasoika ibooto de una womalegaika dokengika, de gea duru womahiorikoka, de mata-mata womalegaika wamake duru itararonoka.

²⁶ De ahao o Yesusu wihuloko la wolio ai tauika de wihibehehongo unangika wato, “Ho naa ka idadi nolio, ma ufa ko nowohama ma kapongo ma goronaika de ufa noade-ade abe naa idadioka ngonaika, ma kiani naa nolio ani tauika dika.” Hokogea worafi-rafioka ai ade-ade.

O Yesusu ko womahingahuahi abe Una o Mesia Ma Jou ai Behehongo

²⁷ De ahao o Yesusu de iwinii-niiki yogila-gila yoiki o Kaisarea Filiipi ma kapo-kapongika. De manga dodagi ma goronaka de o Yesusu waleha iwinii-niikika wato, “Ma oraha o nyawa yomakoketemo ma titi Ngohi, de ona ato Ngohi naa onaguna?”

²⁸ De iwinii-niiki yopaluhu Unangika ato, “Utu naga ato Ngona o Yohanese Wotobaohi-ohiki abe womomikoka ai honengino. De naga o nyawa utu ato bote Ngona naa Ma Jou ai uru ma dodofanga ma dodihiraino o Elia. De nagali ato bote Ngona naa Ma Jou ai uru ma dodofanga nomatengo abe ma dihiraino nohonenge masara naa noboali o duniaino.”

²⁹ De o Yesusu walehali iwinii-niikika wato, “Masara nako ngini, niato bote Ngohi naa onaguna?” De o Peturusu wipaluhu o Yesusika wato, “Ngona gea o Mesia, mia Koano abe ma dihira Ma Jou womihibehehongoka.”

³⁰ De ahao o Yesusu duru wahitiari onangika wato, “Ufa o nyawaika niahingahu ma demo gea.”

O Yesusu wahingahu abe ahao kiani iwihikangela de iwitoma

³¹ De ma oraha gea o Yesusu womulaenge womahingahu abe womahitararono iwinii-niikika wato, “Ngohi naa o Nyawa ma Ngofaka, hokogea ihiromanga angamoi o Horogaka de tauku toboa masara o nyawaino tomaboa. De kiani ahao ihihikangela ma ngoe Ngohino, de hiadono ngone o Yahudi ma nyawa nanga dimo-dimono, de ona abe yodadi nanga hidemo ma nyawa Ma Jouiye manga hohidimono, de ona abe yotobadoto-dotoko o Musa ai Paretaino, ona mata-mata ahao ihikokioluku. De gea ihioluku hiadono ahao ihitoma, masara o wange hangeino dika de ka tomomikokali.”

³² Ho o Yesusu ai demo ma titi gea duru wahitararono onangika la duru ihioriki hokokia ahao idadi Unangika. Masara o Peturusu woboa Unangino de ka wihirehenika ma hohutulu de witaere o Yesusika, wato, “Ahi Baluhu, duru ko itiaiau ma datoro gea idadi Ngonaika!”

³³ Masara o Yesusu womadogilioro de womalega iwinii-niikika de ahao o Peturusikali witaere wato, “Ngona naa hoka o Ibilihi dika ma mau naniiki! Ho ahi poretoko nomahiwalimoka! Ibootoka notemo hokogea angamoi gea o nyawa dika manga hininga naniiki de ko Ma Jou ai mauua naniiki nako hokogea notemo.”

³⁴ Gea o Peturusika witemo ibooto de ahao wahokino iwinii-niiki yangimoi de yahinooto de naga utu manga ngoe-ngoe genangoka. Wakokiahokino de wahitiari onangika wato, “Onagona dika nginioka abe niato nihinii-niiki Ngohi, kiani ti ngini ma hirete nia mau nianoaka. De ngaro duru inihikangela ma ngoe ma titi nihinii-niiki Ngohi, abe ka hiadono o nyawa utu ato inihohonenge o gota isosalioainoka, masara ufa genangino de inihirehenoka ma hoanika. Abe nako nia mau nianoaka de ma kokangela gea niamakeoka de ka nihinii-niikohi Ngohino, gea ahao nihinii-niiki igou-goungu.

³⁵ De onagona dika ko ihiniikua Ngohi angamoi ato manga wowango yomadatoko la ato ufa yohonenge, masara, ahao ona gea ka yohonengohi. Masara onagona dika abe ihingakuoka de nako manga wowango yomahidoaka ma titi Ngohi ihiniiki de ahi Abari ma Rorahai yahingahu-ngahu o nyawaika, ona gea tanu manga badanga dika ihonengoka, masara manga wowango nagahi.”

³⁶ “Ho naa tinileha. Done o kia o nyawa manga utumu nako o nyawa o kiahonanga mata-mata o dunia ma amokika yomaleinoka, masara ka de ma oraha yohonenge de duru yomakitingaka ma gurutika Ma Jouino?

³⁷ De mode naga o kiali la ona gea ato yomabangu la ato manga wowango amake ka hiado-adonika? Gea duru ko iwa!

³⁸ Ho naa kiani o nyawa yomangiriki manga ngekomo. Angamoi ahao naga ma oraha abe Ngohi o Nyawa ma Ngofaka ahao toboali de ahi medebini ma dararono. De gea ahi medebini ma dararono imaketero hoka to ahi Babali ai medebini ma dararono, de ma oraha gea ahi Baba ai momalaekata onangoo ihiniiki. Masara ma oraha naa o nyawa yowoe-woe yotula-tulaka de ka iwioluku Ma Jouika. De gea ma titi hiadono kiani nia ngekomo nimangirikohi. Abe nginioka onagona dika nako inimaleke ma titi Ngohi eko ma titi ahi demo-demo ho hiadono ko inimagaweua Ngohi nihiniiki, ahao Ngohioo dokengika ma oraha de toboali abe naga de ahi debi-debini, gea Ngohioo ko ihimagaweua ngini tinidafongo. Ho ngini nihidodiai nimangiriki.”