Maruku 7 - Ma Jou ai Demo-demo o Totobelohoka

O Yahudi ma nyawa manga hirahi de manga bohono agorakiye

¹ O Yesusu ka wotagi-tagiohi o Galilea ma kapo-kapongika o nyawa wadotoko. De ahao ma moiuku naga o Farisi manga doomuino ma nyawa de ona abe yotobadoto-dotoko o Musa ai Paretaino o Yerusaleeme ma kotaka de yoboaino yomatoomuino o Yesusino.

² De yoboaino de yamake o Yesusu iwinii-niiki manga datoro moi abe ka de yamake de yomaketemo ato, “Gea manga datorino de yahowonoka!” Abe o Yesusu iwinii-niiki utu ngaro manga giama aihoro masara ko imaketeroua abe hoka manga totofora yahibehehongoka kiani yomaihoro, ho yato iwinii-niiki gea manga giama de ma howonokahi de ka yolomo.

³ Angamoi o Yahudi ma nyawa yomahibohono ato nako ko yomaihoruahi hoka manga totofora yahibehehongoka, gea yato yahowonoka Ma Jouika ho ko yolomuahi. De o Yahudi ma nyawa gea abe yahiromanga o Farisi ma nyawa, ka onangohi duru aniiki manga bohono gea.

⁴ De yomahibohonoli abe nako o paharoka aika de yolioino naga manga bohono abe totokia kiani yomaihorokahi de ahao ka idadi yolomo. De manga bohono utuoli naga ma ngoe abe totokia kiani yomagihoro manga kiahonanga abe yapake la yohakai de yolomo, ho manga akere ma ngi, manga dodai, de manga borongko duru ihidodiai aihoro imaketero hoka manga bohono ma hiaturu abe manga totoforaino ato kiani aihoro.

⁵ Ho gea ma titi hiadono o Farisi ma nyawa de ona abe yotobadoto-dotoko o Musa ai Paretaino gea yoboaino o Yesusino de iwileha Unangika yato, “Adodoa ho ininii-niiki ko aniikua nanga pareta nanga baluhino ho hiadono yolomo de ko yomaihorikaua abe hoka nanga balu-baluhino inadotokoka?”

⁶ De o Yesusu wapaluhu onangika wato, “Naga moi Ma Jou ai demo abe atulihuku ma dodihiraino abe winihitaana ngini naa. Abe to Una ai uru ma dodofanga o Yesaya wohitulihuku ai demo gea ma titi ngini naa abe nimadokangeluku dika, wato, ‘O nyawa naa ngaro ato ihihoromati Ngohino, Masara manga horomati ka manga uruoka dika, De manga hiningaka duru ihiporetika.

⁷ Parahaja dika abe yomahuba-huba Ngohino, Angamoi ka o pareta o nyawaino dika abe yotobadotoko, masara gea ihiromanga ato Ma Jou ai demo de ai dodotoko o nyawaika.’” Hokogea o Yesusu wahiree-reeika o Yesaya ai demo onangika de ahao wotemoli onangika wato,

⁸ “De gea Ma Jou wagoungu, ngini naa to Una ai pareta duru ma ngoe niaparihika dika la gea nianiiki ka nia boho-bohono abe o pareta o nyawaino dika.” Hokogea o Yesusu wotemo.

⁹ De o Yesusu wataeroli o Farisi ma nyawaika de onangika abe yotobadoto-dotoko o Musa ai Paretaino gea wato, “Ngini naa duru nisosawaro e? Ngaro nia demoino de nimahingahu abe Ma Jou ai Pareta nianiiki, masara abe igoungu to Una ai pareta niaoluku la gea ti ngini dika nia bohono niatobaniiki!

¹⁰ Abe ma titi ngini hokonaa nidiai. Ma dihirainohi de o Musa wotemoka, wato, ‘Nia baba de nia meme kiani niao irahai’ de wotemoli wato, ‘Onagona dika abe yangelo manga babaika eko manga memeika de manga demo ma dorou, ona gea kiani yohonenge, de manga hohowono gea itiai.’ Hokogea Ma Jou ai Pareta.

¹¹ Masara ngini nihikawalimi ai demo gea abe ninadotoko ngoneino niato o pareta o Musaino gea ngaro ko hohingounua haniiki masara ko adodoaua. Ngini ninadotoko niato ka idadi hotemo nanga baba de nanga memeika hokonaa hato, ‘Iya ahi Baba de ngohi Meme tomahilooa e? Igoungu, naga o Musa ai Pareta ato kiani tiniao irahai masara naa tomahidoakoka Ma Jouika ho Una dika tileleani. Ho ngaro naga o duduhunu tato tinihidoaka nginika masara o duduhunu ngohino gea ko niamakeokauali angamoi naa Ma Jou dika tileleani. Ho ahi duduhunu ko iwaka nginika, tihidoakoka Ma Jouika.’ Hokogea ti ngini nia dodotoko abe niato o totiai niadotoko o nyawaika.

^12-13 Masara ka de niadotoko hokogea o nyawaika de niato ngaro ko yaduhunua manga baba de manga memeika ma ko adodoaua, ko iwa ma howono. Hokogea Ma Jou ai Demo-demo nihitipokouku, de ti ngini nia bohono niagorakiye. De naga Ma Jou ai Demo-demo utuoli ma ngoe nihitipokouku abe ti ngini nia hirahi genangohi niato kiani nianiiki.”

¹⁴ De ahao o nyawa ko manga ngoe genangoka o Yesusu wahokoli Unangino de onangika wotemo wato, “Ngohi tinidotoko moi nginika ho ngini mata-mata niatotoihene la duru nihioriki ma titi ahi demo naa.

¹⁵ Ko ma iwa o peseke abe ma hoanino de o nyawa manga badanguku iwohamuku de yadiai la ma nyawa yahowonoka Ma Jou ai himangoka. Masara naga ma peseke abe manga hiningaino ihupu, de ena gea ma titi hiadono o nyawa ko yotebinokaua Ma Jou ai himangoka.

¹⁶ [Ho onagona dika de manga ngaukoka kiani yotoihene.]”

¹⁷ De ahao o Yesusu wanoaika o nyawa manga ngoe gea de wowohamoka ma tau ma goronaika, de genangoka iwinii-niiki iwilehali ato, “Ani dodotoko ma demo kangano gea ma titi totokia?”

¹⁸ De o Yesusu wapaluhu onangika wato, “Mode nginioo ko nihiorikua ahi dodotoko gea ma titi? Ko nihiorikuahi abe o kia-kia dika ma hoanino de iwohamika o nyawa manga badangoka de ko genanginoua ma titi hiadono ona yopeseke Ma Jou ai himangoka?

¹⁹ Abe ena gea ko inahipesekua Ma Jouika, angamoi o inomo ko itulua nanga hiningaika masara ka igila-gila nanga pokoruku de ahao nanga badangoka ihupuokali.” Ho de ai demo-demoino naa o Yesusu wato ko iwa o inomo de ma bohonoka abe inahidadi la hahowonoka Ma Jouika.

²⁰ De o Yesusu ai hitararono wohigila-gila onangika hokonaa wato, “Abe ihupu o nyawa manga hiningaino gea ena abe yahipeseke de yahihowono Ma Jouika.

^21-22 Angamoi doka manga hiningaka ka ipuda ma dorou hoka yomakitigi irupa-rupa abe ko idadiua ho yomakitigi de o nyawa abe ko manga fekatua eko manga rokatua. De naga manga dorou utu hoka o doma, de o dohiki, de o horoodo, de o dorou yolingiri la o nyawa yahikangela. De nagali o budi, de o hohedu, de o doa-doana, de o sade, de o daleana, de manga hininga yosafarune, de naga yahipareta manga badanga ma hafini duru ko itiaiua dika abe o kia dika de ka yodutulaka, de ngaro yobodo ma ato yomanoa o dararonoka.

²³ De gea mata-mata ma datoro ma dorou ka o nyawa manga hiningaino dika ipuda ho gea hiadono yahihowono Ma Jouika.”

Momatengo ko o Yahudi ma nyawaua de o Yesusu womiduhunu

²⁴ De ipaha de wosobo o Yesusu de woiki o Tirusu ma tonakika. Genangoka naga o tau moi de Una wowohamika masara wato womatohiki wowohama la ufa o nyawa iwihioriki Una naga. Masara ko idadiua womagogono angamoi o nyawa iwihiorikoka.

²⁵ Ho ka de woboa ma tauino gea de naga o ngofeka momatengo moboa Unangino ma titi ngomi ora imikokitokata de migihenoka ma titi abe o Yesusu woboa genangino. Ho, moboa Unangino de momamotumuku ai louoka.

^26-27 Momamotumuku ai louoka de duru mogahoko mato, “Ahi Baluhu, duru togahoko la ma tokata abe naga ngohi ora ami badangoka gea natitoko munangoka de aino.” Masara o ngofeka gea muna ko o Yahudi ma nyawaua, de o Yesusu Una o Yahudi ma nyawa. Masara muna gea o Fenisia ma tonakoka de maino moboa, abe gea o Asuru ma tonaka ma honongaka, de gea imihiromanga o Asuru ma nyawa. De o Yahudi ma nyawa ona ko yomaketedodiawoua de o Asuru ma nyawa abe ko yaigoua onangika. Ho o Yesusu ma oraha womipaluhu de wahiketero abe ona ko o Yahudi ma nyawaua wahiromanga o kaho. Ho womipaluhu wato, “Hobata, tomahilooa, ma kiani ma ngofa-ngofaka ona yohira yahiolomo. Ko idadiua o ngofa-ngofaka manga inomo genangino yagoraka de yododutumoika o kaho-kahoika. Ho gea Ngohi tato kiani o Yahudi ma nyawa tatihira abe taleleani.”

²⁸ De mogahokoli Unangika mato, “Ahi Baluhu, igoungu, masara ngaro o kaho, masara o ngofa-ngofaka manga inomo ma hou naga utu o mejaka de auku itifa-tifauku de gea ena ngomi o kaho ka idadi miaolomo.”

²⁹ Hokogea motemo ho womipaluhu wato, “Duru nagoungu, de mangale ani bobaluhu gea ho ngonaoo ka idadi toniduhunu. Ho naa Ngohi tonihingahu abe ma oraha naa naga de tohititokoka ma tokata gea, ho ka idadi noliohi de nomitutumohi ngoni ora.”

³⁰ Ho muna moihene ai demo gea de mosoboka, de molio ami tauika mato ngomi ora momilegahi. De momahiadonoka de ngomi ora momimake momaiduoka morii-riidi dika ami koioka, de igoungu ma tokata gea iminoaka. Marai hokogea dika aika ma oraha imikokitokata ami ade-ade.

Womatengo womou de o Yesusu wihitogumu

³¹ De ipaha de o Yesusu wosoboli, abe o Tirusu ma tonaka gea wanoaka de woiki wohidotobiki o Sidono ma tonaka de ahao wogila-gila abe ai dumutu o Galilea ma akere ma ngootika. De ipahaino de womahiadono ma akere ma ngootika gea, de ma tonaka genangoka ihiromanga o Kapongo Ngimoi ma tonaka.

³² De genangoka naga womatengo o nauru iwihiboaino womou abe iwitotopongono de wotemo-temoo ko itararonua. De iwihiboaino Unangino de duru yogaho-gahoko la ka idadi o Yesusu wiso.

³³ De o Yesusu o nyawa manga ngoe-ngoeino wihihupu la ma hohutulu yatingakika, de ahao ai giama ma hagaraara arihononga gea wohiso-soika abe womou ai ngaukika. Ipaha de ahao o Yesusu waobiruku ai giama ma hoatuku, de ai kibiri gea wihialeme womou-mou ai akirika.

³⁴ Wihialeme ai kibiri de ahao o Yesusu womamatagaiye o Horogaiye de wowomaha waamo-amokiye de wotemo wato, “Naa totemo ani ngaukika ho ko initopongonokaua.” Abe gea wotemo de to Yahudi manga demo ho wato, “Efaata!”

³⁵ Ka de wotemo ibooto de una gea woihenoka, de ai akiroo ma dudumungu ko iwaka, ho genangoka de aino imulaengoka wotemo-temo itararonoka.

³⁶ De wihitogumu ipaha de ahao o Yesusu wahibehehongo manga ngoe-ngoeika gea wato, “Ho naa idadioka, ho ufa nihingahu-ngahu o nyawa utuika.” Masara ngaro hokokia ma ngoe wohigali-gali wahibehehongo onangika, masara ona ka ihikaika ihidogo-dogo ihingahu-ngahu.

³⁷ De o nyawa manga ngoe-ngoe genangoka duru yokokiheranga de yomakoketemo yato, “Abeika adoo! Una naa ngaro o kia dika ma wakunu wodiai irahai. Ngaro o nyawa yatotopongono ma wakunu wahitogumu la ka idadi yomahiihenoli. De ngaro yomou-mouoo ma Una wodiai la yotemo-temoli.” Hokogea womou-mou ai ade-ade.