Maruku 16 - Ma Jou ai Demo-demo o Totobelohoka

O Yesusu ai momomiki ma ade-ade

¹ De ipaha o Hiaini ma futuku de o ngo Maria Madalena, de momatengo o ngo Maria gea to Yakobusu ngoi meme, de o ngo Salome, ona yaruange yomakiniiki yoija o minya abe ma bounu duru ma hohailoa. Abe ma ngofeka yaruange gea ato yoiki o Yesusu ai lungunika la ai honenguku iwihituagi abe hoka manga biaha yotobadiai o nyawa manga honengika.

² De ma dawangeino abe o Gareja ma wange, abe ma wange ahao ipotokaiha de ona yaruange yosoboka ato ai lungunika yoiki.

³ De manga dodagi ma goronaka de yomakokeleha ato, “Ei, done ka onagona alulu ma hakaru gea abe ma lungunu ma bionoka ihitatokika? Angamoi nako ka ngone, ko hakunua halulu.”

⁴ De yomahiadonika o lungunoka de amake ma hakaru kohaamoko gea iluluokau.

⁵ De ahao yowohamika o lungunoka de naga iwimake womatengo abe ka o goduuruohi wogogeruku manga nirakoka, de to una ai baju duru iarehe. De o ngo-ngofeka gea duru yatodokana.

⁶ Masara una wotemo onangika wato, “Ufa nihawana angamoi ngohi tohiorikoka ngini niwilingiri o Yesusu o Nasarete ma nyawa, abe Una gea iwihohonengoka o gota isosalioainoka. Niwilingiri naangoka masara Una gea womomikoka! Abeika ai dingii o kiaka iwikelengauku, Una ko iwiwa nenangoka.

⁷ De ngini naa kiani niloikohi de niahingahu iwinii-niikika de o Peturusikaoo niwihingahu de niato, ‘O Yesusu Una gea wohiraka o Galilea ma tonakika, ho ahao niwihiduruika la genangoka de ahao nimakamakeoli de Una. Angamoi Una wohiraka abe imaketero hoka ma dihiraino winihibehehongoka.’”

⁸ De o ngo-ngofeka gea ma lungunino yohupu de yolio de duru yomapopaata angamoi duru yokokihawanoka hiadono yolilifanga. De ona abe manga dodagi ma goronaka de yomakamake, ona gea ko yahingahua ma titi manga hawana ma amoko gea.

GENANGINO MA BOBAHA ABE O MARUKU WOTULIHI O ABARI MA RORAHAI HO NAA MARAI KO O MARUKUA WOTULIHI MA HIDOGO NAA ABE NENANGOKA DE IMAHIKAUKU O Yesusu womahimatoko o ngo Maria Madalenaika

⁹ Ho o Gareja ma wange ma ngoru-ngorumino gea de o Yesusu womomikoka ai honengino. De womomiki ipaha de womahimatoko ma ngoe, masara ihira womahimatoko o ngo Maria Madalenaika. Abe muna ma dihira o Yesusu wohititoko o tokata tumidi munangino.

¹⁰ Ho naa muna o Yesusu mimakeoka ho o Yesusu ai dodiawoika moiki la mato onangika mahingahu. De onangika maadono de duru manga hininga ka ihuhahi de duru yoari-ari.

¹¹ De gea mahingahu onangika mato, “O Yesusu Una wowangoli! Ahao kangano ngohi timake!” Masara ami demo gea o Yesusu ai dodiawo ko yongakua.

O Yesusu womahimatokoli yahinootoika

¹² De ahao o Yesusu womahimatokoli ai dodiawo yahinootoikali. Abe ai dodiawo yahinooto gea, ona yohupuoka ma kotaino ho yoiki ma hoanika. De manga dodagi ma goronaka de o Yesusu womahimatoko onangika, masara iwimake hoka o nyawa moioli, abe ai rupa hoka ma dihiraua.

¹³ De womahimatoko ibooto de onangoo yolio de onangoo yoiki yahingahu o Yesusu ai dodiawoika ato, “Ngomi ahao naa wiwimake o Yesusu!” Masara manga demo to onangoo ma ko yangakua.

O Yesusu wahibehehongo iwinii-niikika

¹⁴ De ipahaino de o Yesusu womahimatokoli abe iwinii-niiki yangimoi de yamoiika. Abe ona gea yolomo manga gogiriaka de onangika womahimatoko de wataere wato, “Ngini naa marai nia ngongaku ikuranga. De adodoa ho kangano manga demo ko niangakua abe ma titi Ngohi tomomikoka? Abe ona ihimake de inihingahu ma gea ngini ko niodafongua. Maraioka ngini nia pea ka itogowinohi, e?”

¹⁵ De wataere ibooto de ahao onangika wahibehehongo wato, “Ngini naa kiani niloiki o dunia ma amokika de niahingahu-ngahu o Abari ma Rorahai naa o nyawa mata-mataika.

¹⁶ De onagona dika abe yongaku de yaohiki, ona gea Ma Jou wahihoheoka manga hohowonino. Masara ona gea abe ko yongakua, ona gea ahao Ma Jou wahohowono.

¹⁷ Abe ona ihingaku-ngaku, ona gea ahao o dodunguu irupa-rupa tahidoaka onangika. Abe ona yakunu ihitito-titoko o tokata ma dorou o nyawaino abe ma titi ahi romanga yafetongo. De nagali abe ona ihingaku-ngaku de yakunu yotemo-temo o nyawa manga demo, abe ko to onangua manga demo.

¹⁸ De nagali abe ngaro o dodiha yagoraka eko o akere yarasonguku de yaokere, ma ko yadodoaua. De onangoka naga manga dodunguu moioli, abe nako naga o nyawa yopopanyakeuku de ihingaku-ngaku yafokumu onangika de ona gea ahao yakunu yahitogumu manga popanyakeino.” Hokogea o Yesusu ai behehongo iwinii-niikika.

O Yesusu wogoraka daku o Horogaiye

¹⁹ De nanga Baluhu idodutu o Yesusu hokogea wahibehehongo de ahao iwigoraka daku o Horogaiye. De daku o Horogaka de o Yesusu wogogeruku Ma Jou o Baba ai nirakoka la yomakutuono yahikoano mata-mataika.

²⁰ De wigoraka ibooto de ahao o Yesusu iwinii-niiki ona yoiki yahingahu-ngahu o Abari ma Rorahai o dunia ma amokika. De abe ona yahingahu-ngahu manga gogiriaka de ona gea ka ihikaika nanga Baluhu idodutu waduhunu abe manga hingahu gea wahitaana de ma dodunguu. Abe ona o Yesusu wahiakunu la ka akunu o heheranga ma dodunguu gea yodiai o nyawa manga hima-himangoka.