Maruku 15 - Ma Jou ai Demo-demo o Totobelohoka

O Pilatusika iwiao o Yesusu

¹ De ma dawangeino abe duru o ngoru-ngorumino de ona yotobauru-urusu o nyawa yongodumoka yomatoomuinoka. Abe manga doomuoka gea naga o hidemo Ma Jouiye manga hohidimono, de ona abe yotobadoto-dotoko o Musa ai Paretaino, de o Yahudi ma nyawa manga balu-baluhu, onangoo mata-mata genangoka. De yomatoomuinoka la yomahikaaturu la ato hokokia o Yesusu iwiurusu. De ipaha aputuhoka de o Yesusu iwipaki-pakitoka de iwiaoika womatengoika abe una o popareta moi duru wokurutiye ma propinsioka gea, abe una ai romanga o Pilatusu.

² De iwihiadonika o Pilatusoka de ahao o Pilatusu wileha o Yesusika wato, “Sarakia, Ngona naa igoungu o Yahudioka manga koano?” De wipaluhu wato, “Abe ngona ma hirete nohihiromanga hokogea.”

³ De ahao o hidemo ma nyawa Ma Jouiye manga hohidimono ona duru iwitae-tae o Yesusika.

⁴ De o Pilatusu moioli wileha wato, “Abeika gea ma ngoeoka initae-tae masara Ngona ka nomarii-riidoka dika. Done sarakia ma titi Ngonaka ho hiadono ko nomademoua?”

⁵ Masara o Yesusu ma moioo de ko wopaluhua, hiadono o Pilatusu duru wiheranga.

⁶ De o Pilatusu ai hirahi naga abe o tao-taongiye nako o Totilakuru ma rame-rame adonoka de ka idadi o nyawa yomatengo wahihupu abe o bui ma tauoka de aino. De gea o Pilatusu wahigunoa o Yahudi ma nyawa yairiki, de onagona dika yairi-iriki, ona gea ahao wahihupu o bui ma tauino.

⁷ De ma oraha gea o bui ma tau ma goronaka naga womatengo ai romanga o Barabasa, abe una gea de ai dodiawo yotobadodiai o kokangamo manga poparetaika. De nengokadau abe manga popareta yalawana ma gogiriaka de o nyawa watomaka o Barabasa.

⁸ Ho ma oraha o Pilatusu wileha-leha o Yesusika de naga o nyawa yowoe-woe yokokiboaino o Pilatusino. Yoboaino de yogahoko unangika ato, “Kiani o nyawa moi nahihupu o bui ma tauino abe hoka ani biaha o Totilakuru ma rame-rameoka de o nyawa nahitobahupu.”

⁹ De o Pilatusu waleha ai kokawaahaika wato, “Ho ngini sarakia? O taongo naa de onagona tahihupu? Bote koaho ti ngini o Yahudioka nia koano tihihupu nginika?”

¹⁰ Hokogea wotemo o Pilatusu yowoe-woeika angamoi una wato wahigaro la hiadono ona yogahoko la o Yesusu wihihupu. Abe o Pilatusu wohiorikoka abe ona o hidemo Ma Jouiye manga hohidimono de ona iwitaleana o Yesusika ho gea dika ma titi ho hiadono ona iwihidoaka o Pilatusino. Ho una woigo wahigaro ai kokawaaha gea la ona yalawana manga hohidimono manga hidee o Yesusika.

¹¹ Masara manga hohidimono gea duru yakokidotokokau ho yahigaro manga kokawaahaika la ato ufa o Yesusu wihihupu masara ato o Barabasa dika wihihupu. Ho ma kokawaaha yopoa-poaka ato, “O Barabasa dika nihihupu ngomino!”

¹² Ka de woihene gea de o Pilatusu wotemoli ai kokawaahaika wato, “Nako hokogea o kia todiai Unangika abe niwihiromanga o Yahudioka nia Koano?”

¹³ De ona gea ka yopoa-poakiye ato, “Niwihohonenge dika! Niwihidapakuika o gota isosalioaika dika!”

¹⁴ De o Pilatusu walehali onangika wato, “Adodoa ho hokogea nihihuloko Unangika todiai? Mode o pareta o kia de watilakuru?” Masara ai kokawaaha ka yodogo-dogoli yopoa-poaka ato, “Niwihohonenge! Niwihidapakuika dika o gota isosalioainoka!”

¹⁵ De gea o Pilatusu waputuhoka la wato wahisanangi ai kokawaahaika, ho wadomoteke dika ho wihihupu o Barabasa onangika. De wahuloko ho o Yesusu iwihipoha-pohakahi de o hohonenge ma boboha de ahao wahigunoa la iwihidapaku o gota isosalioaika.

O Roma ma tentara iwimia-mia o Yesusu

¹⁶ De ahao o Roma ma tentara o Yesusu iwiaoika o Pilatusu ai tau ma goronaika de genangoka manga dodiawo mata-mata yakokiahokino abe o tentara o doomu moi.

¹⁷ De ahao moi o baju ma wuu-wuu duru ma rorahai abe manga biaha o kokoano yomahinoa-noa de ena gea iwihinoauku o Yesusuku de iwimia-mia ato, “Naa ani baju, koano!” De ahao aleino o gumi-gumini de ma hihikaka de agale-galeino de iwihinoauku ai peauku de iwimia-miali ato, “Ani koano ma sapeo naa minihinoauku!”

¹⁸ De iwihinoauku de ahao ka iwimia-miahi ato, “Abeika o Yahudioka manga koano! Ngomi duru minigahoko ma owa ngonaika!”

¹⁹ De ona mata-mata yomakokawalimi iwimia-mia irupa-rupa. Naga utu iwihipoha-poha de manga tutukunu ai peauku, de utuoli iwiobiri, de naga utuoli atotilabukuku ai himangoka abe ma rupa hoka yomahuba Unangika ma gea ka iwimia-mia dika.

²⁰ De iwimia-mia ibooto de ahao ma baju ma wuu-wuu ma rorahai gea ahuputoka de iwihinoaukuoli to Una ai baju. De ahao manga tentara gea iwiaoika o Yesusu la ato iwihidapaku o gota isosalioaika.

O Yesusu iwihidapakuika o gota isosalioaika

²¹ De o Yesusu manga gogiriaka iwiao abe o Yerusaleeme ma kotaino yohupu de naga yomakamakeika o ngekomo ma goronaka naga womatengo. De gea una o Kirene ma nyawa, de ai romanga o Simono, abe ai ngofa-ngofaka o Alesandere de o Rufusu. De yomakamake de tanu o Simono wato wogila-gila o kotaika wowohama, masara o Roma ma tentara iwihiribuutu la waniiki la o Yesusu ai gota isosalioaino wimoku.

²² De ahao o Yesusu iwihiadono ma ngiika abe ihiromanga o Gologota, abe ma romanga gea ma titi o nyawa manga pea ma kabelanga ma ngi.

²³ De yomahiadonikaka de ato o Yesusu iwihidoaka o angguru ma teongo ma gohaka abe ihikasapuroka de o muuru la ato ma odiri ikuranga, masara o Yesusu ka woluku wokere.

²⁴ De ahao o Yesusu iwihidapakuika o gota isosalioaika. Iwihidapakuika ibooto de manga tentara gea yomaketebobataru la ato ahao ihioriki hokokia yomahikodoku o Yesusu ai baju.

²⁵ De ma oraha o Yesusu iwihidapaku ahao o takoro hiwo abe o wange ko ikoronauahi.

²⁶ De dakea o gota isosalioainoka naga atulihika o hingahu ma demo. De tanu ma demoino de yahingahu manga howono o kia naga la hiadono ato yahohonenge, masara to Yesusu itemo ato, “O YAHUDI MA NYAWA MANGA KOANO.”

^27-28 De naga o nyawa ma dorou yahinooto o Yesusu ai arihonongaka de onangoo yahidapakuika ma manga gota yahiketehimomoi. De ona gea yahidapakuika de ahao o Yesusu manga hidogoronaka.

²⁹ De naga o nyawa manga ngoe yoboa de ma oraha iwitilakuru o Yesusu ai himangino de manga pea alenge-lenge de iwihohedu de manga demo. Abe ona ato, “Ei, abe Ngona gea notemoka nato ahao Ma Jou ai Tau nakilianga de o wange hangeino dika ma dekana de nohigokokali,

³⁰ ho abeika nomaduhunu nouti nenanguku abe o gota isosalioauku gea.”

³¹ De o hidemo ma nyawa Ma Jouiye manga hohidimono, de ona abe yotobadoto-dotoko o Musa ai Paretaino, onangoo mata-mata iwihohedu abe yomakoketemo ato, “Masara o nyawa utu ka idadi waduhunu masara nako de Una ma hirete ko wakunua womaduhunu.”

³² De ka iwimia-miakali ato, “Ei, Mesia, o Isiraeloka nanga Koano, abeika nouti nenanguku o gota isosalioauku la gea minimake abe Ngona noutioka de ahao miningaku.” De ona yahinooto abe yahidapakuika ai arihonongaka onangoo iwihohedu Unangika.

³³ De o wange ikorona abe o takoro ngimoi de hinooto de o tonaka gea mata-mataika duru ifufutu hiadono o wange ikumurukiha abe o takoro hangeino.

³⁴ De adonoka o takoro hange de duru ma oraha gea o Yesusu wopoaka de ai ilingi duru kohaamokiye wato, “Eloi, Eloi, lema sabatani!” Abe ai demo gea ma titi, “Ahi Jou, ahi Jou, adodoa ho nohinoaika Ngohi?”

³⁵ De naga o nyawa yamuruono naga abe ai demo gea yoihene ihowono de yomakoketemo ato, “Abeika, niihene, Una wiahoko o Elia!”

³⁶ De womatengo womapopaata de o pahi ma diburu o fara moi wale abe ka idadi o akere ahiihi de watonoka o angguru ma suka-sukauku de ahao watobeika de o gota de wihitaanaiye o Yesusu ai uruiye. De wihitaanaiye ibooto de ahao ai dodiawoika wataere wato, “Abeika ibootohi hiruwae, la ka hilega-lega dika, boteua de done o Elia woboa de o gotauku naa wihiguti.”

³⁷ De ahao o Yesusu ka wopoaka waamokiye de gea ai ngomaha itoakoka.

³⁸ De abe duru ma oraha o Yesusu ai ngomaha itoakoka de doka o kota ma goronaka abe Ma Jou ai Tau ma goronaka de o ngoere ma biri-birini ikakihi daku ma barenoka de auku hiadono dau ma barenuku, ho gea ipelaka hinootoka.

³⁹ De naa abe o Yesusu ai gota isosalioainoka nagali womatengo abe o Roma manga tentara manga baluhu abe ai kokawaaha yaratuhu moi, ho unangoo naga o Yesusu ai gotaka. De una wimake o Yesusu hokokia wohonenge de wotemo wato, “Duru igou-goungu Una gea to Ma Jou ai Ngofaka.”

⁴⁰ De o ngo-ngofekaoo yamuruono naga genangoka ma hatoli yokurutika de iwilega-lega o Yesusu ma oraha gea iwihohonenge. De naga manga doomuoka gea o ngo Maria Madalena de naga o ngo Maria abe to Yakobusu ai dodipokouku de to Yosese manga meme, de momatengoli naga o ngo Salome.

⁴¹ O ngofeka yaruange gea ma dihira abe o Yesusu wotagi-tagi wadoto-dotoko o Galilea ma tonakoka de ona iwinii-niiki de iwitobaleleani. De manga doomuoka gea o ngo-ngofeka utuoli naga manga ngoe, de ona gea yoturuino iwiniiki o Yesusu abe woboa o Yerusaleemino. Ho ona mata-mata naga iwilega-lega abe ma oraha gea o Yesusu iwihohonenge.

O Yesusu ai honenge iwikelengaika o aruku ma goronaka

⁴² De angamoi itebini de o Hiaini ma wange adonoka ho de ma wange ilobioka de o Yahudi ma nyawa kiani yomahidiaioka.

⁴³ De naga womatengo o Arimateaino ma nyawa de gea ai romanga o Yusupu. Abe o Yahudi ma nyawa manga hohidimono yotobauru-urusu o nyawa manga howono, de manga doomuino gea una hatoli wokurutiye o Yusupu. De una gea duru wongano-nganono abe ma oraha ahao Ma Jou wahikoano o nyawa. Ho naa o wange ilobioka de una gea womatotomoroini woiki o Pilatusika de wogahoko o Yesusu ai honenge.

⁴⁴ De o Pilatusu woheranga de wotemo wato, “Ho, mode o Yesusu wohonengokau? Naa ko wotedekanuahi abe iwihidapakuika.” De una wiahokino abe o tentara manga baluhu womatengo de wileha wato, “Sarakia, igoungu o Yesusu wohonengoka?”

⁴⁵ De una wipaluhu wato, “Igoungu, Una gea wohonengoka.” De ahao o Pilatusu witemoli o Yusupika wato, “Iya, nako hokogea, ka idadi ai honenge nale.”

⁴⁶ De o Yusupu wosobo de woiki woija moi o ngoere abe ma lawe duru ma alu-aluhu de ahao o Yesusu ai gotaika woiki. De waika de o Yesusu ai honenge wihiguti o gota isosalioauku de duru wihirako de o ngoere ma rorahai gea. De wihirako ibooto de ai honenge wiao o lungunika abe ma dihiraino de afaitoka o hakaruika. Ho ma lungunika gea wihingohamika. De wikelengauku genangoka de o hakaru moi ma amo-amoko waluluika la o lungunu ma biono wohitatokoka.

⁴⁷ De naga o ngo Maria Madalena de nagali o ngo Maria abe to Yosese ngoi meme, abe ona gea yahinooto yalega-lega ho ihioriki o kiaka o Yesusu iwikelenga.