Maruku 13 - Ma Jou ai Demo-demo o Totobelohoka

O Yesusu wahingahu iwinii-niikika abe o kangela ahao idadi

¹ De ipaha de o Yesusu de iwinii-niiki Ma Jou ai Tau ma loaka de yosobo, de womatengo iwinii-niikino witemo wato, “Guru, abeika ma hohailoa ma tau mata-mata naa abe hohidefetongo Ma Jou ai Tau, de abeika o hakaru hokogea ma ago-agomo abe genangino yodiai Ma Jou ai Tau. Duru ma rorahai!”

² De o Yesusu wihitararono wato, “Igoungu, masara naa tonihingahu ma titi Ma Jou ai Tau naa. Ika-ika de to ena ma hakaru gea ko imaritabiokaua, angamoi ma tau gea ikokikiliangoka.”

³ De wotemo ibooto de yogila-gila yohupu o Yerusaleemino de youtiuku ma dolaka, de ahao yodoali de yomahiadono o Saitunu ma lokuiye. De genangoka wogogeruku o Yesusu de wamake Ma Jou ai Tau doka ma dola ma honongaka. De o Peturusu, o Yakobusu, o Yohanese, de o Andareasa yaino Unangino la yamotoa dika de ahao iwileha ato,

⁴ “Mia Guru, abe kangano Ngona notemoka nato Ma Jou ai Tau gea duru ikokikiliangoka, gea ma titi o kia? Muruonoka de ahao idadi Ma Jou ai Tauika? De ma dodunguu o kia abe ahao idadi la miamake de genangino mihioriki abe itigioka ma karusaka gea?”

⁵ De o Yesusu wapaluhu de wahitararono onangika ma titi ma dodunguu o kia abe ahao idadi ma oraha o dunia ma bobaha itigioka. De ai bobaluhu onangika hatoli ikurutu, de womulaenge wapaluhu onangika hokonaa, wato, “Igoungu, ahao ma baha ko adonuahi de naga idadioka ma dodunguu. Ho ngini kiani ka ihikaika nimaagoana la ufa o nyawa inibudi abe ona ato, ‘Naa itigioka o dunia ma bobaha.’

⁶ Angamoi ahao o nyawa manga ngoe yoboa de ona gea yomahingahu-ngahu ato, ‘Ngohi naa nia Mesia, nia Koano abe ma dodihiraka Ma Jou winihibehehongoka.’ Hokogea yomahingahu angamoi inihioriki abe ngini nia koano gea niwidodamaa la nako woboaka, gea nihioriki o dunia ma bobaha itigioka. De ona gea ma titi manga hingahu ma demoino hiadono o nyawa manga ngoeika ahao yabudi hiadono yafikiri ato ma bobaha adonoka. Masara ngini naa ufa inibudi.

⁷ Angamoi ahao naga ma ngoe idadiohi masara gea ma baha ko adonuahi. Abe hoka ngini ahao niihene o parangi manga gigoro itigi-tigino de utu ahao naga inihingahu ma titi o nyawa manga gurutika de yomaketeparangi, de gea ngaro ufa dika de nihawana. Igoungu gea kiani idadi, masara nako gea, ko ma titiua ma baha adonoka.

⁸ De o nyawa yomahikapongo moi de manga musu yomaketeparangi, eko o nuuhu hinooto de yomakumusu. De ma oraha gea o tonaka idadi ihikelu-kelu ma ngoe, de o tonaka utuoli o nyawa ko manga ngoe yohonenge angamoi naga o hafini ma amoko. Masara gea mata-mata ka ma lifunu dika, de ka idadi hohiketero abe o ngofeka momatengo abe ami gahe itigioka ho hiadono ami pokoroka naga igoli-goli. De ino-ino de utuohi idogo ami kangela. De gea imaketero abe nako utuohi itigi o dunia ma bobahaika, utuohi idogo ma kangela.”

⁹ De o Yesusu wahitararonohi wato, “Ngini kiani ka ihikaika nimaagoana, angamoi ahao o nyawa initae-tae de inihidoa-doaka nia hidimonika abe ona gea yotobauru-urusu o nyawa, de marai duru inipoha-poha nia dodotoko ma tau-tauoka. De nagali ahao o gogubernuuru de o kokoano manga hima-himangoka kiani nimaokoiye ma titi nihiniiki Ngohi, de gea ka idadi nimahingahu onangika ma titi nia ngongaku Ngohino.

¹⁰ Abe kiani o Abari ma Rorahai niahingahuokahi o nyawa mata-mataika o duniaka naa, de ahao ka idadi o dunia ma bobaha adonoka.”

¹¹ “De ahao nako initaokoka de inihidoakika yotobauru-urusika, gea ngaro ufa nihawana de nimatemo niato, ‘Adoo, ka o kia de ahao totemo onangika?’ Gea koua, masara ma oraha adonoka de o kia dika ipudaiye nia hiningaiye, gea nitemo dika, angamoi gea tanu ko nginiua nitemo, masara gea Ma Jou o Womaha wotemo de wapake nia uruino.”

¹² “De ma oraha gea nagali ahao idadi abe o nyawa manga ngoe manga tau-tauoka, ngaro yomahitaumoi ma, abe utu ko ihingakua yamusu abe ona ihingaku-ngakuika. Abe hoka o ria-dodoto yahinooto de womatengo abe ko wohingakua wikalaki ai ria-dodoto abe wohingakuoka Ngohino la o nyawa iwitoma. De hokogenangoli idadi abe hoka o ngofaka womatengo wohingaku masara ahao ai baba wihidoaka o nyawaika. De nagali o ngofa-ngofaka utuoli abe ko ihingakua de ahao yalawa-lawana manga meme de manga babaika abe ihingaku-ngakuoka de ka hiadono o nyawa yatoma manga dimono gea.

¹³ De ngini ahao o nyawa mata-mataika ka inidoha-dohatika ngini ma titi nidadioka to Ngohi ahi nyawa, masara onagona dika yomatotongohono hiadono o dunia ma bobahaika, ona gea ahao Ma Jou wahihohe manga kangelaino.”

¹⁴ “De naa moioli tinihingahu abe ahao idadi ma oraha gea. Abe naga moi ahao niamake de nia lako abe gea duru itotorou Ma Jou ai himangoka de gea imahigogere o ngi moioka abe duru ko idadiua iboa genangino. Iya, ahi demo gea kiani duru niongano-nganono la ka idadi niataoko ma titi. De ma oraha ma dodorou gea iboa genangino de niamake de nia lako, gea ahao ma baha itigioka, masara nagahi ma kokangela utu ahao iboaino. Ho ma oraha ma dodorou gea niamake de kiani ngini abe nigogere o Yudea ma tonakoka kiani nimataiti niloaroka o loku-lokuika done ma kokangela inihidotadaene nginika.

¹⁵ Abe nako ngini utu naga nia tau ma poretoka, ufa ka niwohamohi nia tau ma goronaika de niato, ‘Ahi kiahonanga ma hohutulu toleohi jai-jai.’ Gea ufa, ma kiani niloaroka dika ma loku-lokuika.

¹⁶ De ngini utu nako nia redioka ufa nilio de niato, ‘Ahi baju ma doduruuru dika toleohi.’ Masara ngini kiani nikokiloaroka la ufa hiadono o kokangela inihidotadaene.

¹⁷ De hiokoo manga kangela ma ago-agomo o ngo-ngofeka abe de manga bada-badangoka ma oraha gea de ngaro onangoo abe manga ngofa-ngofaka ma gogilau de ka yahuhuohi.

¹⁸ De kiani Ma Jouika nimagahoko la ma kokangela gea ko iboauahi abe ma oraha ma maata done duru nikangela niloara ma hoanika angamoi ma maata gea.

¹⁹ Abe ma oraha gea duru o kangela de o huha ma ngoe niaohana. De ngaro mata-mataika, masara ka ma oraha genangohi ma kokangela ilago-agomo. Abe duru ma dodihiraka abe Ma Jou wotobatulaada ka hiadono ma oraha naa, ko iwahi ma kangela hokogea ma amoko. De ma kangela gea ahao ipahaino, de duru ko iwakau hokogea ma kokangela idadi ka hiado-adonika.

²⁰ De tanu o kokangela ma oraha gea hatoli itedekana de o nyawa mata-mataika o duniaka naa ahao yahikokibinaahaka, masara Ma Jou ahao kiani o kokangela ma dekana wabatingi, wato, ‘Masara naga to Ngohi ahi nyawa abe duru tasanangi onangika, ho naa o kokangela ma dekana tabatingoka la tato ufa ahi nyawa gea yokokihonenge.’”

²¹ De o Yesusu wogila-gila de ai bobaluhu wato, “De ma oraha gea nako naga o nyawa inihigaro ato, ‘Abeika ngini niwilega unangika gea! Gea una nanga Koano abe Ma Jou wonahibehehongoka!’ eko utu ato, ‘Gea una abe dokena, una gea woboaka!’ De ngaro hokogea inihigaro masara manga demo gea ufa ningaku!

²² Angamoi naga manga ngoe ahao yoboaino de yomahiromanga ato, ‘Ngohi naa ma Koano abe Ma Jou winihibehehongoka,’ eko utu ato, ‘Ngohi naa Ma Jou ai uru ma dodofanga,’ masara ona gea yotobabudi dika, ko yagou-goungua. De ona gea o heheranga ma ngoe ka idadi yahimatoko o nyawaika la ato yomahitaana abe manga dodunguu gea Ma Jouoka de aino. Gea yodiai la ato o nyawa yabudi, de tanu yoigo ato Ma Jou ai nyawaikaoo yabudi, masara gea ko adadiua yabudi onangika.”

²³ “Ho naa mata-mata tinihingahuoka la ngini nihioriki abe ma dodunguu o kia ahao idadi ma oraha o dunia ma bobaha itigioka. Ho nako ma dodunguu gea ko idadiuahi, ufa o nyawa inibudi la hiadono niataoko abe ma bobaha gea adonoka. Ho naa tinihitiari tato ngini kiani ka ihikaika nimaagoana done inibudi ma titi o dunia ma bobaha!”

O Nyawa ma Ngofaka muruonoka de ahao woboali

²⁴ De ahao o Yesusu wahitararonohi yaruatika abe ma titi o kokangela gea ipahaikahi de ahao nagali o kia idadi. Una wato, “Masara o kokangela gea ipahaino de ahao ‘O wange idadi ifufutuoka de o mede ko ihitararonokaua o duniauku,

²⁵ de o muru-murumu daku ma hoanoka de auku iota-otaka. Gea ma titi daku ma hoanino ma kiahonanga mata-mata ihikelu-kelu hiadono ma dodagi ko itiaiokaua.’”

²⁶ “De ma oraha gea ahao o nyawa ihimake Ngohi, o Nyawa ma Ngofaka, abe ma oraha gea toboa naga o lobi-lobi ma goronaka. De gea Ngohi naga de ahi kuahaka duru ilamoko de ahi medebini ma dararono enangoo duru ilamoko, de gea mata-mata ahao o nyawa amake de manga lako.

²⁷ De gea ipaha de ahi momalaekata tahidingoto o dunia ma amokika la gea ahi nyawa mata-mata abe duru tasanangi onangika, ona gea ka idadi yatoomuino o dunia ma lokuoka mata-mataino de yakokiaoino Ngohino.”

²⁸ “Abeika tohiketero. Nako o gogilioro ma gota, ka idadi genangino homadotoko, e? Abe nako ma jaga-jaga iboleoka de ihokaka, gea ka de hamake de hohiorikoka hato, ‘O, marai itigioka o hiwara ma oraha, angamoi hamakeoka ma dodunguu de.’

²⁹ De gea imaketero hoka o kangela ma dodunguu mata-mata abe tinihingahuokau kangano. Nako ma dodunguu gea hiadono niamake idadioka, gea ka idadi nimatemo niato, ‘O, marai duru itigioka ai gahe abe wohibehehongo wato ahao woboali.’”

³⁰ “De naa moi tagou-goungu tinihingahu. Abe ma dodunguu tinihingahuoka naa, gea mata-mata, abe ngaro ma dodunguu ihira-hira ka hiadono ma dodunguu duru itoturuino, masara gea mata-mata ko itedekanokaua de idadioka. Abe ma titi nako o nyawa yowango ma oraha naa naga, ona utu ko yohonenguahi de yadaene mata-mata ma dodunguu de ma kokangela gea.

³¹ De mangale ma titi to Ngohi ahi demo-demo duru ko iwa ma baha, ho ka idadi nihioriki abe gea ahi demo nginika duru igou-goungu ka hiado-adonika. Angamoi ahao naga ma oraha abe igoungu o dunia naa de o dihangoo duru ko iwaka, masara ahi demo-demo duru itongohono ka hiado-adonika.”

³² “Masara abe ma titi Ngohi ahao toboali, duru ko moiua de ihioriki abe ma wange o kia eko ma takoro muruono de toboa. De ngaro o momalaekatoo daku o Horogaka ma ko ihiorikua. De ngaro Ngohioo ma ko tohiorikua ahi gahe. Duga-duga Ma Jou o Baba dika, Una wohioriki.

³³ Ho kiani ka ihikaika nimaagoana de ufa ka inikiookohi o howonika, angamoi nginioo ma ko nihiorikua ahi gahe gea.”

³⁴ “De gea imaketero hoka o tau ma dutu womatengo abe wato woikohi ma gurutika. Ma oraha itigioka wosobo de ai huhuloko wahitagongo hokonaa de hokonaa ma karajaanga, de una ma ngorana wotobagoa-goana, unangika wihuloko wato, ‘Nohidodiai noogoana.’”

³⁵ “Gea duru imaketero ahi behehongo nginika, tato, ‘Ngini niogoa-goana,’ angamoi nginioo ma ko nihiorikua muruonoka de o tau ma dutu gea woboa. Marai ihumuririhuku de woboa, eko marai o futu gorona de woboa, eko marai ngade-ngade itebini de woboa, ekola marai o wange ihiwariha de woboa.

³⁶ Ho iti ufa inikiookoka o howonika de ka itodokanino de woboa de winimake nia giooko ma goronaka.

³⁷ De ahi behehongo gea abe tinihibehehongoka, gea o nyawa mata-mataika tahibehehongo tato, ‘Kiani nimaagoana.’” Hokogea o Yesusu ai hitararono onangika abe ma titi o kangela ahao idadi.