Maruku 12 - Ma Jou ai Demo-demo o Totobelohoka

O angguru ma redi ma hiketero

¹ De ahao o Yahudi ma nyawa manga hohidimono gea nagahi o Yesusoka de Una womulaenge wodotoko abe wahiketero ona, wato, “De naga womatengo o angguru ma redi wodatomo. Wodatomo ibooto de wohigilolitino wadaduhu ma redi gea. Wadaduhu ibooto de ahao wofaiti o humu moi abe o angguru ma teongo ahao ihahuru genanguku. De ahao moi wodiai abe o redi yogoa-goana manga tau. De gea mata-mata wabootoka de o nyawa yamuruono naga ahao wahewa la wato ona yoogoana to una ai redi gea. De o redi ma dutu de yogoa-goana yomahiketehibehehongo la nako adonoka ma oraha abe ahao amake o redi ma hasili, de ahao ma hasili gea yaregu la ahao ma hononga iwihidoaka o redi ma dutuika. De yomahiketehibehehongo ibooto de ahao o redi ma dutu wosoboka de wotagi-tagi o tonaka utuikali.

² De ipahaino de adonoka ma oraha abe ai redi naga de ma hasiloka, de o redi ma dutu ai huhuloko womatengo wihidingoto yogoa-goanika la wato wale ma hasili ma hononga o angguru ma redino.

³ Masara ma huhuloko gea womahiadono ma redika de ahao ona ma gogoana iwitaokino de iwipoha-poha unangika. Iwipoha-poha ibooto de ahao iwihuloko wolio ma redi ma dutuika, masara ka womagiawawe dika.

⁴ De una wolio ma redi ma dutuika de ahao ma dutu ai huhuloko womatengoli wihidingoto abe ma redi yogoa-goanika. De unangoo ma iwipohali hiadono ai peaika iwilaboka de duru iwidoa-doana. De unangoo ko idadiua wamake ho wolio womahomoa dika.

⁵ De ahao ma redi ma dutu womatengoli wihidingoto ai redi yogoa-goanika, masara una gea iwitomaka dika. Hokogea idadi ho ai huhuloko yamuruonohi naga ho onangoli wahidingoto yomatengo-tengo, de utu yapoha-poha dika, ma utu yatomakali.

⁶ De ipaha o redi ma dutu wato naga womatengokahi wihidingoto, de una gea to una ai ngofaka ma dutu abe una gea duru widora. De ma bahaika ai ngofaka gea wihidingoto abe ma redi ma gogoanika de wato, ‘Ona gea kiani naga manga horomati ahi ngofakika.’

⁷ Masara ka de woboa de abe ma redi yogoa-goana yomahikagaro ato, ‘Una gea o redi ma dutu ai ngofaka. Abeika hitomaka la naa ai oara mata-mata homahitongoneoka dika!’

⁸ De iwihidee hokogea ho iwitaokino ma dutu ai ngofaka gea de iwitomaka, de ai honenge yaumoka ai redi ma poretika. Marai hokogea dika aika ahi hiketero.”

⁹ De o Yesusu wotemohi o Yahudi ma nyawa manga hohidimonika wato, “Masara naa moi tinileha. Nako ngini, o angguru ma redi ma dutu gea ahao koaho o kia wodiai? Iya, Ngohi tato koaho una ma hirete wolio ai redika la ai redi yogoa-goana koaho wahibinaaha. Wahibinaaha ibooto de ahao o nyawa utuoli wairiki la onangoli ahao yogoa-goana ai angguru ma redi gea. Hokogea Ngohi ahi hininga.”

¹⁰ De ahao o Yesusu wohigila-gilahi ai demo onangika wato, “Abe ma titi ona iwioluku ma dutu ai ngofaka, gea imakiniiki de abe ma dodihiraka naga itulihukuoka Ma Jou ai Demo-demoka, abe itemo hokonaa ato, ‘Naga moi o hakaru abe ona o tau yotobadodiai aolukoka enangika, masara ma hakaru gea ena ahao idadioka o tau ma lifunu abe duru ihira yakelengauku dau ma tonakuku.

¹¹ De gea duru Ma Jouoka de aino wodiai, de duru inahisanangi de abe duru inahiheranga.’ Hokogea itemo Ma Jou ai Demo-demoka, ho mode ngini ko ma moiuahi nibasa ma demo-demo gea? Abeika nimafikirohi ai demo gea ma dumutu onagunaika.”

¹² De ma hohidimono gea duru ihiorikoka abe o Yesusu ai hiketero gea tanu wahiketero ona, abe ona iwioluku Unangika. De tanu ona ato ma oraha gea dika de o Yesusu iwitaokino masara ko idadiua angamoi yamodongo o nyawa yowoe-woeika hiadono ka iwikokinoaika dika ho ona ka yokokilio dika.

O Yesusu iwileha ma titi o pajaka ma tiwi

¹³ De ipaha de o agama ma hohidimono gea yahidingoto o Yesusika o Farisi manga doomuino ma nyawa yamuruono naga de o Herodese ai nyawa yamuruono naga. Ona yahidingoto Unangika la ato iwileha de ihititi genangino la ahao yolio la ato iwikalaki Una.

¹⁴ De ona yoboa o Yesusino de iwitemo ato, “Mia Guru, abe ngona minihiorikoka ngona notobagou-goungu de ngona ko nairikua o nyawa. De Ma Jou ai mau ngoneino nomidotoko duru nagou-goungu. Ho gea miato ngonaika minileha, de hokonaa mia leleha. Sarakia, abe naga o pajaka ma tiwi abe wogaho-gahoko o Roma ma nyawa manga koano ngone homoi-homoiino, masara nagali nanga agama ma pareta hohidifikiri. Ho gea minileha, ngona nato ma tiwi gea itiai hohidoaka unangika eko ngaro ufa hohidoaka? Sarakia ngona?”

¹⁵ Masara o Yesusu wahiorikoka naga manga hidee abe ahao ato iwikalaki, ho Una wato, “Adodoa ho ngini nihitaili? Abeika niaoino moi o tiwi ise-senge la ka idadi tolegahi.”

¹⁶ De ahao gea moi iwihidoaka de ahao Unangoli waleha onangika wato, “Ma tiwioka naa to onaguna ai hapa naga de to onaguna ai romanga?” De gea iwipaluhu ato, “De gea to o Roma ma nyawa manga koano.”

¹⁷ De ahao watemo onangika wato, “Ho gea tato o kia dika naga abe hohiromanga hato to ma koano, gea itiai nihidoaka ma koanoika. Masara nagali o kia dika abe hato to Ma Jou, ena gea kiani niwihidoakoli Ma Jouika.” De gea duru yokokiheranga abe Una ka idadi wopaluhu de ko idadiua iwikalaki ma titi ai bobaluhino gea.

O Yesusu iwileha ma titi o momomiki

¹⁸ De ahao nagali o Saduki manga doomuino ma nyawa yoboa o Yesusino. De marai o Saduki ma nyawa ona yotobadotoko abe nako o nyawa yohonengoka de duru ko idadiua de yomomiki manga honengino. Masara naa onangoo yoboa o Yesusino de ato iwileha moi angamoi yoigo yokadatoro ma titi o momomiki la iwihikala genangino.

¹⁹ De ona iwitemo Unangika ato, “Mia Guru, naga moi mia leleha. Ma dodihiraka nanga tofora o Musa wohitulihuku Ma Jou ai Pareta moi abe itemo hokonaa, ato, ‘Masara nako womatengo woilakoka masara ko wamakeuahi ai ngofaka de gea wohonenge, kiani ai dodotoli woilaka abe de ai riaka ngoi fao gea de ahao o ngofaka yamake yamuruono naga de o ngofaka gea hahiromanga to ai riaka ai ngofa-ngofaka.’ Hokogea to Musa ai Pareta moi itemo.

²⁰ Ho naa o ade-ade moi miniade-ade ngonaika la nomafikirohi o Musa ai Pareta gea. Abe ma moiuku naga o nauru yatumidi, de gea ona o roria-dodoto ma dutu mata-mata. De ma riaka gea una woilaka masara ko wamakeuahi ai ngofaka de una wohonengoka.

²¹ De ipaha de ai riaka widatekuku ai riaka ngoi fao unangoli womile, masara unangoli ko iwa ai ngofaka de wohonengoka. De ahao ma gorona widatekuku ahao unangoli womile, de unangoli ko iwa ai ngofaka de wohonenge.

²² De ka hokogea mata-mata idadi abe yatumidika ko iwa manga ngofaka. Ho ona gea ko moiua yamake o ngofaka ma ngofeka momatengoino gea. Ho de ma bahaika de ma ngofekali mohonengoka.

²³ Ho naa minileha, ahao abe ma oraha yohone-honenge yokokimomikiye, ahao ma oraha gea de ma ngofeka to onaguna ngoi fekata, abe ma dihira o duniakahi de ona yatumidi yokokiilaka munangika?”

²⁴ De o Yesusu wapaluhu onangika wato, “Iya, marai naga abe duru niataoko ihowono! Nako ngini niafikiri niato o nyawa yohonengoka ko yomomikokaua, gea ma titi Ma Jou ai Demo-demo ikuranga nimangaratii, de ngaro Ma Jou ai kuaha ma enangoo ko niataokuahi.

²⁵ Ho ihira-hira marai tinihitararono abe ahao ma oraha yohone-honengoka yokokimomikiye. Angamoi ma oraha gea de o nyawa ko yoilakokaua. Abe ma oraha gea ona ngade-ngade yomaketero de Ma Jou ai momalaekata o Horogaka abe onangoo ko yoila-ilakua.

²⁶ De abe ma titi ona yohonengoka de yomomiki, mode ngini ko nibasauahi o Musa ai bukuoka abe inahingahu ma titi gea? Abe ai bukuoka de inahingahu ma titi Ma Jou naga o gota ma eteteke itoka-tokaroka de witemo o Musaika hokonaa, wato, ‘Abe ani totofora o Abarahaama de o Isaka de o Yakubu, ona gea ka ihihigiriiriohi Ngohino angamoi Ngohi naa to ona manga Jou.’ Hokogea Ma Jou wotemo. Ho abeika naa niafikiri, abe ma oraha gea Ma Jou witemo o Musaika, gea ona yaruange manga badanga yokokihonengoka, eko sarakia? Masara Ma Jou ka wotemohi wato, ‘Ona gea ka ihihigiriiriohi Ngohino.’ Ho abeika, nako ka manga honenge dika, done sarakia de iwihigiriiriohi Ma Jouika? Ona yohone-honenge ko yakunua iwihigiriiri.

²⁷ Ho genangino hamake abe ona gea yaruange ka yowangohi naga Ma Jouoka de ka hiadono ma oraha naa nagahi manga gogao manga Jouika. Angamoi nako ona ka manga honengokahi dika, gea de Ma Jou ko wafetongua wato, ‘Ona gea ka ihihigiriiriohi Ngohino.’ Ho nako ngini niato ona yohone-honenge ahao ko yomomikua, genangoka de hiadono duru niahowono!” Hokogea o Yesusu ai dodaere onangika.

Ma Jou ai Pareta abe duru ikurutiye

²⁸ De ahao ma oraha o Yesusu de o Saduki ma nyawa gea yomakoketemo manga gogiriakahi de naga woboaino womatengoli wotobadotoko o Musa ai Paretaino. Una woboaino de woihene o Yesusu ai demo abe wapaluhu o Saduki ma nyawaika, de una gea doka ai hiningaka wato, “Naa una duru itaana ai bobaluhu onangika!” Ho hiadono una dika ma hirete wileha moi o Yesusika wato, “Guru, nako Ma Jou ai Pareta mata-mata ngoneino abe o Musa wohitulihuku ma dihira, o pareta o kiahi abe duru ikurutiye?”

²⁹ De o Yesusu wipaluhu wato, “Ma pareta abe itemo hokonaa ato, ‘Abeika ngini o Isiraele ma nyawa nitotoihene, nanga Jou o Yawe, Una gea dika to ngone nanga Jou, de ko iwa utu!

³⁰ De kiani nia Jou o Yawe, kiani Unangikahi niwidora de nia womaha ma gahumu, de kiani niwidora de nia wowango ma gahumu, de kiani niwidora de nia hininga ma gahumu, de kiani niwidora Unangika de o kia dika mata-mata abe naga nginioka!’ De ma pareta ka genangohi duru ikurutiye nako Ma Jou ai Pareta mata-mataika.

³¹ De nagali ai pareta moioli abe ngade-ngade imaketero ma gurutiye, de gea ma pareta inahigaro hokonaa ato, ‘O nyawa utuika kiani niadora imaketero hoka ti ngini nia roehe ma hirete niodora.’ Nako Ma Jou ai Pareta mata-mataika, ka o pareta hinootohi gea duru ikurutiye.”

³² De ahao una wotobadotoko gea witemo o Yesusika wato, “Guru, gea duru itaana ani bobaluhu gea! Duru nagoungu nato Ma Jou womatengo dika de ko iwa o Jou utu!

³³ De genangoli nagoungu nato, ‘Kiani nanga Jou hidora de nanga womaha ma gahumu, de kiani hidora de nanga hiningaoo ma gahumu, de kiani hidora Unangika de o kia dika mata-mata abe naga ngoneoka, de o nyawa utuika hadora imaketero hoka to ngone nanga roehe ma hirete hoodora.’ De nako gea mata-mata haniiki, duru hihisanangi Ma Jou. Abe ngaro haniiki ai pareta mata-mata utuoli abe ma titi o aewani eko o kia dika naga homahihuba Ma Jouiye, gea igoungu iwihisanangi Ma Jou. Masara abe hidora Unangika de hadora o nyawa utuika, ka enangohi gea duru iwihisanangi.”

³⁴ De ai bobaluhu gea o Yesusu woihene de womatemo wato, “Naa una duru itaana ai bobaluhu gea,” ho hiadono witemo unangika wato, “Ngona marai ma hohutulokahi de nodadioka Ma Jou ai kawaaha la Una wonihikoano ngonaika.” De gea ipaha de marai o nyawa ko moiokaua de yamoroini iwileha o Yesusika abe ma titi iwitaili.

O Yesusu o nyawaika wadotoko ma titi ona abe yotobadoto-dotoko o Musa ai Paretaino manga dodotoko de manga sade

³⁵ De ahao o Yesusu wadotoko o nyawaika Ma Jou ai Tau ma loaka de naga o leleha moi Unangoli wato woleha la ka idadi o nyawa yomahihohininga. De waleha o nyawa yowoe-woeika wato, “Ona abe yotobadoto-dotoko o Musa ai Paretaino ona yodotoko ato, ‘Nanga Koano o Kristusu abe ma dihira Ma Jou winihibehehongoka wato ahao wihidingoto nginiuku, Una gea ka o nyawa biaha dika angamoi wodadi nanga tofora o Dautu ai totoforaukuino.’

³⁶ Masara Ngohi tinileha, done sarakia hiadono nanga Mesia gea ka o nyawa biaha dika? Angamoi o Dautu una ma hirete wihiromanga de wigorakiye nanga Mesiaika gea wato, ‘Ahi Baluhu idodutu.’ Ho nako o Dautu wigorakiye o Kristusu wato ai Baluhu, gea itararono abe nako o Dautu de o Kristusu de kiani ka o Kristusohi duru wokurutiye. Angamoi abeika to Dautu ma hirete ai demo-demo abe ma dihira wotulihuku, wotemo wato, ‘Ma Jou o Yawe wotemo ahi Baluhu idodutuika wato, “Naino nogogere ahi nirakoka la ngone hohikoano mata-mataika ka hiadono ani musu gea duru manga hingounu naga Ngonaika.”’ Hokogea ma dihira o Dautu waturu to Ma Jou ai demo abe gea witemo o Dautu ai Baluhu idodutuika. De gea ko to Dautua dika ai demo, angamoi Ma Jou o Womaha wihihira-hira o Dautu hiadono ai demo gea wohitulihuku.”

³⁷ De ahao o Yesusu wogila-gila wotemo wato, “Abeika o Dautu wihiromanga nanga Mesia abe Ma Jou wonahibehehongoka wato, ‘Ahi Baluhu idodutu.’ Ho nako igoungu nanga Mesia gea to Dautu ai Baluhu idodutu, sarakia, ka idadiohi ona abe yotobadoto-dotoko o Musa ai Paretaino iwihiromanga ato, ‘Nanga Mesia Una gea ka o nyawa biaha dika angamoi wodadi nanga tofora o Dautu ai totoforaukuino?’ Nako Ngohi, gea duru ko idadiua!” De o nyawa yowoe-woe genangoka duru yogarago ma titi o Yesusu ai demo gea.

O Yesusu wahitiari ma titi ona o Musa ai Paretaino yotobadoto-dotoko

³⁸ De o nyawaika wadotokohi wato, “Nimahidodiai ona abe yotobadoto-dotoko o Musa ai Paretaino! Ona gea duru yomatobasade abe yoigo manga baju ma rorahai yomahinoauku de yotagi-tagi la ato yomahimatoko manga kuaha ikurutiye o nyawaika. De duru yoigoo o nyawa yahayanga onangika o kiaka naga abe o nyawa yowoe-woe.

³⁹ De naga moioli yoigo, nako nanga dodotoko ma tau-tauoka de duru yoigo o nyawa manga himangoka de yogogeruku. De nako o ngolo-ngolomokaoo de duru yoigo yogogere o kiaka naga yokokurutiye manga gogogeroka.

⁴⁰ De ona gea yarusi o ngo-ngofekaika abe yofao la yaora onangino manga tau ka ma moi de manga kiahonanga. De gea yodiaioka yofao-faoika de ahao o nyawa manga hima-himangoka de yomaniata ma dekanino la ato manga totiai yahimatoko o nyawaika. Ho gea Ngohi tato ona abe yotobadoto-dotoko o Musa ai Paretaino ahao to onangohi manga hohowono duru ilamoko.” Hokogea o Yesusu wahitiari yowoe-woeika abe ma titi ona abe yotobadoto-dotoko o Musa ai Paretaino.

Momatengo o huha ma nyawa ami hidoaka

⁴¹ De ahao o Yesusu woikohi de wogogeruku la womalega Ma Jou ai Tau ma hidoaka ma petika. Abe ma peti ma goronauku gea o nyawa yotobanoa manga tiwi abe yato yahidoaka Ma Jou ai Tau ma karajaangika. De walega-lega ma oraha ona abe de manga tiwi-tiwioka yatotilakuru de yonoa manga hidoaka ma peti ma goronauku.

⁴² De ipaha de naga momatengo o huha ma nyawa abe mofao-faooka matilakuru de monoa ka o tiwi ise-senge hinooto dika, abe ma tiwi gea tanu duru ko kia-kiaua ma titi.

⁴³ De gea o Yesusu wamake de ahao wahokino abe iwinii-niiki de wotemo wato, “Naa moi tagou-goungu tinihingahu. Nako o nyawa mata-mataika masara o ngo bao gea ka to munangohi ami hidoaka duru ilamoko Ma Jou ai himangoka.

⁴⁴ Angamoi ona utu mata-mata manga tiwi ma boloiino ihidoaka masara nagahi ma amoko yagogonika. Masara muna gea, ngaro duru mohuha ma mohidotodoakoka, abe ami tiwi gea ngaro ma hohutulokahi masara ko matumungua.”