Maruku 11 - Ma Jou ai Demo-demo o Totobelohoka

O Yesusu wowohama o Yerusaleeme ma kotaika

¹ De ipaha de o Yesusu de ona yomakokutuono yoiki de de Una ngade-ngade yomahiadono o Yerusaleeme ma kotaika. Abe gea yomahiadonoka o Saitunu ma lokuika, de genangoka naga o Betefage ma kapongo de o Betania ma kapongo abe imahikitigino. Ho gea o Saitunu ma lokuoka de o Yesusu wairiki yahinooto iwinii-niikino de wahidingoto doka ma kapongika.

² De yahinootoika wahuloko wato, “Ngini niloikohi doka o kapongika gea. De genangoka ka de niwohama de o keledai ma ngofaka moi niamake. De o keledai ma ngofaka gea ko ma moiuahi abe o nyawa yofarene. Ho ma aewani gea niahoheohi la niao Ngohino.

³ Masara nako o nyawa initaere ato, ‘Nihidodoa ho manga keledai ma ngofaka gea de niahohe?’, gea de ahao kiani niapaluhu onangika hokonaa, niato, ‘Mia Baluhu Una woperelu, ma ko itedekanua de wohigilio ma dingiino naa.’”

⁴ De wahuloko ibooto de ona yahinooto yoiki genangika de amake o keledai ma ngofaka gea alikoika o tau ma ngoranoka o ngekomo ma datekoka. De ona yomulaenge ma keledai yahohe.

⁵ Masara genangoka naga o nyawa yomatoomuino de yataere yahinootoika gea ato, “Nihidodoa ho manga keledai ma ngofaka gea de niahohe?”

⁶ De duru imaketero abe hokokanganoli o Yesusu ai demo yapake ato, “Mia Baluhu woperelu, ma ko itedekanua de wohigilio ma dingiino naa.” Ho ma demo gea o nyawa yoihene de yahigunoa ato, “Iya, nako hokogea niaoika dika de ahao Una ka idadi wohigilio.”

⁷ De ma aewani gea yao o Yesusika, de ahao manga baju ma guru-gurutu ihinao o keledai ma poretoka. Ihinaoika de ahao o Yesusu wofarenuku.

⁸ De naga o nyawa manga ngoe ato iwibuhuku o Yesusu ho ihinao manga baju de manga ngoere ma ngekomika la gea idadioka manga horomati ma dodunguu abe ma titi o nyawa yokokurutiye yoboaino. De o nyawa utuoli yoiki manga dumuleika de atobiki ma tage ma ngoe abe ma rupa hoka o biso ma tage, de enangoo ihinao o ngekomika. De gea mata-mata yodiai ma titi manga horomati o Yesusika.

⁹ De o nyawa yowoe-woe gea, ona mata-mata iwihigiriiri o Yesusika. De gea o Yesusu naga woboa o kotaino, de o nyawa naga utu ai himangokahi, masara naga utu iwihidoduru ai poretino, de ona mata-mata yokokipoaka ato, “Una woboaino naa Ma Jou ai uru ma dodofanga, ho ngomi wiwigahoko la Ma Jou wihiowa Unangika! Hihigogiriiri Ma Jou!

¹⁰ De naa adonoka ma oraha abe Una naa wonahikoano hoka ma dodihiraka abe nanga tofora o Dautu wonahikoano! Hihigogiriiri Ma Jou o Horogaka!”

¹¹ De ahao o Yesusu womahiadoniyeoka o Yerusaleeme ma kotaiye de wogila-gila wowohama Ma Jou ai Tau ma loaika. De mata-mata Ma Jou ai Tauoka gea o Yesusu duru watailako. Masara mangale ngade-ngade ifufutu, ho Una wohupu dika la Una de yangimoi de yahinooto yokokilio o Betania ma kapongika.

O Gogilioro ma gota abe ko iwa ma hofoko

¹² De ma dawangeino de o Yesusu de iwinii-niiki yohupu o Betania ma kapongino gea, de o Yesusu iwihafini.

¹³ De ma gurutikahi de naga wamake o gogilioro ma gota o utu moi. De ma gota gea ngaro ma oraha ko adonuahi la ihofoko de o hofoko ma ago-agomo, masara biaha naga to ena ma hofoko ma domoro abe imakiniiki de ma hoka, de ma gota gea naga ihokaka ho ingodumoka ma hoka. Ho ma gotaika gea wolegahi la wato wamake ma hofoko. Masara wolegaika de ma hoka dika naga, masara moioo de ko iwa ma hofoko ma gotaka gea.

¹⁴ Ho Una wohikoboto ma gotaika gea wato, “Ibootohi ihofoko, ho ko moiokaua yomale ani hofokino naa!” De ona iwinii-niiki yoihene ai koboto ma demo gea.

Ma Jou ai Tauino o Yesusu waduhu ona yotobafuku-fukunu

¹⁵ Ho de ipaha de ona yogila-gila daku o Yerusaleeme ma kotaiye. Yomahiadoniyeoka de ahao o Yesusu wowohamikali Ma Jou ai Tau ma loaka. Wowohamika de naga wamake o nyawa yomatiwi-tiwi genangoka, abe utu yotobafuku-fukunu o aewani la o nyawa yomaija de yomahihuba de o aewani gea. De naga utuoli o aewani yotobaija-ija genangoka. Ho ona mata-mata o Yesusu womulaenge waduhu Ma Jou ai Tau ma loaino. De utuoli genangoka abe ona yotobaturuuru o nyawa manga tiwi, de ona yotobaturuuru manga meja wamotumu la hiadono manga tiwi ikokipurarahoka. De utuoli yotobafuku-fukunu o namodaara, to onangoo manga kuruhii wakumuruku.

¹⁶ De ona abe yotobafuku-fukunu, gea manga kiahonanga ko wahigunoaua ona yao-ao aika aino Ma Jou ai Tau ma loaka.

¹⁷ De gea ipaha de ahao o nyawa genangoka wadotoko wato, “Abeika nitotoihene Ma Jou ai Demo-demo abe ma dihira ihitulihukuoka. Ma dihira gea Ma Jou wotemo hokonaa wato, ‘Ahi tau ahao ihiromanga o niniata ma tau la tato o nyawa o kia-kiaka dika o duniaka naa ma ka idadi yoboa ahi tauino naa de yomaniata Ngohino.’ Masara ngini naa nihidadioka Ma Jou ai Tau yotobarusi-rusi manga ngi.”

¹⁸ De o nyawa yowoe-woe genangoka o Yesusu wahiheranga ma titi ai demoino gea onangika. De ona abe yodadi manga hidemo ma nyawa yokokurutiye Ma Jouika de ona abe yotobadoto-dotoko o Musa ai Paretaino, onangoo naga yoihene ai demo gea de yamake abe yowoe-woe duru wahiheranga. Ho ona gea yohawanoka de yomakoketemo ato, “Done naa o kokawaaha ahao ko inaniikokaua.” De gea yomulaengoka iwihidee la ato o Yesusu iwitoma.

¹⁹ Ipaha de yofutuku de o Yesusu de iwinii-niiki yohupu ma kotaino gea, hoka manga biaha o futu-futuiye yohupuino.

O gogilioro ma gota ihonengoka

²⁰ De ma dawangeino yoikoli daku o Yerusaleeme ma kotaiye, de o gogilioro ma gota gea atilakuru de amake abe duru imoraa de hiadono itoolengoka ma gota gea. Ka hiadono ngaro ma dekaroka de auku ka hiadono ma ngutu-ngutukuku masara ikokihonengoka.

²¹ De ahao o Peturusu womahohininga o Yesusu ai demo abe kanugonino wohitemoka ma gotaika gea de wotemo Unangika wato, “Ahi Guru, abeika ma gota naa abe kanugono Ngona nohikobotoka! Naa ihonengoka!”

²² De o Yesusu wapaluhu iwinii-niikika wato, “Kiani niwingaku Ma Jouika!

²³ Abe naa tagou-goungu tinihingahu, onagona dika duru iwingaku Ma Jouika abe manga ngongaku ko idomo-domoua, ona gea manga gogahoko o kia dika de gea Ma Jou wahidoaka onangika. Abe ngaro ona yahuloko o lokuika gea ato, ‘Nomagorakoka de nomahidulutuoka o gahiuku!’ De nako manga huhuloko ma demo yangaku abe ahao idadi, gea ahao Ma Jou o loku gea wagoraka de wahidulutuoka.

²⁴ Gea ho tinihingahu tato abe ma oraha nimagahoko moi Ma Jouino, gea iti ningaku abe nia gogahoko gea Ma Jou ka idadi winihidoaka. De nako hokogea nia ngongaku, ahao Ma Jou winihidoaka nia gogahoko gea.

²⁵ De abe nimaniata ma getongo, nako naga niagogonuku nia hiningaka abe o nyawaika ko niasanangiua, gea manga howono nginika kiani niapongokahi de gea ahao ka idadi nimaniata. Nako hokogea nidiaiokahi, gea nia Baba o Horogaka, Unangoli ahao nia howono Unangika waofi abe niatilakuru to Una ai Pareta.

²⁶ [Masara nako to ona manga howono nginino ko niapongua, ahao Unangoli ko waofiua ti ngini nia howono Unangika.]”

O Yahudi ma nyawa manga hohidimono ko iwingakua abe o Yesusu Ma Jouoka de wauku woboa

²⁷ De ipaha de yomahiadoniyeoli o Yerusaleeme ma kotaiye. De o Yesusu wotagi-tagi Ma Jou ai Tau ma loaka de naga o hidemo ma nyawa Ma Jouiye manga hohidimono de ona abe yotobadoto-dotoko o Musa ai Paretaino de o Yahudi ma nyawa manga hohidimono, ona mata-mata yokokiboa o Yesusino.

²⁸ De ona gea iwileha o Yesusika ato, “O kiaino ani kuaha la hiadono kanugono o nyawa naduhu abe yotobafuku-fukunu Ma Jou ai Tauoka? De onagona honanga inihidoaka manga kuaha Ngonaika la gea ka idadi nodiai?”

²⁹ Masara o Yesusu ko womafetongua onangika ho watemo wato, “Iya, marai gea ko tinipaluhuahi. Masara naga moi Ngohi tato tinilehahi nginika. De nako ngini ka idadi nihipaluhu Ngohino, de ahao Ngohioli tinipaluhu nginika abe tinihingahu ma titi ahi kuaha o kiaka de aino. Masara nako ngini ko nihipaluhua, Ngohioo ko tinipaluhua nginika.

³⁰ Ho hokonaa ahi leleha. Nako nengokadau abe o Yohanese Wotobaohi-ohiki, to una ai kuaha o kiaino la hiadono o nyawa waohi-ohiki, Ma Jouoka de aino eko o nyawaka de aino dika ai kuaha? Abeika nipaluhu!”

³¹ Ho ona duru yomakoketemo ma titi ai leleha gea, ho yotemo ato, “Ou, ai leleha naa done sarakia de hopaluhu? Nako hipaluhu Unangika hato, ‘Ma Jouoka de aino o Yohanese ai kuaha,’ gea de ahao kiani Una wonaleha wato, ‘Ho gea adodoa ho ko niwingakua unangika?’

³² De masara nako hipaluhu hato, ‘O nyawaka de aino dika ai kuaha,’ de done sarakia?” Manga demo hokogea angamoi yamodongo manga gogianongoruika, abe ko manga ngoe iwingaku abe o Yohanese una Ma Jou ai uru ma dodofanga womatengo.

³³ Ho ma bahaika de manga hohidimono gea iwitemo o Yesusika ato, “Marai gea ko mihiorikua.” De ahao o Yesusu wotemo wato, “Angamoi gea ngini ko nipaluhua, Ngohioo toluku tinihingahu abe ma titi ahi kuaha o kiaka de aino la ka idadi o nyawa gea taduhu Ma Jou ai Tauino.” Hokogea idadi abe o Yesusu de o Yahudi ma nyawa manga hohidimono yomakoketemo, de manga demo o Yesusu wahikala abe to ona manga hininga wohikawalimi.