Kolose 4 - Ma Jou ai Demo-demo o Totobelohoka

¹ De ngini o gogilaongo manga dutu-dutu, ngini kiani nia gogilaongo manga perelu niolega abe hoka itiai, de ufa ona gea niahikangelaholi. Abe kiani ngini niohohininga abe ngaro nginioo, ma naga de nia Dutuoli o Horogaka, ho ka idadi hotemo hato nginioo to Una ai gogilaongo.

² De naa ka tinihibehehongohi ngini mata-mataika. Kiani ka ihikaika nimaniata de ufa o niniatino nimahipidili. De abe ma oraha nimaniata, kiani ka ihikaika niwangoro de kiani nagaoo nia tarimakase Unangika.

³ De nia niniata gea ma goronaka de kiani ngomioo nimigahoko. Nimigahoko la ma ngekomo Ma Jou womihimatoko la hiadono to Una ai Demo-demo miahingahu-ngahu o nyawaika. Abe ngomi mioigo la o Kristusu ai dogogono ma abari abe ma dihira de ka agogonohi masara naa ma duru de Ma Jou wohihimatoko ngohino, ma abari gea mioigo la mihingahu-ngahu. De duru ma abari gea ma titi hiadono ngohi naa ihibuioka.

⁴ Ho kiani nihigahoko ngohi la ma oraha o Kristusu ai abari gea tahingahu-ngahu de ka idadi o nyawa duru itararono yataoko ma titi, angamoi hokogea ahi karajaanga ma dumutu.

⁵ De ti ngini nia wowango kiani niao irahai abe de nia sosawaroka la ngaro naga o nyawa abe ko iwingakuahi o Kristusika, masara ona ko idadiua initae nginika. De nako naga ma oraha la ka idadi niahitararono o nyawaika ma titi Ma Jou ai Demo-demoino, gea ma oraha ma getongo kiani niale de niapake.

⁶ De abe nimakoketemo de ona, kiani nihidodiai nia demo la naga nia hayanga onangika de naga ma hiliara la ahao ona ka idadi ma utumu yamake nia demoino. Ho nako nia hininga itagi onangika hokogea de ma oraha nimakoketemo de naga inileha moi, ahao nia babaluhu duru itaana. Abe ngaro onagonaika dika nipaluhu, ma, ka idadi nipaluhu duru itiai.

O abari ma hingahu o Paulusu wohidingoto ai dodiawoika

⁷ De naa ngohi tato o abari ma hingahu tohidingoto nginika la ka idadi nihioriki hokokia idadi ngohino mata-mata. Ho nanga gianongoru o Tikiku tihidingoto la una ahao winihingahu o abari ma titi ngohino. Abe o Tikiku una gea ngomi duru wiwidora de una duru watobagou-goungu womiduhunu ngomi abe unangoo mia datekoka de wileleani nanga Baluhu idodutu.

⁸ De una gea tihidingoto nginika la ngini ahao ka idadi nihioriki abe hokokia idadi ngomino de genangino ahao ka idadi nisanangi de nia hiningaoo iuwini.

⁹ De womatengoli o Onesimusu, unangoo tihidingoto la una de o Tikiku yomakiniiki yoiki ona yahinooto. De abe hoka nihiorikoka, o Onesimusu, unangoo gea nanga gianongoru o Yesusoka abe ngomi duru wiwidora de abe ngomi naa wiwingaku unangika. De unangoo gea o Kolose ma nyawa abe nimaketero hoka nginioli. Ho ona yahinooto ahao iniade-ade nginika mata-mata abe idadioka nenangoka.

O tabea ma demo o nyawa utuino ihidingoto nginika

¹⁰ De naa o Arisitarakusu abe unangoo iwibuioka nenangoka de de ngohi, una ai tabea wohidingoto nginika. De o Maruku, abe o Baranabasa ai gianongoru ma dutu, unangoo ai dora nginika wohidingoto. De naa ngohi tinihihohiningali ma titi o Maruku gea, angamoi nengokadau tinihibehehongoka tato nako una woboa winitutumu, gea kiani niwidafongo.

¹¹ De o Yesusu abe iwiaho-ahoko o Yustusu, unangoo ai dora wohidingoto nginika. Ho ona yaruange naa, ngaro ahi gogianongoru ko manga ngoe o Yahudi ma nyawaino, masara ka ona yaruange dika naa abe ihiduhunu ngohi ma titi ahi karajaanga. Abe ma titi ona de ngohi mimakuduhunu la ngone hodogo-dogo abe Ma Jou wonahikoano nanga wowangoka. Ho ona yaruange gea duru ihilaru ngohino.

¹² De o Epafras abe una ti ngini nia doomuino de una o Yesusu Kristusu ai huhuloko womatengo, unangoo ai tabea wohidingoto nginika. Una gea ka ihikaika wininiata ngini, abe ai niniata ma goronaka de winigahoko de ai hininga ma gahumu la ngini ka idadi nimatongohono de nibaluhu nia ngongakuoka. De winigahokoo la nia ngongaku gea duru ingodu-ngodumoka de ko ihoa-hoanua, la hiadono ngini duru niataoko itiai Ma Jou ai mau nginino.

¹³ De ngohi ma hirete tihioriki to Epafras ai datoro ho naa tinihingahu nginika abe una gea duru de ai magaweoka wokarajaanga la wato winiduhunu ngini. Abe gea winiduhunu ngini o Koloseoka de onangoo nanga gogianongoru abe o Laodikia ma kotaka de onangoo abe o Hirapolis ma kotaka yogogere, ho gea ngini mata-mataika o Epafras winikokiduhunu nginika.

¹⁴ De naga o Lukasa, ma dotere abe duru wiwidora, de o Demasoo, ona yahinooto manga dora ihidingoto nginika.

¹⁵ De naa ngohi togahoko la to ngohi ahi dora niadofanga nanga gogianongoruika abe yogogere o Laodikia ma kotaka. Abe hoka o ngo Nimafa de ona mata-mata abe nengokadauino yomatoomuino o Gareja ma wange ma getongo to muna ami tauoka la iwihigiriiri Ma Jou.

¹⁶ De ahi hurata naa nako yabasa ibootoka nia himangoka de kiani o Laodikia ma garejakali yabasa la onangoo ka idadi yoihene ma hurata naa. De ma hurata moioli abe ngohi tohidingoto o Laodikia ma garejaika, ma hurata gea kiani niale onangino la nginioli ka idadi niabasa.

¹⁷ De naga moi ahi behehongo nia gianongoruika abe genangoka o Kolose ma kotaka wogogere. Ho naa o Arikipusika tihibehehongo. Hokonaa niwitemo unangika niato, “De kiani nahingodumu ma karajaanga mata-mata abe nanga Baluhu idodutu wonihitagongoka.”

¹⁸ De naa ngohi o Paulusu totulihi o hurata ma bobaha naa de to ngohi ma hirete ahi giama. Abe hiadono ma oraha naa ahi gianongoru wohitulihuku ahi demo abe woihene ahi uruino la idadioka ahi hurata nginika, masara naa de ahao ahi hurata ma bobaha totulihi de to ngohi ma hirete ahi giama. De ufa ngini niawohanga la nihiniata angamoi ngohi ihibuiokahi. De naa tinigahoko la Ma Jou ai owa winihidoaka nginika.