Kolose 3 - Ma Jou ai Demo-demo o Totobelohoka

O wowango ma hungi o Kristusoka

¹ Kangano tinihitararono ma titi abe nako Ma Jou winihidohonengoka ka ma moi de o Kristusu, gea ma titi hiadono tanu ko idadiokaua nianiiki nia wowango ma dihira abe ihititi o dunia ma biahaino. Ho naa moioli tinihingahu, abe ngini winihikokimomikoka ka ma moi de o Kristusu! Ho mangale ma titi gea ho kiani ka ihikaika nia hininga ma dumutu itagi o Horogaika de abe to Una ai mau ngoneino niatobanii-niiki. Angamoi ngone hohioriki o Kristusu Una gea wogogere daku Ma Jou ai nirakoka la Unangoo o dunia wohipareta ai Baba ai datekoka.

² De kiani nia hininga ma dumutu ka ihikaika itagi o Horogaiye, de ufa o duniaka naa ma kiahonanga niongano-nganono.

³ Angamoi ngini nia wowango ma dihira ihonengoka, de ti ngini nia wowango ma hungi naga imagogonohi daku o Kristusoka, abe Una gea naga daku ai Baba ai datekoka.

⁴ De o Kristusu Una gea nanga wowango ma ngango ma titi. Abe ma titi nia wowango ma hungi gea ngone o nyawa duru ko idadiua hamake de nanga lako. Masara de ahao ma oraha Una womahimatoko de woboali, de gea nginioo naga Unangoka. De angamoi ma oraha gea Una naga de ai medebini ma dararonoka duru ma hohailoa, de ngini naga Unangoka, ho gea nginioo naga de nia medebini ma dararonoka duru ma hohailoa abe ma oraha gea womahimatoko.

Nia wowango ma dihira ma hirahi kiani niakokihohonengoka

⁵ De mangale ma titi naga nia wowango ma hungi gea ho hiadono ngini kiani niahohonengoka nia badanga ma horoodo mata-mata abe naga nia wowangoka, angamoi gea o dunia ma wowangoka de aino dika iboa. Abe hoka nginioka o nyawa yomatengo de yomakitigi de abe ko manga fekatua eko manga rokatua. De ngaro naga nginioka nimahitorou, eko ngaro nia hininga ihauku ma dorouika gea. Eko nia hininga itula-tulaka naga, eko ngaro naga nia horoodo o kiahonangika, abe gea imaketero hoka nimahijou de o kiahonangika gea, ma, gea mata-mata abe tafetongoka naa kiani niahohonengoka la gea duru ko iwaka nia kokiwowangoka.

⁶ Angamoi ma dorou gea Ma Jou duru wodohata, ho ahao naga ma oraha abe Una kiani wahohowono o nyawaika abe yotobadiai ma dorou gea.

⁷ De igoungu ngini ma dihira ma dorou gea nginioo nitobadiai, abe ma oraha gea ngini ka nigogerohi nia wowango ma dodihirakahi.

⁸ Masara ma oraha naa ngini kiani ma dorou mata-mata naa niatingakoka. Abe o ngamo, de o dohata, de o hininga abe nia dodiawo niato niahikangela, de o hiade-ade, de o doa-doana. Gea mata-mata kiani nianoaka nia uruoka.

⁹ De ibootohi ngini nimakokeluku, angamoi nengokadau ma oraha niwingaku de ngini nia hininga ma dihira de nia datoro ma dihira, gea ka ma moi niakokihuputoka ho inihikatingakoka nginino.

¹⁰ De nia hininga ma hirahi gea inihikatingaka ipaha de ahao o hininga ma hungioli Ma Jou winihinoaukuoka. De nia hininga ma hungi gea Una ka ihikaika waturuuru la hiadono utuohi imakiniiki de to Unangoli ai hininga abe winihidoaka nginika. De gea hiadono utuohi itararono niwihioriki to Una ai hininga.

¹¹ De abe nanga wowango ma hungioka naa Ma Jou duru ko wairi-irikua o nyawa abe ma titi hoka o Yahudi ma nyawa de ona abe ko o Yahudi ma nyawaua, eko ngaro o nyawa yomahunaka de ona abe ko yomahunaua, ma gea ko wairi-irikua. De abe o homoa ma nyawa de manga demo o fara moi, eko ngaro manga biaha hatoli duru imakohowono de ti ngini, eko duru ko yohakolaua, eko ngaro o gilaongo eko o hiluasa ma nyawa, ma duru o nyawa mata-mataika de ko iwa ma regu Ma Jou ai himangoka. Ho ngaro o kiaino dika ma nyawa, ma, ko yadodoaua. Iti abe ngone mata-mata hingaku o Kristusika, de gea Una wodadioka to ngone mata-mata nanga Baluhu wokokurutiye, de nanga kokiwowango gea ka imakokadaene dika Unangoka. De Una gea wogogere ngone homoi-homoioka nanga kokibadangoka. Ho mangale ma titi gea ho ngini kiani niahohonengoka abe nia wowango ma dodihiraka la niwangoli abe itiai de nia wowango ma hungi o Kristusoka.

Ngini kiani nimahinoauku de o Yesusu ai hininga

¹² De ngini naa winiirikoka Ma Jou de winihidadioka to Una ai nyawa, de Una duru winidora ngini. Ho, mangale ti ngini nia gogere Ma Jouoka gea, kiani nia hininga ma dora itagi o nyawa utuika abe yohuha eko yokangela. De kiani o nyawa mata-mata niao irahai de onangika niabole-bole. De nia hiningaka kiani nimahitipokouku. De ngaro naga abe inihikangela, ma, kiani ngini nimatongohono dika ma ngaro ufa de nia ngamo ipuda.

¹³ De ngaro nia gogianongoru yahowono nginika, ma, kiani ona gea niao irahai dika de ngaro ufa nia hininga kuranga onangika. Hokogenangua, masara nginioka kiani ti ngini mata-mata nia howono nimahikokingini nimahikokoofi. Abe nanga Baluhu idodutu waofioka ti ngini nia howono Unangika, ho ngini kiani nimaaduru hoka Unangoli la nginioo o nyawa utu manga howono nginika niaofioka.

¹⁴ De gea mata-mata kiani nidiai, masara kiani duru nihitihira o dora. Abe kiani o dora nimahinoauku hiadono nimakodora, angamoi duru o dora gea ena abe inihiketerimoi la hiadono nia rimoi gea duru ihingodu-ngodumoka.

¹⁵ De ngini naa kiani nimahigunoa la o Kristusu ai hininga ma miriidi inihipareta nia kokihiningaka hiadono ngini duru nimakao irahai abe de o hininga ma miriidi gea. De gea kiani nimakao irahai abe de o hininga ma miriidi mangale ma titi ma dodihiraka nagau o Kristusu ai hininga de ai hidee nginika, abe Una winiahokoka de winihidadioka hoka o badanga moi la ngini nimakao irahai. De ka ihikaika kiani ngini nitarimakase Ma Jouika.

¹⁶ De kiani nimahigunoa la o Kristusu ai demo-demo imanoa nia kokihiningaka hiadono duru niongano-nganono ai demo gea. Abe kiani niapake nia tobahioriki ma gahumu ai demoino gea ma oraha nimakodotoko de ma oraha nimahiketehitiari. De abe ma oraha niapake o Higiriiri ma Nyanyianga ma buku abe ma dihira ihitulihukuoka, de o nyanyianga utuoli naga abe niwihigiriiri Ma Jou, gea mata-mata ka idadi ninyanyi la nimahiketehipoputurungu nia ngongakuoka. De abe ninyanyi, gea niwihigiriiri de nia hininga ma tarimakase Unangika.

¹⁷ Ho, ngaro o kia dika ngini nidiai de ngaro o kia dika ngini nitemo, ma, iti nia datorino de nia demoino gea de niwihisanangi de niwihigiriiri nanga Baluhu idodutu o Yesusika. De kiani ka ihikaika nitarimakase Ma Jou nia Babaika ma titi nia gogere nanga Baluhoka.

O Paulusu wahibehehongo onangika

¹⁸ De naa ngohi tinihibehehongo nginika. Ngini o feka-fekata, kiani niahigihene nia rokatika, angamoi hokogea itiai nanga Baluhu ai nyawa hodiai.

¹⁹ De nginioli o roka-rokata, kiani niadora nia fekatika de ufa niao ko itiaiua.

²⁰ De ngini o ngofa-ngofaka, ngaro o kia dika naga, masara kiani nia dimo-dimono niahingounu, angamoi nia hingounu gea iwihisanangi nanga Baluhu idodutuika.

²¹ De ngini o ba-baba, ufa nia ngofa-ngofaka niahikangelaholi done naga yagogono manga hiningaka, de done manga hiningaka itubuho de ko yamagaweokaua.

²² De ngini o gogilaongo, nginioo kiani niahingounu nia dutu o duniaka naa. Ngaro o kia dika ona inihuloko, ma, kiani naga nia hingounu onangika. Masara ufa nia dutu manga himangoka de ahao naga nia hingounu onangika la niato nia dutu inisanangi nginika. Ufa hokogea dika nia hingounu, masara ngini kiani nialeleani itiai onangika de nia hininga ma rorahai, de gea ihititi de nia horomati ma gou-goungu nanga Baluhu idodutuika.

²³ Ho ngaro nia karajaanga o kia dika naga, ma, gea kiani nikarajaanga de nia magawe ma gahumu. Abe gea kiani nikarajaanga imaketero hoka nanga Baluhu idodutu ma hirete Una winihikarajaanga nginika, ho Unangika niwileleani de ko o nyawaikaua dika.

²⁴ Kiani ngini nikarajaanga irahai angamoi ka niohiningahi abe nanga Baluhu Una ma hirete ahao nia utumu de nia oara winihidoaka nginika. De nia utumu gea ahao duru imakiniiki de nia karajaanga de nia hingounu Unangika. De ngaro ngini nialeleani nia dutuika o duniaka naa, ma ufa niawohanga abe tanu nanga Baluhu idodutu o Kristusu, Unangikaoo ngini niwileleani angamoi Una nia Dutu ma gou-goungu. Ho nako niwileleani irahai, gea ahao nia utumu niamake.

²⁵ De masara onagona dika yotobadiai itorou, onangoli ahao yamake manga hohowono abe duru itaana, angamoi Ma Jou ko wairikua o nyawa.