Kolose 2 - Ma Jou ai Demo-demo o Totobelohoka

¹ De ahi gogianongoru, naga moi ngohi toigo tofetongo ngini mata-mataika la ngini nihioriki hokokia ma dubuho ahi karajaanga, abe ngohi kiani ngade-ngade hoka ngohi o parangi ma goronaka de tomaribuutu de tomatongohono la ngini mata-mataika niakokimake ma utumu ahi karajaangino naa. De ahi karajaanga ma dubuho gea todiai la ngini mata-mataika abe ngaro ko ma moiuahi ngini de ngohi homakamake, ma ka idadi ma utumu niamake ahi karajaangino naa. Abe ngaro ngini o Koloseoka, eko ngaro onangoli nanga gogianongoru o Yesusoka yomanoa o Laodikia ma kotaka, eko ngaro nanga gogianongoru utuoli o kia-kiaka dika yogogere de ko mimakamakeuahi ona de ngohi, ma, ngini mata-mataika ma titi hiadono ngohi tokarajaanga ma dubuho, la ka idadi ngini niakokimake ma utumu ahi karajaangino naa.

² De ahi karajaanga ma dubuho gea ma titi o kia? Gea tokarajaanga de tomatongohono angamoi duru toigo la ngini mata-mata tinihiputurungu nia kokihiningaka la hiadono utuohi ngini nimahiborikeketoka ma titi nia dora itagioka nia gogianongoruika. De nagali abe tokarajaanga ma dubuho la tato tiniduhunu hiadono ngini mata-mataika nia kokihiningaka de duru nia tobahioriki ingodu-ngodumu la hiadono ngini duru niataoko itiai Ma Jou ai dogogono gea, abe ma titi o Kristusu.

³ Angamoi duru o Kristusoka dika naga imanoa ma tobahioriki mata-mata abe inahiakunu ngone la hiadono ka idadi Ma Jou ai hininga hohioriki. De ma tobahioriki gea tohiketero de o hakaru duru ma leto-letongo abe duru de ma ijaka.

⁴ De ahi demo gea tinihingahu nginika la tato done o nyawa inihigaro ato, “Nako niwingaku ka o Kristusika dika, gea ko iniwedonua! Kiani niodogoli hokonaa de hokonaa la nia tobahioriki ingodumoka.” Ho nako hiadono hokogea inihigaro, ma ufa o nyawa inibudi de inihirehene ngini Ma Jouino, ngaro ona duru yososawaro yowarodemo, ma, ufa ngini inihirehene.

⁵ Angamoi ngaro ngohi naa ahi badanga ko iwa nginioka ma oraha naa, masara to ngohi ahi hininga naga nia hidogoronaka. De ngohi togarago ma titi tamakeoka abe ngini nimaketerimoi de nimahikokaaturu itiai, de abe nia ngongaku o Kristusika duru imahikeketika hiadono ko ikelu-kelua. Ho ahi hiningaka tomatemo tato, iti abe ti ngini nia ngongaku iputurungu o Kristusoka hiadono ko idadiua inihirehene Unangino. Abe hokogea ma titi hiadono naa tinihitiari.

O Paulusu wahitiari la wato ufa yorehene o Kristusino

⁶ De naa, ahi gogianongoru, kiani nia wowango niao itiai. Angamoi ngini niodafongokau ma dodotoko abe nengokadau inidotokoka nginika ato “O Yesusu Kristusu, Una gea nanga Baluhu idodutu.” Ho mangale Una niwidafongoka abe niato Una gea nia Baluhu idodutu, ho kiani nia wowango niao itiai abe hoka igoungu o Yesusoka nimanoa.

⁷ Abe ngini kiani nimahingutuku Unangoka de kiani ka ihikaika niwango de nioaguru Unangika hiadono nia buturungu ka idogo-dogo nia ngongakuika. Abe gea duru imakadaene de ma dodotoko abe hoka nengokadau inidotokokau. De moioli kiani nidiai, de gea nia hiningaka ma tarimakase kiani naga de ma boloioka hiadono ka ihikaika nitarimakase Ma Jouiye.

⁸ Ahi gogianongoru, ngini kiani nimaagoana done o nyawa abe yotobadotoko o ngelu-ngeluku ma homoa de ona gea ahao initaurino nia hininga de hiadono inihiloara abe to ona manga dodotokika. Abe to ona manga dodotoko gea tanu o nyawaka de aino dika, abe ona o dunia ma biaha yatobadotoko de yomafiki-fikiri hiadono manga hininga ma tobahioriki dika yamake, de genangino yadotoko o nyawaika. Ho manga dodotoko gea duru imakohowono de o Kristusu ai dodotoko.

⁹ Ho done ma titi o kia hiadono nihigihene manga demoika gea? Angamoi ngone naa o Kristusokau! De o Kristusu ai badangoka dika naga imanoa Ma Jou ai hininga ma gahumu de ai kuaha ma gahumu. Abe o kia-kia dika naga Ma Jouoka, gea mata-mata naga ingodumoka o Kristusu ai badangokaoo angamoi Una de Ma Jou o Baba duru hoimoi.

¹⁰ De ngini naa ko iwaka ma kuranga nginioka ma titi o Kristusoka nia gogere, angamoi Una gea wapareta o momalaekata de o toka-tokata mata-mataika abe de ma kuahaka, angamoi Una gea to ena mata-mata ma haeke. Ho ma titi ti ngini nia gogere Unangoka hiadono ngini duru ningodumoka.

¹¹ Ho nako hiadono ona yotobadotoko o ngelu-ngelukino initaere ato ko ningodumuahi ma titi ko inihunauahi, naa ena nia lalaru ma demo abe ka idadi nimahihohininga. Abe mangale ma titi nimarimoi ngini de o Kristusu, ho hiadono nginioli inihunali. Masara nia huhuna gea ko o nyawakaua de aino, masara to Kristusu ai huhuna. Abe ma dodihiraino ma oraha o nyawa yahuna de manga roehe ihikitingaka onangino, masara nako to ngone nanga huhuna o Kristusoka hokogenangua. Abe nako to ngone nanga huhuna, gea ko nanga badangokaua, masara nanga hiningaka dika. Ho nanga huhuna o Kristusoka ma titi nanga hiningaka ma hafini ma dorou ihikitingakoka ngoneino.

¹² De ngaro nia huhunaoo de nia gogohikoo, ma to ena mata-mata ma dumutu moi dika. Abe nako nia gogohiki, gea imaketero hoka nginioo inihidulungunoka ngini de o Kristusu. Masara doka nia badanga ma goronaka imanoa nia hafini ma dorou, ho enangoo ma ihidulungunoka ka ma moi de o Kristusu. De masara to Una ai karajaanga nginioka ko hokogenangua dika. Abe nagali Ma Jou winihimomiki ngini ka ma moi de de Una. De gea winihimomiki ma titi nia ngongaku Ma Jou ai kuahaika, abe duru ai kuaha ena gea abe wapake ma oraha o Kristusu wihimomiki ai honengino.

¹³ De nengokadau ngini ko iwahi nia wowango Ma Jou ai himangoka ma titi nia howo-howono Unangika de ma titi nia hininga ma hafini ma dorou ko ihikitingakuahi nginino, ho nia hafini ma dorou gea ka inihihira-hirahi. Masara ngaro ngini ma dihira hokogea, ma, Ma Jou winihidawangoka ka ma moi ngini de o Kristusu ma oraha naa. De nanga howono Unangika mata-mata wakokiofioka.

¹⁴ Abe to ngone nanga howo-howono waofi hokonaa. Ma dihira naga ihitulihukuoka to ngone nanga howono mata-mata o bukuku. De ma buku gea ka idadi hohiromanga hato nanga nagimi Ma Jouika ma buku. De ena gea idadioka nanga bodito. Masara o Kristusu nanga nagimi gea waofioka abe waoika de wohidapakuika o gota isosalioaika, la genangoka de nanga nagimi ihihangoka.

¹⁵ De mangale ma titi o Yesusu Kristusu ai honenge o gotaka gea ho hiadono Ma Jou wohikala o toka-tokata, de genangino ai hilaku duru womahimatoko la mata-mataika ihioriki. Abe ngaro o toka-tokata de ma kuahaka abe iwimusu Unangika, ma, ena gea duru wohikala de hiadono wohimaleke o dunia mata-mataika ma himangoka. De genangino Una womahitaana abe ai kuaha de ai karajaanga ngoneoka duru ingodumu.

¹⁶ Ho mangale ngini duru ningodumokau o Kristusoka, ho ngaro ufa de niahigihene onangika abe initae-tae de inihohowono ma titi bari ato niahowono niolomo eko niokere. De ngaro ona gea initae ma titi manga agama ma rame-rame ma pareta ko nianiikua eko ngaro o mede ma hungi ma rame-rame eko o Hiaini ma wange ma hiaturu de ngini ko nianiikua, ma, ufa niahigihene to ona manga hininga gea.

¹⁷ Angamoi ma pareta eko ma hiaturu mata-mata gea abe ma dihira o Musa wohitulihuku, ma pareta gea imaketero hoka o nyawa manga gurumini dika manga timiuku. Abe nako o gurumini moi hamake, gea inahidumutu abe kiani naga o gurumini gea ma dutu. Masara nako ka ma gurumini dika, gea ko o nyawa ma gou-goungua. De ma paretaoo hokogea, angamoi ma hiaturu de ma pareta gea imaketero hoka o Kristusu ai gurumini. Abe o Musa ai Pareta gea ka ma gurumini dika, masara ka idadi inahidumutu ngone abe to ena ma dutu ma gou-goungu kiani naga. Ho mangale ma dutu woboaka, abe o Kristusu woboaka, ho ibootohi de ma pareta eko ma gurumini dika ngone ka haniikohi, masara ma oraha naa kiani o Kristusoli hiniiki.

¹⁸ De naga o nyawa utu duru yomahingahu ato, “Ngomi naa mia hininga ma dodipokouku dika,” masara gea ona yoeluku dika angamoi manga hingahuoka gea de yomagorakoka. De ona gea yomahuba o momalaekatika. De nagaoo ka ihikaika ona yomahingahu-ngahu abe hokokia yamake manga buluhara ma goronaka. Masara ona gea ka yomahikurutiye dika ngaro ko iwa ma titi hiadono ona yomahitaana yomahikurutiye. Abe ona manga hininga ma dolaka, gea ka manga badanga ma horoodo dika. Ho duru tinihitiari la ufa ona gea nianiiki, done ko niamakeua nia utumu Ma Jouoka de aino.

¹⁹ Angamoi ona gea ko iwa manga gogao nanga haekika o Kristusika. Abe nako o badanga moi, ma badanga ma kiahonanga mata-mata imahinganono ma peaika. De ma dengo-dengo de ma nguro-nguroto, gea mata-mata imahiso-so la ma badanga ma rimoi naga. De iti ma badanga imahigagao ma peaika de ka idadi ma pea ihiaturu de ihiputurungu ma badangika. De hiadono ma badanga ka ifero de idogo iputurungu abe imakiniiki de Ma Jou ai mau. Ho gea imaketero hoka to ngone nanga gogao o Kristusika, angamoi Una gea nanga haeke. Abe iti homahigagao Unangika de Ma Jou kiani wonaduhunu abe wonahiketerimoi de wonahiputurungu hiadono ka idadi hofero de hoaguru nanga ngongakuika. Masara ona gea abe ahao kangano tafetongo, ona ko iwa manga gogao nanga haekika o Kristusika, angamoi ona gea yogogere ko ai badangokaua. Ho ngini ngaro ufa dika de niahigihene onangika.

²⁰ De ngini naa ka idadi hotemo hato winihidohonengoka ka ma moi de o Kristusu abe ma oraha Una wohonenge. De abe nihonengoka, gea ho hiadono nia wowango abe ihititi o dunia ma biahaino ihonengoka. Ho nako nia wowango ma dihira gea ihonengokau, done o kia ma titi de hiadono ka niwangohi hoka o duniali ma nyawa yowango? De done sarakia hiadono nagahi nia hingounu o dunia ma biaha ma paretaika?

²¹ Abe naga utu inihuloko ato, “Ufa naa ena naso done nahowono!,” de utu ato, “Ma inomo eko ma ngokere gea ufa namao ani uruoka!,” de utu hiadono ato, “Naa ena ufa ko natigi!”

²² Masara ma pareta gea o nyawa manga dodotokoka de aino dika. Abeika, manga pareta gea ihidumutu o kiahonangika abe ko itongohonua, abe ka de haolomuku eko hapakeuku de ko iwaka. Ho ma pareta gea duru ko imakataanua de nanga wowango ma hungi o Kristusoka, angamoi ena gea itongohono ka hiado-adonika. De nagali ma titi abe manga pareta ma dumutu ato ufa naa hamao de ufa naa haso, masara gea ma kiahonanga Ma Jou wotulaadauku la wato ka idadi ngone o nyawa hapake de haolomo! Ho done ma titi o kia hiadono manga pareta gea ka nianiikohi?

²³ De igoungu naga ma pareta de ma hiaturu kohangoe abe o nyawa manga hiningaka de aino dika iboa, de gea ma dumutu la inahipareta hokokia kiani haniiki de homahuba Ma Jouika. Abe hoka ma pareta gea naga utu o nyawa yaniiki ato, “Nako ma pareta naa taniiki, o nyawa ka ihimake abe ahi hininga ma dodipokouku.” Hokogea manga hiningaka itemo. De nagali ma hiaturu abe o nyawa utu yaniiki hiadono yomahikangela manga badangoka la ato iwihisanangi Ma Jouika. De ma pareta mata-mata abe hokogea imakiniiki, tanu o nyawa manga ngoe yamao hoka ma pareta gea ihititi o sosawaroka. Masara hokogenangua, abe nako ma pareta gea haniiki, gea ko inaduhunua la hiadono ngone nanga roehe ma horoodo yatumungu, ma masara ihitoofo nanga sade dika hiadono ngone homagoraka ma titi haniiki itiai ma pareta kohangoe gea. Masara ma pareta hokogea o duniaka dika ma pareta de duru ko inaduhunua, ho ibootohi haniiki ma pareta gea.