Kolose 1 - Ma Jou ai Demo-demo o Totobelohoka

O Paulusu ai demo ihira-hira o Kolose ma garejaika

¹ Mia gogianongoru o Yesusoka. Ngohi naa o Paulusu, abe Ma Jou wohiiriki ngohi la todadi o hidingoto ma nyawa abe tahingahu-ngahu o nyawaika ma titi o Yesusu Kristusu nanga Koano abe Ma Jou wonahibehehongoka. De o Timotiusu, nanga gianongoru o Yesusoka, una naga de de ngohi.

² Ho imihinooto o hurata naa mihidingoto nginika abe Ma Jou ai nyawaika o Kolose ma kapongoka, abe ngini nimanoa o Kristusoka de ka ihikaika o Yesusu Kristusu ai mau nianiiki. Ngohi naa tinigahoko Ma Jou nanga Babaiye la ai owa de ai hininga ma miriidi winihidoaka nginika.

O Paulusu wotarimakase Ma Jouiye ma titi o Kolose ma nyawa

³ Ngomi naa ma getongo mimaniata ma titi ngini Ma Jouiye, abe nanga Baluhu idodutu o Yesusu Kristusu ai Babaiye, de mia niniata ma goronaka gea de mitarimakase Unangiye ma titi ngini.

⁴ Angamoi ngomi miihenoka ma titi nia ngongaku o Yesusu Kristusika de abe ma titi nia doraoo itagi Ma Jou ai nyawa mata-mataika.

⁵ De nia ngongaku de nia dora, gea ihititi nia nganganonoka, abe ngini duru nionganono abe nia utumu nagau o Horogaka. Abe nengokadau ma oraha ahao iboa nginino o demo ma gou-goungu, abe o Abari ma Rorahai, ma oraha gea de ahao nihioriki abe ka idadi niamake o utumu o Horogaka. De ma oraha naa Ma Jou winihibehehongoka ma utumu gea de Una daku duru winihigoa-goana nia utumu gea ka hiadono nimahiadoniyeoka de ahao winihidoaka. Ho ma titi gea hiadono ngini ka ihikaika niwingaku Unangika de ai nyawa mata-mataika niadora.

^6-8 Abe ti ngini nia dora gea Ma Jou o Womahoka de aino niamake. De gea mata-mata mihioriki angamoi nanga gianongoru o Epafras naa ma duruino womiade-ade ngomino hokokia itagi nia dora nia gogianongoruika. De duru o Epafras gea abe nengokadau winihingahuoka o Abari ma Rorahai gea, de una gea mia olo abe mikarajaanga mimakuduhunu ngomi de una. De una naga ai tagongo o Yesusu Kristusoka de aino, de ai tagongo gea wao duru irahai abe watobagou-goungu winiduhunu Ma Jou ai Demo-demoino. De hiadono nengokadau ahao ma wange ma hira gea abe ngini niihene o Abari ma Rorahai unangino de niataoko itiai Ma Jou ai owa de ka hiadono ma oraha naa de ka ihofokohi o Abari ma Rorahai ti ngini nia kokiwowangoka. De imaketero hoka o Abari ma Rorahai iboa nginino de hiadono ihofoko abe ngini nidogo-dogo niwingaku o Yesusika, gea imaketero hoka o dunia ma amokika naga o Abari ma Rorahai itagi de ihofoko la o nyawa ka ihikaika yodogo-dogo iwingaku Unangika. Ho naa ngomi duru mitarimakase Ma Jouiye ma titi ngini abe ma oraha mimaniata.

O Paulusu wagahoko Ma Jouiye ma titi ai gogianongoru o Kolose ma nyawa

⁹ De mangale ma titi ma hingahu gea miihenoka unangino ma titi ngini, ho ma wange gea abe miihenoka de ka hiadono ma oraha naa de duru ka ihikaika mininiata ngini. De gea minigahoko Ma Jou la ngini duru niataoko itiai to Una ai mau nginika. Abe ma titi minigahoko la Una duru winihidoaka nginika to Una ai sosawaro la hiadono nia hininga ma lako ka yobawilika dika Ma Jou ai mauika.

¹⁰ Angamoi nako ngini niataoko itiai to Una ai mau nginino, gea ahao ngini niakunu niwango abe hoka itaana nanga Baluhu idodutu ai nyawa yowango. Abe nia wowangoka ka ihikaika naga wamake nia datoro ma rorahai ma hofoko irupa-rupa, de gea nia wowango ka ihikaika niwihisanangi Unangika. De nagali nako niataoko itiai Ma Jou ai mau, ahao utuohi idogo niwihioriki to Una ai hininga.

¹¹ De minigahokoo Ma Jouiye, la Una duru winihiputurungu hiadono nia buturungu ingodumu. De nia buturungu gea ma titi o kia? Gea ma buturungu iboa to Una ai kuahaka de aino, abe ai kuaha gea duru kohaamoko hiadono ko iwa ma bobaha. Ho nako ai kuahaino gea de winihiputurungu, gea de ahao nia buturungu duru ingodumu. De nako nia buturungu ingodumoka, ahao ngaro o kangela o kia dika ngini niaohana ma, nia ngongaku ko idomo-domoua de ka idadi nimatongohono de gea nia hininga ka igaragohi.

¹² De moiohi minigahoko, la ngini ka ihikaika nitarimakase nanga Babaiye angamoi Una winihigunoa la nginioo ai owa ma hidoku niamake Unangoka de aino. Abe Ma Jou ai kokawaaha mata-mataika Una wahikokodokuoka ai owa onangika, de ona yokokigogere ai dararonoka. De naa nginikaoo winihikodoku ai owa la hiadono nginioo ai owa niamakeoka de nigogere ai dararonoka. Ho ma titi ena gea hiadono koaho nitarimakase Unangiye. Ho ngomi naa ka ihikaika minigahoko Ma Jouiye la ngini ka idadi nioaguru ai mau ma goronaika.

¹³ Abe igoungu Ma Jou wonahitingakoka nanga boditoino abe iboa o fufutu ma kuahaino, de ahao wonaturuuru ngone de wonahidogogere de to Una ai Ngofaka ai kuahaka, abe ai Ngofaka gea duru Ma Jou widora Unangika.

¹⁴ De ai Ngofaka gea abe wonabangu ngone de nanga howono waofioka la hiadono ngone naa wonahiluasoka. Ho duru itiai ngone ka ihikaika hitarimakase nanga Baluhu idodutuiye.

Ka o Yesusu Kristusohi duru wokokurutiye

¹⁵ De abe ma titi Ma Jou ai Ngofaka o Kristusu, Una gea ai rupa duru hoimoi de Ma Jou o Baba ai rupa. Ho ngaro Ma Jou duru ko idadiua de ngone himake de nanga lako, ma, o Kristusu wonahimatoko ngoneino Ma Jou ai rupa. De nako Ma Jou ai dulaada mata-mataika de ai dulaada gea hohidotelega de o Kristusu, ka o Kristusohi wokurutiye angamoi duru Una gea hoka Ma Jou ai dulaada ma riaka, abe ma titi Una nagau de ahao ma dulaada mata-mataika itoturuino wotulaada.

¹⁶ Angamoi duru o Kristusu abe wotobatulaada mata-mataika, ngaro o duniaka naa imanoa eko ngaro daku ma hoanino imanoa, eko ngaro dakuoli ma dihangoka ma, mata-mataika wotulaada. De ngaro o kia dika naga abe de ma kuahaka, ngaro de nanga lako ka amake eko ngaro ko amakeua, abe hoka o momalaekata eko o toka-tokata, ma, mata-mataika Una wotulaada. Ho moioo de ko iwa o dodulaadoka gea abe ko Unangua wotulaada, de gea mata-mataika Una wotulaadauku la Una wamake o higiriiri genangino.

¹⁷ De o dulaada mata-mataika gea ko wotulaadauahi de Una nagau. De duru Una gea abe o dulaada mata-mataika wohiaturu de ka ihikaika wasoino la ufa hiadono imahikabarihi. Abe nako ko o Kristusua, ma dulaada gea ahao imahikabarihi. Ho nako o Kristusu de o dulaada mata-mataika, masara ka Unangohi duru wokurutiye.

¹⁸ De ngaro o garejakaoo, masara ka Una dika o garejaka nanga haeke. Abe o gareja ma nyawa mata-mata homahinganono Unangika, ho ngone hoka to Una ai badanga, de Una to ngone nanga haeke. De Unangoo gea o gareja ma titi, abe Una duru wohira womomiki ai honengino la ko wohone-honengokaua, ho ahao o nyawa utuoli iwihidoduruino abe onangoo ahao yomomiki manga honengino de yowango ka hiado-adonika. Ho ngaro Ma Jou ai dulaadoka eko ngaro ai garejaka, masara gea mata-mataika o Kristusu ai timiuku, angamoi ka Unangohi woloku-loku de duru wokokurutiye.

¹⁹ De igoungu Unangohi wokokurutiye angamoi Una de Ma Jou o Baba duru yomatoteroino. Angamoi ma dodihiraka Ma Jou o Baba ai hidee la wato to Una ai hininga ma gahumu de to Una ai kuaha ma gahumu imanoa o Kristusoka la duru ka yomaketero dika abe manga hininga de manga kuaha Ma Jou o Baba de o Kristusu.

²⁰ De Ma Jou ai hidee gea nagali la wato ma titi o Kristusoka hiadono mata-mata womahitounakali Unangino. Abe ma titi o Kristusu ai awunu iuihi ai gota isosalioainoka, de genangino wahiketehirimoioka ai dulaada mata-mataika, ngaro abe o duniaka naa imanoa eko ngaro daku ma hoanino eko dakuoli ma dihangoka, masara mata-mataika Ma Jou wahikokigilioli Unangino.

²¹ De ma dihira ngaro nginioo naa, ma, inihikatingakoka kohagurutika de Ma Jou, angamoi nia hiningaka niwimusu Unangika de hiadono nia wowango ma datoroka nitobadiai itorou.

²² Masara ma oraha naa de ngini winihigiliokau Unangino ma titi o Kristusu ai badanga womahidoaka la wohonenge. De gea wodiai Ma Jou la ahao ka idadi ngini winiao ai himangino de duru ko iwaka nia howono nginioka, angamoi wakokiofioka nia howono mata-mata de winihiromanga o debi-debini ma nyawa.

²³ De ma oraha gea ngini igoungu nidadioka o debi-debini ma nyawa, iti ngini naa nigila-gila niwingaku Unangika la nia ngongaku duru hoka imahingutukuku hiadono ko idomo-domoua. De ufa nimahipipidili nia nganganonino abe nengokadau niihenoka o Abari ma Rorahaioka. De o Abari ma Rorahai naa ihingahu-ngahuoka o dunia ma amokika, de ngohi naa o Paulusu todadioka to ena ma huhuloko abe ngohioo tahingahu-ngahu o nyawaika o Abari ma Rorahai gea. Ho mangale ma titi Ma Jou ai hidee gea ngoneino, ho ngone kiani duru homahigagao nanga nganganonika ka hiadono ai dulaada mata-mataika wahiketehirimoioka.

O Paulusu ai karajaanga gea o garejaika waduhunu

²⁴ De naa ngohi togarago angamoi ngaro ngohioka o kangela kiani tomamao, gea ko kia-kiaua, iti ngini ka idadi niamake ma utumu ahi kangelaino gea. Abe o kokangela ma oraha naa tamao ahi roehoka, gea tohioriki o Kristusu wohideeoka la o kangela ma ngoe ngohi taohana la genangino o gareja ma nyawa yamake ma utumu. Masara abe ma titi ahi kokangela naa, gea tohioriki ko ibootuahi, masara nagahi abe o Kristusu wohideeoka la ngohi tamao ahi badangoka. Ho ma kangela naa abe kiani tangodumokahi la o Kristusu ai badanga abe ai nyawa, ona gea ka taduhunohi.

²⁵ De ngohi todadioka o gareja ma huhuloko, abe to ngohi ahi karajaanga naga Ma Jouoka de aino wohihitagongino. De ahi tagongo gea wohihidoaka la wato ngohi totobaduhunu abe ngini ko o Yahudi ma nyawaikaua. De gea tiniduhunu de Ma Jou ai Demo-demoino tinidotoko la moioo de ko iwa abe naga ko tinihingahua nginika, masara duru tangodumu Ma Jou ai Demo-demo tinidotoko nginika. De duru ena gea ahi karajaanga la taduhunu Ma Jou ai garejaika.

²⁶ Masara duru ma deka-dekanuku naa naga moi o dogogono abe Ma Jou wagogono o nyawaino la ufa ihioriki. Masara ma oraha naa de ahao Una wato ma dogogono gea wahimatoko to Una ai nyawaika.

²⁷ De gea Ma Jou wato ai dogogono wahingahu la ngini abe ko o Yahudi ma nyawaua ka idadi nihioriki abe to Una ai owa nginika duru kohaamoko de duru ihohailoa. Ho naa ma dogogono ma rorahai abe ahao naa ma duru Ma Jou wonahimatoko. De ma dogogono hokonaa, itemo ato, “Ngaro nginioo abe ko o Yahudi ma nyawaua, ma o Kristusu Una gea wogogere nginiokaoo. De mangale Una igoungu naga nginioka, ho nginioo ka idadi duru nionganono abe ahao ma oraha dokengika de ahao ai dararono de ai hohailoa winihidoaka nginika la nia hohailoa de nia dararono gea hatoli imaketero hoka to Unangoli.” Hokogea Ma Jou ai dogogono abe ahao naa ma duru wonahimatoko.

²⁸ De mia demo abe ngomi miahingahu-ngahu o nyawa mata-mataika, gea duru miahingahu onangika ma titi o Kristusu. De ma oraha miahingahu-ngahu ma titi Una de mia sosawaro ma gahumu miapake, la ngaro miahitiari o nyawaika eko ngaro miadotoko onangika, masara gea mia demo duru itaana mata-mata. Angamoi ngomi miato miaduhunu o nyawa mata-mata hiadono yokokibaluhoka o Yesusu Kristusoka.

²⁹ De hokogea mia hininga ma dumutu, ho ngohi duru tokarajaanga ma dubuho de hiadono tomaribuutu la iti o nyawa yobaluhu o Yesusu Kristusika. De abe tomaribuutu de ahi buturungu ma gahumu, ahi buturungu gea tanu ihititi Ma Jou ai kuahaka dika abe Una wohihidoakino ngohino.