Ibarani 9 - Ma Jou ai Demo-demo o Totobelohoka

Abe ma titi Ma Jou ai Tau ma dodihiraino de abe hokokia ma hiaturu nanga totofora yanii-niiki abe yomahuba-huba Unangika

¹ De naa abeika hafikirohi ma titi ma behehongo ihira-hiraika ma hiaturu hokokia. Abe nako ma behehongo ihira-hiraika gea, igoungu naga to enangoo ma hiaturu abe hokokia kiani yomahuba Ma Jouika, de nagali to Una ai Tau o Ngoerino o duniaka naa abe genangoka yomahuba-huba.

² De ma dodihiraino gea de ma tau o ngoerino doka ma goronaka yokabatingoka ho naga ma ngi hinooto ma tau ma goronaka. Ho ma ngi abe ma himangika idate-dateke, gea ma goronaka naga ma posi ma liate moi abe ma posi ma ngi daku tumidi, de nagaoo ma meja abe ka ihikaika naga o hohininga ma roti genangoka. De ma ngi gea ihiromanga enangika ato o Debi-debini ma Ngi.

³ De nagaoo o tau gea ma goronaka o ngoere ma biri-birini abe ena gea yokabatingi ma ngi hinooto, ho nagali doka ma poretoka abe ma ngi ihiromanga ato o Ngi duru Kohamedebini.

⁴ De abe to ena ma kiahonanga genangoka, naga o Manyanyi ma Huhuba ma Ngi de nagali ma Behehongo ma Peti, abe gea hinootoo ihilape de o gurasi ma dutu arihonongaino ho mata-mataika ihihawo de o gurasi. De doka ma Behehongo ma Peti ma goronaka naga o boto moi o gurasi ma dutuino abe to ena ma dola o mana ma hohutulu, de nagali ma petioka to Harunu ai tutukunu abe ma dodihiraino itorioka, de nagali ma hakaru ma baka-baka o behehongo ma hiraino abe naga ihitulihi Ma Jou ai Pareta Ngimoi gea ma hakaruika.

⁵ De ma Behehongo ma Peti ma lokuoka naga o malaekata hinooto ma rupa hoka o kerubu ma malaekata. De nako o kerubu ma malaekata, gea ma dodunguu abe genangoka naga Ma Jou duru de ai medebini ma dararonoka. De gea ma malaekata hinooto ma rupa hoka yafofonguku ma peti ma dadamunuku, abe ma dadamunoka gea ena de Una wahiapongo o nyawa manga howono. De gea tanu naga ma titi ma ngoeohi, masara nako ma oraha naa ko idadiuahi ma titi mata-mata gea tinihitararono nginika.

⁶ Ho ma dodihiraino gea to Ma Jou ai Tau o Ngoerino ihiaturu hiadono to ena ma kiahonanga ingodumoka. De ahao nanga totofora manga hidemo Ma Jouika ona o wange-wangeiye yotobawohama ma ngi ihira-hira abe ka yodugamino de genangoka manga tagongo yotobadiai abe iwileleani Ma Jouika.

⁷ Masara nako ma ngi ma hinooto abe gea ena o Ngi duru Kohamedebini, gea ma goronaika ka o taongo moi ma moi dika yowohama. De manga hidemo ko mata-mataikaua yowohama, masara ka una dika abe wodadi manga hidemo wokokurutiye Ma Jouika, gea ka una dika womatengo abe ka idadi wowohama doka ma goronaika. De gea ka o taongo moi ma moi dika wowohamika. De nako ma wange gea abe wowohamika, ko idadiua ai giama ma homoa, masara gea kiani naga moi ai giamoka wasoino o huhuba abe o aewani ma awunino, abe ma huhuba gea wahihuba Ma Jouika ma titi to ona mata-mata manga howo-howono abe yahowonoka masara ko yomahiorikua. Ho ngaro manga hidemo wokokurutiye to una ma hirete ai howono de ngaro o Isiraele ma nyawa utu mata-mata manga howo-howono abe ko yomahiorikua de yahowonoka, masara ma huhuba moi gea o awunino de gea ena akokidaenoka ona mata-mata manga howonika.

⁸ De ma hiaturino gea de Ma Jou o Womaha wonahitararono ngoneino abe nako ma dodihiraino ma oraha Ma Jou ai Tau ihira gea ka yapakeohi, gea ko idadiuahi o nyawa kawaaha yowohama ai Ngi duru Kohamedebini ma goronaika.

⁹ De gea mata-mata idadioka hoka o hiketero dika onangika ma dodihiraino abe ai Tau ma hiaturino de Ma Jou wonahidumutu hokokia ahao waofi nanga howo-howono o Kristusino. Ho ma hiaturu ihira-hiraika gea idadi hoka o hiketero dika abe ngone Ma Jou ai nyawa ka idadi hapakeohi jai-jai hiadono to Una ai hiaturu ma gou-goungu idadioka. De abe manga hidoaka de manga huhuba abe ma dodihiraino yomahihuba de o hiaturu ihira-hiraka, ngaro gea mata-mata masara ko idadiua manga hininga ihitebini de gea ena ma huhubaino, ho ona manga hiningaka de ka yomamaoohi manga peseke Ma Jou ai himangoka.

¹⁰ De igoungu, hokogea ibooto o behehongo ihira-hiraika angamoi to ena ma hiaturu ma dumutu gea ka nanga badangino dika, abe hoka nanga inomo de nanga ngokere o kia ka idadi holomo de hokere, de hokokia kiani ngone homaihoro de homaohiki la homahuba itiai Unangika. De nako to Una ai hiningaka Una wato ma hiaturu gea mata-mata ka jai-jaiohi dika ngone haniiki ka hiadono to Una ai hiaturu ma hungioli idadi, abe genangoka de ahao ma hiaturu ma hungioli hanii-niiki.

O Kristusu Una nanga Hidemo de nanga huhubaoo Ma Jouika, ho Una gea abe wohiaturu to ngone nanga behehongo ma hungi Ma Jouoka

¹¹ Ho ma oraha naa Ma Jou ai hiaturu ma hungioli idadioka, de o Kristusu wodadioka nanga Hidemo Wokokurutiye Ma Jouika. Ho Unangoo abe wohiaturu nanga Behehongo ma hungi naa. De gea ma titi Una gea abe wohiaturu ma owa de ma rorahai mata-mataika abe ngone naa hamakeoka o Behehongo ma hungioka de aino. De hokonaa wodiai la wohidadi nanga Behehongo ma hungi. Abe Una wowohamikaka Ma Jou ai Tau o Horogaka, abe ka enangohi duru irorahai de duru itotiai. De nako ma Tau gea, ko o nyawa manga giamokaua de aino idadi, angamoi ko o duniakaua imanoa, ho duru ka enangohi irorahai.

¹² De ma oraha wowohama Ma Jou ai Ngi duru Kohamedebini ma goronaika o Horogaka de ko o kabingua ma awunu wao de ko o hapiua ma awunu, masara gea to Una ma hirete ai awunu abe wao doka ma goronaika angamoi genangino wonabangu ngone de wonahihohe nanga howo-howonino naa de ka hiado-adonika. Ho gea ma moi dika abe Una wowohamika genangika angamoi to Una ai huhuba ai awunino, gea ena ilaku ka hiado-adonika. Ho ngaro ufa dika Una wohigali-galioli wowohama de o huhuba wao doka ma goronaika, masara ma moi dika.

¹³ De nako o behehongo ihira-hiraika ma hiaturoka, de gea igoungu abe o nyawa onagona dika ko yotebinua Ma Jou ai himangoka ho ona gea duru ko idadiua yowohama ai Tauika la yomahuba Unangika. De ona gea kiani ihira yadereroukuohi onangika de o kabingi ma awunu eko o hapi ma awunu. De utu kiani o hapi ma ngofaka ma dukuuru abe gea ihihubaka, de gea kiani yadopurarahukuohi onangika la yodadioli yotebini ai himangoka de ka idadioli yomahuba Unangika.

¹⁴ Ho genangino de ka idadi hamake abe barikua ngaro o kabingi ma awunu masara genangino de ka idadi o nyawa yahitebini manga badangino la yomahuba Ma Jouika. Hongoli nako to Kristusu ai awunu! Abe genangino de ka idadi inahitebini ngone nanga hiningaka. De gea inahitebini nanga hininga la ibootohi nanga datoro ma homoa haniikohi nanga wowangoka, masara ka idadi ka Unangika dika homahuba de hileleani abe Una gea wotobawango ka hiado-adonika. De abeika ngone hafikirohi o Kristusu ai huhuba gea ma titi ngone. Abe Una wapake to Ma Jou o Womaha ai kuahaino abe naga ka hiado-adonika, la genangino ka idadi o Kristusu womahidoaka Ma Jouika. De gea Una wodadi imaketero hoka o huhuba moi abe duru ko iwa ma howono eko ma heluku, la gea Ma Jou duru wosanangi wodafongo ai huhuba gea. De gea ma titi hiadono to Una ai huhuba gea duru inahiutumu ngoneino, la ngone ka idadi homahuba Unangika ka hiado-adonika.

¹⁵ Masara nako ngone o nyawa, ngone hatilakuroka ai behehongo ihira-hiraika. Ho mangale ma titi gea de kiani Una wohonenge la genangino wonabangu ngone ma titi nanga howo-howonino gea. De gea ma oraha wonabangu de wodadioka Una abe wohiaturu nanga behehongo ma hungi. De Una wodadioka to ngone nanga Hidemo Ma Jouika abe o behehongo ma hungiokali wonahidemo. De gea ko ma titiua nanga howo-howono dika wohiaturu la ko iwaka, masara gea wohiaturoo la ngone mata-mata abe Ma Jou wonaahokoka nanga ngongakuino, ngone ahao ka idadi hamake nanga utumu abe ma dihiraino de Una wonahibehehongoka. Angamoi ma dodihiraino de Ma Jou wonahibehehongoka ma utumu ma ngoe ngoneino wato ahao wonahidoaka, ho naa ma titi o Kristusino de wohiaturu la nanga utumu gea hakokimake! De nanga utumu gea ka jai-jaiua dika, masara gea itongohono ka hiado-adonika.

^16-17 Ho naa ngohi moi tonaleha. Gea ma titi sarakia hiadono kiani o Kristusu wohonenge la o behehongo ma hungi ka ilaku? De ma titi o kia hiadono kiani Una wohonenge la nanga utumu mata-mata gea ngone hamake? Gea ka idadi hohiketero de ngone o nyawa nanga biahaino. Abe ngone nanga ngoe nako hobaluhoka de gea o behehongo ma hurata hodiai ma titi nanga oara ahao onagona yamake ma oraha ngone hohonenge. De ngaro hoka ma hurata gea ngohi todiaioka, masara nako ngohi ka towangohi, gea ma behehongo ma hurata ko ilakuahi, de o nyawa onagona dika ma ko yamakeuahi manga oara ngohino. Masara nako hiadono ngohi tohonengoka de o nyawa duru yongaku abe igou-goungu tohonengoka, genangoka de aino de ahi behehongo ma hurata ilaku de ka idadi manga oara yahikokodoku onangika abe manga roma-romanga naga ihitulihukuoka ahi behehongo ma huratoka. De hokogea ma titi hiadono o Kristusu wohonenge la o behehongo ma hungi ka idadi ilaku to ngone nanga wowango homoi-homoioka. Ho imaketero abe hoka ma hiketero ma goronaka de ma nyawa kiani yohonengohi la ai dutu yamake manga oara unangino, hokogenangoo o Kristusu kiani wohonengohi la ahao ngone ka idadi hamake nanga utumu mata-mata abe ma dodihirainohi de Ma Jou wonahibehehongoka wato ahao wonahidoaka ngoneino.

¹⁸ De tanu hokogenangoo Ma Jou ai behehongo ihira-hiraika wohiaturu la enangoo gea ka ilaku ma titi o awunino. De gea nako o awunu naga, gea hohioriki abe o hohonenge o domaino idadioka.

¹⁹ Abe duru ma dodihiraino de o Musa wadofanga Ma Jou ai Pareta mata-mata o Isiraele ma nyawaika. De gea wadofanga ibooto de ahao wale o hapi ma ngofaka ma awunu de o kabingi ma awunu de gea wohikasapuru de o akere. De ahao o hisopo ma jaga muruono naga de o ngoere ma doka-dokara abe o domba ma gogoino yodiai, de enangoo gea waleino de wapake la ma awunu wohibarihi Ma Jou ai Pareta ma bukuku de ma nyawaikaoo mata-mataika.

²⁰ De ma oraha gea o Musa wahingahu onangika wato, “De naa ma awunino de Ma Jou wohidadi ai behehongo ngoneino abe gea ai behehongo wato kiani naa ena ngone hanii-niiki enangika.”

²¹ Hokogea wahingahu ibooto de ahao ma awunu gea wagorakoli de wohibarihi Ma Jou ai Tau o Ngoerino ma amokika de to ena ma hiaturu ma kiahonanga mata-mataika abe gea yatobapake ma tau gea ma goronaka abe ma oraha yomahuba Unangiye.

²² Ho igoungu abe nako haniiki Ma Jou ai Pareta, gea ngade-ngade mata-mataika kiani ihitebini ma titi o awunino. De nako o howono la aofioka, gea kiani o awunu iuihi. Angamoi nako ko iuihua o awunu, gea duru ko idadiua o howono aofi. De kiani hokogea idadi angamoi o howono ma ngongofi gea kiani naga moi ihonenge, de o awunu gea ma dodunguu abe o hohonenge idadioka. Ho genangino ka idadi hamake abe ngaro o behehongo ihira-hiraika eko ngaro o behehongo ma hungioli, masara ma behehongo hinootoo ihititi o awunino.

To Kristusu ai huhuba abe to Una ai awunino gea duru ihiofi to ngone nanga howono

²³ Ho mangale ma titi o awunu idadioka o howono ma ngongofi, gea ma titi hiadono Ma Jou ai Tau o Ngoerino o duniaka kiani ihitebini de o aewani ma awunino. Masara ma tau de ma dola mata-mataika gea tanu hoka ma gurumini dika, de abe ma Tau ma gou-goungu de ma dolaoo ma gou-goungu, gea mata-mata naga daku o Horogaka, abe ka enangohi duru irorahai. Ho nako ma tau abe o duniaka imanoa, gea ka idadi o aewani ma awunu dika yapake la ihitebini enangika. Masara nako ai Tau ma gou-goungu abe o Horogaka imanoa, gea kiani ihitebini de o huhuba moioli abe ka enangohi duru irorahai.

²⁴ De duru ma huhuba gea abe idadi o Kristusu ai hininga ma dumutu ma oraha Ma Jou ai Tau o Horogaka wowohamika. Angamoi o Kristusu Una ko wowohamua o Debi-debini ma Ngiika abe o nyawa manga giamoka de aino yodiai, angamoi ena gea ka ma gurumini dika de ko ma gou-goungua. Masara nako Una gea, Una wowohamika Ma Jou ai Ngi o Horogaika dika la ma oraha naa ka idadi woboa Ma Jou ai himangino ma titi wonaduhunu ngone naa.

²⁵ De ko ma titiua Una wowohama o Horogaika la ka idadi wohigali-gali womahidoaka Ma Jouika. Masara igoungu nako nanga totofora ma dodihirainohi manga hidemo wokokurutiye Ma Jouika, igoungu una gea kiani o tao-taongiye wowohama abe ma Ngi duru Kohamedebinika. De gea kiani o awunu abe ko to unangua ai awunu masara o aewani ma awunu womahihuba Ma Jouiye.

²⁶ Masara nako de o Kristusu duru hokogenangua wodiai. Angamoi nako hokogea o Kristusu kiani ma ngoeika wohigali-gali wowohamika de wao ai huhuba o awunino, gea ma titi kiani wohigali-galioli wohonenge abe ma oraha o dunia naa wotulaadauku ka hiadono ma oraha naa de duru kohangoe Una kiani wohonenge. Masara duru ko hokogenangua idadi. Masara abe igoungu Una hatoli naa ma duru woboa abe ngone hohiromanga hato naa ma oraha ma bobaha. De gea woboa o duniauku naa la waofi o howo-howono ma titi ai badanga womahidoaka de womahidadi o huhuba Ma Jouika. Ho gea ko ma ngoeikaua womahidoaka, masara ma moi dika womahidoaka la wato wonaduhunu ngone o nyawa mata-mataika.

²⁷ De ngone hohioriki abe ngone o nyawa homoi-homoi nako nanga bobaha o duniaka adonoka de gea kiani hohonengoka. Masara gea ma moi dika hohonenge, de ipaha ahao Ma Jou wonatailako de wonaurusu ma titi nanga wowango homoi-homoiino.

²⁸ De hokogenangoo o Kristusu Una ma moi dika wohonenge, ho genangino de ngone o nyawa hatoli homaketero de Una abe ma titi nanga hohonenge. Masara abe homakohowono de Una, gea to Una ai hohonenge idadi o huhuba Ma Jouiye la ngone o nyawa nanga ngoe nanga howono waofioka. De igoungu Una ahao woboali, masara gea woboa ko ma titiua la nanga howono waofioli, angamoi ai karajaanga gea wabootokau. Ho ahao ma oraha woboali ma hinootoino de gea womahimatoko o nyawaika abe duru iwidodamaa de iwingano-nganono Unangika, de ma oraha gea abe Una wadafongo ai nyawa Unangino, angamoi genangoka de ahao ai duduhunu ngoneino duru wohingodu-ngodumoka.