Ibarani 6 - Ma Jou ai Demo-demo o Totobelohoka

Una wotuli-tulihi wonahitiari ngoneino la ufa hioluku nanga Baluhika abe Una gea wonaduhunoka nanga howonino

¹ De ngini naa ka nitedekanaholi abe hiadono naa de ngini ko nibaluhuahi nia ngongakuoka, ho naa abeika ngone hoaguru nanga ngongaku ma dodotokoka la ka idadi ngone hobaluhu Unangika. Ho ngaro ibootohi o Kristusu ai dodotoko ihira-hiraika dika hohigali-gali homadotoko. Abe hoka ma dodotoko abe ngone kiani hanoaka nanga datoro ma homoa de hingakuoli Ma Jouika. Angamoi ma dodotoko ena gea duru ma dekanoka de nihiorikokau, ho ngaro ufa ka ena dika nihigali-galioli nimadotoko.

² De nagali nanga dodotoko ihira-hiraika utuoli, abe gea hoka nanga gogohiki ma hiaturu, de abe hokokia nanga gogianongoru hafokumu o gareja ma himangoka ma oraha hahitagongo moi onangika, de abe ma dodotoko abe ma titi ona yohone-honengoka ahao yokokimomiki manga honengino de ahao Ma Jou waurusu de waputuhu abe hokokia ona homoi-homoi manga baha ka hiado-adonika yaborimake. De nanga dodotoko mata-mata gea tanu ngaro ufa dika de hohigali-galioli homadotoko.

³ Masara koaho ngone hoaguru dika nanga himangika abe de ma dodotoko abe enangohi ikurutiye, de ena gea abe toigo la ngone homadotoko, iti abe Ma Jou wonahigunoa.

^4-6 Masara naga utu nanga gogianongoru abe ona gea ko idadiokaua yoaguru angamoi duru iwiolukoka Ma Jouika. Abe nako ngone hingaku-ngakuoka, gea ngone mata-mata inahitawangeoka de Ma Jou ai dararono la ka idadi hohioriki ma gou-goungu abe gea Unangoka de aino iboa. De gea ngone hakokimakeoka Ma Jou ai hidoaka ma owa abe o Horogaka de auku ngoneuku. De abe nagali ngone homoi-homoi hikokimakeoka Ma Jou o Womaha to ngone nanga boriwowangoka. De nako Ma Jou ai Demo-demo, gea ngone mata-mata hohiorikoka abe ena gea duru ma rorahai. De abe nako Ma Jou ai kuaha abe Una gea ka wakunu wodiai o heheranga, de gea igoungu abe nako ahao ma oraha dokengika de gea ai heheranga hatoli iwoe wodiai, masara abe ngaro ma oraha ngoneokahi naa de ngone homoi-homoi hamakeoka Ma Jou ai kuaha gea. Ho nako Ma Jou ai hiowa mata-mata gea abe ngone hamakeoka nanga wowangoka masara de ahao horehene de hiadono ngone hioluku Unangika, de gea ngone duru ko idadiokaua hotoba de holio Unangika. Angamoi nako hiadono ngone hiolukoka, gea ngade-ngade imaketero hoka Ma Jou ai Ngofaka hihidapakuikali o gotaika de ka ihikaika hingelo o nyawa manga hima-himangoka, de genangino duru homahikangela.

⁷ De gea ka idadi tohiketero de o redi ma tonaka abe ena gea imatobamake o awana ma rorahai ho ma akere yahiihi ma tonakuku. Abe nako ma tonaka gea ka ihikaika ihiferoiye hiadono ihofoko ma joro ma rorahai abe ma tonaka ma dutu wosanangi wamake, de gea ma tonaka ahao Ma Jou wohiowa enangika.

⁸ Masara nako ma tonaka gea ihiwangoiye de o kokomomoko de o ruruubu abe de ma hihikaka, gea ma tonaka ka parahaja dika ho marai itigioka ma tonaka ma dutu wohikoboto enangika de ma bahauku de ena gea ahao atufuku ho ma tonakoka gea ihiofioka. De hokogenangoo ngone naa abe hodadioka to Una ai nyawa, abe ngone naa mata-mata hamakeoka ma owa abe Ma Jouoka de auku, ho gea kiani nanga wowango ihihofoko de o hofoko ma rorahai la ka idadi iwihisanangi Unangika. Masara nako nanga wowango ma hofoko ka o kokomomoko de o hihika dika, gea ahao Una wonahohowono ngoneino.

⁹ Masara ngini ahi gogianongoru abe duru tinidora nginika, ngaro ahi hitiari ma demo gea nginika naga de ma dotoka, masara ngohi ko ma titiua tinihiromanga nginika tato itigioka Ma Jou winihikoboto nginika. Masara ngohi hokogenangua ahi hininga, ma ngohi tonganono de tohioriki abe ngini ahao ma rorahai niamake Unangino. De gea tohioriki angamoi tinihioriki ti ngini nia hiningaka abe niato niwiniiki Unangika. Abe mangale ma titi Una winiduhunoka ti ngini nia howo-howonino ho ngini nioigo niwiniiki la hiadono nia wowango ma datoro imakiniiki abe de o wowango ma ngango ma datoro. De mangale ti ngini nia hininga hokogea ho ngohi duru tohioriki abe ma rorahai ahao ngini niamake Unangino.

¹⁰ De gea ma rorahai ahao niamake Unangino angamoi hohioriki Una gea duru itiai dika ai putuhu abe ma oraha waurusu o nyawaika. Ho mangale to Una ai putuhu ka itiai dika, ho Una duru ko wawohangua nia datoro ma rorahai, masara ahao ngini niamake nia utumu genangino. Abe ti ngini nia karajaanga abe nidiaioka Unangika de abe nia dora Unangika itagioka ma titi niatobaleleani nia gogianongoruika ma dihirainohi ka hiadono ma oraha naa naga. De gea nia datoro mata-mata duru ko wawohangua, masara ahao nia utumu Unangino niamake abe ma titi nia datorino gea.

¹¹ De igoungu abe ngini ka ma dihirainohi de duru inimagawe nimakodora ngini de nia gogianongoru. Ho naa ngohi duru toigo la hokogenangoo nia magawe gea niapake nia wowangoka hiadono ngini homoi-homoi nioaguru abe ma titi nanga nganganono nanga ngongakuoka. De gea ahi hininga la ngini homoi-homoi duru ka ihikaika idogo-dogo nia nganganono hiadono ma bahaika, la dokengika de ahao ka idadi nia utumu abe niongano-nganono gea duru ingodu-ngodumoka.

¹² Ho ngohi toigo la ufa initebeturu masara koaho inimagawe, de gea ngohi toigo la nimaaduru abe hoka onangoli yamakeoka ma utumu Ma Jouino, abe manga utumu gea imaketero hoka ma dihiraino wahibehehongoka onangika. De ona gea yamake ma utumu Unangino ma titi manga ngongaku de manga dongohono abe Unangika.

Ma Jou ai behehongo gea duru ko waturuurua

¹³ De gea ena ka idadi hohioriki abe Ma Jou ai behehongo ngoneino gea duru ko waturuurua, angamoi abeika nanga tofora o Abarahaama ai ade-ade homahihohininga. Abe ma oraha gea de Ma Jou wihibehehongo moi o Abarahaamika de gea wohikoboto de to Una ma hirete ai romanga. Angamoi nako Ma Jou de utu mata-mataika, de gea ka Unangohi ai romanga duru ikurutiye, ho ma oraha wohibehehongo de gea to Una ma hirete ai romanga womafetongo, la ka idadi o Abarahaama duru wohioriki abe ahao kiani idadi unangika abe imaketero hoka wihibehehongoka.

¹⁴ De gea wihibehehongo o Abarahaamika wato, “Ngohi naa tonihiowa ngonaika de ma gou-goungu abe ani totoforauku tahidadi duru yowoe-woeuku.” Hokogea Ma Jou ai behehongo ma demo unangika.

¹⁵ De o Abarahaama ma dekana womatongohono de womahingano-nganono Ma Jou ai behehongika gea, de ahao ma bahauku de idadioka abe imaketero hoka ma dihiraino Ma Jou wihibehehongoka unangika.

¹⁶ De hokogenangoo de Ma Jou ai behehongo abe wonahibehehongoka ngoneino. De ngone ka idadi duru hohioriki abe Una ahao wohingodumu ai behehongo gea ngoneino. De gea ka idadi tohitararono hokonaa. Abe nako hoka ngone o nyawa homahiketehibehehongo, gea to ngone ma hirete nanga romanga ko homafetongua, masara abe hofetongo, gea kiani o romanga abe enangohi duru ikurutiye. De nako ma romanga abe ikokurutiye de gea ena hofetongoka, de gea ibootokau ma behehongo angamoi gea ena ko idadiokaua haturuuru eko hawohanga ma behehongika.

¹⁷ Ho gea Ma Jou Unangoo wonahibehehongo ngone o nyawaino de o koboto la gea ka idadi duru hohioriki abe ahao kiani idadi abe imaketero hoka wonahibehehongoka. De hokogea wonahibehehongo angamoi Una duru woigo la ngone ka idadi duru hongano-nganono de hohioriki abe to Una ai hininga gea duru ko waturuurua, masara Una wagou-goungu wonahidoaka ngoneino abe o kia dika wonahibehehongoka. De gea ma titi ho hiadono ma oraha wonahibehehongo ngoneino de to Una ma hirete ai romanga womafetongo la ai behehongo gea ka idadi duru de ma buturungoka.

¹⁸ Ho gea Ma Jou wonahibehehongo ngoneino de abe ai behehongo ma demo wotemoka, de ahao wodogo de womafetongo to Una ma hirete ai romanga, la ngone naa ka idadi duru homahinganono ai behehongika de gea nanga hininga duru ko idomo-domoua. Angamoi Una gea ngaro ai behehongo ma demoka eko ngaro ai romangoka ma duru ko idadiua woeluku. Ho ngone to Una ai nyawa abe nanga hininga homoi-homoi imanoa Unangoka la ka idadi wonagoana, ngone naa ka idadi homahinganono ma titi to Una ai behehongika abe wonahibehehongoka ngoneino, de ka idadi hohioriki abe nanga nganganono ma hasili ahao hamake Unangino.

¹⁹ De gea ka idadi duru hohioriki abe ma hasili ahao hamake nanga nganganonino angamoi ngone hohiorikoka ko iwaka ma batingi abe inahikatingaka ngone de Ma Jou, ho ma oraha naa de ngone ka idadi hoboa Unangino. Masara nako nanga gogianongoru o Yahudi ma nyawa abe ma dodihiraino, ona gea ka yomakitingakokahi Ma Jouino ma titi ma ngoere ma biri-birini abe to Una ai Tau ma goronaka, angamoi ona ko idadiua yatilakuru ma ngoere gea la yoboa to Una ai himangino. Masara ngoneoli ma oraha naa, ngone imaketero hoka ka idadi howohamika abe to Una ai ngi duru itebi-tebini doka ma goronaika de homarihimanga de Una genangoka. De nanga nganganono ena gea tohiromanga tato imaketero hoka o tapu moi abe inahiputurungu nanga hiningaka la ko idomoua hiadono ko ihelorua.

²⁰ De naga ma titi moioli abe inahidumutu ma titi nanga gogao Ma Jouika. Abe nako nanga Hidemo wokokurutiye Ma Jouika o Yesusu, Una gea ma hirete abe wohiaturoka la ka idadi ngone hoboa Ma Jou ai himangino. Abe imaketero hoka ma dodihiraino de nanga gogianongoru o Yahudi ma nyawa de manga hidemo yowohama ma ngoere doka ma poretika, hokogenangoo to ngone nanga Hidemo wokokurutiye o Yesusu. Abe Una wohiraika wowohama ma ngi ma goronaika gea, angamoi Una gea to ngone nanga Hihira, la ahao ngone ka idadi hihidoduruika howohama. De gea ka idadi wowohamika angamoi Una wodadioka to ngone nanga Hidemo Ma Jouika, abe Una ai hidemo ma gogere gea hatoli imaketero hoka o Mekisedeke abe ma dodihiraino to unangoo ai hidemo ma gogere, angamoi o Yesusu Una wodadi nanga Hidemo ka hiado-adonika. Ho mangale ma titi o Yesusu ai Hidemo ma gogere gea hiadono ka idadi hohioriki abe to ngone nanga gogao Ma Jouika gea ka hiado-adonika.