Ibarani 5 - Ma Jou ai Demo-demo o Totobelohoka

Abe ma titi nanga Hidemo Ma Jouika to Una ai hininga de ai wowango hokokia

¹ De nako ngone o Yahudi ma nyawa, nako Ma Jou wiiriki de wigoraka womatengo ngoneino la una wodadi nanga hidemo wokokurutiye, una gea o nyawaka de aino wiiriki. De nako womatengo wigorakoka, gea womulaenge wonahidemo Ma Jouika. De womatengo gea ahao wohiaturu nanga tarimakase ma huhuba de nanga howo-howonoo ma huhuba Ma Jouika.

² De mangale ma titi abe nanga hidemo wigora-gorakoka gea unangoo o nyawa, de naga ai hininga ma buturungu ma kuranga ma ngoe abe hoka ngone o nyawa utuoli mata-mata nanga kuranga, ho una gea ka idadi wonaao de ai hininga ma mobole, ngaro ngone utu nanga tobahioriki Ma Jouika ka ikurangohi ho hiadono ma ngoe hangofu.

³ Ho mangale ma titi to unangoo ai hininga ma buturungu Ma Jouika ka ikurangohi iputurungu, ho gea hiadono to unangoo ma hirete kiani ai huhuba womahihuba Ma Jouiye de to ngoneoo nanga huhuba Ma Jouiye wonahihuba la to ngone mata-mata nanga howo-howono atamunohi.

⁴ De ko iwa o nyawa abe ka idadi ona ma hirete yomagorakiye la ona gea yodadi nanga hidemo wokokurutiye Ma Jouika, masara gea kiani Ma Jou wagoraka ona de ahao ma gogere abe de ma horomatioka gea ona ka idadi yamake. De hokogea idadi abe ma dodihiraino de o Harunu, abe Ma Jou wigorakiye la wodadi manga hidemo wokokurutiye.

⁵ De hokogenangoo de o Kristusu abe Unangoo ma ko womagorakua la wodadi nanga hidemo wokokurutiye. Masara gea duru Ma Jou Una ma hirete, de gea to Una ai Baba, abe wigorakiye la o Kristusu wamake ai hidemo ma gogere gea. Angamoi ma dodihiraino de Ma Jou witemo Unangika wato, “Ngohi o wange naa de tomahitaanoka abe Ngona nodadioka ahi Ngofaka, De abe Ngohi tagou-goungu to Ngona ani Baba.”

⁶ De gea Ma Jou Unangoo abe wigorakiye o Kristusu la wodadi nanga Hidemo, abe Ma Jou ai Demo-demoka ma dodihiraino ihitulihukuoka ato, “Ngona nodadioka o Hidemo ka hiado-adonika, de ani hidemo ma gogeroka gea hatoli imaketero de o Mekisedeke ma dodihiraino ai hidemo ma gogeroka, abe unangoo o hidemo womatengo.” Hokogea itemo ma dodihiraino Ma Jou ai Demo-demoka.

⁷ De nako ma dihiraino ma oraha o Yesusu nagahi o dunia ma lokuokahi de Una naga de ai roehokahi abe imaketero hoka ngoneoli, de ma oraha gea Una duru womaniata de o duduhunu womatobagahoko ai Babaiye, abe womaniata de ai ilingi ma amokiye de nagali ai koongo itifa. De abe womagahoko o duduhunu ai Babaiye de gea ai Baba tanu ka idadi widuhunu la ngaro ufa dika de ai Ngofaka wohonenge. De mangale ma titi o Yesusu womahitipokouku de wihoromati ai Babaika, ho ai Baba wigihene de wopaluhu ai niniata ma demoika de widuhunu Unangika.

⁸ De ngaro Una gea Ma Jou ai Ngofaka, masara gea kiani Unangoo ma kangela de ma huha wohimanga la ka idadi womadotoko genangino abe hokokia wihingounu ai Babaika ngaro ai kangela ma goronaka.

⁹ De gea ai wowango ma dodagi mata-mataika de duru wihingounu ai Babaika ho hiadono duru itiai o Yesusu wodadi nanga Hidemo Ma Jouika, angamoi duru ko iwa ai kuranga Unangoka. De hokogea Una ka wakunu wonaduhunu la ngone abe naga nanga hingounu Unangika, gea ngone ka idadi howango ka hiado-adonika, de gea nanga wowango ma titi ka Unangoka dika.

¹⁰ De gea Ma Jou o Baba wihiromanga Unangika wato wodadioka nanga Hidemo abe ngaro o hidemo mata-mataika ma ka Unangohi wokurutiye, masara igoungu nako to Una ai hidemo ma gogere, gea hatoli imaketero de o Mekisedeke to unangoo ai hidemo ma gogere ma dodihiraino, abe unangoo o hidemo womatengo.

Una wotuli-tulihi wonahigaro la ngone hobaluhu nanga ngongakuoka

¹¹ De abe ma titi o Yesusu ai gogere abe Una gea wodadioka nanga Hidemo Ma Jouika, tanu nagahi o dodotoko ma ngoeohi abe tato tinidotoko genangino, masara ma oraha naa ko tadadiuahi angamoi ngohi tokangela abe tinidotoko hokokia, angamoi ngade-ngade ngini hoka initopongonoka.

¹² De ngini naa ma deka-dekanuku niwingaku Unangika, ho tanu nidadioka o tobadotoko ma nyawa de niadotoko nia gogianongoru utuikali. Masara ngini hadongoo de ma oraha naa kiani o nyawa inidotokoli abe o dodotoko ihira-hira nginika abe Ma Jou ai dodotokino. De gea ngohi tinihiromanga tato ngini nidadiokali hoka o ngofa-ngofaka abe niperelu o huhu ma teongoli angamoi ko niakunokauali niaolomo o inomo ma dodogowini.

¹³ De abe onagona dika ka yohuhuohi, ona gea ka o ngofakohi de ko ihiorikuahi o totiai ma wowango ma dodotoko.

¹⁴ Masara nako o nyawa abe yapoa yaolomo o inomo ma dodogowini, ona gea yobaluhoka, de ona abe manga hiningaka yomadotokoka la hiadono yakunu ihioriki de ihikohowono o kia itiai de o kia itorou. Ho naa ngohi duru tinihigaro la ngini nibaluhu Unangika hiadono ti nginioo nia hininga hokogea itagi.