Ibarani 4 - Ma Jou ai Demo-demo o Totobelohoka

O Pasala 4 ma hitararono ma hidogo Una wotuli-tulihi wonahigaro la ahao ngone ka idadi homahiaini de de Ma Jou

¹ De mangale ma titi nanga totofora utu ko yowohamua ma tonakika gea de ko idadiua yomahiaini de de Ma Jou, ho ngone ma oraha naa naga kiani duru hohidodiai hiniiki Unangika done ngoneoo utu ko idadiua homahiaini de de Una. Angamoi igoungu nagahi Ma Jou ai behehongo ngone ai nyawaino abe wonahibehehongo wato ngoneoo ka idadi homahiaini Unangoka. Ho iti ufa naga nginioka abe ko niwiadonikaua Unangika de gea ko nimahiainua Unangoka, masara abe duru irahai la ngone mata-mata homahiadono Unangika la homahikokiaini de de Una genangoka.

² De gea igoungu abe ona ma dodihiraino naga Ma Jou ai hingahu ma demo ma rorahai ona yoihenoka abe ma titi nako yomahiadono ma tonakika gea de ahao ka idadi yomahiaini de de Ma Jou genangoka. De ngaro ngone naa, ma ngoneoo nengokadauino de naga o hingahu ma demo ma rorahai abe inahingahu-ngahuoka ngoneino, de gea ma titi nanga hiaini Ma Jouoka. Masara abe ona gea ma dodihiraino, ona gea ko yamakeua ma utumu ma hingahu ma demoino angamoi ona ko yangakua ma demoika gea abe yoihenoka.

³ Masara abe ngone naa hangaku-ngakuoka ai hingahu ma demoika, ngone naa ka idadi homahiaini de de Ma Jou. De abe ma titi Ma Jou ai hininga la ngone homahiaini Unangoka, gea ka idadi hohioriki abe duru ma dodihirainohi de wonahideeokau wato ngone ahao homahiaini de de Una. De to Una ai hidee gea wohiromanga wato to Ngohi ahi hiaini, angamoi Unangoka dika de aino iboa ai hidee gea. De abe wohiromanga wato to Ngohi ahi hiaini, enangoo ka idadi hamake Ma Jou ai Demo-demo ma goronaka abe kangano. Abe Una ma dodihiraino wotemo wato, “Ngohi tomahibehehongo ahi hiningaka ma titi ahi ngamo itagi onangika tato, ‘Ona gea ahao duru ko tahigunoakauali yowohama ma tonakika gea abe ma dodihiraino tato nako genangokau yowohamikaka de ka idadi yomahiaini manga dodagino de yogogere de de Ngohi genangoka. Masara naa ko tahigunoakauali yowohama ahi hiaini ma ngiika gea.’” De hokogea Ma Jou wotemo angamoi naga to Una ai hidee abe ma dodihirainohi la wato ngone to Una ai nyawa homahiaini de de Una. De to Una ai hiaini gea abe wonahidiaioka la hamake, gea tanu wohiaturu la hatoli imakiniiki de to Unangoli ma hirete ai hiaini duru ma dodihiraka. Abe Una ka de o dunia de ma dola mata-mataika wohidadi ibootino de Una womulaengoka womahiaini, ho gea to ngoneoo nanga hiaini Unangoka ma dodihiraka gea de wonahidiaiokau.

⁴ De gea ka idadi hohioriki abe to Una ai dulaada mata-mata wohidadi ibooto angamoi ma dodihiraino naga moi Ma Jou ai Demo-demoka ihitulihukuoka abe ma titi to Una ai hiaini abe ma wange ma tumidoka, de gea itemo ato, “De o wange ma tumidi de Ma Jou womahiaini wotulaada angamoi wakokibootokau mata-mata wotulaada.” De Ma Jou ai demoino gea de ka idadi hamake itararono abe Una ma hirete womahiaini ma dodihiraka gea.

⁵ De gea ka idadi hohioriki abe Una ma dodihiraka de wonahideeokau wato ngoneoo ahao homahiaini Unangoka abe hatoli imaketero hoka Unangoli ma hirete womahiaini ma dodihiraino gea. Angamoi mangale ma titi ai hidee ngone ai nyawaino nagau ai hiningaka la wato ngoneoo homahiaini, de genangino ma titi hiadono ai Demo-demo ma goronaka de wofetongo ma titi ai nyawa yowohama ai hiaini ma ngiika. Masara igoungu nako ona ma dodihiraino, ona gea ko wahigunoaua la yowohama genangika. De gea itemo ato, “Ona gea ahao duru ko tahigunoakauali yowohama ma tonakika gea abe ma dodihiraino tato nako genangokau yowohamikaka de ka idadi yomahiaini manga dodagino de yogogere de de Ngohi genangoka. Masara naa ko tahigunoakauali yowohama ahi hiaini ma ngiika gea.” Hokogea itemo Ma Jou ai Demo-demoka, de ngone ka idadi hamake genangino abe ma dodihirainohi de nagau Ma Jou ai hidee la to Una ai nyawa ka idadi yomahiaini Unangoka.

⁶ Ho ai Demo-demoino gea de ka idadi hohioriki abe Ma Jou ai hiaini gea nagahi de Una ka woigohi la ngone ai nyawa homahiaini Unangoka. Masara nako ona ma dodihiraino, ona gea ko yamakeokauali ai hiaini ma titi ko iwiniikua ai mau onangika. Abe ngaro yoihenoka Ma Jou ai hingahu ma demo ma rorahai abe gea yahigaro onangika la yowohama ma tonaka ma goronaika la genangoka ka idadi yomahiaini de de Una, masara ona ko iwihigihenua, ho ai hiaini gea ko yamakeokauali.

^7-8 Masara igoungu abe ma oraha gea de naga manga gogianongoru yamuruono naga abe nanga tofora o Yosua wahihira-hira onangika la ona yowohama ma tonaka ma goronaika de genangoka yamake to Ma Jou ai hiaini. De ngaro ona gea yamakeoka ai hiaini ma oraha o Yosua, masara ipahaino de hamake abe nagahi Ma Jou ai hidee la wato to Una ai nyawa utuoli yomahiaini de de Una. Angamoi duru ma dekanino ipahaino de ahao Ma Jou ma moioli wahigaro ai nyawaika la wato ma oraha genangokali de ka idadi ona yomahiaini Unangoka. De ai higaro gea naga to Una ai Demo-demoka abe ma dodihiraino nanga tofora o Dautu wohitulihuku de enangoo abe ahao kangano ngohi tapakeoka ahi demo ma goronaka. De gea Ma Jou ai Demo-demo ma dodihiraino itemoka ato, “O wange naa ti ngini nia Jou ka winitemohi nginika, ho ma oraha ai demo ma ilingi ngini niihene de koaho niwihigihene Unangika. Ufa nia hininga niwidotogowini Unangika.” Ho nako hoka ma oraha o Yosua dika de ka idadi Ma Jou ai nyawa yamake ai hiaini, marai ko wohigali-galiokaua ai higaro ma demo abe ma oraha o Dautu. Masara ai demo gea wohigalioli la ai nyawa utuikali wahigaro la wato onangoo ka idadi yomahiaini Unangoka.

⁹ De genangino ka idadi ngone hohioriki abe nako to Una ai hiaini gea ko wohibobahauahi, masara nagahi ka hiadono o wange naa. Abe Una duru woigo la ngone ai nyawa homahiaini Unangoka abe hatoli imaketero hoka Unangoli duru ma dodihiraka de womahiainoka o wange ma tumidoka.

¹⁰ De abe ma titi nanga hiaini, gea ena ka idadi tinihitararono nginika hokonaa. De nako hiadono ngone homahiainoka de de Ma Jou, de gea ma titi abe to Una ai Demo-demo hohitihira de hangaku nanga wowango ma goronaka la ibootohi to ngone dika nanga hininga haniikohi. Ho gea nako ngone nanga wowango ko homahiaturokaua masara homahidoaka Unangika la Una dika wonahihira-hira nanga wowango ma goronaka, gea ka idadi hohiromanga hato to ngone nanga karajaangoka de aino homahiainoka. De gea duru imaketero abe hoka ma dodihiraka Ma Jou womahiaini to Unangoli ai karajaangoka de aino abe ma oraha wotulaada angamoi gea wakokibootokau mata-mata wotulaada.

¹¹ Ho ngone naa kiani duru homaribuutu la ka idadi nanga hiaini gea hamake Ma Jouoka, done ngone utu gea ena ko hamakeua ma titi ngoneoo ko haniikua ai demo ngoneino. Ho done imaketero hoka nanga totoforali to Una ai demo ko yaniikua ho hiadono yoruba genangoka. Masara koaho ngone duru homaribuutu la hiadono ngone mata-mata ahao Ma Jou ai hiaini hakokimakeoka.

Abe ma titi Ma Jou ai Demo-demo ena gea duru de ma buturungoka

¹² Ho ngone kiani duru hanii-niiki Ma Jou ai hingahu ma demoika abe ai Ngofaka o Yesusoka de aino iboa. Angamoi Ma Jou ai Demo-demo ena gea duru itobawango de iputurungu. De abe nako to ena ma modoto ngaro o humaranga o dopo-dopoino mata-mataika abe ma doto arihononga, ma ka ai Demo-demohi ena gea duru idoto. Abe imaketero hoka o humaranga ka idadi inatopoko nanga badangoko hiadono nanga dengo-dengo de nanga kobongo ma dututuku ka idadi hamake, hokogenangoo Ma Jou ai Demo-demo gea ka idadi inatopoko ka hiadono nanga hininga ma lifunika, la gea nanga hininga de nanga hidee o kia dika naga duru nanga hininga ma goronaka gea ka idadi ai Demo-demo amake.

¹³ De gea moioo de ko iwa abe to Una ai dulaadoka de ka akunu imagogono la ufa wamake. Masara gea duru mata-mataika imatawangeika dika la Ma Jou ai lako ka yobawilika enangika. Ho Unangika ahao ngone kiani homoi-homoi homahitararono abe ma titi nanga hininga ma datoro mata-mataika. Ho igoungu kiani ngone hohidodiai hanii-niiki ai hingahu ma demoika abe Unangoka de aino iboa.

O Kristusu Una wodadioka to ngone nanga Hidemo wokokurutiye Ma Jouika

¹⁴ De igoungu ngone homoi-homoioka kiani homahitararono Ma Jouika ma titi nanga datorino, masara naga nanga Hidemo Ma Jouika abe ka Unangohi duru wokokurutiye nako de o hidemo utu, de Una gea ka idadi wonahidemo Ma Jouika. De nanga Hidemo gea o Yesusu Ma Jou ai Ngofaka, de Una wodoaiyeoka ho Una nagau ai Babaka abe o Horogaka. Ho mangale ma titi abe Una wodadioka nanga Hidemo wokokurutiye Ma Jouika, ho ngone naa ufa horehene nanga ngongaku ma lifunoka de aino, masara kiani ka genangoka dika homahibitumuku.

¹⁵ De to ngone nanga Hidemo wokokurutiye Ma Jouika, Una gea ka idadi duru wonahioriki abe to ngone nanga hininga ma buturungu ka ikurangohi. Angamoi Unangoo ma dihiraino de iwihiata-atara ma ngoe, de abe o hiatara mata-mataika inadaene ngone o nyawaino, enangoo gea mata-mata iwidaenoka Unangika. Masara ngaro hokogea iwihiata-atara Unangika, masara Una duru ko wahowonua.

¹⁶ Ho gea ufa ngone hohawana homahitigi Ma Jouika abe ma oraha homaniata angamoi to ngone nanga Hidemo Unangoo naga genangoka. Masara koaho hoboa de nanga domoroini Ma Jouika abe Una wonaao de ai hininga ma owa ngoneino. De gea ka idadi ngone hoboa ai himangino ma titi nanga niniatino la gea ai dora de ai owa hamake Unangoka abe ma oraha ena gea duru hoperelu.