Ibarani 3 - Ma Jou ai Demo-demo o Totobelohoka

Nako Ma Jou ai Ngofaka de nanga tofora o Musa, ma ka ai Ngofakohi duru wokurutiye

¹ Ahi gogianongoru abe ngini nidadioka Ma Jou ai debi-debini ma nyawa de abe nginioo hoka ngohioli abe ngone mata-mata wonaahokoka nanga ngongakuino la hakokimake o Horoga. Ahao kangano abe ahi demo ma goronaka de tinihitararonoka abe nanga Duduhunu Una gea ka wakunu wonaduhunu ngoneino, ho abeika hingano-nganonohi ma titi Una gea. De abe naa o Yesusu tihiromangoli tato Una gea Ma Jou ai hidingoto ma nyawa ngoneuku la ai hingahu ma demo wonahingahu-ngahu ngoneino. De Unangoo to ngone nanga Hidemo abe ka Unangohi wokokurutiye nako de o hidemo utu.

² De igoungu nako ma tagongo mata-mataika abe Ma Jou wihitagongoka Unangika, ma o Yesusu duru watobagou-goungu wohingodumu ai tagongo mata-mataika gea abe ai Babaka de aino. De gea duru imaketero abe hoka ma dodihiraino abe Ma Jou wihitagongoka o Musaika mata-mataika abe naga Ma Jou ai tau ma goronaka la una wahiaturu ai nyawaika. De ma oraha gea o Musaoo duru watobagou-goungu ma tagongo wohingodumu abe Ma Jouoka de aino mata-mata gea.

³ Masara nako o Yesusu de o Musa, gea ka o Yesusohi kiani wamake o horomati ma amoko de to Una gea ai romangoo kiani ngone duru hohilamoko. Angamoi nako hohiketero de o tau, gea ka idadi tonaleha. De sarakia, nako ngone moi o tau ma rorahai hamake, gea ka hohigiriiri ma tauika dika, eko koaho ma tau ma dutuika hihigiriiri angamoi una gea wohidadi de wohingodumu abe ai tau gea de ma kiahonangoo mata-mataika? Koaho ma tau ma dutuika hihigiriiri, e?

⁴ Angamoi duru ko iwa moi o tau abe ka ena dika ma hirete de imahidadi, masara homoi-homoiika gea o nyawaka de aino idadi. De igoungu Ma Jou Una ma hirete abe duru mata-mataika wohidadi.

⁵ Masara nako Ma Jou ai tauoka eko ai nyawaka, gea to Yesusu ai gogere de to Musa ai gogere ko imaketeroua. Angamoi ma dodihiraino gea de o Musa watobagou-goungu ai tagongo o tau ma goronaka abe una hoka o duduhunu manga haeke, de una witobaleleani Ma Jouika de ka ihikaika waduhunu Ma Jou ai nyawaika. De abe nako ai tagongo ma dodihiraino, ena gea idadioka hoka o dodunguu moi abe inahimatokohi ngoneino abe hokokia ahao idadi nako ma oraha adonoka. Ho o Musa una gea ka o duduhunu dika,

⁶ masara nako o Kristusu gea Una to Ma Jou ai Ngofaka idodutu, ho Ma Jou ai tau eko ai nyawa gea to Kristusu ai kuahaka mata-mataika. De Unangoo watobagou-goungu wohiaturu mata-mataika abe Ma Jou ai tau ma goronaka. De gea ngone naa abe hodadioka ai tau ma goronaka ma nyawa, iti abe ka ihikaika hotomoroini abe to ngone nanga ngongakuoka de ufa homahipipidili nanga nganganonino, masara gea ka ihikaika hangaku de duru hohioriki abe ahao ma oraha adono de ngone hamakeoka nanga utumu mata-mata abe Ma Jou ma dihiraino wonahibehehongoka wato ahao wonahidoaka ngoneino.

Una wotuli-tulihi wonahitiari la ufa horehene Ma Jouoka de aino

⁷ De ngaro ngone hodadioka to Una ai nyawa, masara kiani ngone ka homahitiariohi la ufa horehene Unangoka de aino. Angamoi abeika Ma Jou o Womaha ai higaro ma demo abe ma dodihiraino ihitulihukuoka, ato “O wange naa ti ngini nia Jou ka winitemohi nginika, ho abe ma oraha ai demo ma ilingi ngini niihene,

⁸ gea koaho niwihigihene Unangika. De ufa nia hininga niatogowinoka dika abe imaketero hoka ma dodihiraino nia totofora o Isiraele ma nyawa yodiai ma oraha ona duru ihilawa-lawana de ihitaili Ngohi abe o tonaka ma kakaahaka.

⁹ De abe genangoka ngaro ka ihikaika yamake to Ngohi ahi datoro de ahi duduhunu onangika abe o taongo moruatino ma dekana, masara ona ihitaili de ihidimoaka Ngohino la ona ihioriki abe nako Ngohi tahohowono onangika eko koua.

¹⁰ Ho Ngohi ma oraha gea duru tangamo onangika de tomatemo ahi hiningaka tato, ‘Ona gea manga hiningaka de ka ihikaika yorehene Ngohioka de aino. De ngaro ahi hiningaka tato tadotoko onangika ma titi to Ngohi ahi hininga ma ngekomo, masara hadongoo de ona gea ihioluku de duru ko ihiniikua Ngohino.’

¹¹ Ho ma bahauku de Ngohi tomahibehehongo ahi hiningaka ma titi ahi ngamo itagi onangika tato, ‘Ona gea ahao duru ko tahigunoakauali yowohama ma tonakika gea abe ma dodihiraino tato nako genangokau yowohamikaka de ka idadi yomahiaini manga dodagino de yogogere de de Ngohi genangoka. Masara naa ko tahigunoakauali yowohama ahi hiaini ma ngiika gea.’” Hokogea ma dihiraino Ma Jou womahibehehongo ai hiningaka ma titi nanga totofora manga rerehene ma hininga.

¹² Ho ahi gogianongoru, ngini kiani nimahitiari de homoi-homoiika nimaagoana done naga nia hiningaka ma dorou de hiadono ko niangakua to Ma Jou ai behehongo ma demoika, de done genangino ma titi hiadono nirehene Ma Jouoka de aino de niwioluku Unangika abe Una gea duru wotobawango.

¹³ Masara koaho o wange-wangeiye ngini nimahikokagaro ma totiaiika, la ufa ngini utu inibudi ma titi o howo-howonino hiadono nia hiningaka itogowinoka Ma Jouika. De gea ma oraha naa de imahikaika ngini kiani nimahikokagaro ka ihikaika ka hiadono ma oraha ko iwaka abe nimahikokagaro.

¹⁴ Angamoi nako hoka ngini nimahirehene o Kristusoka de aino, gea ngini niwiporetoka Unangika. Masara iti ka ihikaika nia hiningaka imahisoika to ngone nanga ngongaku de nanga nganganono ma lifunika abe ma dihiraino de niihenoka, de ko nimahipipidilua genangino ka hiadono nia wowango ma baha adonoka. De nako hokogea ngone, gea inahitaanoka abe ngone duru hodadioka o Kristusu ai dodiawo ma titi ai kuahaka, abe ahao Una wonahikokodoku to Una ai kuaha ngoneino la ngoneoo naga de nanga kuahaka.

¹⁵ De gea igoungu abe kiani ka ihikaika hasoika nanga nganganono ma lifunika, angamoi abeika holegali Ma Jou ai Demo-demoika abe ahao kangano hoihenoka. De ai demo gea itemo ato, “O wange naa ti ngini nia Jou ka winitemohi nginika, ho ma oraha ai demo ma ilingi ngini niihene de koaho niwihigihene Unangika. De ufa nia hininga niatogowinoka dika abe imaketero hoka ma dodihiraino nia totofora o Isiraele ma nyawa yodiai ma oraha ona duru ihilawa-lawana Ngohino.” Hokogea ai demo ma dodihiraino.

¹⁶ De naa tonaleha gea onagona honanga abe ma dodihiraino yoihenoka ai hingahu ma demoino masara ka iwilawa-lawanohi Ma Jouika? De mode ona gea abe o Musa wahihira-hira de wahihupu o Mesiiri ma tonakoka de aino de ona gea iwilawana Ma Jouika? Igoungu, ona gea. Abe ona ko o homoaua ma nyawa, masara gea Ma Jou ai nyawa ma hirete abe ma dodihiraino iwinii-niiki Unangika masara ma bahauku de ona yorehenoka ai demoino.

¹⁷ De sarakia, onagona abe Ma Jou ai hininga yahuha ho hiadono Una wangamo onangika o taongo moruatino ma dekana? De gea onangoo abe yahowo-howono Unangika de hiadono yokokihonenge o tonaka ma kakaahaka, de gea manga hone-honenge ka yanoaika dika genangoka.

¹⁸ De naa tonalehali, sarakia, gea ma titi onagona abe ma dodihiraino Ma Jou womahibehehongo wato, “Ona gea ahao duru ko tahigunoakauali yowohama ma tonakika gea abe nako genangokau yowohamikaka de ka idadi yomahiaini manga dodagino de yogogere de de Ngohi genangoka”? Gea bote ma titi onangoo abe ko iwihingounua Unangika.

¹⁹ Ho gea hamakeoka de duru itararono abe ona Ma Jou ai nyawa ma dodihiraino ko idadiua yowohama o Kanani ma tonakika abe ma titi ona ka yoluku iwingaku Unangika.