Ibarani 2 - Ma Jou ai Demo-demo o Totobelohoka

Una wotuli-tulihi wonahitiari la ufa horehene o Abari ma Rorahaiino

¹ Ho mangale ma titi naa ma duru Ma Jou wonatemoka abe to Una ai Ngofakino, de ma titi abe ka Unangohi duru wokokurutiye nako de o momalaekata, ho ngone naa kiani duru hohidodiai hototoihene de haniiki ma hingahu ma demo abe ngone hoihenoka, done genangoka de aino horehene,

² de gea ahao Ma Jou wonahohowono ngoneino. Abe nako to ai Ngofaka ai demo de ngone ko hotoihenua, gea hohioriki abe Una ahao kiani wonahohowono ngoneino. Angamoi abeika ngaro ma dodihiraino ma nako hiadono Ma Jou ai hingahu o nyawa yatilakuroka, ona gea kiani yamake manga hohowono. Abe ma dodihiraino de Ma Jou ai hingahu ma demo moi ai momalaekata yadofanga nanga totoforaika, de gea ena ma hingahu ma rahai abe ahao ihiromanga o Musa ai Pareta. De ma hingahu gea ena idadi o behehongo abe duru de ma buturungoka. De nako hiadono o nyawa yatilakuru de ko yaniikua ma hingahuika gea, ona yamakeoka manga balaha abe imakiniiki de manga howono.

³ Ho genangino de duru itararono abe nako ma dodihiraino gea de ma oraha naa, masara ka ma oraha nenangohi itubuho nanga hohowono hamake nako ko hotoihenua to Ma Jou ai Ngofaka ai hingahu ma demo ngoneino. Angamoi abeika, nako to Una ai Ngofaka de to Una ai momalaekata gea ka ai Ngofakohi duru wokurutiye. Ho nako ma dodihiraino gea de Ma Jou wahohowono onangika abe ko yaniikua ai hingahu gea abe o malaekatoka de aino iboa, done sarakia ngoneoli ma oraha naa? Angamoi Ma Jou ai hingahu abe ngone naa hanii-niiki de abe duru inaduhunu nanga howo-howonino, ena gea nanga Baluhu idodutu ma hireteoka de aino iboa. Ho nako hiadono ngone ko holegaikaua to Una ai hingahu ma demoika abe genangino hamakeoka nanga duduhunu duru kohaamoko, gea duru ka ngoneohi kiani hamake nanga hohowono Ma Jouoka de aino. Ho duru ko iwa ma ngekomo la hato hodokaowara nanga hohowonino gea! De abe nanga Baluhu idodutu ai hingahu ma demo ngoneino, ena gea ma dihiraino de Una ma hirete wahingahu-ngahu o nyawaika, de ipaha ahao ona abe yototoihene ai demoino, onangoli yadofanga ai hingahu ngoneino. De gea ona inahimatoko abe enangoo Ma Jou ai hingahu ma demo abe duru ma gou-goungu de duru de ma buturungoka, de abe imaketero hoka ai hingahu ma demo ihira-hiraika o Musa ai Pareta enangoo gea ma gou-goungu.

⁴ De ma oraha gea abe yadofanga ai hingahu ma demo ngoneino de Ma Jouoo wahitaana enangika de ai dodunguu de ai heheranga la gea ka idadi ngone hohioriki abe ai hingahu gea enangoo duru ma gou-goungu. Abe ma oraha gea naga irupa-rupa idadi abe inahimatoko to Una ai kuaha. De nagali Ma Jou o Womaha ai hiakunu abe ikarajaanga to Una ai nyawaka la enangoo yahitaana o nyawaika abe ai hingahu ma demo gea duru ma gou-goungu. De ai heheranga mata-mata gea duru imakiniiki de to Una ai mauino. Ho mangale ma titi to nanga Baluhu ai hingahu ma demo duru itararono abe ena gea Ma Jouoka de aino iboa, ho ufa hiadono ngone horehene genangoka de aino la ai hohowono hamake, masara koaho ngone hohidodiai haniiki enangika dika.

O Yesusu Una wodadi o nyawa la ka idadi wonaduhunu hiadono ngoneoo naga de nanga medebini ma dararonoka

⁵ De gea naga ma titi moiohi hiadono ngone koaho hohidodiai haniiki nanga Baluhu idodutu ai hingahu ma demo gea abe inahingahu ma titi hokokia wonaduhunu nanga howonino. Angamoi igoungu ma dodihiraino de Ma Jou wapake ai momalaekata la to Una hingahu ma demo ihira-hira gea wahidoaka nanga totoforaika. De ngaro ai malaekata gea hatoli yokurutiye masara ka ai Ngofakohi duru wokurutiye nako de ona. Masara naa tonaleha moi ma titi ngone o nyawa nanga gogere. Ho sarakia, nako o dunia naa, gea ahao ma oraha dokengika de idadi to onagona manga kuahaka? De gea ahao ma oraha dokengika de o dunia ko o momalaekatua manga kuahaka, masara gea Ma Jou wohiaturu la wato ahao ma oraha gea adonoka de ahao o dunia naa idadi to ngone o nyawa nanga kuahaka, ho gea ka ngoneohi abe de nanga kuahaka nako de o momalaekata ma oraha gea. Ho ngaro nanga Baluhu ma dihiraino de womahitipokoukuohi la Una de ngone homahigogere moi o duniaka, masara nagahi to Una ai gogere abe hatoli ikurutiye.

⁶ De abe Ma Jou ai hidee gea ma titi ngone o nyawa, gea ka idadi hohioriki ma titi ai Demo-demoino abe ma dodihiraino ihitulihukuoka ato, “Jou, done ma titi o kia naga ngomi o nyawaka hiadono Ngona nomingano-nganono? De ngomi naa ko kia-kiaua imidaene, ho ma titi o kia hiadono nomalega ngomiuku?

⁷ De ngaro hokogea ngomi, masara Ngona ani hiningaka nohiaturu la to ngomi mia gogere ngade-ngade hoka o malaekatoli manga gogere ma gurutiye, masara ka to onangohi hatoli ikurutiye ma hohutulu. De gea ngomi duru nomigorakiye hiadono ngomi o nyawa naga de mia horomatioka, de nagali mia medebini ma dararonoka,

⁸ angamoi ani dulaada mata-mataika de gea nomihidoaka la idadi to ngomi dika mia kuahaka mata-mataika.” Hokogea itemo Ma Jou ai Demo-demoka abe ma dodihiraino. De abeika gea ma demo ma goronaka de itemo ato, “mata-mataika idadi to ngomi mia kuahaka,” de genangino abe duru itararono moioo de ko iwa la ko nanga kuahakaua. Ho naa tonaleha, gea ma demo idadioka eko kouahi? Ho sarakia, o duniaka naa mata-mataika gea idadioka to ngone nanga kuahaka? Koua, marai kouahi, e? Ma oraha naa ko idadiuahi abe o duniaka naa idadi to ngone nanga kuahaka mata-mataika.

⁹ Masara ngaro to ngone o nyawa nanga kuaha ko ingodumuahi, masara nako o Yesusu, Una gea duru de ai kuahaka ma oraha naa, angamoi Una iwigorakiyeoka de iwihoromatioka, de naga de ai medebini ma dararonoka. Ho abeika, Ma Jou ai behehongo abe ngone o nyawaino ma dodihiraino gea abe wato wonahidoaka o kuaha ngoneino, gea de Una wohingodumoka ihira abe o Yesusino. De gea tonaleha, ma titi o kia hiadono o Yesusu ma oraha naa naga de ai kuahaka? De gea ma titi abe ma dodihiraino de iwihitipokouku jai-jai ma oraha Ma Jou wihidadi o nyawa, ho nako to Unangoo ai gogere o duniaka de o malaekata manga gogere, masara ma oraha gea de ka o malaekatohi manga gogere hatoli ikurutiye ma hohutulu angamoi Una wodadioka o nyawa. De hokogea Ma Jou wohiaturu la o Yesusu wodadi o nyawa la ka idadi Una wohonenge ma titi ngone mata-mata, de gea ai datorino de ngone ka idadi hamake Ma Jou ai hininga ma owa. Ho mangale ma titi o Yesusu womahigunoa la iwihitipokouku de iwihikangela ka hiadono wohonenge, ho gea ena ma titi hiadono Ma Jou duru wigorakiyeoka la ka idadi o Yesusu wamake o horomati de o medebini ma dararono.

¹⁰ De abe ma titi Una iwihikangela hiadono wohonenge, gea kiani idadi hokogea la imakiniiki de to Ma Jou ai hininga ma dumutu abe ma titi ngoneino. Angamoi Una ma dodihirainohi de wonahideeokau ngone homoi-homoiino wato ngone ai ngofa-ngofaka ko nanga ngoe ahao naga to ngone nanga medebini ma dararono abe ma oraha ngone naga Unangoka. De gea duru imakiniiki de ma demo abe ahao kangano hoihenoka to Una ai Demo-demoino abe inahingahu ato ahao ngone naga de nanga medebini ma dararono hiadono o dulaada mata-mataika de idadi to ngone nanga kuahaka. De igoungu nako Ma Jou, Una gea o dulaada mata-mataika ma titi, de gea mata-mata wohidadi la ahao Una wamake ma utumu ai dulaada mata-mataino. Masara nako hoka ngone o nyawa abe wonahidadi ai dulaadaino de ko wonaduhunua nanga howo-howonino, ho done sarakia de Una ahao wamake ma utumu ngoneino? Angamoi nako hoka ko wonaduhunua, gea ngone ka homakitingakohi de Una, de gea ka hiadono hohonenge dika. Masara to Una ai hidee duru itaana de itiai, angamoi ma titi to Una ma hirete ai Ngofakino hiadono ngone ai nyawaoo ahao naga de nanga medebini ma dararonoka abe imaketero hoka Unangoli! Ho gea ma titi hiadono Una wihidingoto ai Ngofaka o Yesusu ngoneuku, la ma titi to Una ai kokangelaino o duniaka naa de genangino duru iwihingodumoka la Una wodadi to ngone nanga Hihira de nanga Haeke abe duru wotobalaku-laku. De gea Una abe ka idadi wonahihira-hira ngone naa abe ngoneoo Ma Jou ai ngofa-ngofaka to Una ai ngekomika, la ahao ngoneokaoo naga nanga medebini ma dararono abe imaketero hoka to Unangoli.

¹¹ De gea ahi demo ma goronaka abe ngohi tonahiromanga tato “ngoneoo Ma Jou ai ngofa-ngofaka,” de gea ahi demoino duru igoungu abe ngaro o Yesusu eko ngaro ngoneoo naa, ma gea tanu ngone mata-mata nanga Baba gea ka womatengo dika. Ho ngaro Una gea abe wonahitebini nanga howo-howonino eko ngaro naa ngone abe wonahitebi-tebinoka, masara mata-mata to ngone nanga Baba gea ka womatengo dika. De gea ma titi hiadono o Yesusu ko iwimalekua womahidodoto ngoneino, angamoi ngone o ria-dodoto moi de ngone mata-mata hokokibaba Ma Jou o Babaika.

¹² De gea duru imakiniiki de o Yesusu ai demo ma dihiraino abe wotemoka ai Babaika wato, “Ngohi ahao tahingahu-ngahu ani hininga de ani datoro abe ona ahi doo-dodotika abe ihinii-niiki, de ma oraha abe mimatoomuino de mimahuba Ngonaika de ahao Ngohi tonihigiriiri de o nyanyianga.”

¹³ De nagali ai demo abe Una wato, “Ngohi naa tomahinganono ka Unangika dika.” De naga moiohi to Yesusu ai demo abe ma dodihiraino wato, “De abe nako Ngohi de Ma Jou ai ngofa-ngofaka abe wohihitagongo Ngohino, de ngomi naga nenangoka de mimahidiaioka la wiwihingounu Unangika.” Hokogea to Yesusu ai demo ma dodihiraino, de gea ai demoino ka idadi hamake abe Una ma hirete wonafetongo wato to Una ai doo-dodoto, ho igoungu Una de ngone nanga Baba ka womatengo dika.

¹⁴ De igoungu abe ngone Ma Jou ai ngofa-ngofaka naa, ngone o nyawa abe de nanga roehoka de nanga awunoka, de o Yesusoo wodadioka o nyawa la ai rupa duru imaketero hoka ngoneoli, abe ma oraha gea de Unangoo naga de ai roehoka de ai awunoka. De gea ma titi o kia ai hiningaka hiadono wodadi o nyawa? De gea o nyawa wodadi la ka idadi wohonenge, angamoi gea ai hininga ma dumutu la ai hohonengino de o Ibilihi ma haeke ma kuaha wawedere, abe ena gea ikoano o hone-honengoka. De duru hokogea idadioka abe wawederoka o Ibilihi ma haeke ma kuaha,

¹⁵ ho hiadono ngone naa ngaro ufa de hohawanohi o hone-honengika. Angamoi ngaro ma oraha homaboaino ka hiadono ma oraha naa de ka hohawanohi o hone-honengika ma titi ena gea inahipareta, masara ibootohi enangika hohawana angamoi o Yesusu wonahihupuoka nanga hawanoka de aino ma titi ai datorino hiadono o hone-honenge ko inahiparetakaua.

¹⁶ De gea ngone hohiorikoka abe nako o malaekata, ona gea ko yohone-honengua, ho ko iwa o malaekata abe yohawana o hone-honengika. Ho gea duru itararonoka abe ko o malaekatua o Yesusu waduhunu de wahihupu o hawa-hawanino abe yohawana o hone-honengika, masara gea ngone wonaduhunu abe ngone to Abarahaama ai totoforauku.

¹⁷ De mangale ma titi ai hiningaka woigo wonaduhunu ngone, ho ma dihiraino gea de kiani wodadi duru womaketero hoka ngoneoli abe nanga rupa de nanga hiningaoo kiani duru hoimoi. Abe o kia dika naga ngone o nyawa hamao nanga hiningaka, gea ena Unangoo kiani wamao to Unangoo ai hiningaka. Angamoi Una wodadioka to ngone nanga Hidemo Ma Jouika abe Unangohi duru wokokurutiye nako de o hidemo utu, la gea ka idadi duru wonaduhunu Ma Jou ai himangoka ma titi nanga gogao Unangika, la gea Ma Jou wohitiai nanga gogao hiadono gea itiaiokali. De nanga gogao gea wohitiai abe ma oraha womahihuba moi Ma Jouiye ma titi ngone la genangino de nanga howo-howono Ma Jou waofioka. Masara nako hoka nanga Hidemo Ma Jouika abe Unangohi duru wokokurutiye de gea nako hoka ai hininga imakohowono de to ngone o nyawa nanga hininga, gea done sarakia una wonahioriki nanga hininga ma dola, de done sarakia wonadora ngoneino? Ma nako to ngone naa nanga Hidemo wokokurutiye Ma Jouika o Yesusu, Una gea ma dihiraino de wodadi o nyawa de wamaoka to ngone nanga hininga mata-mataika abe imaketero hoka ngoneoli hamao. Ho gea Una wodadioka nanga Hidemo Ma Jouika abe Una naga de ai hininga de ma doraka ngone ai nyawaino, de gea hohioriki abe Una watobagou-goungu ai demoika, ho ngone duru ka idadi hingaku Unangika.

¹⁸ Ho mangale ma titi abe ma dihiraino de Una ma hirete iwihiata-atara hiadono wokangela, ho ma oraha naa Una ka wakunu wonaduhunu abe ma oraha ngoneoo inahiata-atara. De gea mata-mata abe Ma Jou wohiaturu la wonaduhunu ngone nanga howo-howonino, hokogea wodiai la ma oraha abe ngone naga Unangoka de ahao ngoneoo naga de nanga medebini ma dararono, de hokogea to Una ai hidee abe duru ma dodihirainohi ma titi ngone ai nyawaino.