Ibarani 13 - Ma Jou ai Demo-demo o Totobelohoka

Una wotuli-tulihi wonahibehehongo ma titi nanga wowango ma goronaka

¹ De naa, ahi gogianongoru, ngini kiani nigila-gilahi nimakodora abe hoka itiai o gogianongoru o ngongaku moioka yomakodora.

² Abe nako naga o nyawa yoboa manga gurutoka de aino de ona yotulu nia tauino, ona gea ufa niaoluku masara ka idadi niadafongo nia tauino la yomahidodogumu nginioka. De gea ufa niawohanga abe hokokia ma dodihiraino idadioka, abe o nyawa yadafongo manga tauino ona abe yotagi-tagi, masara gea ipahaino de ahao ona o tau ma dutu yahioriki ona gea abe yomahidodogumika gea tanu ko o nyawa biahaua masara o malaekata. Ho marai nginioo ahao niadafongo bote Ma Jou ai malaekata.

³ De nako ona abe yabuioka, ngini kiani niangano-nganono ma titi ona la niolega manga pereluika, abe gea ngade-ngade imaketero hoka nginioo inihidubuika ka ma moi de ona o bui ma goronaka. De nako ona utuoli abe o nyawa yahikangela onangika, genangoo ma ka idadi nia hininga itagi onangika de manga perelu niolegaika, angamoi nginioo nihioriki de niamaoka ma kangela nia badangoka abe imaketero hoka onangoli.

⁴ De ngini mata-mataika kiani nimahitiari la ufa niaruwae o gogiabereki manga gogaoika. Angamoi onagona dika abe yomakitigi ko itiaiua, ona gea ahao kiani Ma Jou wahohowono onangika. De ngini onagona dika abe niilakoka, ngini kiani duru niogoana nia gogao abe ngini o giaberekioka de ufa nimakitigi de utuika.

⁵ De ti ngini nia wowango ma goronaka de ufa niohafini o tiwika, masara koaho ngaro ti ngini nia kiahonanga iwoe eko ngaro hatoli ihutulu, ma koaho niriidi dika nia hiningaka. De gea ka idadi ngini niriidi angamoi ma dodihiraino de Ma Jou Una ma hirete wonahibehehongoka ngoneino wato, “Ngohi naa duru ko toninoaikaua ka hiado-adonika, masara Ngohi duru ka ihikaika ngonaka la tonigoana.” Hokogea ai behehongo ma demo abe ma dodihiraino ihitulihukuoka.

⁶ De mangale ma titi ai demoino gea ho duru inahiputurungu nanga hiningaka hiadono ngone ka idadi hotemo hato, “Nanga Baluhu idodutu Una gea to ngohi ahi Duduhunu ho ngaro ufa dika de ngohi tohawana. Angamoi mode sarakia hiadono o nyawa dika de ka akunu ihiruwae ngohino? Duru ko idadiua ihiakunu!”

Ngone kiani ka ihikaika homanoa to Una ai behehongo ma hungioka de ufa hogilio ma behehongo ihira-hiraika

⁷ De ngini kiani niangano-nganono ona ma dihiraino abe yodadioka ti ngini nia doomu ma hihira, abe ona gea inidotokoka Ma Jou ai Demo-demo nginika. De gea ka idadi nimahihohininga ma titi to ona manga wowango ma hofoko ma rorahai nginioka abe ka hiadono yohonenge, la ngini nimaaduru nia ngongakuoka abe hoka to onangoli manga ngongaku Unangika ma dihiraino.

⁸ De nako o Yesusu Kristusu, Una gea ai hininga duru ko waturuurua. Abe ngaro duru ma dodihirainohi ka hiadono ma oraha naa naga ma Una ai hininga ko waturuurua, ma ka hokogea dika ai hininga. De ngaro nenangoka de imahikaika ma Una ahao ko waturuurua ai hininga ka hiado-adonika.

⁹ De nako to Una ai hininga ko waturuurua, gea ma titi to Una ai dodotoko enangoo ma ko ituruurua. Ho ngini ufa hiadono o dodotoko utuoli inihiloarika la enangikali nianiikoli. Angamoi igoungu naga o dodotoko utu kohangoe, de naga utu genangino abe to ena ma dola duru o fara moi ma hidumutu. Ho ngini naa ibootohi nimahigunoa la inihirehene ma dodotoko utuikali gea. Abe naga utu o nyawa manga dodotoko o fara moi ma titi o inomo o kia haolomo de o kiali ko idadiua haolomo. De ngaro ona ma dodotoko abe ma dumutu o inomika gea duru ka ihikaika yatobaniiki to ena ma hiaturu, masara gea duru ko yaduhunua Ma Jou ai himangoka. Ho ngohi tato, ngone naa ngaro ufa homahitoofo nanga hiningaino de o inomo ma rupa o fara moioli gea, abe ma titi to ona gea manga dodotoko. Masara nako to ngone nanga hininga, gea irahai homahitoofo de Ma Jou ai owa dika ngoneino.

¹⁰ De nako ngone naa abe hingaku-ngakuoka o Yesusika, to ngone nanga huhuba Ma Jouika abe iwihisanangi hiadono waofi to ngone nanga howo-howono Unangika, nanga huhuba gea nanga Baluhu idodutu o Yesusu dika. Masara nako ona abe ka yaniikohi ma behehongo ihira-hiraika de ka yapakeohi de o aewani yomahihubahi Unangika la ato manga howono waofi, de ona gea ko yamakeua o hidoku moi to ngone nanga huhubaino.

¹¹ De abe ma titi ona ko yamakeua o hidoku nanga huhubaino, gea ka idadi tonahihohininga ma titi to ona manga huhuba ma hiaturu abe ma dodihirainohi. Abe o taongo moi ma moi ona yodiai manga Howono ma Dadamunu ma wange. Ho abeika hafikirohi manga huhuba ma hiaturu gea, angamoi manga Howono ma Dadamunu ma wangeoka gea de ona duru ko kia-kiaua yamake de yaolomo manga huhubaino. De ma wangeoka gea de yomahihuba o aewani Ma Jouiye la ato manga howo-howono waofi. Masara ngaro manga hidemo Ma Jouiye biaha yatobamake o hidoku moi manga huhubaino, masara o Howono ma Dadamunu ma wangeoka gea de ko idadiua yamake manga hidoku. Angamoi kiani ma aewani ma badanga ma gahumu yao ona mata-mata manga hijai-jai ma kapongo ma poretoka de genangoka yatufuku ka hiadono itinoka, ho moioo de ko iwa abe yamake manga hidoku genangino. De gea ma aewani ma roehe duru itinoka ho ma awunu dika abe o Yahudi ma nyawa manga hidemo wokokurutiye Ma Jouika wao o Ngi duru Kohamedebini ma goronaika. De gea ma titi hiadono ma wangeoka gea de manga hidemo ko yamakeua manga hidoku ma aewanino gea abe yomahihubaka.

¹² De nako o hiketero hodiai, ngade-ngade hokogenangoo idadi abe ma oraha o Yesusu womahidadi to ngone nanga huhuba Ma Jouiye de gea ai honengino de ka idadi wonahitebini ngone ma titi ai awunino. Angamoi Unangoo iwihikangela de iwihohonenge ma kota ma poretoka abe imaketero hoka ma aewani ma badanga abe o Howono ma Dadamunu ma wangeoka de enangoo yatufuku ona mata-mata manga hijai-jai ma kapongo ma poretoka. De imaketero hoka ma huhubaino gea de manga hidemo ko yamakeua o hidoku genangino, hokogenangoo de ona ko yamakeua o hidoku abe to ngone nanga huhuba o Yesusino. De ngaro onagona dika abe ka yaniikohi ma huhuba ma hiaturu ihira-hiraika ma onangoo gea ko idadiua yamake manga utumu abe nako de to ngoneoli nanga huhuba ma hungi o Yesusino. De gea ma titi abe ona duru ko yamakeua ma utumu o Yesusu ai honengino.

¹³ Masara nako ngoneoli naa, ngone hamake nanga utumu ma amoko to Una ai huhubaino. Ho mangale ma titi nanga utumu ma amoko gea hamakeoka ai huhubaino, ho ufa hiadono ngone horehene nanga ngongakuoka de aino abe o behehongo ma hungioka. De ngaro o nyawa inangelo ma titi ma ngekomo ma hungioli hanii-niiki, ma ufa homahipipidili genangino. Angamoi nako nanga Baluhu idodutu, to Una ma hirete ai nyawa iwioluku de iwingelo Unangika de hiadono iwihihupu o kota ma poretika de genangoka iwihohonenge. Ho abeika ngoneoo nanga hiningaka de hosanangi dika hanoaka ma kota gea. Angamoi ma kota gea idadioka ma dodunguu o nyawaika ma titi ngone o Yahudi ma nyawa nanga hiaturu ihira-hiraika. De abe ihira-hiraika gea mata-mata Una waturuuruoka de ma hiaturu ma hungioli abe ka enangohi irahai. Ho abeika ngone hanoaka ma kota gea de hoiki Unangika la ka idadi o hingelo ma demo hamake angamoi homafafoino de de Una genangoka.

¹⁴ Ho koaho ufa nanga hininga ihuha ma titi ma kota gea hanoa la hiniiki ma poretika gea, angamoi o duniaka naa de duru ko iwa nanga kota abe itongohono ka hiado-adonika. Masara ngone naa hongano-nganono de hododamaa to ngone nanga kota abe imanoa o Horogaka, ho nako ma oraha adonoka de ahao ngone homahiadoniye ma ngiiye gea.

Abe ma titi o huhuba o kia hodiai la hihisanangi Ma Jouika

¹⁵ Ho ngone naa irahai ka ihikaika hihigiriiri Ma Jouika abe ma titi o Yesusu nanga Duduhunino ho hiadono itagi nanga higiriiri Ma Jou o Babaika. De gea nanga higiriiri ma demo Unangika ahao Ma Jou wamake imaketero hoka nanga huhuba eko nanga hidoaka moi Unangiye. Abe ngaro o aewani ko homahihubakaua Unangiye masara abe ma oraha ngone hihigiriiri Ma Jouika de hifetongo to Una ai romanga, de gea ena nanga uruino ma hofoko abe ka idadi ka ihikaika hihidoaka Unangiye la gea idadi hoka nanga huhuba Ma Jouika.

¹⁶ Masara ufa ka gea dika nanga huhuba Ma Jouiye, angamoi nagahi o huhuba utu ka idadi hotobadiai la genangino hihisanangi Unangika. De abe hotobadiai ma rorahai nanga wowangoka, de nagali abe haduhunu o nyawaika la manga perelu hahidailako. De nanga wowango ma datoro hinooto gea enangoo idadi hoka nanga huhuba Ma Jouiye abe duru iwihisanangi Unangika.

¹⁷ De nako ona nginioka abe inihitobahihira-hira nia doomu ma goronaka, onangika niahingounu de niahigihene manga hiningaika. Angamoi ona gea naga de manga tagongoka la ka ihikaika initobagoa-goana nia hininga homoi-homoi la ato ufa ngini nirehene Ma Jouoka de aino. De nako hoka ahao idadi abe ngini utu nirehenoka ma titi ona manga gogoana nginika ko yodiaiua, gea ahao onangoo kiani yomahitararono Ma Jouika ma oraha wonatailako ngone homoi-homoiino. Ho nako nginioka naga nia hingounu nia hihiraika, de gea ngaro ufa ona yomahitararono Unangika ma titi ti ngini nia datoro. De gea nako niahingounu onangika, ahao manga tagongo ka idadi yodiai de manga garagoka de aino. Masara nako nia hingounu ko iwa nia hihiraika, gea ahao manga hininga idadi itubuho, de nginiokaoo ko niamakeokaua manga tagongino ma utumu.

Una wotuli-tulihi wohibobaha ai hurata naa de ai tabea ma demo

¹⁸ De naa ngohi togahoko la ngini ka ihikaika niminiata ngomi nenangoka. De ngomi naa mimatailakoka mia hininga de ka idadi mimahingahu abe gea ko imakalawanua de Ma Jou ai mau masara imakiniiki dika to ngomi mia hininga de to Unangoli ai hininga. Angamoi to ngomi mia hininga ma dumutu la ngaro o kia dika naga miato midiai, masara duru mioigo la mia datoro gea itaana de ma rorahai dika. Ho gea togahoko la ngini niminiata la hokogea idadi to ngomi mia wowango ma goronaka.

¹⁹ De naga ma titi moiohi abe ngohi duru togahoko la ngini nihiniata ma titi ngohi. De gea duru togahoko la nihiniata Ma Jouiye la ko itedekanokaua de ngohi ka idadi tolio nginika la ngini de ngohi homakamakeokali genangoka.

²⁰ De naa ngohioo tinigahoko Ma Jouiye ma titi ngini, abe ka Una dika ka idadi wonahiriidi to ngone nanga hiningaka la hiadono nanga hininga iriidi Unangoka. De nako Una gea, Unangoo Ma Jou abe wodafongo nanga Baluhu idodutu o Yesusu ai awunu abe Una womahihubaka. De gea ai huhuba ipahaino de ahao wihimomiki o Yesusu ai honengino. De ai momomikino gea de wohitunguu abe to Una ai behehongo ma hungi imulaengoka, abe ai behehongo ngoneino gea ko ihibobahaua masara naa de ka hiado-adonika. De gea wigorakoka o Yesusu la wodadi to ngone nanga hihira de nanga gogoana wokokurutiye, abe ka idadi homahiketero ngone naa abe ngone hoka ai domba o duduono moi ho Unangika ka idadi hihiromanga nanga Domba ma Gogoana abe duru wokokurutiye. De Unangika gea abe ngohi tinigahoko ma titi ngini.

²¹ Ho naa ngohi tinigahoko la Una ahao winihiakunu de winihidailako nginika abe o kia niperelu la nianiiki to Una ai mauika dika. Angamoi nako nia hiakunu de nia hidailako, ngone hohioriki abe ka Una dika ka idadi gea mata-mataika winihingodumu nginika. La gea ngini ahao ka niakunu niwango hokokia la Ma Jou winisanangi nginika. De gea ma titi hiadono ngohi tinigahoko hokogea Unangika, la Una ka idadi winisanangi nginika. Ho naa tihigiriiri Unangika angamoi ka Una dika abe naga de ai medebini ma dararono naa de ka hiado-adonika. De duru hokogea igoungu. Amin. De hokogea ahi gogahoko ma demo abe tininiata Unangiye ma titi ngini.

²² De naa, ahi gogianongoru, duru togahoko nginika la tato ufa niodebeturu ma titi ahi higaro ma demo mata-mata abe ahi huratoka naa tohitulihukuoka, masara togahoko la niomagawe nianiiki ahi demoika, angamoi tanu ahi hurata naa nginika hatoli itipoko dika de ko ikurutua.

²³ De naa moi ngohi tinihingahu nginika la ka idadi nihioriki abe ma titi nanga gianongoru o Timotiusu. Abe una gea ma duruika de iwihihupuoka o bui ma tauoka de aino. Ho ka de una woboa ngohino de ahao ngohi de una miloiki mimakiniiki la minitutumu ngini genangoka.

²⁴ De naa marai ngohi togahoko nginika la ahi tabea niadofanga nia doomu ma hihira mata-mataika de nia gogianongoru utuoo mata-mataika. De naa nanga gogianongoru o Italia ma nyawa abe naga nenangoka ihidodiawoino ngohi, de gea to onangoo manga tabea ihidingoto nginika.

²⁵ De naa ngohi tinigahoko la Ma Jou ai owa winihidoaka ngini mata-mataika.