Ibarani 12 - Ma Jou ai Demo-demo o Totobelohoka

O hiketero moi abe ma titi nanga ngongaku ma wowango ma gogaoino

¹ De naa o hiketero moi ka idadi todiai abe tonahiketero to ngone nanga wowango de o roreebe abe ngone o nyawa nanga biaha homapopaata homaketeroreebe. De ona ma dodihiraino abe duru iwingaku-ngakuoka de to ona manga ade-ade niihenoka, ona gea yomahiadonikaka ma roreebe ma batingika ho ma oraha naa ona ko yomaketeroreebeokaua masara gea inawuni-wuningoli ngone naa abe ko homahiadonuahi ma batingika. Ho mangale ma titi ona gea ko manga ngoe inawuni-wuningi, ho abeika ngone hanoaka o kia dika naga ngoneoka abe ena gea inahikokapaanga hiadono ko hotai-taitua, masara koaho gea ena hanoaka la ka idadi homapopaata de houwini. De o howono o kia dika naga ngoneoka abe biaha ena gea inatobatukoro, enangoo ma kiani hanoa la ka idadi ka ihikaika hoaguru nanga himangika de homapopaata de nanga dongohono ka hiadono nanga roreebe ma batingika homahiadonika.

² De gea nanga popaata ma goronaka de kiani ka ihikaika homalega ka o Yesusika dika, angamoi Una gea ka idadi hihiromanga hato Una to ngone nanga ngongaku ma lifunu de ma dekaroo. Abe ma romanga gea ma titi hokonaa. Nako to ngone nanga ngongaku gea imulaenge Unangoka. De nako ahao ma oraha nanga roreebe ma batingika homahiadonikaka, Unangoo naga genangoka la ka idadi nanga ngongaku duru wohingodu-ngodumoka abe ma oraha homahiadono Unangika. Ho ngone naa ka idadi homaaduru abe hoka o Yesusoli ai hininga, angamoi Una ma dihiraino de ngaro o himaleke wohimanga abe kiani wohonenge o gota isosalioaka, masara ko iwitukorua de gea ena ai ngekomino. De gea Una ka wogila-gila dika de ai dongohono ka hiadono womahiadonika ma batingika angamoi genangoka de ahao wamake ai hadia o garago ma amoko Unangika. De gea womahiadonika de ahao wogogerukuoka Ma Jou o Baba ai kadera ma hohailoa ma nirakoka la genangoka Una de ai Baba yokoano.

³ Ho abeika ngone hongano-nganono abe ma titi o Yesusu ai dongohono ma oraha Una o dunia ma lokuokahi womanoa. De gea ngaro o nyawa duru iwilawa-lawana Unangika masara Una womatongohono hiadono ko worehenua o totiai ma ngekomoka de aino. De to Una ai dongohono gea hongano-nganono la ufa ngone nanga hininga itubuho hiadono nanga ngongaku Unangika homahipipidili genangino.

Abe ma titi Ma Jou wonadotoko ngone ai ngofa-ngofakino

⁴ De igoungu nako nanga gogianongoru ma dodihiraino ona manga ngoe yohonenge ma titi yalawana o howonika. De ngaro nanga Baluhu idodutu ma Unangoo iwihohonenge o nyawa ma titi Unangoo ka woluku waniiki o howonika. Masara nako ma oraha nginioli naa, adodoa ho ngini niheranga ma titi o kangela niaohana? Angamoi gea ti ngini nia wowango ma goronaka de igoungu nginioo nialawana o howonika, masara ko inihohonenguahi ma titi genangino.

⁵ De gea ngini marai ka niawohangoka Ma Jou ai higaro ma demo ma dodihiraino abe gea wahidumutu ngone ai ngofa-ngofakino. De gea wonahigaro la ngaro o kangela haohana ma ka idadi wonahiputurungu genangino. Abe gea ai higaro ma demo wato, “Ahi ngofaka, nako ngona nahowono de hiadono Ngohi ani Baluhu idodutu kiani tonidotoko ngonaika, gea ufa ko nolegaikaua ahi dodotokika, ma kiani nale. De nako Ngohi tonitaere, gea ufa ani hininga ieteke.

⁶ Angamoi onagona dika Ngohi Ma Jou tadora, onangika gea kiani tadotoko, de onagona dika abe Ngohi Ma Jou tafetongo ahi ngofa-ngofaka, onangika gea kiani tadotoko duru de ma dubuho.” Hokogea Ma Jou ai higaro ma demo abe ma dodihiraino ihitulihukuoka.

⁷ De nako ngini ma oraha naa de niagoungu niohimanga o kangela eko o dodotoko nia wowangoka. Ho genangino ka idadi nihioriki abe Ma Jou winiao itiai nginika abe hoka itaana Una wao ai ngofa-ngofakika. Angamoi mode o kiaka moi la ai ngofaka ko widotokua abe wahowonoka? Duru ko ma iwa hokogea!

⁸ De ngone hohiorikoka abe nako Ma Jou Una gea wonadotoko ngone ai ngofaka mata-mataino. Ho nako hoka ngini utu Ma Jou ko winidotokua, gea ma titi abe ngini ko nidadiuahi ai ngofaka idodutu masara ngini gea tanu o homoa dika ma ngofaka. Ho ngaro ufa ngone hoheranga nako o kangela haohana, angamoi genangino de Ma Jou wonadotoko ngoneino.

⁹ De ngaro to ngone homoi-homoi nanga baba o duniaka naa, ma onangoo inadotoko ngoneino, de gea hahoromati onangika. Ho gea nako ka idadi hahoromati nanga babaika o duniaka naa, hongoli kiani Unangikahi hihoromati de hihingounu nanga Baba o Horogaka la gea duru howango irahai Unangoka.

¹⁰ Angamoi nako nanga baba homoi-homoi o duniaka, ona gea o taongo muruonino dika inadotoko abe hokokia dika manga hininga adaene ato irahai inadotoko. Masara nako Ma Jou wonadotoko ngoneino, gea ka ihikaika inahitaana de inahiutumu ngoneino. De gea wonadotoko la ahao ma bahauku de ngoneoo duru hotebini abe imaketero hoka Unangoli duru wotebi-tebini.

¹¹ De igoungu nako Una wonadotoko ho ngone naga ai dodotoko ma goronaka, gea ngone hamao ko iuwinua masara ma dubuho dika hamao. Masara ma dodotoko gea ipahaino de ahao ihofoko nanga wowangoka o totiai ma datoro abe gea inahidoaka ngoneino o hininga ma miriidi. De gea ena ma hofoko ma rorahai ka idadi hamake nanga dodotokino iti homahigunoa la homadotoko genangino de ufa ko hohigihenua Ma Jou ai dodotokika.

Ngone kiani homahiputurungu nanga ngongakuika

¹² Ho ngaro nagahi nia kangela eko nia dodotoko abe ka niohimangohi, masara naa ngohi duru tinihigaro la nimahiputurungu nia ngongakuika done nirehene genangino. Abe nako o roreebe ma hiketero hagorakoli, gea ngini kiani nia badangino nimahiputurungoli la ka idadi nimapopaata niuwini. De abe nia giama de nia buku ilolamaanoka, ena gea kiani nimahiputurungu la ka idadi nioaguru nia himangika de iputurungoka.

¹³ De ti ngini nia lou kiani niapake la niahingekomo o ngekomo abe duru itiaiika de irikotika, la ahao onagona dika inihidoduruino abe ona yosuga, gea ko ihiurotokaua ho ko yopelekua masara ka idadi manga lou itaiti itogumu de iputurungu la onangoo yomapopaata de youwini. De gea ahi hiketero ma demo ma titi hokonaa. De gea ngini kiani o totiai ma ngekomika dika nianii-niiki nia wowangoka la ahao nia gogianongoru abe to ona manga ngongaku ka idomo-domohi, ona gea ka idadi yomaaduru abe hoka nginioli la onangoo yomahiputurungu manga ngongakuika.

Una wotuli-tulihi wonahigaro la hanii-niiki o hininga ma debi-debini

¹⁴ De ngini kiani duru nimaribuutu la ka ihikaika nimakao irahai ngini de o nyawa mata-mataika la o hininga ma miriidi ilaku nginioka. De kiani nimaribuutuoo la o hininga ma debi-debini ka ihikaika nianiiki, angamoi nako hoka ngini ko nianiikua, gea ahao hatoli nimaketero hoka o nyawa abe ko yotebinua. De gea hohioriki ona gea ahao duru ko idadiua iwimake Ma Jou.

¹⁵ De ngini kiani nimakokelega ti ngini mata-mata nia perelu nia boringongakuoka homoi-homoioka, de nimahiketehitiari done utu nginioka yorehenoka nia ngongakuino. Abe done naga utu abe yorehene hiadono manga hiningaka yomaputuhu la ato ko iwiniikokaua Ma Jou de gea ahao to Una ai hiowaikaoo, ma enangoo ma yaolukoka. De gea done hiadono to ona manga hininga gea imahora-hora ngini utuikali hiadono ko nia ngoe inihirehenoka nginioo.

¹⁶ De nimahiketehitiari done ngini utu nirehene abe nimakitigi ko itiaiua. Eko done ngini utu nirehene de hiadono nia horomati Ma Jouika ihutuloka de ko niolegaikakauali to Una ai hiningaika. Angamoi nako hokogea ngini nia hininga, gea imaketero dika abe hoka o Esau ma dodihiraino, abe gea una tanu ahao ka idadiohi wamake ai hiowa moi Ma Jouoka de aino nako hoka wanii-niiki ai baba ai behehongika. Masara una gea wohituruuru to una ai oara ma kuaha la genangino wamake o inomo abe ma moi dika waolomo. De gea ai oara abe tanu kiani una ma riaka wamake ma oraha ai baba wohonenge, masara gea ko wolegaikaua ho hiadono wohituruuruoka.

¹⁷ De gea ufa ngone hawohanga abe o Esau ai oara wohituruuru ipaha de ahao ma oraha ai baba itigioka wohonenge de o Esau duru woigo la ai baba wigahoko ma owa Ma Jouika ma titi una. De gea o Esau womagahoko ai babaika de duru wohigari-gari la wato iti ka idadi wamake ma behehongo ma owa ai babaino. Masara ngaro hokogea o Esau womagahoko de wohigari, masara ma oraha ko iwaka la to una ai hininga womadagali, ho una duru ko idadiokaua ma behehongo ma owa wamake o Esau. Ho ngini ufa nimahigunoa la hiadono nginioka naga utu abe yomaaduru abe hoka o Esauoli ai hininga de ko yolegaikaua Ma Jou ai owaika ho ena gea nihiketehituruuru de ma homoa dika. Masara koaho ka ihikaika nimahiketehitiari de nimakokelega ti ngini mata-mata nia perelu nia boringongakuoka la ahao ngini mata-mata ka nimadaenohi ma owa Ma Jouino.

Abe ma titi Ma Jou ai behehongo hinooto hohidotelega

¹⁸ Ho ahi gogianongoru, ufa ngone naa homaaduru abe hoka o Esauoli ai hininga de haoluku Ma Jou ai behehongo ma owa ngoneino, masara kiani ngone ka ihikaika hohidodiai haniiki enangika la hataana de Ma Jou ai mau. Angamoi ngone naa haniiki Ma Jou ai behehongo ma hungi abe ka enangohi duru ikurutiye nako de o behehongo utu mata-mataika. Abe Ma Jou ai behehongo naa ngoneino ko imakadaenua de ai behehongo ihira-hiraika abe ma oraha nanga gogianongoru o Yahudi ma nyawaika wahibehehongo onangika. Angamoi ma dodihiraino gea abe Ma Jou wahibehehongo onangika de ona duru yohawana, de hongoli ona ko idadiua yomahitigi Unangino masara kiani ma gurutika yomahikitingaka. Ho abeika hafikirohi hokokia idadi ma dodihiraino gea. Abe nako ma oraha gea de o Yahudi ma nyawa yoboa o Sinai ma lokuino abe genangoka naga ma ngoe yamake de manga lako de yoihene de manga ngauku. Abe ma oraha gea ona yamake o uku duru kohaamoko itoka-tokara, de nagali yamake o fufutu abe duru ifufutuholi hiadono yaporohono onangika, de nagali o rato moi yamao abe ma oraha yawuwu onangika.

^19-20 De nagali yoihene o guguli ma ilingi kohaamokiye, de nagali Ma Jou ai huhuloko ma demo ma ilingi onangika abe duru ilamokiye ai ilingi, wato, “De naa Ngohi tinihuloko tato ngaro ngini eko ngaro o aewani de nako yomahitigino de adoko eko yapalanga ma lokuika naa, gea kiani ma aewani eko ma nyawa ngini niahakaru onangika hiadono yohonenge.” Hokogea Ma Jou ai demo onangika. De gea ka de wotemo ibooto de ona duru yokokihawanoka ma titi ai demoino ho hiadono ona duru yomagahoko la ato ibootohi Ma Jou watemo onangika done ko yapoaua yoihene de yohonenge.

²¹ De igoungu ma oraha gea duru o hawana ma amoko idadioka ma lokuoka gea hiadono ngaro o Musa ma unangoo duru wohawana hiadono womahingahu wato, “Ngohi naa duru ihiporohono hiadono tofafara.” Hokogea ma dihiraino o Musa ai demo.

²² Masara nako ngoneoli naa, ngoneoka duru ko iwaka ma batingi abe inahikatingaka ngone de Ma Jou, angamoi ngone naa homanoa o behehongo ma hungioka. De nako ona abe yomanoa o behehongo ihira-hiraka, ona gea Ma Jou ko wahigunoaua la yomahitigi Unangika abe o Sinai ma lokuino. De masara ngone naa ka idadi homahitigi Unangino, masara gea ko o Sinai ma lokuinoua abe homahitigi. Ho gea ka idadi tonahiromanga ngone naa tato ngone homahitigi Ma Jou ai himangino abe o Siono ma lokuoka de to Una Wotobawango ai kotaka abe gea o Yerusaleeme ma kota o Horogaka. De genangoka ko ikurutikaua inahikatingaka masara duru homakitigino ngone de Ma Jou. De gea to ngone nanga ngioka de naga Ma Jou ai momalaekata duru yosana yomatoomuino genangoka de manga gogarago.

²³ De ngone naa homaketero hoka ngone homoi-homoi hodadioka to Ma Jou ai ngofa-ngofaka ma riaka homoi-homoiika. Abe ma titi to ngone nanga utumu de nanga behehongo ma owa Ma Jouino gea duru ilamoko ngoneino abe imaketero hoka womatengo o ngofaka ma riaka abe ka to unangohi ai utumu unangika duru ilamoko. Masara ngone naa mata-mata hamakeoka ma utumu ma amoko Unangoka abe ngone homoi-homoiino, de gea ngone homoi-homoi ai gareja ma doomu hodadioka, de to ngone nanga roma-romanga akokitulihukuoka o Horogaka. De ngone naa homahitiginoka Ma Jou ai himangino abe Una o nyawa mata-mata o duniaka naa to Una ai kuahaka la Una gea wonatobauru-urusu. De nanga doomuoka naa nagali Ma Jou ai totiai ma nyawa manga jiwa abe ma dodihirainohi de ona yohonengoka ho naa to ona gea manga kuranga ko iwaka, masara ona duru yongodumoka.

²⁴ De ngone ko homakitingakikaua de Ma Jou angamoi ngone homahitiginokau o Yesusino, abe Una gea nanga Hidemo Ma Jouika ma titi nanga behehongo ma hungioka naa. De Unangino gea de hamakeoka ma awunu abe ka de inadaene ngoneino de nanga howo-howono Ma Jouika ihiofioka. De nako to Una ai awunu de to Habele ai awunu ma dodihiraino, ma ka to Yesusohi duru de ma utumoka. Angamoi nako to Habele ai awunu, ena gea hoka imagahoko o hibalaha. Masara nako to Yesusu ai awunu, ena gea inahidoaka ngoneino o ngongofi nanga howo-howonika. Ho gea mata-mata inahimatoko ngoneino abe nako to ngone nanga behehongo ma hungi naa de abe ma behehongo ma dihiraino, masara duru ka ma hungiohi naa ihohailoa de ikurutiye.

Ngone kiani hohidodiai haniiki Ma Jou ai demoika abe o Yesusoka de aino iboa

²⁵ Ho ngone naa kiani duru homahidodiai la ufa hiadono hiolukoli Ma Jouika. Angamoi gea Ma Jou Una ma hirete abe wihidingoto ai Ngofaka o Yesusu la Unangoli wonadofanga de wonatemo-temo ngoneino abe ma titi Ma Jou ai Demo-demoino. Ho ngone naa homahidodiai la ufa hiadono hiolukoli o Yesusika angamoi gea tanu Ma Jouikaoo hioluku. De nako hiadono hiolukoli Unangika, gea ahao kiani nanga hohowono hamake Unangino. De gea hohioriki abe onagona dika iwioluku Unangika ahao yamake manga hohowono angamoi ngaro ma dodihiraka ma hokogea idadi. Abe ma dodihiraino de o Yahudi ma nyawa yamake manga hohowono ma titi ona yoluku yaniiki Ma Jou ai demo abe o Musaka de aino wadofanga onangika. De hokogea to ona manga hohowono ma dodihiraino, ho hongoli ngone naa utuohi kiani hamake ai hohowono nako ngone ko haniikua Ma Jou ai demo naa moioli abe nanga Baluhu o Yesusu wohiboa o Horogaka de auku de wadofanga ngoneino. Angamoi nanga tofora o Musa una o duniaka dika ma nyawa, masara nako o Yesusu, Una gea o Horogaka de wauku woboa. Ho nako hiadono ngone hiolukoli Unangika, gea ahao nanga hohowono inadaene ngoneuku.

²⁶ De igoungu ma dodihiraino ma oraha Ma Jou wotemo o Sinai ma lokuoka de genangoka ma tonaka ihikelu-kelu ma titi ai ilingino. Masara ufa hafikiri hato ko iwaka ma oraha abe o nyawa duru iwimodongo Ma Jouika. Angamoi tanu ahao ma oraha adonoka de ma moiokali idadi abe imaketero hoka ma dodihiraino gea. Abe naga to Una ai Demo-demoino abe wohibehehongo wato, “Ahao ma moioli Ngohi naa tohikelu-kelu ma tonaka, masara gea ka ma tonakua dika ahao tohikelu-kelu, masara o dunia de ma dihangoo mata-mataika ahao Ngohi naa tohikelu-kelu.” Hokogea to Una ai behehongo ma demo.

²⁷ De gea ai demo ma goronaka abe wotemo wato, “Ahao ma moioli,” ai demoino gea de itararono abe ahao ma oraha adonoka de o kia dika naga ai dulaadoka abe ka idadi ihikelu-kelu, gea mata-mata ahao wohikelu-kelu hiadono duru wohiofioka. De hokogea wodiai la gea wohiofi ipaha de ahao abe nagahi ma hou, gea to Una ai dulaada abe itongohono ka hiado-adonika, de utu mata-mataika ko iwakau angamoi duru wohiofioka.

²⁸ De nako to ngone nanga ngi Unangoka abe ahao Una genangoka wonahikoano, gea hohiorikoka abe nanga ngi gea ko idadiua ihikelu-kelu masara itongohono ka hiado-adonika. Ho irahai ngone naa hasoino Ma Jou ai hininga ma owa ngoneino de hiadono homahuba-huba Unangika abe hoka itiai Ma Jouika homahuba, abe gea de nanga horomati Unangika de nanga hawana to Una ai hohowonika la ufa Unangoka de aino horehene.

²⁹ Angamoi duru igoungu abe nako ma oraha nanga Jou wahohowono o nyawaika de ai hohowono gea imaketero hoka o uku moi duru kohaamoko abe yahibinaaha mata-mataika abe adaene enangika. Ho gea hiadono tonahigaro tato irahai ngone naa hasoino Ma Jou ai hininga ma owa ngoneino.