Ibarani 11 - Ma Jou ai Demo-demo o Totobelohoka

O Pasala 11 ma hitararono ma hidogo Nanga totofora manga ngongaku ma ade-ade

¹ De nako nanga ngongaku Ma Jouika, gea ma titi o kia? De nako ngone hingaku, gea ma titi ngone duru hohioriki de honganono abe ahao hamakeoka Unangino abe o kia dika ma dihiraino wonahibehehongoka ngoneino. De ngaro naga o kia moi abe ngone ko hamakeuahi de nanga lako, masara ena gea duru hohiorikoka abe ena gea naga de igoungu. De gea ena ma titi o ngongaku ma demoino.

² De ma dodihiraino o kia ma titi ho hiadono nanga totofora utu Ma Jou wadosanangi onangika? De gea wadosanangi onangika abe naga manga ngongaku Unangika dika.

³ De gea to ngone nanga ngongakuino ma titi hiadono ka idadi homangaratii abe o dunia naa Ma Jou wotulaada ai demoino dika. Angamoi ai dulaada abe naa ka idadi hamake de nanga lako, gea idadi ai kuahaino abe ai kuaha gea duru ko idadiua hamake. Ho gea nako hoka ngone ko iwa nanga ngongaku, gea ko idadiua homangaratii abe ai dulaada naa o kiaka de aino idadi.

⁴ De naa abeika homahihohininga ma titi nanga totofora abe ma dodihiraino de Ma Jou wadosanangi onangika. Abe nako o Habele de o Kaini ma oraha ona yahinooto yomaborihuba Ma Jouiye, de gea mangale o Habele wingaku Ma Jouika ho to unangohi ai huhuba itiai nako de ai riaka o Kaini ai huhuba. De o Habele ai datorino gea ma titi hiadono Ma Jou wietongo unangika wato una o totiai ma nyawa. De ngaro o Habele ma deka-dekanuku wohonengoka masara ka idadiohi wonadotoko ngoneino naa ma titi ai ngongaku Ma Jouika.

⁵ De nako o Henoko, mangale unangoo wingaku Ma Jouika ho ko wohonengua masara hokogea dika de ka iwigorakiye. Abe o wange moiuku de ka itodokanino de ko iwiwaka angamoi Ma Jou wigorakoka. De naga ma hingahu Ma Jou ai Demo-demoka abe inahingahu ngoneino abe ko wigorakuahi de o Henoko duru wihisanangi Ma Jouika ai ngongakuino.

⁶ Ho ma demoino gea de hamake abe nako ko iwa nanga ngongaku, gea duru ko hakunua hihisanangi Ma Jouika. Angamoi nako ngone hato hoboa de homahitigi Unangino, gea hotemoua ngone kiani ihira hingaku Unangika. Abe nanga ngongakuoka gea de kiani hingaku abe Una naga, de kiani hingakuoo abe Una ahao wonahibalaha de ma owa ngoneino abe hagou-goungu hilingiri la hato ka idadi hihioriki Unangika. Ho iti naga nanga ngongaku hokogea Unangika de ahao ngone ka hakunu hihisanangi Ma Jouika.

⁷ De mangale o Nuhioo wingaku Ma Jouika ho hiadono una womadiai o kapa la genangino yapake ona abe ai tau ma goronaka la ufa yohonenge ma titi o nguihi. De gea ma dihiraino de Ma Jou wihitiari moi o Nuhika ma titi o hohowono abe ngaro duru o dunia ma dodihirainohi hiadono ma oraha gea masara ma hohowono gea ko ma moiuahi idadi, ho o nyawa duru ko ma moiuahi yamake de manga lako. De ngaro o Nuhioo ma ko ma moiuahi wamake ma hohowono abe hokogea ma rupa, masara una wohingounu Ma Jou ai demoika ho ma kapa womadiai. Ho Ma Jou wifetongo o Nuhika wato una o totiai ma nyawa ma titi to una ai ngongaku Ma Jouika. Masara nako o dunia ma nyawa utu abe ma oraha o Nuhi, ona gea yomahitaana abe manga hohowono kiani yamake, angamoi ona duru yoluku Ma Jou ai hitiari ma demo onangika abe iboa o Nuhino. Ho ma titi ma hitiari gea ona yoluku hiadono ka idadi hamake abe o dunia ma nyawa ma oraha gea duru itiai Ma Jou ai hohowono onangika.

⁸ De nako o Abarahaama, mangale unangoo wingaku ho wihingounu abe ma oraha Ma Jou wihibehehongo unangika wato kiani wanoaka ai tonaka de woiki o tonaka moiikali abe ahao ma tonaka gea Ma Jou wihidoaka unangika la idadi to una ai tonaka. De gea wihingounu de wosoboka, ngaro ma oraha wosobo de ko wohiorikuahi abe ai dumutu gea ma tonaka o kiaka idateke.

⁹ Ho una wodionikika o Kanani ma tonakika, de genangoka womanoa hoka o homoa ma nyawa yomanoa abe ai tau o ngoerino dika, de hokogea wodiai angamoi una ka wingakuohi Ma Jouika. De ngaro ai ngofaka o Isaka de ai danongo o Yakubu, ma onangoo yowango hoka o dionikino dika ma nyawa yowango ma tonakoka gea. De o Abarahaama de o Isaka de o Yakubu, ona mata-mata Ma Jou wahibehehongoka ma owa onangika abe ma titi ahao ma tonaka gea idadi to ona manga tonaka. Masara ona mata-mata yowango hoka o dionikino dika ma nyawa ma tonakoka gea.

¹⁰ De o Abarahaama wosanangi wowango hokogea angamoi una tanu wododamaa to una ai ngi abe Ma Jou ai kotaka o Horogaka. Abe ma kota gea Ma Jou ma hirete wohideeoka de ahao wohidadi ai hideeoka de aino, de ena gea ahao itongohono ka hiado-adonika. Ho ngaro o Abarahaama ka wowangohi o duniaka hoka o dionikino ma nyawa, masara una wongano-nganono abe ahao ka idadi wowango Ma Jou ai kotaka o Horogaka.

¹¹ De mangale to Abarahaama ai ngongaku Ma Jouika ho hiadono iwihiputurungu la una wakunu wodadi o baba, de gea barikua de ngoi fekata o ngo Sara duru ko ma moiuahi de ami badangoka, de hongoli o Abarahaama duru iwiperekioka. De ngaro una de ngoi fekata manga badanga hokogea, masara o Abarahaama duru wangaku Ma Jou ai demoika de womatemo wato, “Nako Ma Jou wohihibehehongoka ngohino, gea tangaku ahao idadi duru imaketero abe hoka ai behehongo ma demo ngohino.”

¹² Ho gea ma bahauku de womatengoino dika naa o Abarahaama de ai totoforauku duru yowoe-woeuku abe ona hoka o murumu o dihangoka manga ngoe de hoka o dowongi imui-muiuku duru kohangoe o gahi ma ngigorino, hokogenangoo manga ngoe to una ai totoforauku. De gea barikua de una iwiperekiokaholi hiadono tanu ko iwaka ai hiakunu ai badangino la ai ngofaka womamake. Masara o Abarahaama ka womamakeohi ai ngofaka ma titi ai ngongakuino.

¹³ De o Abarahaama de o Isaka de o Yakubu, ona gea mata-mata iwingaku Ma Jouika manga wowango ma goronaka de ka hiadono ona yoborihonenge masara ka iwingakuohi Unangika. De gea igoungu abe Ma Jou ai behehongo utu abe ma dodihiraino de wahibehehongoka ona de manga totoforaukuika, gea ma behehongo utu ka yadaenohi, masara utuoli naga ma behehongo abe ko yadaenikaua de ona yaruange yokokihonengoka. Masara ngaro hokogea ma ona ngade-ngade hoka Ma Jou ai behehongo gea ka idadi yamake de manga hininga ma lako abe hoka duru ma gurutikahi ho ahao yanonanako enangika. De gea manga hiningaka duru yodogarago ma behehongika angamoi ona iwingaku Ma Jouika ma titi ena gea ahao idadi. De genangino ma titi hiadono ona yosanangi dika yomahingahu abe ona hoka o homoa ma nyawahi ma tonakoka gea yomanoa-noa, de hoka o dionikino ma nyawa dika genangoka, angamoi ma oraha gea de ko idadiuahi to ona manga tonaka.

¹⁴ De to ona manga hingahu ma demoino gea de duru itararono abe ona manga hiningaka de yongano-nganono o tonaka eko o ngi moioli la ahao genangokali ka idadi yogogere la genangoka idadi duru to ona ma hirete manga ngi.

¹⁵ De gea ko ma titiua to ona ma hirete manga tonaka ma dodihiraino abe yanoakau. Angamoi nako hoka manga tonaka ihira-hiraika gea yongano-nganono, gea nagahi ma ngekomo la ka yoliohi genangika.

¹⁶ Masara duru hokogenangua to ona manga hininga, masara ona duru yoigo la ato yomahiadonika o tonaka eko o ngi abe ka enangohi duru irahai nako de o ngi utu. De gea ma titi tanu yoigo yomahiadono o Horogaiye, abe ma ngi ka enangohi duru irahai. Ho mangale ma titi to ona manga hininga ma dumutu duru itagi Unangika de ai ngiika, ho Ma Jou duru wosanangi ma titi ona gea yomahijou Unangika. De mangale ma titi Ma Jou wasanangi onangika hiadono Una wahidiaioka to ona manga ngi ai kotaka gea abe imanoa o Horogaka.

^17-18 De mangale o Abarahaama wingaku Ma Jouika ho wihidoaka ai ngofaka o Isaka la wato wodadi o huhuba Unangiye abe ma oraha Ma Jou witaili o Abarahaamika. De masara ma dihiraino abe ko witailuahi o Abarahaama de Ma Jou wihibehehongokau unangika ma titi ai ngofaka o Isaka, abe Ma Jou wato, “Ahao ani totoforauku idodutu mata-mataika yomakokiboa o Isakino.” De Ma Jou ai behehongo ma demo gea ihidumutu o Abarahaama ai ngofaka womatengoika dika. De gea o Abarahaama wosanangi wodafongo Ma Jou ai behehongo gea unangika. De ahao ngaro Ma Jou wihuloko unangika wato kiani ai ngofaka womatengo gea wihidadi ai huhuba masara ka idadi o Abarahaama wihingounu ma titi ai ngongakuino.

¹⁹ Angamoi doka o Abarahaama ai hiningaka una wato nako o Isaka kiani wohonenge, gea naga Ma Jou ai kuaha la wihimomikoli ai honengino. De gea ngade-ngade hokogea ka idadi hohiromanga, angamoi gea imaketero hoka o Isaka wohonengoka de Ma Jou wihimomiki ai honengino la wowangoli. Ho gea o Abarahaama ai hiningaka wato ka idadi ai ngofaka o Isaka wihidadi ai huhuba angamoi wingaku Ma Jouika.

²⁰ De nako o Isaka, mangale unangoo wingaku Ma Jouika ho wagahoko ma owa ai ngofaka yahinooto o Yakubu de o Esauika la hokokia ahao yaborimake manga wowango homoi-homoioka.

²¹ De hokogenangoo o Yakubu, abe mangale unangoo wingaku Ma Jouika ho ma oraha abe ngade-ngade wohonenge de wagahoko ma owa ai danongo yahinootoika abe ona o Yusupu ai ngofaka. De ma oraha gea o Yakubu womahitukunuku de ai tutukunu de womahuba Ma Jouiye.

²² De ahao o Yusupoo ngade-ngade ai bobaha adonoka de mangale wingaku Ma Jouika ho ai hininga womahingahu ma titi moi abe ma oraha gea de ko idadiuahi. De gea ma titi ahao ma oraha o Isiraele ma nyawa yokokihupu de yanoa o Mesiiri ma tonaka gea. Abe ngaro duru ma dekanohi de ahao idadi, masara una wohiorikokau abe ona ahao ka idadi yokokihupu ma tonakoka de aino naa, ho una wahibehehongo ai gogianongoruika wato, “Nako ma oraha ahao adonoka de niakokinoa ma tonakino naa, gea ahao kiani ahi honenge niao de de ngini.” Hokogea o Yusupu wahibehehongo onangika ma titi ai ngongakuino.

²³ De mangale o Musa ai dimono onangoo iwingaku Ma Jouika ho ma oraha o Musa ahao ka de womaboaino de ona iwigogono o mede hangeino ma dekana. De manga datoro hokogea yodiai angamoi ka de womaboaino o Musa de iwimake abe una ko o ngofaka biahaua masara duru worahai, de gea ona ko yohawanua yalawana ma koano ai huhuloko ma demoika abe gea ma titi o Yahudi ma nyawa manga ngofa-ngofakika.

²⁴ De mangale o Musa unangoo wingaku Ma Jouika ho ma oraha wobaluhoka de una woluku ai wowango ma gogere abe o Mesiiri manga koano ai tauoka. Abe ma dodihirainohi hiadono ma oraha gea de iwihiromanga ma koano ngoi ora ami ngofaka o dofo.

²⁵ Masara gea de ahao womangiriki ai wowango ma ngekomo wato ufa o hijai-jai dika ma sosanangi waniiki abe gea iboa o howono ma hofokino, masara koaho iwihikangela de de ai gogianongoru idodutu abe Ma Jou ai nyawa.

²⁶ De hokogea womangiriki o Musa angamoi una wohidotelega ai ngiriki hinooto de womatemo ai hiningaka wato ngaro iwingelo unangika ma titi waniiki nanga Koano ai hininga abe Ma Jou wonahibehehongoka wato Una ahao wonaduhunu nanga howonino, ma ka enangohi duru de ma utumoka nako wohidotelega de o Mesiiri ma nyawa manga gurasi de manga kaya mata-mataika. De gea to una ai hiningaka de o Musa wongano-nganono ai hadia ma amoko abe ahao dokengika de wamake Ma Jouino.

²⁷ De mangale o Musa wingaku ho o Mesiiri ma tonakoka de waino wohupu, de gea woara ko mangaleua ma titi abe wohawana ahao ma koano wingamo unangika. De o Musa ka ihikaika wogila-gila waniiki ai ngekomo ma hidumutika de woluku iwihirehene genangino, de gea ma titi to una ai hininga ma lakoka de aino imaketero hoka ka ihikaika widamaana Ma Jouika, abe Una gea tanu ko idadiua ngone himake de nanga lako biaha.

²⁸ De mangale o Musa wingaku ho wahuloko ai nyawaika la yaniiki o Totilakuru ma hiaturu ho yapake de o awunu ihiehe-eheika manga ngora-ngoranoka, done o Tobabinaaha ma malaekata yahohonenge to ona manga ngofaka ma domoro homoi-homoiika.

²⁹ De mangale o Yahudi ma nyawa onangoo iwingaku Ma Jouika ho ona ka idadi o Bongo-bongo ma gahi ma hidogoronaino yoboa de yomahihora doka ma honongaika imaketero abe hoka yotagi-tagi o tonaka ma dudungika. Masara yomahihoraka ibooto de ahao o Mesiiroka manga tentara onangoli ihitaili la yato yomahihora doka ma honongaika, masara ona gea yakokilutuoka.

³⁰ De mangale o Yahudi ma nyawa iwingaku Unangika ho yotagi-tagi ihigilolitoka o Yeriko ma kota hiadono o wange tumidino ma dekana yotagi, de ka de ma wange tumidi ibooto de o Yeriko ma kota ma dadaduhu ikokiturabahoka.

³¹ De nako o Yeriko ma ngofeka gea abe momatobafukunu ami badanga de gea ami romanga o ngo Rahaba, mangale munangoo mingaku Ma Jouika ho ma oraha o Yahudi ma nyawa yamuruono naga yoboaino la ato yatailako o Yeriko ma kota de muna o ngo Rahaba naga ami hingounu Ma Jouika ho hiadono de ami hininga ma rorahaioka de aino madafongo o Yahudi ma nyawa gea. De ma titi ami hingounu gea hiadono ipaha abe ma oraha o Yeriko ma nyawa utu mata-mata yokokihonenge masara muna imihigunoa la mowango ho ko imihohonengua munangika.

³² De naa tanu ma ade-ade naga ma ngoeohi abe ka idadi tonahihohininga, masara ahi oraha ko iwedonua nako mata-mataika toade-ade. Angamoi tanu nagahi to ona naa manga ade-ade, abe hoka to Gideono ai ade-ade, de to Baraka, de to Simsono, de to Yefata, de to Dautu, de to Samuele, de to Ma Jou ai nyawa utu abe ona o hingahu ma demo yatobamake Ma Jouoka de aino de ahao ma demo gea yadofanga manga gogianongoru utuikali. De to ona gea mata-mata manga ngongaku ma ade-ade nagahi abe ko tofetonguahi.

³³ De gea mangale ona homoi-homoi iwingaku Ma Jouika ho ona utu ka yakunu yaparangi de hiadono yahikala o kokoanoika, de utu ka yakunu yotobauru-urusu manga kokawaaha de manga putuhu itotiai, de utu yamake ma behehongo ma owa abe ma dihiraino de Ma Jou wahibehehongoka onangika. De utuoli naga abe ma titi manga ngongakuino ho ka yakunu ihidokaokumu o singa ma uru la ufa yagoli onangika,

³⁴ de utu ngaro o uku ma amokoka masara ko yaukua, de utu ngaro o humaranga o dopo-dopoino ma ngoe yaohana masara manga musu ko yakoronaua ho ko yohonengua ma titi o humarangino. De utuoli naga abe ma titi manga ngongakuino ho ngaro manga buturungu iowahoka masara Ma Jou duru wahiakunu onangika hiadono manga buturungu naga ma amoko, de utu o parangi ma goronaka de Ma Jou wahiputurungu onangika hiadono ona yakunu yahikala manga musu o homoa ma nyawaika hiadono manga musu gea yoaroka.

³⁵ De utuoli gea o ngo-ngofeka abe ma titi manga ngongakuino de manga dutu abe yohonengoka Ma Jou wahimomiki manga honengino la yowangoli. De masara naga Ma Jou ai nyawa utuoli abe mangale iwingaku Ma Jouika ho manga kangela hatoli ilamoko yaohana o dunia ma lokuino naa. Abe ona utu ma titi manga ngongaku hiadono o nyawa yahikangela de yahiodiri manga badangika ka hiadono yatoma. De ona gea tanu manga musu ka idadi yahihohe ona manga papakitino iti iwioluku Ma Jouika, masara ona yomangiriki o honenge dika la ato ahao ma oraha yomomikiye manga honengino de manga wowango ma hungi gea ka irahaioli.

³⁶ De naga utuoli abe yahohedu onangika de yapoha-poha de o boboha abe o migino yodiai. De utuoli yahidapakitika de o rante de ahao yabuika o bui ma tau ma goronaka.

³⁷ De utuoli yahakaru onangika hiadono yohonenge, de utuoli manga badanga yahipelaka de o garagaji, de utuoli yahitoma de o humarangino, de utu duru yohuha abe ka ihikaika yomahinoauku de o domba eko o kabingi ma kaiino dika manga pakeanga. De ona gea duru ko kia-kiaua manga kiahonanga, de ka ihikaika o nyawa yahikangela onangika de yao duru ko irahaiua.

³⁸ De ona ko iwa manga tau, masara ka yotagi-tagi dika yaika yaino abe hoka o paradidu ma nyawa o tonaka ma kakaahaika de o loku-lokuika, de gea yomanoa o aru-arukoka de o guhu ma ago-agomoka dika angamoi hokogea ma amoko manga kangela yaohana. De ona mata-mata abe ahao naa toade-adeoka, ona gea duru de manga ngongakuoka abe manga wowango ma goronaka o duniaka naa. Masara tanu hiokoo o nyawa abe to ona manga hininga ka irahaiholi hokogea de kiani yomanoa o dunia ma dorouoka naa. Angamoi tanu irahai nako ka idadi o ngi duru ma rorahaioka dika yogogere la gea imakiniiki de to ona manga hininga ma rorahai abe o ngongakuino.

³⁹ De ona gea mata-mata Ma Jou duru wadosanangi onangika ma titi to ona manga ngongaku Unangika. De masara ngaro Una duru wasanangi onangika ma ona gea ko yamakeuahi manga hadia ingodumu abe ma dodihiraino de wahibehehongoka onangika.

⁴⁰ De gea manga hadia ko yamakeuahi ma dihiraino gea angamoi Ma Jou ai hideeoka wato koaho ona gea inadodamaa ngone naa abe ngoneoo hingaku-ngakuoka, la ahao ona de ngone ka ma moi Ma Jou wonahikokingodumoka la duru ko iwaka nanga kuranga to Una ai himangoka. De nanga gogao Ma Jouika abe duru ingodu-ngodumoka, duru ena gea ma hadia abe ka enangohi irahai, de abe ona ma dodihiraino ma deka-dekanuku yododamaa. De hokogea to ona manga ade-ade abe ma dodihiraino iwingaku-ngaku Ma Jouika.