Ibarani 10 - Ma Jou ai Demo-demo o Totobelohoka

To Kristusu ai huhuba gea duru iwihisanangi Ma Jouika angamoi duru ko iwa ma kuranga enangoka masara duru ka itotiai dika

¹ De igoungu, Ma Jou duru wonahiowaka de ai hiowa kohangoe ma titi ai behehongo ma hungino naa. Masara nako o Musa ai Pareta ma hiaturu ma dihiraino, abe ngaro gea ena duru hanii-niiki ma ko idadiua hamake genangino Ma Jou ai behehongo ma owa abe wonahibehehongoka, angamoi ma pareta gea hoka o gurumini dika de ko ma gou-goungua. Ho tanu ngone ko idadiua hamake nanga utumu o Musa ai Paretaino angamoi ma Pareta gea ko akunua la aofi to ngone nanga howo-howono ka hiado-adonika. Angamoi abeika hafikirohi o Pareta ma hiaturu. Abe o Pareta ma hiaturoka gea de kiani o nyawa o tao-taongiye ka ihikaika ihigali-gali yomahihuba Ma Jouiye, de ma huhuba gea ka imakokadaene dika to ena ma rupa. Masara ngaro hokogea ka ihikaika yotobadiai, masara ma huhuba gea ko yakunua yahitebini onangika abe yomahihuba-huba hiadono manga howono duru ko iwaka Ma Jou ai himangoka.

² Angamoi nako hoka ma huhubaino gea de ka idadi duru yahitebini ona yomahihuba-hubaika, gea de ahao ngaro ufa dika ihigali-gali manga huhuba yomahihuba ka ihikaika. De nako hoka yahitebinoka o huhubaino, gea ahao manga howono ko yomamaokauali. De gea bote manga hininga ka iuwinoka dika.

³ Masara hokogenangua idadi onangoka, angamoi ma huhuba gea ko yahitebinua manga hiningaka, masara o tao-taongiye ma huhubaino de yahihohininga onangika ma titi manga howo-howono, ho ko idadiua manga hininga iriidi.

⁴ De hokogea itagi manga hiningaka angamoi ngaro o hapi ma awunu eko o kabingi ma awunu, ma gea mata-mata duru ko yakunua nanga howono aofi.

^5-6 De gea ma titi hiadono ma dihiraino ma oraha o Kristusu woboa o duniauku naa de witemo ai Babaika wato, “Baba, Ngohi naa tonihioriki ani hininga, abe nako to Ngona ani mau gea ko o nyawa manga hidoakinoua Ngonaika de ko o aewani ma huhubainoua abe Ngona noigo. De ngaro o huhuba iharo-harongo eko o huhuba utuino abe o nyawa yaoino la ato genangino de manga howono atamunu, masara hokogenangua abe inihisanangi Ngonaika. Masara abe Ngona duru noigo la to Ngohi ahi badanga ahao idadi o huhuba Ngonaika, de gea ma titi hiadono o nyawa manga badanga nohihidiai la gea ka idadi tapake.”

⁷ De ipahaino o Kristusu wotemoli wato, “Jou Ngohi naa toboaka o duniauku la taniiki de tohingodumu to Ngona ani mau, la gea ahao idadi duru imaketero hoka ma dodihiraino de ihitulihukuokau ani bukuoka ma titi Ngohi.” Hokogea o Kristusu ai demo ai Babaika ma dodihiraino.

⁸ De abeika o Kristusu ai demo gea ma goronaka de ihira-hira wotemo ai Babaika de ngoneinoo wonahitararono abe Ma Jou tanu ko wodosanangiua o nyawa manga hidoaka de manga huhubaika mata-mata. Abe ngaro o huhuba iharo-harongo eko o huhuba abe o nyawa yaoino la ato genangino de manga howono atamunu, masara gea mata-mataika ko Ma Jou ai mauua ho ko wodosanangiua enangika, angamoi ena gea duru ko akunua la aofi ka hiado-adonika o nyawa manga howo-howono. De hokogea o Kristusu wotemo ngaro ma huhuba de ma hidoaka gea duru imakiniiki de ma Pareta o Musaino.

⁹ De ahao Una wotemoli de womahingahu Ma Jouika wato, “Abeika Ngohi naa toboaka la taniiki de tohingodumu to Ngona ani mau.” Ho ai demo gea ma goronaka de duru itararono abe ma huhuba o kiahi duru imakiniiki de to Ma Jou ai mau. Abe ai demoino gea de ka idadi hamake abe ma huhuba ma hiaturu ihira-hiraika gea Ma Jou wohibobahaka de waturuuruoka de o huhuba ma hiaturu ma hungioli, de gea abe ma hungi ma titi o Kristusu ai huhubaino.

¹⁰ De genangino o Yesusu Kristusu duru waniiki Ma Jou ai mau. Abe ma moi dika womahidoaka de ko womahigaliokaua womahidoaka ka hiado-adonika. Ho mangale ma titi Una waniiki Ma Jou ai mau, ho ngone naa hingaku-ngakuoka Una duru wonahitebinoka nanga howonino. De gea wohahitebini ma titi o Yesusu Kristusu ai badanga womahidoaka ma titi ngone.

¹¹ De nako o behehongo ihira-hiraika ma hiaturoka, gea to ona manga hidemo o wange-wangeiye iwileleani Ma Jou ai Tauoka, abe genangoka ka ihikaika yomaokoino o huhuba ma ngi ma himangoka de yahihuba o huhuba Unangika abe gea ena mata-mata ka imakokadaene dika ma rupa. De ngaro hokogea itagi ka ihikaika manga huhuba, masara moioo de ko iwa ma huhubaino gea abe ka akunu o howono aofi.

¹² Masara nako naa o Kristusu, Una gea o huhuba moi dika wonahihuba Ma Jouiye, de genangino waofioka nanga howono ka hiado-adonika. Ho gea ai karajaanga ai huhubaino duru wabootoka, ho Una wogogerukuoka Ma Jou ai nirakoka o Horogaka la genangoka yoborikoano.

¹³ Ho ma oraha naa Una naga genangoka wododamaa hiadono ai musu gea duru manga hingounu naga Unangika.

¹⁴ Ho mangale ma titi Una wogogeruku o Horogaka de wokoano de hiadono wododamaa ma titi ai musu, genangino ka idadi hohioriki abe o Kristusu wagou-goungu wabootoka ai karajaanga ai huhubaino. Ho duru ko iwaka ai karajaanga la wonabangu ma titi nanga howo-howono, angamoi ma titi ai huhuba moiino gea de wonahitotiaioka ngone ai nyawa mata-mata, la genangoka de aino ngone duru hototiai ka hiado-adonika Ma Jou ai himangoka. Ho ngone abe ma dodihirainohi de wonahideeokau wato ahao hotebi-tebini ai himangoka, ngone duru wonahitotiaioka ma titi ai huhuba moiino gea la duru ko iwaka nanga howono ka hiado-adonika.

¹⁵ De abeika ngaro Ma Jou o Womaha ma to Unangoo ai demo imakiniiki de ahi demo ma dumutu abe ahao naa nibasaka. Abe ma dodihiraino ai demo naa ihitulihukuoka, wato,

¹⁶ “Ho naa Ngohi ani Baluhu idodutu tonihingahu ngonaika abe ahao ma oraha dokengika de o behehongo ma hungioli tahidoaka onangika. De hokonaa abe ahi behehongo ma hungi ma demo ahao tahidoaka onangika. Ahao to Ngohi ahi pareta tohingohama to ona manga hininga homoi-homoi ma goronaika la enangika gea duru yongano-nganono, de gea ngade-ngade imaketero hoka ahi pareta gea tohitulihika to ona manga hiningaika.”

¹⁷ De gea wotemo ibooto de ahao Ma Jou o Womaha ka wodogohi wato, “De to ona manga howo-howono de manga datoro ma dorou abe ahao ma oraha genangoka de imahikaika ko tohohiningakauali.” Hokogea Ma Jou o Womaha ai demo ma dodihiraino.

¹⁸ Ho mangale ma titi nanga howono ma ngongofi idadioka abe gea nanga howono duru aofioka, ho gea ngaro ufa dika de o huhuba utuoli homahihuba ma titi nanga howono, angamoi nako Ma Jou ai himangoka gea to ngone nanga howono duru ko iwaka ka hiado-adonika ma titi o Yesusu Kristusu ai huhuba moiino gea.

Una wotuli-tulihi wonahigaro la homahitigi Ma Jou ai himangino

¹⁹ Ho ahi gogianongoru, mangale ma titi o Yesusu ai awunino ho hiadono ngone naa hototiaioka Ma Jou ai himangoka. Ho ngaro o duniakahi naa homanoa, masara koaho ngone de nanga domoroinoka hiadono ka idadi ma oraha naa naga de homahitigi Ma Jouika de ko himodongua. Abe gea homahitigi Unangika, gea hatoli imaketero abe hoka ngone howohamika Ma Jou ai Ngi duru Kohamedebinika ai Tauoka la homahuba Unangika, de gea ko himodongua. Abe ma dodihiraino de gea ma goronaika o nyawa biaha ko idadiua yowohamika, masara naa de Una wonahidoaka ngoneino la imaketero hoka howohamika genangika angamoi ngone wonahigunoa la ma ora-orahiye de ka idadi homahitigi to Una ai himangino.

²⁰ De gea ngone de nanga domoroini howohamika de homahitigi Ma Jouino ma titi o Yesusu naa ma duru wonabelengaka o ngekomo ma hungi moi. Abe gea o wowango ma ngango ma ngekomo wonabelenga ma oraha womahidoaka Ma Jouiye. De ma ngekomo ma hungi genangika haniiki hiadono Ma Jou ai Ngiino hoboa, abe ma titi ngaro ma oraha o kia dika ma ka idadi ngone homahitigi Unangino. De to Una ai ngekomo ma hungi gea inahiboa Ma Jou ai himangino, ho gea imaketero hoka ma oraha naa de howohamika o ngoere ma biri-birini doka ma honongaika la homarihimanga ngone de Una angamoi ko iwaka ma batingi abe inahikatingaka Unangino.

²¹ De gea Una wodadioka to ngone nanga Hidemo Ma Jouika abe Una duru de ai kuahaka wonahipareta ngone Ma Jou ai nyawa abe homahitau moi to Una ai tauoka.

²² Ho abeika ngone ngaro ka homahitigi Ma Jouika! Angamoi nako to ngone nanga hininga, gea ena ihitebinoka ma titi o Kristusu ai awunino hiadono ma dorou ko iwaka genangoka, ho gea ko hohawanokaua o hohowonika. De gea ngone ngade-ngade homaketero abe hoka ona o hohidemo Ma Jouika abe ona gea yomahiohikoka de o akere duru ma debi-debini hiadono manga peseke duru ko iwaka onangoka. Ho ma oraha naa duru ko iwaka nanga ngekomo ma hungi ma goronaka yodurutukuku, ho abeika ngone ngaro ka homahitigi Ma Jouika de nanga hininga ma gahumu, de nanga ngongakuoo ma gahumu Unangika, angamoi ngone hagou-goungu homahinganono to Una ai karajaangika abe Una womahidoaka ma titi ngone.

²³ De naa ngohi tonahigaro ngoneino la ka ihikaika hakeketika homahiso-so nanga nganganonika abe ma dihiraino de nanga nganganono gea homahingahuoka o nyawa manga himangoka hato homahinganono o Yesusika dika. De mangale ma titi homahinganono o Yesusika, tanu ahao nagaoo nanga utumu hamake abe ma dodihirainohi de Ma Jou wonahibehehongoka wato ahao wonahidoaka ngoneino. Ho abe to ngone nanga nganganonoka gea ufa hodomo-domo, angamoi Ma Jou Una duru watobagou-goungu ai behehongika. De mangale ma titi Una wonahibehehongoka ma hiowa ngoneino ho ngone ka idadi duru hohioriki abe hokogea ahao idadi ngoneino.

²⁴ De abeika ngone hafikiri nanga gogianongoru manga perelu de manga hininga la genangino ka idadi hohioriki hokokia homahikawangoro. De gea kiani homahikawangoro ngone o gogianongoruino la ngone duru homakodora de hotobadiai ma rorahai dika nanga wowangoka.

²⁵ De igoungu, nanga gogianongoru utu naga abe ona ko yaniikokaua manga doomu abe ma oraha manga gogianongoru yomatoomuino de iwihigiriiri de yomahuba Ma Jouika. Masara nako ngone naa ufa homaaduru abe hoka onangoli. Masara koaho ngone ka ihikaika homatoomuino de homahikokagaro nanga ngongakuika. Abe nako ma dihiraino de ma oraha naa naga, de ma oraha nenangohi duru hoperelu homahikokagaro ngone o gogianongoruino angamoi ka itigi moduku nanga Baluhu idodutu ai gahe ma wange abe Una woboali.

Una wotuli-tulihi wonahitiari la ufa haoluku to Kristusu ai huhuba ma titi ngoneino

²⁶ De naa ngohi tonahitiari ngoneino. Abe nako hiadono ngone duru hodafongoka ma gou-goungika abe hamake nanga ngongaku ma dodotokoka de aino, de gea hodafongoka masara ahao nanga hiningaka homaputuhu la ka hahowo-howonoli Unangika, de gea ngone haolukokali to Kristusu ai huhuba ma titi ngoneino. De nako hiadono to Una ai huhuba haolukoka, ahao duru ko iwa o huhuba utuoli abe ka akunu ihiofi nanga howo-howono gea.

²⁷ De nako hokogea abe ngone homangirikoka, de gea ngone hodamaa dika abe Ma Jou ai hohowono ahao hokokia dika ma rupa inahidotadaene ngoneino de genangoka de ahao ngone duru hoomodongo enangika. De ai hohowono gea marai imaketero hoka o uku moi duru kohaamoko abe ahao ena gea yahikokibinaaha ona iwilawa-lawanika.

²⁸ De gea igoungu abe nako Ma Jou ai behehongika o nyawa yaoluku, ona gea ahao kiani manga hohowono yadaene. Abe ngaro ai behehongo ihira-hiraika ekola ngaro ai behehongo ma hungioli, masara ahao naga manga hohowono onangika abe yaoluku enangika. Angamoi abeika hohidifikiri ma behehongo ma hira de ma behehongo abe ngone haniiki ma oraha naa. Abe ma dodihiraino ma oraha o Musa de nako naga o nyawa abe wongelo o Musa ai Paretaika de duru woluku waniiki ma Paretaika, una gea ko iwihiapongua masara iwihohonenge dika, abe iti naga o hakihii ma nyawa yahinooto eko yofoloi abe iwihitaana ai howonika gea. De nako genangoo ma dubuho ma hohowono nako gea ka to Musa ai Paretaino dika yoluku yaniiki,

²⁹ hongoli ma hohowono itubuho nako o nyawa iwioluku iwiniiki Ma Jou ai Ngofakika! Angamoi duru itaana abe kiani to onangohi manga hohowono duru itubuho, angamoi ona gea yomadiaioka yato Ma Jou ai Ngofaka manga lou ma dodoko. Abe ngaro to Una ai awunu abe genangino ihititi Ma Jou ai behehongo ma hungi naa, masara ona gea duru yongelo ai awunika ato ena gea ko kia-kiaua adaene angamoi bari ka o nyawa biaha dika ai awunu. De abeika, ngaro to Yesusu ai awunu gea ma dihiraino de ona yahitebinoka to ona manga howo-howonino, masara ma oraha nenangoli de ona ihiromanga ai awunika ato ena gea ko itebinua. De ngaro Ma Jou o Womaha abe wonahidoaka ai hiowa ngoneino, masara Unangikaoo ma iwingeloka ona gea. Ho igoungu Ma Jou kiani duru wahohowono onangika gea de o hohowono ma dubuho.

³⁰ Angamoi nako to Una ai hininga abe wato wahohowono onangika, gea ngone hohiorikoka abe duru imakiniiki de ai hininga de ai demo abe ma dodihiraino de ihitulihukuoka. Abe ma dodihiraino Ma Jou wotemo wato, “Nako o hibalaha, gea to Ngohi naa ahi kuahaka. De Ngohi naa ahao tahibalaha o nyawaika ma titi to ona manga datoro ma dorou.” De tanu ai hininga gea ka onangikaua dika abe ko iwingaku-ngakua, masara ngoneinoo abe hodadioka to Una ai nyawa. Angamoi naga moioli ai demo ma dodihiraino abe Una wotemo wato, “Ngohi ahao taurusu de tahohowono to Ngohi ahi nyawaika.”

³¹ Ho igoungu, abe nako hiadono nanga Jou abe duru Wotobawango womaputuhu wato wonahohowono ngoneino, gea ma hohowono ahao duru ko ma goguwinua masara ahao ngone duru homodongo ai hohowonika gea abe ahao inadaene. Ho ngone kiani duru hohidodiai hototoihene de haniiki to Ma Jou ai Demo-demoino.

Ngone kiani homatongohono nanga ngongakuoka de homahinganono Unangika

³² De naa, ahi gogianongoru, irahai ngini nimahihohininga ma titi nia wowango hokokia ma dodihiraino abe ma oraha gea o Kristusu ai dodotoko ahao inihitawangeoka de niwingakuoka Unangika. De ma oraha gea ngaro o kangela ma amoko niaohana, masara gea nimatongohono de ko nikalaua.

³³ Abe ma dihiraino gea de ma moi ma moi iningelo nginika de duru inihikangela o nyawa manga ngoe manga himangoka, de nagali idadi abe nia gogianongoru onangoli ma kokangela gea yahidotadaene, ho ngini niaduhunu de nialaru nia gogianongoruika abe manga kangela ma goronaka.

³⁴ De abe ma dihiraino nia gogianongoru utu yataokino de yabuika, gea nginioo nia hiningaka de hoka niamao manga kangela abe imaketero hoka to onangoli manga hiningaka. De nagali idadi ma dodihiraino abe ti ngini nia kiahonanga o nyawa yomahitoonaka. De ngaro hokogea idadioka masara ti ngini nia hiningaka ko ihuhaua masara tanu naga de ma garagohi, angamoi ngini nihiorikoka abe ti ngini nia utumu abe nagau o Kristusoka, ka enangohi duru ihohailoa nako de o duniaka ma kiahonanga. De gea nihiorikoo abe nia utumu Unangoka gea duru ko idadiua ihihanga ka hiado-adonika. De hokogea ti ngini nia wowango ma dodihiraino gea, ho ufa hiadono nia hininga ma rorahai gea niawohanga abe gea ena nia ngongakuoka de aino.

³⁵ Ho naa ngohi tinihigaro nginika tato kiani niapaliarohi nia domoroini nia ngongakuoka abe ma dodihirainohi de gea nagau nia hiningaka. De ufa gea ena niaumoika dika, masara koaho nigila-gila de nia domoroini nia ngongakuino, la gea ahao ka idadi nia utumu duru ilamoko ngini niamake abe nia domoroinino.

³⁶ Ho naa ngini duru niperelu o dongohono nia ngongakuoka, angamoi nako nimatongohono la Ma Jou ai mau ka ihikaika nianiiki, gea ahao ngini niamake ma utumu Unangino abe ma dodihiraino wonahibehehongoka ngoneino.

³⁷ De gea ko itedekanokaua de idadi, angamoi naga ihitulihukuoka Ma Jou ai Demo-demoino ato, “Ko itedekanokaua de Una woboaka abe ma oraha naa Una gea hidodamaa la woboa; abe Una gea ko wohiaka-akaua ma titi ai gahe.

³⁸ De nako to Ngohi ahi nyawa abe taetongoka tato ona yototiai ahi himangoka, ona gea manga ngongaku yahihira-hira manga wowango ma goronaka. Masara nako hiadono ahi nyawa yogilio manga poretoko de yolukoka ihiniiki Ngohi, gea ahi hininga duru ko yadosanangiua onangika.” Hokogea itemo Ma Jou ai Demo-demoka.

³⁹ Masara nako ngone naa, tonahioriki abe ngone naa ko hogilioua nanga poretoko la o binaaha hamake nanga wowangoka. Masara ngone naa ka ihikaika hingaku Unangika ho hiadono nanga wowango ko wohibobahaua, masara ka wonapakeohi o dunia ma lokuoka naa.