Ibarani 1 - Ma Jou ai Demo-demo o Totobelohoka

Ma oraha naa Ma Jou wonatemo-temo ngoneino abe to Una ai Ngofaka idodutuino

¹ Duru ma deka-dekanuku abe nanga totofora nagahi de ma ngoe Ma Jou wotemo onangika abe wapake ai uru ma dodofanga la ai hingahu ma demo ona ahao yadofanga nanga totofora utuikali. De to Una ai hingahu ma demo nanga totoforaika, gea ka moiua dika ma rupa, masara ma rupa imaketemomomoi ai hingahuino wapake la ai hingahu ma demo gea wahingahu nanga totoforaika ma dodihiraino gea.

² De nako ma oraha nenangoli abe hohiromanga ngone hato ma oraha ma bobaha de Ma Jou ka wonatemohi ngoneino. Masara nenangoli de ka wonatemokali ngoneino abe to Una ai Ngofakino wonatemo. De abe ma titi to Una ai Ngofaka gea, duru ma dodihiraka de o dunia naa de ma dihangoo Ma Jou o Baba wotulaada de to Unangoo ai Ngofakino, de gea Ma Jou o Baba waputuhoka wato gea mata-mataika ahao idadioka to ai Ngofaka ai kuahaka, ho ai Ngofaka gea wodadi to ena mata-mataika ma dutu.

³ De Una gea abe wonahitararono ngoneino to Ma Jou o Baba ai medebini ma dararono. De Una de o Baba duru hoimoi dika manga rupa, abe ma hohutuloo de ko yomakohowonua. De to Una ai dulaada mata-mataika ka Una dika wohiaturu de wapaliara la ka idadi hokogea dika igila-gila. De gea wohiaturu de wapaliara ka to Una ai uru ma demoino ma kuaha ma amokino. De Una gea abe wakokiofioka ngone to Una ai nyawa nanga howo-howono. De gea ai karajaanga ibooto de ahao Una wogogerukuoka Ma Jou o Baba wokokurutiye ai nirakoka, abe ka o Babahi ai kuaha duru kohaamoko. De genangoka wogogeruku la Unangoo womulaenge wahikoano mata-mataika. Ho genangino de ka idadi ngone hamake abe to Ma Jou ai Ngofaka gea duru de ai medebini ma dararonoka, de to Una ai Ngofakino gea abe Ma Jou wipake la ma oraha naa wonatemo-temo ngoneino.

Nako Ma Jou ai Ngofaka de o momalaekata, ma ka ai Ngofakohi duru wokurutiye

⁴ De mangale ma titi Ma Jou ai Ngofaka wogogerukuoka ai Baba ai nirakoka, genangino de duru itararono abe nako Ma Jou ai Ngofaka de Ma Jou ai momalaekata, gea ka ai Ngofakohi duru wokurutiye abe ma titi ai kuaha ma gogere. De nagali ma titi moioli abe iwihitaana Unangika ma titi ka Unangohi duru wokurutiye. Angamoi nako o nyawa manga ngofaka de manga duduhunu, ma ka manga ngofakohi duru yokurutiye manga tauoka. De hokogenangoo kiani Ma Jou ai Ngofakohi duru wokurutiye nako de Ma Jou ai duduhunu o momalaekata. De gea ma titi hiadono Ma Jou wihiromanga Unangika de o romanga abe ka enangohi ikurutiye abe nako de o malaekata ma romanga.

⁵ De gea hohioriki duru itaana, angamoi abeika, duru ko ma iwa abe Ma Jou wihiromanga ai malaekatika wato, “Ahi ngofaka.” O malaekata moioo de ko iwa abe hokogea wahiromanga. Masara abeika Ma Jou ai demo ma dodihiraino abe ai Ngofakika, abe Una wato, “Ngohi o wange naa de tomahitaanoka abe Ngona nodadioka ahi Ngofaka, De abe Ngohi tagou-goungu to Ngona ani Baba.” De naga moioli abe ma dodihiraino de ihitulihukuoka to Una ai Demo-demoka abe ma titi ai Ngofaka wato, “Ngohi ahao todadi to Una ai Baba, ho Una gea ahao to Ngohi ahi Ngofaka.” Masara duru ko ma moiuahi Ma Jou wotemo hokogea ma titi ai momalaekatika.

⁶ De abe ma titi gea, naga moioli Ma Jou ai Demo-demoka ihitulihukuoka abe ma titi ai Ngofaka ka Unangohi wokurutiye. De gea ai demo ma goronaka de inahingahu abe ahao ma oraha ai Ngofaka wihiboali o duniaino naa de ahao Ma Jou wotemo ai momalaekatika, wato, “To Ngohi ahi momalaekata, ngaro ngini mata-mataika ka idadioka nimakokihuba Unangika naa.” Hokogea ma dodihiraino ihitulihukuoka, de hokogea ahao Ma Jou wakokihuloko ai momalaekatika.

⁷ De naa ma titi moioli abe inahimatoko abe ka Ma Jou ai Ngofakohi wokurutiye nako de o momalaekata. Angamoi nako Ma Jou wahiromanga ai malaekatika, gea Una wato to Una ai kuaha wahidoaka jai-jai onangika ma oraha wahitagongo moi de wahidingoto la hokokia iwileleani Unangika. De gea duru imaketero abe hoka o hidaloko de o uku, angamoi enangoo ma moi ma moi idadi iputurungu de duru hamake to ena ma buturungu, masara ka de ipaha de duru ko iwaka ho ko hamaokaua. De ma titi genangoo ma naga ai Demo-demoka abe ma dodihiraino de hokokia wahiromanga onangika wato, “Ahi malaekata ona gea ihitobaleleani Ngohino, abe utu tahidadi hoka o hidaloko de tahidingoto abe ahi hininga ma dumutika, de utuoli tahidadi hoka o uku ma dokara la hokogea ona ihileleani.”

⁸ Masara nako de Ma Jou ai Ngofaka gea duru yomakohowono, angamoi to Una ai kuaha ko de ma ora-orahua, masara gea ka hiado-adonika. De gea ma titi hiadono ma dodihiraino Ma Jou wotemo ai Ngofakika wato, “Ngona Jou ka hiado-adonika nogogere ani pareta ma kaderaka la nohikoano ka hiado-adonika. De Ngona duru de ani totiaioka abe nahikoano ani kokawaahaika.

⁹ Masara Ngona duru nosanangi o totiaiika masara nako o dorouika gea Ngona duru nodohata. De mangale ma titi ani hininga ma totiai ho hiadono Ngohi ani Jou tonigoraka de tonihidoaka moi Ngonaika o kuaha la ani gogere duru ikurutiye, de genangino Ngona duru nosanangiholi. Abe ngaro to Ngona ani dodiawo onangoo yosanangi, masara ka Ngonahi duru nososanangiholi!” Hokogea ma dodihiraino ihitulihukuoka.

¹⁰ De nagali utuoli Ma Jou ai Demo-demoka abe inahimatoko ngoneino ma titi ka ai Ngofakohi duru wokurutiye nako de ai momalaekata. Abe hoka ma demo moioli naa abe inahitararono ma titi ai Ngofakika wihiromanga wato Una gea wotobatulaada de ko iwa ai bobaha masara wowango ka hiado-adonika. De gea Ma Jou wotemo ai Ngofakika wato, “Ngona o dunia ma Baluhu idodutu, abe duru ma dodihiraka de Ngona ma hirete notulaada o dunia naa de ma dihangoo, de gea mata-mata iboa to Ngona ani karajaangoka de aino.

¹¹ De gea igoungu ani dulaada gea ika-ika de ka aiaho, masara nako Ngona gea Ngona nagahi ka hiado-adonika. De o dunia naa de ma dihanga ahao ngade-ngade hoka ibabiti abe hoka o pakeangoli ho ma bahauku de itorouoka,

¹² de ma oraha gea ahao naluluino ani dulaada gea, de naturuuru abe imaketero hoka o baju moi imulaenge ibabiti ho naluluino de naturuuru ma hungioli. Masara nako Ngona ma hirete ahao duru hokogenangua idadi Ngonaika. Angamoi Ngona duru notobawango ka hiado-adonika, de Ngona duru ko iniperekiua ho hokogea dika nogila-gila ho duru ko iwa ani bobaha.”

¹³ De naga moiohi Ma Jou ai demo abe ma dodihiraino wotemo ai Ngofakika wato, “Naino nogogere ahi nirakoka la Ngone hohikoano mata-mataika ka hiadono ani musu onangoo duru naga manga hingounu Ngonaika.” Hokogea ma dodihiraino o Baba ai demo ai Ngofakika. Ho naa tonaleha, ho sarakia, naga Ma Jou ai demo abe hokogea ma dumutu ai malaekatika? Duru ko iwa!

¹⁴ Angamoi o malaekata mata-mataika, abe ngaro hokokia dika ma gurutiye ma to ona gea manga tagongo naga la iwileleani dika Unangika, masara ko ihikoanoua utuika. Angamoi ona gea hoka o womaha abe Una wahidingoto la ona yaduhunu o nyawaika abe manga hiningaka yosanangi yodafongo to Una ai duduhunu. Masara nako Ma Jou ai Ngofaka, Una gea ka idadi wokoano. Ho gea to Una ai Demo-demoino de hamake duru itararono abe nako to Ma Jou ai momalaekata de to Una ai Ngofaka, ma ka ai Ngofakohi duru wokokurutiye.