Huhupu 9 - Ma Jou ai Demo-demo o Totobelohoka

Ma Jou ai hohowono naa ma motoa de wahohonenge manga aewani o dofo

¹ De ahao Ma Jou o Yawe wihibehehongoli o Musaika wato, “Musa, nohigalioli noiki o Firaunika de nihingahu unangika nato, ‘Ahi koano, Ma Jou o Yawe abe o Ibarani ma nyawa manga Jou, wonihulokoka ngonaika wato, “Ngona o Firaunu kiani nahigunoa ahi nyawa yohupu o Mesiiri ma tonakino la ka idadi yomahuba Ngohiye.

² De nako ka ihikaika ngona nahikangela de noluku nahigunoa yoiki,

³ de ahao Ngohi, Ma Jou o Yawe, tohipoha ti ngini nia aewani o dofoika de o panyake moi kohadubuho. Abe o panyake gea tapake la tohibinaaha ti ngini nia kuda, de nia keledai, de nia unta, de nia hapi, de nia domba, de nia kabingi.

⁴ Masara naa ma moioli Ngohi Ma Jou o Yawe tinihikohowono ngini o Mesiiri ma nyawa de o Isiraele ma nyawa abe to ona manga aewani moioo de ko iwa abe ihonenge.

⁵ De itebini dika de o panyake ma hohowono gea tohidingoto.”’ Hokogea, Musa, kiani nihingahu o Firaunika.” Ho Ma Jou ai demo gea o Musa wihingahu o Firaunika.

⁶ De igoungu, ma dawangeino de Ma Jou o Yawe wodiai duru imaketero hoka wohingahuoka. O Mesiiri ma nyawa manga aewani o dofo mata-mataika o panyake gea yakokidaene ho kohangoe ihonenge. Masara o Isiraele ma nyawa manga dofo moioo de ko ihonengua.

⁷ De o Firaunu wahidingoto ai gogilaongo la yatailako nako idadi hoka Ma Jou wotemoka. De yamake abe ngaro to ona manga aewani kohangoe ikokihonengoka masara o Isiraele ma nyawa manga aewani moioo de ko ihonengua. De gea iwihingahu o Firaunika masara ai hininga ko waturuurua ka watogowinohi de ka wolukohi o Isiraele ma nyawa yohupu ai tonakino.

Ma Jou ai hohowono naa ma butaanga de o boroho wahikangela

⁸ De ahao Ma Jou o Yawe wahibehehongoli o Musa de o Harunika wato, “Naa ngini niloiki o tela ma haharongika de niale o uku ma dukuuruino de ena gea niao ma oraha niwitutumoli o Firaunu. De ahao to una ai himangoka kiani ngona o Musa nohibarihi nakaiye la ihaili ma dukuuru gea.

⁹ De ngohi Ma Jou todiai la ihaili o Mesiiri ma tonaka mata-mataika de ngaro o nyawa de ngaro o aewani ma ka de adaene de yakokiboroho de o boroho o bara.” Hokogea Ma Jou wohibehehongo.

¹⁰ Ho o Musa de o Harunu o uku ma dukuuru yale o uku ma ngiino abe genangoka o tela yaharo-harongo de yoiki iwihimanga o Firaunu. Ho gea iwihimatoko unangika ma dukuuru gea de ahao o Musa wohibarihi la ihaili daku ma hoanino. De o Mesiiri ma nyawa de manga aewanioo yakokiboroho de o boroho o bara ho duru kohaodiri manga nabo.

¹¹ De ngaro o Firaunu ai duduhunu yososawaro yotobadiai la yabalaha de o fufutu ma kuahaino masara ko yakunua iwihimanga o Musa angamoi onangoo yaboroho de o bara ho igoungu yadaene o Mesiiri ma nyawa mata-mataika.

¹² Masara o Firaunu woluku wahigihene o Musa de o Harunika. Abe Ma Jou o Yawe wohitogowini o Firaunu ai hininga hoka ma dihira o Musaika wihingahuokau wato wodiai hokogea.

Ma Jou ai hohowono naa ma tumidi de o es ma awana

¹³ De ahao Ma Jou o Yawe wihingahu o Musaika wato, “Musa, naa kiani nomomiki duru o ngoru-ngorumino de noikoli o Firaunika la de ani domoroini nihimanga de nihingahu nato, ‘Mia koano, to ngomi mia Jou ai demo nagali ngonaika Una wato, Ngohi naa Ma Jou o Yawe abe o Ibarani ma nyawa manga Jou, de ma moioli tonihuloko ngonaika kiani nahigunoa ahi nyawa yohupu o Mesiiri ma tonakino la ka idadi yomahuba Ngohiye.

¹⁴ De nako ngona ka nolukohi ahi behehongo naa de ahao ngohi o bodito ma kokangela moioli tohidingoto. De ma kokangela gea duru itubuho ani kokawaahaika o Mesiiri ma tonaka mata-mataika ka hiadono ngona de ani duduhunoo niaborimake ma kangela gea la ngini mata-mataika duru nihihioriki Ngohi Ma Jou. Hokogea Ngohi todiai la duru tomahitaana nginika abe o duniaka naa ko moiua naga ma pangao la yakunu ihihikala naa Ngohi.

¹⁵ Naa ma duruino ma muruono ibooto Ngohi tanu ka idadi tapake o kokangela duru ma amoko ka hiadono ngini tinihikokiofi o dunia ma lokuino.

¹⁶ Masara nagali ma titi hiadono ngini ko tinihibinaahaua. To Ngohi ahi mau la ngini tinihigunoa niwango la ahi kuaha de ahi buturungu ma dodunguu tinihimatoko nginika. De gea todiai ahao o nyawa ihiade-ade o dunia ma nyawa mata-mataika ka hiadono ihihioriki to Ngohi Ma Jou o Yawe ahi kuaha duru de ma buturungoka hiadono ahi romanga yagorakiye de manga horomati.

¹⁷ Masara to ngona ani sade naga ka itagiohi to Ngohi ahi nyawaika hiadono naa ma dekanino nalawana de ko nahigunoauahi yoiki ahi nyawa gea.

¹⁸ Ho abeika idadi itebini! O takoro hokonaa de Ngohi tohiboa o es ma awana abe ngaro ma dodihiraka de hiadono naa ko ma moiuahi naga o Mesiiroka o es ma awana hokogea de ma buturungoka.

¹⁹ Naa kiani ngona nahuloko ani nyawaika la ona mata-mata kiani yokokiwohama manga kokitauika ho ngaro ani nyawa eko ti ngini nia aewani ma hou masara, ufa naga manga redioka eko ma hoanoka nianoaika. Angamoi o es ma awana gea tadopuraraha o Mesiiri ma tonaka ma amokika. Ho ti ngini nia kiahonanga de nia aewani abe nagahi ma hou nako ngini ko nioigoua ihibinaaha de o es ma awana gea kiani nihikokingohama o kiaka naga abe ko adaenua. De angamoi o nyawa de o aewani abe nagahi ma hoanoka ahao ikokihonenge.’” Hokogea Ma Jou o Yawe ai demo o Firaunika abe o Musa wadofanga unangika.

²⁰ De ma oraha naa o Firaunu ai duduhunino naga utu duru iwimodongoka Ma Jou o Yaweika ma titi ai demo onangika gea. De ona iwihigihene Ma Jou ai hitiarika gea ho manga kokawaaha yahiaturu la to ona manga huhuloko de manga aewani o dofo ihikokingohama ma tauika.

²¹ Masara ona utu ko yopusingua Ma Jou o Yawe ai demoika gea ho hiadono manga nyawa abe manga huhuloko de manga aewani o dofo yanoaika manga redioka de ko ihingohamua.

²² De ahao Ma Jou o Yawe wihulokoli o Musaika wato, “Musa ani tutukunu ahao nagoraka de nohitumutu o dihangiye de ahao Ngohi tohiboa o es ma awana. Abe ka de hokogea ahao nodiai de o es ma awana gea ahao yadopuraraha o aewaniuku de o nyawauku de to ona manga redi-rediuku hiadono manga dato-datomo enangoo yadaene o Mesiiri ma tonaka ma amokika.”

²³ Hokogea Ma Jou wihuloko de hokogea idadi abe ka de o Musa wagoraka ai tutukunu de wohitumutu daku o dihangiye de Ma Jou o Yawe wohiguti o Mesiiri ma tonakuku o es ma awana de wohitunguu de o kuruuhu imakiniiki kohabuturungu hidutu ma leletongo iuti hiadono ma tonakuku de ikerewoto ma tonaka ma lokuino.

²⁴ De naga o leletongo ma jaanga imakasapuru de o es ma awana ho ka ma moi wohidopurarahuku. Ho igoungu, ngaro ma dihirainohi abe ahao o Mesiiri ma nyawa yomahipareta ka hiadono ma oraha gea, masara ko ma moiuahi abe ona yamake o es ma awana hokogea ipurarahuku duru kohagiria manga tonakuku.

²⁵ Hokogea o es ma awana ipuraraha imakasapurino de o uku hiadono o Mesiiri ma tonaka ma amokika manga datomo, de manga nyawa, de manga aewani abe naga ma hoanoka ikokibinaahaka. De ngaro manga gota-gota manga redioka ma gea enangoo yodubuku o es ma awana ma ago-agomo hiadono ikokipageloka ma jaga.

²⁶ Masara Ma Jou wahidingakuku la gea o Mesiiri ma tonaka ma honongaka dika adaene. O tonaka ma hononga ma romanga o Gosene, abe o Isiraele ma nyawa yogogere genangoka ona ko yadaenua o es ma awana gea.

²⁷ De ka ipurarahohi de o Firaunu wabehehongo la o Musa de o Harunu yoboali unangino. Ho ka de yomarihimanga de o Firaunu una womahingahu onangika wato, “Naa de ahao igoungu ngohi tahowonoka. Ma Jou o Yawe wagoungu wotiai de ngohi de ahi kokawaaha midiai itorou abe ko itiaiua.

²⁸ De o es ma awana de yokokuruuhu naa duru imihihawana de ngohi duru togahoko la ngini nimidemo ngomi Ma Jou o Yaweika la o bodito naa wohitogumu. De ngohi ko tinitumungokaua de naa ka idadi tinihigunoa la ngini nihupu.” Hokogea o Firaunu duru wogahoko o duduhunu o Musa de o Harunika.

²⁹ De o Musa wipaluhu wato, “Nako hokogea, ka idadi miniduhunu. Ka de ani kotaino naa tohupuoka de ahao ahi giama tohidoakiye Ma Jou o Yaweiye de tininiata ngini. Ka de tininiata ibooto de o kuruuhu de o es ma awana naa iogoroka ho enangoo gea ibooto inihikangela. Ma Jou wapuraraha de naa Una wohiogoro la duru itaana ngonaika abe o dunia naa duru to Ma Jou o Yawe ai dunia ho duru to Una ai kuahaka igogere.

³⁰ Masara nako ngona de ani nyawa abe iniduhu-duhunu marai ngohi tinihikokioriki abe ngini ko niwimodonguahi Ma Jou o Yaweika hiadono nia horomati ko iwahi Unangika.” Hokogea o Musa wihingahu o Firaunika.

³¹ De duru iwederoka o Mesiiri ma nyawa manga gandumu o fara moi angamoi ka ma moiika ikurati de duru ihirusakoka hiadono yamaaioka. De naga manga datomo moi ma romanga o rami ena gea duru yoperelu masara enangoo gea ikokirusakoka. Abe ma oraha o es ipuraraha manga rami ma rediuku de ena gea ihuri ho ma tuwiki ko yatimonuahi de ko idadiuahi yale.

³² Masara naga manga gandumu o fara hinootoli de ena gea ko adodoaua angamoi ahao gea yadatomuku ho ko iwangouahi.

³³ De o Musa de o Harunu o Firaunu ai tauoka de aino yohupu hiadono o kota ma poretoka yaika. De ka de o Musa ai giama wohidoakiye Ma Jou o Yaweiye la o duduhunu womagahoko de o es ma awana de o kuruuhu ka ma moi imakiniiki iboritogumoka. De ma awanoo abe ipurarahuku enangoo iogoroka.

³⁴ Masara o Firaunu gea, ka de wamake o awana de o es ma awana de o kuruuhu iboritogumoka de wahowonoli angamoi una de ai nyawa abe iwiduhu-duhunu manga hininga yatogowinoli.

³⁵ Ho o Firaunu ai hininga duru itogowiniholi de duru woluku wahigunoa o Isiraele ma nyawa yohupu. Ho igoungu idadi duru imaketero hoka Ma Jou o Yawe wahingahuoka abe wapake o Musa ai uruino la o nyawa wahingahu hokogea o Firaunu womatogowini ai hininga.