Huhupu 8 - Ma Jou ai Demo-demo o Totobelohoka

Ma Jou ai hohowono naa ma hinooto de o popaa

¹ De o wange tumidoka de ahao Ma Jou o Yawe wihibehehongoli o Musaika wato, “Musa, nohigalioli noiki o Firaunika de nihingahu unangika nato, ‘Ahi koano, Ma Jou o Yawe wonihuloko ngonaika wato, “Ngona kiani nahigunoa ahi nyawa yohupu o Mesiiri ma tonakino la ka idadi yomahuba Ngohiye.

² De ngona nako ko nahigunoaua yoiki Ngohi ahao ani tonaka mata-mataika tohipoha de o hohowono de tapake o popaa la gea ena inihikangela ani tonaka duru ma amokika.

³ De angamoi o Nili ma akere aomanga de o popaa gea, ho kohangoe ahao ikokifarene ma akerino de ikokiboaino hiadono to ngona ani tau iningohama hiadono ani kamarika de ahao ani koioka ikokidoaiye o popaa kohangoe. De to ngona ani duduhunu manga kokitauika yakokingohama de ka hiadono ani kokawaahaikaoo ka yahikokioluino de o popaa. De inikokingohama ti ngini nia tau homoi-homoiika hiadono naga ma popaa gea imanoa nia roti ma haharongika, de nia boko-bokoluku genangikaoo imanoa, hiadono ngini initamunoka de o popaa.

⁴ De ngaro ngona eko ani duduhunu de hiadono ani kokawaaha ngini mata-mataika homoi-homoiika nia kokibadangiye inikokidoa.”’ Hokogea ahi demo o Firaunika abe kiani ngona Musa nadofanga unangika.”

⁵ De ahao Ma Jou o Yawe wihingahu o Musaika wato, “Naa kiani o Harunika nihulokoli la ma tutukunu gea wohitumutoli o akere ma jaga-jagaika de o lepa mata-mataika de o akere ma ngekomo yofaiti o nyawaino la genanginoo mata-mata ikokifareniye o popaa la manga tonaka aomanga de o aewani gea.”

⁶ Hokogea Ma Jou wahibehehongo onangika de hokogea o Harunu wodiai. De ahao o Mesiiri ma tonaka igoungu aomangoka de o popaa.

⁷ Masara ma moioli o Firaunu ai nyawa abe yososawaro yotobamai-maihi ona ahao yapake manga sosawaro o fufutuino ma heheranga la hiadono onangoo ka idadi ihiboa o popaa o akerino.

⁸ Masara manga koano o Firaunu duru wokangelaholi ma titi o popaa gea de o Musa de o Harunu wabehehongo. Ho ka de yoboainoka de wogahoko onangika wato, “Naa ngohi tato nia nyawa ka idadi tahigunoa yoiki la manga huhuba gea yomahihuba ti ngini nia Jou o Yaweika gea. Ma, iti nimigahoko la o popaa naa ka idadi Una wagorakoka abe ngohi de ahi kokawaahaoo imihikokangelaholi.” Hokogea o Firaunu wogahoko.

⁹ De o Musa wipaluhu wato, “Ahi koano, ngohi tosanangi ngona noigo la tininiata ahi Jouiye ho ngona nohihingahu dika ma oraha abe ngona noigo tinigahoko o duduhunu. De ngohi tinigahoko ngona de ani nyawa abe iniduhu-duhunu hiadono ani kokawaahauku tinigahoko o duduhunu la ma aewani gea winihitingakoka hiadono nginioka o popaa ko iwaka de ma hou abe iwangohi gea ena dika abe naga o Nili ma akerokahi.” Hokogea o Musa wihibehehongo o Firaunika.

¹⁰ De o Firaunu wato, “Nako gea itebini nominiata.” De o Musa wopaluhu, wato, “Ngohi ahao itebini tininiata ahi Jouiye de gea ahao idadi imaketero hoka o koano nogahokoka la gea duru ngona nohioriki abe ko moiua o pangao de ma buturungu abe imaketero hoka to ngomi mia Jou o Yawe ai buturungu.

¹¹ Abe Una ahao wohiaturu la o popaa gea ikokihupu ti ngini nia tau mata-mataika ngaro ani popareta ma nyawa manga tau de ngaro ani kokawaaha manga tau o popaa ahao ikokihupu ka hiadono ko iwaka nia hidogoronaka. Hokogea Ma Jou o Yawe wohiaturu hiadono ma houokahi abe iwangohi o Nili ma akeroka.”

¹² Hokogea o Firaunika o Musa wihingahuoka de ahao una de o Harunu iwinoaika ho ona yolio. De ahao o Musa o Mesiiri ma nyawa duru wagahoko Ma Jou o Yaweiye ma titi manga kangela o popaaino.

¹³ De ahao Ma Jou o Yawe wodiai duru imaketero hoka o Musa wogahoko Unangika. Ho o popaa gea ikokihonenge abe naga homoi-homoiika manga tau ma goronaka, de manga tau ma loaka, de manga redi-redioka ikokihonenge mata-mataika.

¹⁴ De o popaa ma honenge dika ihikokaika atoo-toomuino hiadono itotoporoniye. De ahao iwedere de ma mela duru ihaukuholi o Mesiiri ma tonaka mata-mataika.

¹⁵ Masara ka de o Firaunu wamake abe ma popaa gea ikokihonengoka de ai hininga watogowinoli hiadono ai behehongo o Musa de o Harunika ko waniikokauali ho o Isiraele ma nyawa ko wahigunoakauali yohupu. Ho idadi imaketero de Ma Jou o Yawe wahingahuokau o Musa de o Harunika.

Ma Jou ai hohowono naa ma hange de o hihiri

¹⁶ Hokogea o Firaunu ai hininga ho Ma Jou o Yawe wihingahu o Musaika wato, “Naa kiani o hohowono moioli yadaene ho nihuloko o Harunika la de ani tutukunu wohipoha o tonaka ma kuhuhunuku. Ka de wapoha o tonaka ma kuhuhunuku de ma kuhuhunu gea idadioka o hihiri ma hohumuduru o Mesiiri ma amokika.”

¹⁷ Hokogea Ma Jou wahuloko ho hokogea o Musa de o Harunu yodiai. De ka de o Harunu ai tutukunu gea wagoraka de wapoha o tonaka ma kuhuhunuku de gea idadi o hihiri kohangoe de duru yagoli-goli o nyawa de o aewani mata-mataika. Abe o tonaka ma kokuhuhunu o Mesiiri ma tonaka mata-mataika idadiokau o hihiri.

¹⁸ De ahao ma moioli o Firaunu ai nyawa abe yososawaro yapake abe o fufutuino ma kuaha la ato onangoo ihidadi o hihiri masara naa ko yadadiokaua yodiai o heheranga hoka Ma Jouoli. De o hihiri gea iboaino ikafoka o nyawa de o aewani yakokigoli.

¹⁹ De ona yososawaro yotobamai-maihi gea iwitemo manga Firaunika ato, “Abeika, naa ma titi manga Jou to Una ai buturungino dika hiadono o heheranga naa inadaene de ngaro de ai hagaraara dika wonatumutu ngoneino!” Ngaro hokogea iwihingahu o Firaunika masara to una ai hiningaka ka womatogowinohi! Ho idadi imaketero de Ma Jou o Yawe wahingahuokau o Musa de o Harunika abe o Firaunu gea ko wahigihenua.

Ma Jou ai hohowono naa ma iata de wapake o gufuru

²⁰ De ahao Ma Jou o Yawe wihingahu o Musaika wato, “O Firaunu gea ko wohihigihenuahi ho naa kiani nitutumoli. Ho ngona nomomiki duru o ngorumino la ka idadi o Firaunu nibuhuku ma oraha wouti o akeruku de ahi huhuloko unangika nohigalioli de nihingahu nato, ‘Ahi koano, Ma Jou o Yawe ai demo ngonaika hokonaa wato, “Ngona kiani nahigunoa ahi nyawa yohupu o Mesiiri ma tonakino la ka idadi yomahuba Ngohiye.

²¹ De nako ngona noluku nohigunoa la ahi nyawa yoiki de abeika, ahao Ngohi tohidingoto o gufuru kohangoe o Mesiiri ma tonaka ma amokika. De o gufuru gea ahao inihikangela ngona, de to ngona ani duduhunu, de ani kokawaaha mata-mataika, abe ahao inikokingohama ti ngini nia tau homoi-homoiika de hokogea ma ngoe tohidingoto hiadono ani tonaka atamunoka de o gufuru gea.

²² Masara ma oraha o gufuru gea Ngohi tohidingoto de tohiaturoo la ena gea ko iboaua ani tonaka ma honongaika o Gosene. Ho o gufuru gea ko yahikangelaua o Isiraele ma nyawa abe yogogere o Gosenoka. Ma hohowono naa ko yadaenua ahi nyawaika ho onangoka dika abe ko iwa o gufuru. Hokogea tohiaturu la ngona duru nohioriki abe Ngohi Ma Jou o Yawe naga to ngona ani tonakoka de nako to Ngohi ahi kuaha de to ngona ani kuaha, ka to Ngohiohi ahi kuaha iputurungu.

²³ De hokogenangoli tinihikohowono ngini o Mesiiri ma nyawa de to Ngohi ahi nyawa o Isiraele ma nyawa. Ho ma titi gea itebini Ngohi tomulaenge tohitunguu de o heheranga naa abe de o gufuru.”’ Hokogea Musa, ahi demo nadofanga o Firaunika.”

²⁴ De Ma Jou ai behehongo gea o Musa waniiki de ahao idadi Ma Jou o Yawe wahohowono o Mesiiri ma nyawa imaketero hoka wahingahuoka. Ho o Firaunu ai tau ma goronaka atamunoka de o gufuru de hokogenangoli yakokegetongoka o Mesiiri ma nyawa manga tau mata-mataika. De o gufuru kohangoe yangohama de duru yakolongunu o Mesiiri ma nyawa ona mata-mataika.

²⁵ De o Firaunu ahao o Musa de o Harunu wabehehongo ho ka de yoboaino de una wahitodokanika onangika, wato, “Ngohi ihiwedonoka, ho naa ngini ka idadi nia huhuba nimahihuba nia Jouiye gea tinihigunoa. Masara kiani nenangoka dika nimahuba, ko idadiua niloiki o tonaka ma kakaahaika la nimahuba genangoka.” Hokogea o Firaunu ai dodaere ma demo onangika.

²⁶ Masara o Musa wipaluhu o Firaunika wato, “Mia koano ko hokogenangua nomihuloko angamoi ahao naga o Mesiiri ma nyawa imiwuningi ma oraha mimahuba de duru yaemono mia huhubaika hiadono manga dohatoo itagi ngomino. De sarakia ani nyawa gea ko imihakarua ma titi yaemono mia huhubaika? Ngonaoo nohioriki ani nyawa gea ahao imihakaru e?”

²⁷ “Ngomi kiani miloikohi mia wange hange mia dodagi de ahao mimahiadono mia dumutika abe Ma Jou o Yawe womihibehehongoka, de genangoka ahao ngomi kiani mimahihuba Unangika.” Hokogea o Musa wihiree-reeika wihingahu o Firaunika.

²⁸ De o Firaunu wato, “Ngohi ma oraha naa tato tinihigunoa ho niloiki dika. De ka idadi ti ngini nia huhuba niao de nimahihuba nia Jou o Yaweika o tonaka ma kakaahaka. Ho naa ngini nimataiti niloiki ma iti kalioli nikurutika. De naa kiani Musa ngona nohiniata.” Hokogea o Firaunu ai gogahoko.

²⁹ De o Musa wato, “Ahi koano, naa ngohi toikohi jai-jai la toniniata. De ngohi tonigahoko o duduhunu Ma Jou o Yaweika la ngaro o gufuru naa ikusuilino ani tonakoka wohihihanga. Ho itebini ahao ihihanga o gufuru mata-mata ngaro abe naga ani tau ma goronaka naa, eko ani duduhunu manga tauoka, eko ani kokawaaha manga kokitauoka de itebini ko iwaka mata-mata. Masara naa moi tonihibehehongo ngonaika, ufa nomielukoli abe hoka o futu muruono naga ipahaika. Ho tonganono ngona nagoungu abe nato ka idadi ngomi o Isiraele ma nyawa mia huhuba mimahihuba Ma Jou o Yaweika.”

³⁰ Ho ka de hokogea wotemo ibooto de o Musa wosobo o Firaunu winoaika de ahao wogahoko la Ma Jou o Yawe wohikokihihanga ma gufuru mata-mata.

³¹ De Ma Jou o Yawe wihigihene o Musa ai niniata gea ho hiadono wodiai la ikokiloara ma gufuru. Ho ngaro naga ikusuilino o Firaunoka de abe nagaoo ai duduhunu manga tau-tauoka de ona mata-mataika o Mesiiri ma nyawa ngaro ma gufuru kohangoe ikusuilino onangoka masara naa ikokiloaroka ka hiadono o gufuru moioo de ko iwaka.

³² Masara naa ma moioli o Firaunu ai hininga hoka ma dihirali ho wolukoli o Isiraele ma nyawa ai tonakoka yohupu.