Huhupu 40 - Ma Jou ai Demo-demo o Totobelohoka

Ma Jou ai Tau o Ngoerino ihigoko Ma hitararono ma hidogo abe hokokia o Musa wohiaturu de wohigoko Ma Jou ai Tau o Ngoerino

¹ Ho gea mata-mata ihidiai ibooto de ahao Ma Jou wihingahu o Musaika abe hokokia ai tau ona kiani ihigoko ho wato,

² “Musa, ho naa itigioka ka idadi nihigoko ahi Tau o Ngoerino abe idadi o Hikamake ma Tau abe genangoka Ngohi de ngini homakamake. Ho nako ma oraha nihigoko gea kiani o mede moiuku de ma tanggaloo moiuku.

³ De kiani o Behehongo ma Peti nihingohama o Debi-debini ma Ngi abe Ngohi Ma Jou Tomadingakino de ahao niatatoko de o dadatoko ma ngoere gea.

⁴ De ma meja nihingohama o dadatoko ma honongaka abe enangoo o Debi-debini ma Ngi. De o meja ma kiahonanga mata-mata abe niapake la nianiiki to ena ma hiaturu niakelenga o meja ma lokuoka. De ahao o hilo enangoo nihingohama de niakelenga to ena ma posi tumidi homoi-homoi ma ngioka.

⁵ De o manyanyi ma huhuba ma ngi o gurasi ma dutuino enangoo niakelenga o Debi-debini ma Ngioka abe ma dadatoko o ngoerino ma himangoka la o Behehongo ma Peti doka ma poretoka. Gea ibooto de ahao o Tau o Ngoerino ma ngoranoka niodide to ena ma dadatoko o ngoerino.”

⁶ “De o haharongo ma aewani ma huhuba ma ngi ahao niakelenga o Tau o Ngoerino ma ngorana ma himangoka ngaro imakatingakika ma hohutulu.

⁷ De ahao o akere ma ngi ma amoko niakelenga la igogere o haharongo ma huhuba ma ngi de ahi Tau o Ngoerino ma hidogoronaka. Ho igogere duru o Debi-debini ma Ngi ma himangoka de nioguhe ma akere ka hiadono niaomanga.

⁸ De ahao niatuga o Tau o Ngoerino ma loa de ahao ma dadaduhu ma liate nihigoko nihikilolitino de ahao nihipasi ma dadatoko o ngoerino. De to ena ma ngoranoka kiani niodide to ena ma dadatoko o ngoerinoli.” Hokogea Ma Jou ai hiaturu abe hokokia ai Tau o Ngoerino kiani ihigoko.

⁹ De ahao Ma Jou wihingahu o Musaika hokokia ihitunguu abe ai tau de ma kiahonanga kiani iwidingakoka Unangika, wato, “O tau naa de ma kiahonanga mata-mata kiani nohitunguu to Ngohi Ma Jou. Ho gea mata-mata niakelenga to ena ma ngi homoi-homoioka de ahao ngona, Musa, naleino o debi-debini ma minya abe tomahitongohioka de o minya gea ngona noderero ahi Tauika de to ena ma kiahonangikaoo nohibarihi la de ma dodunguu gea duru nohikokidingakino Ngohino. Hokogea nohihitongohioka ibooto de duru itebinoka ahi Tau o Ngoerino de ma kiahonanga mata-mata abe naga ma goronaka.

¹⁰ De ahao o debi-debini ma minya gea noderero o haharongo ma huhuba ma ngiika de to ena ma kiahonangika nohikokabarihi de ma minya gea la ena mata-mata nohihidingakoka Ngohino de hokogea enangoo idadi ma debi-debini.

¹¹ De gea ibooto de ahao o akere ma ngi ma amoko o tabaagaino de to ena ma gogogere de ma kiahonanga mata-mataika ngona nohikokabarihi de o debi-debini ma minya gea la enangoo nohikokitunguuoka abe nohihitongohioka.”

¹² “De ngona, Musa, ahao o Harunu de ai ngofa-ngofaka kiani nakokiao ahi Tau o Ngoerino ma himangika de genangoka naihoro de ma akere genangoka.

¹³ Gea ona naihoro ibooto de ahao naleino o Harunu to una ai leleani ma pakeanga de ngona nihinoa unanguku. De ahao una niduguihi de ahi debi-debini ma minya la de gea nihidingakoka Ngohino la una wodadi nia hidemo ma nyawa abe wohileleani Ngohi.

¹⁴ De ahao o Harunu ai ngofa-ngofaka to onangoo manga leleani ma pakeanga nahinoa onanguku.

¹⁵ De hoka manga babali ahao onangoo naduguihi de ahi debi-debini ma minya la onangoo yodadi o hohidemo abe ihileleani Ngohino. Hokogea Musa kiani ona nahitunguu la yodadi o hohidemo ma doomu abe manga leleani gea ko iwa ma dodogumu ka hiadono o Harunu de ai ngofa-ngofaka manga totoforauku.”

¹⁶ Hokogea Ma Jou o Yawe wihibehehongo o Musaika de o Musa wodiai duru waniiki itiai Ma Jou ai behehongo mata-mata gea.

¹⁷ Ho o mede moiuku de ma tanggaloo moiuku de Ma Jou ai Tau o Ngoerino idadioka. Ho naa manga dekana yohupuoka o Mesiiri ma tonakino manga taongo moi ibooto. Abe o wange gea o Tau o Ngoerino ihigokoka de duru o wange gea adonokali manga taongo ma hungi ho naa manga taongo hinooto o tonaka ma kakaahaka imulaengoka.

Ma Jou ai Medebini ma Dararono iuti de igogere ai Tau o Ngoerinoka

³⁴ Ka de manga karajaanga mata-mata gea ibooto de naga o lobi ma lou iuti hiadono o Tau o Ngoerino gea atamunuku de ma lobi de Ma Jou o Yawe ai medebini ma dararono iwohama hiadono aomangoka Ma Jou ai tau ma goronaka de ai dararono ma meletongo gea.

³⁵ De ko idadiokaua o Musa wowohama o Tau o Ngoerino ma goronaika angamoi o lobi duru ipirini. De doka ma goronaka ai Tau o Ngoerino duru aomanga de Ma Jou o Yawe ai medebini ma dararono.

³⁶ Abe ma oraha o Isiraele ma nyawa ahao yotagi-tagi de nako ona yomahiainuku de genangoka manga dodogumu ma ngioka yogogere ka hiadono yamake o lobi ma lou gea imagoraka Ma Jou ai Tau o Ngoerinoka de aiye. De o lobi ma lou gea idadi ma dodunguu Ma Jou ai mau la yosoboli.

³⁷ Ma nako o lobi ma lou gea ko imagorakiyeuahi ho nagahi Ma Jou ai Tauoka, gea ko idadiuahi yotagi hiadono o lobi ma lou imagorakiye de o wange gea ka idadi yomahidiai yoikoli.

³⁸ Ho ngaro o Isiraele ma nyawa yotagi-tagi ko manga dekanino masara Ma Jou o Yawe ai lobi ma lou gea ka ihikaika yamake Ma Jou ai Tau o Ngoerino ma lokuoka. De nako o futu-futu o lobi ma lou ma goronaka idadi hoka o uku ihololomiye, ho ka ihikaika ona mata-mata ka idadi yomalega genangika de yamake ma dodunguu gea abe iwihitaana Ma Jou ai gogere onangoka. O lobi ma lou gea Ma Jou ai dodunguu de gea ma rupa ma bobululunu abe daku de auku iuti de ma lobi gea Ma Jou wapake la ai dararono wohihawo. De Una ahao wapake gea ena la ka ihikaika o Isiraele ma nyawa wahihira-hira manga ngekomika ma oraha yotagi. Abe ka de o lobi ma lou gea imulaenge imalage de gea ona ihiorikoka kiani yosoboli de gea ena yaniiki de nako imatogumu gea onangoo yomatogumu de manga tau ihigokokali o ngoerino.