Huhupu 4 - Ma Jou ai Demo-demo o Totobelohoka

Ma Jou ai buturungu ma dodunguu wihimatoko o Musaika

¹ O Musa duru wototoihene Ma Jou ai hingahu gea masara una ka womademohi Ma Jouika wato, “Masara nako hokogea totemo marai ona o Isiraele ma nyawa ko yangakua ho ko ihihigihenua abe tahibehehongo yodiai. Ona ahao marai yotemo ato, ‘Ma Jou o Yawe ko womahimatokua ngonaika.’ Ho done sarakia ngohi topaluhu?”

² Ka de hokogea o Musa womademo de Ma Jou wileha unangika wato, “Gea ani kia nasoino?” De o Musa wopaluhu wato, “Naa ahi tutukunu abe tapake o domba de o kabingi togoana.”

³ De Ma Jou o Yawe wihuloko wato, “Ani tutukunu gea naumo o tonakuku!” De o Musa waumo ai tutukunu ma tonakuku, de ka de ai tutukunu waumo de idadi o dodiha de o Musa duru womodongo o dodihaika gea hiadono woara ma gurutika.

⁴ De Ma Jou o Yawe witemo wato, “Ufa noara, masara ma bikinika naso.” Ho o Musa wogilio ma dodihaika de wataoko ma bikinika de idadiokali hoka ma dodihirali ai tutukunu ai giamoka.

⁵ De Ma Jou o Yawe wihibehehongo wato, “Hokogea ngona nodiai o Isiraele ma nyawa manga himangoka de ahao ona iningaku abe Ngohi tomahimatokoka ngonaika, abe Ngohi Ma Jou o Yawe, de abe o Abarahaama, o Isaka de o Yakubu, Ngohino yomahijou.”

⁶ De Ma Jou o Yawe wohulokoli o Musaika wato, “Abeika ani giama nohingohama ani baju de ani badanga ma hidogoronaika.” De o Musa wihingounu ho wodiai hokogea abe hoka Ma Jou wihulokoli ma ka de ahao ai giama wohihupuino de abeika, ai giama duru iare-arehoka angamoi o panyake o pado ma dorou iwidaene.

⁷ De Ma Jou wihulokoli wato, “Ho naa nohingohamoli ani giama gea.” De o Musa wihingounoli ho wohingohamoli masara ka de ai giama wohihupuoli de abeika, ai pado ko iwaka ho ka ihira-hirali ai giama.

⁸ O Musa wodiai hokogea ipaha de Ma Jou o Yawe wihingahuoli unangika wato, “Nako ona yamake ani tutukunu gea ma heheranga masara ko iningakuahi de ahao hokonaa nodiai de o pado la de o dodunguu moioli nahiheranga hiadono marai ona iningaku.

⁹ Ma nako o dodunguu hinooto gea nodiai de yamake ma, ko iningakuahi ngonaika ho hiadono ko inihigihenua de ahao nodiai o heheranga moioli hokonaa, kiani o Nili ma akere nauitino. De ma akere gea abe ngona nauitino ahao manga himangoka napoauku o tonaka ma dudunguku de ena gea ahao idadi o awunu ma tonakoka gea.” Hokogea Ma Jou wihiakunu o Musaika de ai kuaha la o heheranga ka idadi wodiai hiadono iwingaku o Isiraele ma nyawa.

¹⁰ Masara o Musa womahiaka Ma Jou o Yaweika wato, “Ahi Baluhu, marai ngohi ko tadadiua angamoi ka ma dodihirainohi de ngohi totemo-temo ko itiaiua de hiadono ma oraha naa ahi akiri ma dubuhohi.” Hokogea o Musa womahiaka.

¹¹ De Ma Jou o Yawe wihitararono unangika wato, “Musa, naa tonileha, onaguna yodiai o nyawa manga uru mata-mataika? De onaguna yodiai o nyawa utu yatopongono de o nyawa utu yomou? De onaguna yodiai la o nyawa utu yomahioriki de utu yorafioka? De gea ngona nato ko Ngohiua? Gea Ngohi Ma Jou o Yawe dika ahi kuaha la hokogea todiai!

¹² Ho naa ngona tonihulokoli, kiani ngona noiki de ahao ngohi toniduhunu, la ma oraha notemo-temo de ani uru gea ahao Ngohi tohipareta de Ngohi ahao tonidotoko o kia notemo onangika.” Hokogea Ma Jou wihigaro.

¹³ Masara o Musa wohigalioli womademo wato, “Ahi Baluhu, duru togahoko la ngohi ufa. Irahai o nyawa utu nairiki la ona genangika yoiki de nahikarajaanga hokogea, ufa ngohi naa nohihidingoto.” Hokogea o Musa womahiaka.

¹⁴ Masara ka de womahiaka hokogea de Ma Jou o Yawe ai ngamo itagi o Musaika de wotemo wato, “Ho sarakia nako o Harunu woniduhunu, unangoo o Lewi ai toforauku abe una ani riaka idodutu de Ngohi duru tihioriki wotemo-temo wosawaro. De abeika, ma oraha naa una wosoboka dokaino woboa ngonaino la wonibuhuku de ma oraha nimakamakeoli de gea una duru ai hininga isanangi.

¹⁵ Ho ngini inihinooto nimakiniiki de o Harunu ahao tihidadi ani uru ma dodofanga o nyawaika hiadono o kia dika Ngohi Ma Jou tonihingahu ngonaika gea ahao nihingahuoli ani riakika la una ahao wotemo-temo onangika abe ahao tinihidumutu. Hokogea Ngohi tinidotoko inihinootoika la gea nihioriki o kia nidiai de o kia nitemo.

¹⁶ Ho una wodadi wotoihene ngonaino la wohioriki hokokia Ngohi Ma Jou tonihidoaka ani demo o nyawaika. De gea abe nihingahu ani riakika una ahao wadofanga o kokawaahaika. Ho una womahibaluhu ngonaika de wonihigihene imaketero hoka ngona nohihigihene Ngohino. Ho to Ngohi ahi demo womahinganono ngonaika.

¹⁷ De kiani to ngona ani tutukunu gea nao la de gea ena nohidadi o heheranga o nyawa manga himangoka.” Hokogea Ma Jou wihingahu ibooto o Musaika.

O Musa wolio o Mesiiri ma tonakika

¹⁸ Ho o Musa wolio ai toroa o Jitorika de womahidemo ai toroaika wato, “Toroa ngohi togahoko la nohihigunoa la toikohi ahi gogianongoru tatutumohi o Mesiiroka, mode naga ahi gogianongoru doka ka yowangohi.” Hokogea wogahoko de ai toroa o Jitoro wato, “Ka idadi, ngini niloiki dika ma iti nimahidodiai.”

¹⁹ De o Musa genangoka o Midiana ma tonakokahi abe ko wosobouahi o Mesiirika de Ma Jou o Yawe widuhunu la ufa wohawana wato, “Musa, ufa nohawana kiani noiki dika noliohi o Mesiiri ma tonakika angamoi o nyawa gea abe ma dihira ato initoma, ona gea yokokihonengoka.” Hokogea Ma Jou wihingahu.

²⁰ Ho ka de gea woihene de o Musa ngoi fekata de ai ngofa-ngofaka wahibarene ai keledaiuku de yosobo manga dumutu o Mesiiri ma tonakika. De ai tutukunu abe Ma Jou womadingakoka la wapake gea o Musa wasoino ai giamoka.

²¹ De Ma Jou o Yawe wihihohininga wato, “Musa, ka de nomahiadonika o Mesiiroka de o heheranga mata-mata abe Ngohi tonihiakunoka la ngona nodiai gea ahao nodiai o Firaunu ai himangoka. Masara una ko wonihigihenua angamoi to una ai hininga ahao tohitogowini hiadono ngaro o heheranga gea una wamakeoka ma, o Isiraele ma nyawa ko wahigunoauahi yoiki yomatingaka o Mesiiri ma tonakino.

²² Ho kiani ngona ahao nihingahu unangika nato, ‘Hokonaa Ma Jou o Yawe ai demo ngona o koanoika: o Isiraele ma nyawa ona gea tahiromanga ahi ngofaka o domoro.

²³ Ho hiadono tonihuloko kiani ngona o Firaunu nahigunoa la ahi nyawa ani tonakino naa yohupu la ka idadi yoboa Ngohino de yomahuba Ngohiye. Masara naa tonihitiari ngonaika nako ngona ka nolukohi ahi ngofaka o domoro yohupu de ahao Ngohi to ngona ani ngofaka o domoro titoma.’ Hokogea Musa kiani nihingahu o Firaunika.” Hokogea Ma Jou ai demo o Musaika.

²⁴ Ho naa o Midianoka de o Musa de ngoi fekata de ai ngofa-ngofaka yosobo yoiki o Mesiirika de ahao manga dodagi ma goronaka manga futu moi yomahiaini o dodagi ma dodogumoka de genangoka Ma Jou o Yawe ngade-ngade o Musa wihohonenge.

²⁵ Ho ngoi fekata o ngo Sipora maleino manga gakana yodiai o hakaruino de gea ena mapake mihihuna manga ngofaka. De ahao manga ngofaka ai kai abe maluitino gea maumo duru o Musa ai hima-himanguku de motemo unangika mato, “Ho naa ibooto! Ngona nodadi ahi rokata o awunino.”

²⁶ Hokogea o ngo Sipora mihiromanga ami rokatika mato, “ahi rokata o awunino” ma titi o huhuna ma behehongo yaniikoka abe ma dihiraino Ma Jou wahidoaka o Isiraele ma nyawaika la yomahitunguu ona to Una ai nyawa. Ho gea muna modiai ibooto de ahao Ma Jou wihigunoa o Musa wowangohi.

²⁷ De ma oraha o Musa de o Harunu ko yomakamakeuahi de Ma Jou o Yawe wihingahuokau o Harunika wato, “Harunu, naa Ngohi toigo tinihikamake de ani dodoto o Musa ho kiani noiki nibuhuku o tonaka ma kakaahaika.” Ho o Harunu woiki de ma oraha abe ahao una de o Musa yomakamake gea o loku ma timiuku abe ma dihira Ma Jou womahimatoko o Musaika. De genangoka o Harunu de ai dodoto yomahikomorene.

²⁸ De o Musa wihingahu ai riakika gea abe Ma Jou wihulokoka abe kiani woiki o Mesiirika. De mata-mata Ma Jou wihingahuoka o Musaika ena gea wihingahuoli ai riakika mata-mata. Abe o heheranga Ma Jou wihuloko o Musa wodiai o Mesiiroka, genangoo wihingahu o Harunika.

²⁹ Genangoka de o Musa de o Harunu yogila-gila o Mesiirika. De ma oraha yomahiadonika genangoka de ahao o Isiraele ma nyawa manga balu-baluhu mata-mata yatoomuino.

³⁰ De o Harunu wahingahu onangika mata-mata gea abe Ma Jou wihibehehongoka o Musaika, de gea ahao o Musa wodiai o heheranga o Isiraele ma nyawa manga balu-baluhu manga himangoka.

³¹ De o Musa ai hingahuika gea yongaku. De naa ona yotemo ato “Naa ngone duru hohioriki Ma Jou o Yawe ka wonalegahi de ai dora ngoneino abe nanga kangelaoo ma, wohioriki.” Ho ka de yotemo hokogea de yomakokiponuku yomahuba Ma Jouiye.