Huhupu 34 - Ma Jou ai Demo-demo o Totobelohoka

O Hibehehongo ma Hakaru ma duruuru de o behehongo ma ngoeoli abe kiani yaniiki

^1-2 De Ma Jou o Yawe wihibehehongoli o Musaika wato, “Musa, kiani naa nomahidiaioka la itebini duru ka o ngoru-ngorumino nodoali o Sinai ma loku ma tubuiye naa la genangoka nomaokoino nohidamaa. Ho naa ko nodoauahi de kiani o hakaru hinooto nomapawohi de ipelaka duru itiaiuku ma baka-baka duru imakadaene abe hoka ma dihirainoli ngona nawede-wedere. De ahao itebini ma hakaru hinooto gea naoiye de Ngohi de ahao ma hakaruika gea totulihikali ahi pareta abe ma dodihiraka totulihuku gea.

³ De ma oraha nodoa ko idadiua o nyawa utu ininiiki de ngaro o Sinai ma loku ma amoko gea ko idadiua o nyawa utu naga genangoka de ngaro manga aewanioo ma ko idadiua ma timiuku ihiolomo ma ruruubu abe iwangoiye genangoka.” Hokogea Ma Jou wihibehehongo o Musaika.

⁴ Ho o Musa wopawohi o hakaru hinooto la hiadono ipelaka duru itiaiuku ma baka-baka abe duru imakadaene hoka ma dihirali. Gea womapawa ibooto de ahao duru o ngoru-ngorumino wosobo wodoa o Sinai ma lokuiye la waniiki Ma Jou o Yawe ai behehongo de wao naga o hakaru ma baka-baka hinooto gea.

⁵ De Ma Jou o Yawe womahihawoka de o lobi de ahao wouti o Musauku o loku ma tubuoka yomaokoino duru imaketero hoka yomakadatekuku Una de o Musa. De ka de Ma Jou womahiadono de womafetongo wato, “Ngohi Ma Jou o Yawe.”

⁶ De witilakuru o Musa ai himangino de o lobi gea de womahingahu-ngahu wato, “Ngohi Ma Jou o Yawe, Ngohi Ma Jou o Yawe abe duru ahi hiokoo itagi ahi nyawaika hiadono duru toigo taduhunu. De to Ngohi ahi dora gea ngaro ufa dika o nyawa yomaija angamoi Ngohi tahidoaka dika. Ngohi Ma Jou abe ko itai-taitua ahi hininga yatohata o nyawaika. Ngohi Ma Jou abe duru kohaamoko ahi dora itagi o nyawaika. De mata-mata Ngohi Ma Jou tohibehehongoka tato todiai gea ahao todiai.

⁷ Ho to Ngohi Ma Jou o Yawe ahi dora ko itoa-toakua itagi o nyawaika abe duru yasana. De ngaro ahi pareta yatilakuru ma ka idadi Ngohi tahiapongo de hiadono manga howono de manga dorouoo enangoo ma, taofi. De ngaro ihitobalawana Ngohi Ma Jouino masara manga howono enangoo ma, ka idadi Ngohi taofi. Masara ona abe manga datoro o howonika yahitaanoka de kiani Ngohi Ma Jou tahohowono. De ko ma titiua onangika dika tahohowono masara to ona manga ngofa-ngofakuku hiadono manga lape hangeuku eko iatuku manga tofora manga hohowono yadaene manga danongika.” Hokogea Ma Jou o Yawe wihitararono o Musaika.

⁸ Ka de Ma Jou ai demo gea o Musa woihene de womaponuku womahuba hiadono ai pea itiki o tonakuku.

⁹ De wohibehehongo Ma Jouika wato, “Ahi Jou kangano Ngona nohihingahu nato nohisanangi ngohino de ani demo mata-mata igoungu ho duru ngohi togahoko la Ngona nominiiki mia dodagi ma goronaika. De ngaro ani nyawa naa ona o tobalawana ma nyawa abe igoungu manga pea duru inidotogowini Ngonaika masara ngohi togahoko la to ngomi mia howono nakokiofi la duru itaana abe ngomi nomidafongoka. Hokogea idadi ma dodunguu abe ngaro ani dulaada mata-mataika to Ngona masara, gea ka ngomiohi duru nomadingakoka Ngonaika.” Hokogea o Musa wihibehehongo.

¹⁰ De Ma Jou wopaluhu o Musaika wato, “Abeika, naa ani demo topaluhu de ahi behehongo ngini o Isiraele ma nyawaika. Ngohi ti ngini nia himangoka ahao todiai o heheranga duru ma ngoe abe ko ma moiuahi o dunia ma nyawa yamake. Ho ngaro o tonaka mata-mataika o dunia ma lokuoka ma ko ma moiuahi todiai ahi heheranga ma ngoeika naa. Abe ma oraha tiniao nia tonakika de ahao ma ngoe tinihiheranga ngini de o nyawa utu abe naga nia datekoka ma titi to Ngohi Ma Jou o Yawe ahi buturungu. De gea o nyawa mata-mataika ahao duru yahiheranga ahi karajaangika hiadono duru yohawana ma titi ahi duduhunu nginika abe duru tomahimatoko de ahi buturungu ma gahumu.

¹¹ De gea ti ngini nia tagongo kiani nihihingounu Ngohino de nianiiki ahi behehongo mata-mataika abe tinihidoaka o wange naa. Abeika ahi duduhunu nginika, Ngohi ahao tahihupu ona mata-mata abe yogogere ma tonakoka gea abe Ngohi tinihidoaka. Ho ngaro o Amori ma nyawa, de o Kanani ma nyawa, de o Hete ma nyawa, de o Ferisi ma nyawa, de o Hewi ma nyawa, de o Yebusi ma nyawa ona mata-mataika ahao Ngohi tahihupu ma tonakino gea.

¹² De Ngohi tinihitiari nginika la ufa o dame ma hibehehongo nidiai de ona abe yogogerika o tonakoka gea. Angamoi nako ahao niadodiawo onangika ho hiadono nimahiketehibehehongo hokogea de ahao ko itedekanua de manga datoro itotorou gea idadi o modoi abe ahao inihidilikoka genangika ho ufa nidiai o hibehehongo ngini de ona.

¹³ Masara kiani manga popangao niakokioluku ho manga huhuba ma ngi kiani niakokikilianga, de manga hakaru yohapa ma ngoe abe yomahijou enangika kiani niakokiwedere, de manga pangao o ngo Asera ma liate abe yomahuba enangika kiani enangoo mata-mata niakokitolanga.

¹⁴ Ngini duru ko idadiua nimahijou to ona manga popangaoika angamoi Ngohi Ma Jou o Yawe, ti ngini nia Jou abe nimahuba Ngohino. Ho ufa ngini nihihikasapuru hiadono naga utu nihikurutiye de gea niato nako ena de Ngohi mimaketero dika. Ngohi Ma Jou duru todohata abe nako nimahuba o kiahonangika ngaro o kia dika naga. Ho Ngohi Ma Jou duru tagoana o nyawa la de manga hininga ma gahumu yomahijou de yomahuba ka Ngohino dika.”

¹⁵ “Ho ngini kiani nimahidodiai la ufa nimaketedodiawo onangika hiadono nimahiketehibehehongo de onagona dika ma tonakoka gea. De gea ngaro o behehongo o kia dika ma rupa masara ko idadiua. Ona gea yomahijou ka manga popangaoika dika de done iniahoko hiadono onangikali nianiiki. Abe ka de ngini nianiiki manga rame-rame de niaolomo manga huhuba ma roehe de ahao gea ena inihirehene.

¹⁶ De ahao ko itedekanokaua de nia ngofa-ngofaka niahigogilaka de manga ngofaka o ngo-ngofeka. De ahao nia hunu-hunungu gea abe yomahuba-huba manga popangaoika ahao manga roka-rokata yahirehene hiadono onangoo duru yohafini manga dorou o pangaoika. Ho ma bahauku de nia ngofa-ngofaka ihiporetoka Ngohino.”

¹⁷ “Ngini ko idadiua o kia dika ma rupa ma pahitaaka nimadiai la idadi nia pangao.”

¹⁸ “De naga ahi hingahu nginika abe iniduhunu la nihiniiki itiai. Ngini kiani o tao-taongiye nihirame-rame o Roti ko Iwa ma Ragi ma rame-rame o wange tumidino ma dekana imaketero hoka tinihibehehongokau. De gea kiani nihirame-rame o taongo ma mede ihira abe ma romanga o Abibi ma mede de ma tanggala yakorona abe Ngohi tinihingahuokau la duru nimahihohininga o wange gea abe Ngohi o Mesiiri ma tonakino tinihikokihupu.”

^19-20 “De ti ngini nia ngofa-ngofaka o domoro Ngohi Ma Jou tomahitongohioka. Ho ufa niawohanga ti ngini nia ngofa-ngofaka o domoro o nau-nauru gea niakokibangu Ngohiye. De abe nia duduonino, ti ngini nia aewani o dofo ma ngofaka ma nauru abe o domoro enangoo to Ngohi ho ena gea kiani nimahihuba Ngohiye. Masara nia aewani o keledai ko idadiua nimahihuba Ngohiye. Ho nako o keledai ma ngofaka ma domoro gea kiani niobanguokahi abe nia domba ma ngofaka moi kiani nimahihuba Ngohiye. De nako nia keledai ma domoro gea niato ko niapakeua, ho ko niobangua, gea kiani ma tomara dika niatobikoka.” “De ngini ngaro onagona dika ma oraha niboa Ngohino de kiani naga nia hidoaka Ngohino ho ufa niboa Ngohino de nimagiawawe dika.”

²¹ “De ngini naga o wange butaanga abe ka idadi nimakarajaanga masara ka de ma wange tumidoka de adonoka o Hiaini ma wange abe kiani nimahikokiaini. De hokogea kiani nianiiki ngaro ma oraha nia redi nihidiai la niodatomo eko ma oraha niautuku masara ka de ma wange tumidoka de kiani ngini nimahiaini.”

²² “De o tao-taongiye kiani nihirame-rame o Domoro ma rame-rame abe nimahihuba Ngohino nia datomo o gandumino ma hasili ma domoro. De ahao nihirame-rameoli o Gugutuku ma rame-rame abe ma oraha nia datomo hoka o pine eko o gandumu ma hasili ma amokino niautuku niabootoka.

²³ Ho ma oraha o rame-rame ma hangeino gea o Isiraele ma nyawa o nau-nauru mata-mataika abe yobaluhoka kiani yoboa Ngohino, abe ti ngini o Isiraele ma nyawa nia Jouino, la gea yomahuba Ngohi Ma Jou o Yaweiye.

²⁴ Nako ngini duru nihidodiai nianiiki o rame-rame ma hangeino gea, de ahao ngini nigogere nisosanangi dika nia tonakoka. De ti ngini nia tonaka ma batingi Ngohi tohiwoata. De o tao-taongiye ko moiua yamoroini yohafini nia tonakika ngaro ma oraha niloiki de nianoaika nia tonaka la nianiiki ma rame-rame hange abe tinihibehehongoka ma ko yamoroinua iniora.”

²⁵ “De duru ko idadiua nimahihuba Ngohiye o roti de ma ragioka. Ho ma oraha nimahihuba o huhuba ma awunu de ma hisapuroka de ko idadiua ma hisapuru gea de ma ragioka. De ma oraha o Totilakuru ma huhuba ma roehe niaolomo de kiani niaolomo ka niotengouku abe ma dawangeino ma wange ko ipotokauahi de ma roehe gea niamataka.”

²⁶ “De angamoi ngini nimahijou Ngohi ma Jou o Yaweino dika ho o tao-taongiye kiani ti ngini nia tonakino ma hasili ihira-hira niairikino abe duru ma rorahai de gea niao to Ngohi ahi tauino de ena gea nimahihuba Ngohiye.” “De ufa nimaaduru o nyawa utu manga biaha abe o kabingi ma ngofaka eko o domba ma ngofaka ma roehe ihihakai de to ena ma ayoino ma huhu ma teongo.” Hokogea Ma Jou ai behehongo abe wihingahu o Musaika ma oraha gea.

^27-28 De gea Ma Jou o Yawe de o Musa yomakoketemo daku o lokuoka o wange moruata ma dekana. Ho o Musa ai dekanino genangoka ai wange moruata de ai futuoo moruata de ko ma moiua o inomo waolomo de ko ma moiuahi o akere waokere o wange moruatino gea. De gea Ma Jou abe wotulihi ai Pareta Ngimoi o hakaru ma baka-bakaika abe idadi manga Behehongo ma demo abe Una de o Isiraele ma nyawa yomahiketehibehehongo. Masara Ma Jou ai behehongo mata-mata utu gea o Musa wotulihuku angamoi Ma Jou wihuloko unangika wato, “Musa, kiani ahi behehongo mata-mata naa ngona de o Isiraele ma nyawa nianiiki angamoi gea ahi demo ihititi nginika abe homahiketehibehehongoka ngini de Ngohi. Ho ahi behehongo utu naa kiani ngona notulihuku la enangoo nianiiki mata-mataika.” Hokogea Ma Jou ai behehongo o Musaika.

O Musa wouti o Sinai ma lokuino de ai himanga duru iletongo

²⁹ Ho ai wange moruata gea ibooto de ahao o Musa wouti o Sinai ma lokuino de wao Ma Jou ai Pareta Ngimoi abe Ma Jou wohitulihukuoka o hakaru hinooto ma baka-bakaika. De gea o Musa wouti de ai himanga duru iletongo angamoi yomarihimanga una de Ma Jou o Yawe yomakoketemo. Masara o Musa ko wohiorikua abe naga ai himanga iletongo hokogea.

³⁰ Ka de o Harunu de o Isiraele ma nyawa iwimake o Musa woboaino de ai himanga iletongo de duru yohawana yomahitigi unangika.

³¹ Masara o Musa wahokino o Harunu de o Isiraele ma nyawa manga dimo-dimono la ka idadi ona yohira yomakoketemo de o Musa.

³² De ahao o Isiraele ma nyawa mata-mata yokokiboa yomahitigi o Musaika de wahikokingahu onangika Ma Jou o Yawe ai behehongo mata-mata abe wihidoaka o Musaika o Sinai ma lokuoka.

³³ De ma oraha o Musa wahingahu ibooto onangika de ahao ai himanga watatoko de o ngoere.

³⁴ Masara una ma oraha wowohama Ma Jou ai himangika la yomakoketemoli de ai himanga ma dadatoko gea wagorakoka hiadono wohupuokali Ma Jou ai tauino abe genangoka yomakamake una de Ma Jou. Ka de wohupuino de woiki wahingahu o Isiraele ma nyawaika Ma Jou ai demo abe Una wato kiani o Musa wadofanga onangika.

³⁵ De ona yamake ai himanga ma meletongo gea ho to una ai himanga ma dadatoko o ngoerino gea wapakeoli. Masara ma oraha wowohamoli la una de Ma Jou yomakoketemoli de ai himanga ma dadatoko gea wagorakokali.