Huhupu 32 - Ma Jou ai Demo-demo o Totobelohoka

Manga pangao yomadiai o gurasino ma hapa o hapi ma ngofaka

¹ De mangale o Musa daku o lokuoka wodoaiye ko ai dekana ho hiadono o Isiraele ma nyawa ato bote una ko woboakaua. Ho ona yoiki o Harunika de iwihigororomino de iwitemo unangika ato, “Abeika, naa ngone duru ko hohiorikua o kia idadi o Musaika daku o lokuoka. Igoungu, una gea wonahihupu o Mesiirino de wonaao nenangino masara naa marai ko iwiwaka. Ho done ka onagonali inahihira? Ngone hoperelu ena gea abe ka idadi to una ai duruuru. Abe kiani naga enangoli la idadi to ngone nanga jou abe inaao. Ho ngona Harunu kiani nonadiai nanga jou la enangoli inahihira-hira.” Hokogea o Isiraele ma nyawa iwihigororomino de iwiribuutu o Harunika.

² De o Harunu wopaluhu onangika wato, “Ti ngini nia ngaukuku o gurasino niakokihuputu homoi-homoi nia fekatino, de nia ngofa-ngofakino o nauru de o ngofeka, de o ngaukuku mata-mata gea niakokiaoino ngohino.”

³ Ka de o Harunu wahuloko hokogea de ona yakokihuputu manga ngaukuku o gurasino gea de yakokiao o Harunika.

⁴ De o Harunu manga ngaukuku mata-mata wale de ahao wahakai ka hiadono iwaro. Ma gurasi gea wawaro ibooto de ahao woguhe ma pahitaakauku abe ma hapa hoka o hapi ma ngofaka. De ahao wapake ai alata moi la gea ena wohitiai abe ihikokaika ipuku-puku. Hokogea wodiai ma gurasino gea manga pangao ma rupa hoka o hapi ma ngofaka ma nauru de ahao o Isiraele ma nyawa yomahikokangahu ato, “Naa ena to ngone nanga jou abe inahihupu o Mesiirino.” Hokogea de manga garago yotemo.

⁵ Ka de o Harunu wamake ona hokogea de ahao wodiai o huhuba moi ma ngi manga pangao gea ma himangoka, de wahingahu onangika wato, “Itebini ahao ngone hodiai o rame-rame Ma Jou o Yaweika.”

⁶ De o Harunu ai demo gea yaniiki ho ma dawangeino o ngoru-ngorumino de yokokiboaino, de naga utu yaoino o aewani la ena gea yomahihuba. Ho manga aewani gea utu idadi manga huhuba iharo-harongo. De utu idadi o dame ma huhuba abe ma hononga yomahihuba Ma Jouika de ma hononga ona yaolomo. Gea yomahuba ibooto de ahao ona mata-mata yomulaenge ihirame-rame de manga inomo de manga daluku. De ona yoselo-selo de yodiai irupa-rupa de mata-mata gea Ma Jou wamake.

⁷ De ma oraha gea o Musa una nagahi daku o lokuoka de Ma Jou wihuloko unangika wato, “Musa, kiani ngona nomataiti nouti, angamoi ani nyawa gea abe nahihupuoka o Mesiirino ona gea yodiai duru o howono hiadono yomahidadidorouoka.

⁸ Ona ko yaniikua abe Ngohi tahibehehongo onangika de itaiti yorehenoka ma gurutika de yaniikoli o howono ma ngekomo ho ahi pareta yoporetoka. Ona yomadiai o gurasino manga pangao ma hapa o hapi ma ngofaka, abe o gurasi yawaroka de yoguhe o pahitaakauku ho idadioka manga pangao. De enangika duru de manga horomatioka yomahuba de nagali manga aewanioo yomahihuba enangika. Hokogea yodiai angamoi ato o pangao hokogea yoperelu la enangoli yahihira-hira hiadono yotemo ato, ‘Naa ena to ngone o Isiraele ma nyawa nanga jou abe inahihupu o Mesiirino.’ Hokogea manga hininga hiadono tato ona gea ihiolukoka Ngohino ho ngona kiani nomataiti nouti.”

⁹ “Ngohi Ma Jou o Yawe tahiorikoka o nyawa gea de abeika manga pea duru kohadogowini.

¹⁰ Ngaro ufa, Musa, ngona nademo la nato ahi ngamo onangika nohitatoko! Ngona nomarii-riidoka dika la ahi ngamo duru idogo itagi onangika hiadono Ngohi tahibinaaha. La ona gea tahibinaahaka de ahao ngona de to ngona ani ngofa-ngofaka de ani dano-danonguku tinihidadi o dutu moioli duru kohaamoko.” Hokogea Ma Jou ai dohata manga howonika.

¹¹ Masara ngaro hokogea Ma Jou wihitiari o Musaika masara una duru wagahoko o Isiraele ma nyawa Ma Jou o Yaweika. Ho hiadono ona o Musa wademo ai Jouika wato, “Ahi Jou o Yawe, ngaro yahowonoka ma adodoa ho Ngona nangamo onangika hiadono nato ona nahibinaaha mata-mata? Ona gea nahidadioka to Ngona ani nyawa de abeika ani duduhunu onangika hiadono nahihupu o Mesiiri ma tonakino de o heheranga ma ngoe abe inihitaana ani kuaha ma buturungu.

¹² Ho naa nako ani nyawa nahibinaaha de ahao o Mesiiri ma nyawa yosanangi hiadono done ahao manga demo o hohedu Ngonaika. Ona ahao yotemo, ato, ‘Abeika, manga jou ai hininga duru wabudi hiadono ona waofi o dunia ma lokuino. Abe ona wahihupu nenangino la wao o tonaka utuika de wakokitoma o loku-lokuoka genangoka.’ Ahi Jou, done hokogea manga hohedu ma demo Ngonaika ho koaho ibootoka ani ngamo onangika. Ngohi togahoko ahi Jou ani hininga naturuuru onangika la ufa nahibinaaha.

¹³ Kiani Ngona nahininga ma dihiraino ona ani dodiawo abe inileleani Ngonaika gea o Abarahaama, o Isaka, de o Yakubu. Onangika nahibehehongokau, nato ahao nahidoaka onangika manga totoforauku duru ko manga ngoe hiadono hoka o murumu o dihangoka manga ngoe. De nahibehehongoli onangika o tonaka abe nato o Kanani ma tonaka enangoo nahidoaka manga totoforauku de gea idadi to ona manga tonaka ka hiado-adonika. Ho done sarakia ani behehongo onangika nawohanga dika?”

¹⁴ O Musa hokogea ona wademo Ma Jouika la Una wahiapongo. Ho Ma Jou o Yawe ai hininga waturuuru ho ngaro wato wahibinaaha masara naa, ko wahibinaahauali ai nyawa gea.

¹⁵ Ho yomakoketemo ibooto de o Musa o loku ma tubuoka de wauku wouti dau onanguku. De wao naga o hakaru ma baka-baka hinooto abe genangika Ma Jou wohitulihika ai pareta ma hakaru arihonongaika.

¹⁶ De o hibehehongo ma hakaru gea Ma Jou ma hirete ahao ma himangoka de ma poretoka wotulihi ai pareta ngimoi. De ma dulihi gea imakadaene hoka wapawika ma hakaru ma baka-bakaika gea.

¹⁷ O Musa wouti hiadono o Yosuauku wiadono de gea o Yosua woihene manga dodiawo manga gigoro ho wotemo o Musaika wato, “Ei, marai naga o nyawa inaparangi nanga doomuoka.”

¹⁸ De o Musa wopaluhu wato, “O hagaaga gea ko o lolakua ma hagaaga, De tanu gea ko o kalaua ma gigoro, Masara gea yogii-gigoro, toihene hoka yonyanyi dika.”

¹⁹ Ho o Musa womahitigioka o Isiraele ma nyawa manga dodogumuku de ka idadi wamake mata-mata gea yodiai. Ka de wamake manga pangao o gurasino ma hapa o hapi ma ngofaka de ai nyawa yoselo-selo de o Musa ai ngamo duru ilamoko ena mata-mataika abe wamake genangoka. De ai ngamo dika hiadono wadotumo Ma Jou ai pareta ma hakaru hinooto wasoino gea. Dau o loku ma batingi ma timiuku waumo ho o hibehehongo ma hakaru hinooto gea ikokiwederoka.

²⁰ De gea o Musa waleoli manga pangao o hapi ma ngofaka de gea ena wahakai hiadono iwaroli de ahao ma gurasi gea wawedere ka hiadono wamata-matauku watutuku ho idadioka hoka o dofae ma mangaluhu. Hokogea wawedere ibootoka de ahao ma gurasi gea wohisapuru de o akere de wahuloko o Isiraele ma nyawaika la ona kiani yakokiokere ma akere gea ka hiadono yamataka. Hokogea una wahohowono onangika de manga pangao gea.

²¹ De ahao o Musa wileha ai riakika wato, “Harunu, ka o kia ma titi ona iniribuutu hiadono ngona nahingounu? Abeika, ngona ka de nodiai hokogea de ona duru nahirehene ka hiadono yahowono ma amoko Ma Jouika!” Hokogea o Musa witaere o Harunika.

²² De o Harunu wopaluhu wato, “Ufa nohingamo ka ngohi dika. Ngona nahioriki nanga nyawa naa abe ka ihikaika manga hininga ma dumutu o howonika! Ona yoboa ngohino de manga gogahoko ngohino ato,

²³ ‘Harunu, ngona kiani nonaduhunu la naga nanga popangao ma ngoe abe ka idadi inahihira. Abe o Musa una gea igoungu wonahihupu o Mesiiri ma tonakino masara ka de ma wange naa de una ko wiwihiorikokaua gea o kiaka waika.’

²⁴ Hokogea Musa, manga ribuutu ma demo ngohino ho hiadono tahuloko onangika tato, ‘Nako ngini hokogea nia hininga ma gogahoko ngohino de niaoino nia ngaukuku de nia gogoli eko o kia naga o gurasino nia badangoka.’ Ho ngohi tale manga gurasi abe yakokihuputoka manga badangino de tahakai ka hiadono iwaro de ka itodokanino de idadioka ma hapa o hapi ma ngofaka gea abe ngonaoo namake nenangoka.” Hokogea o Harunu womademo.

²⁵ De gea o Musa wamake o Harunu wahigunoa dika o Isiraele ma nyawa manga hininga ma hafini ko yomatumungua ho ma dorou o kia dika ipuda manga hiningaka de gea yodiai. De una wohuha ma titi manga musuoo yamake abe hokokia yodiai itorou de ngaro manga malekoo ma ko iwa ho hiadono manga musu ahao yahiade-ade de manga gietoka.

²⁶ Ho o Musa womaokoino manga dodogumu ma ngi ma ngoranoka de ai ilingi ma amoko watemo, wato, “Ngini mata-mata ma oraha naa kiani nimangiriki. Onagona dika yomangiriki Ma Jou o Yawe kiani yoboa ngohino.” Ka de hokogea o Musa wahuloko de o Lewi ai totoforauku ona yokokiboa yomatoomu o Musaino.

²⁷ De ahao o Musa wahuloko o Lewi ma nyawa ma nau-naurika wato, “Hokonaa Ma Jou o Yawe wotemo, abe Una o Isiraele ma nyawa nanga Jou wonahuloko wato, ‘Ngini o nauru homoi-homoiika nia humaranga o dopo-dopoino nimahikokihibuluino de ahao niloiki nia gogianongoru manga hidogoronaika. Hokogea niaika niaino niatailako nanga gogianongoru de niahohowono de niapake o doma. Ho ngini nimulaenge naa ma dobikoka de hiadono nia doomu ma dobikika nitagi-tagi niatoma onagona dika abe ihilawana Ngohi Ma Jou o Yaweino. Ho ngaro ona nia ria-dodoto, eko nia dodiawo, eko nia datekoka yogogere ma tinihuloko kiani niatoma.’ Hokogea nanga Jou ai huhuloko nginika.”

²⁸ Ka de o Musa wahuloko hokogea de ona o Lewi ma nyawa ma nau-nauru yosobo yaniiki Ma Jou ai behehongo onangika. De o wange gea ona o Lewi ma nyawa yatoma manga gogianongoru yasana hange manga ngoe.

²⁹ De gea yatoma ibooto de ahao o Musa wahingahu onangika wato, “O wange naa ngini o Lewi ma nyawa Ma Jou o Yawe winidingakoka to Una ai karajaangika. De ngini niwihingounu ngaro duru nihuha niatoma ti ngini nia ngofa-ngofaka o nauru de nia ria-dodoto idodutu masara hokogea nidiai itiai hiadono Ma Jou o Yawe winihiowa.” Hokogea o Musa wahitararono Ma Jou ai hininga o Lewi ma nyawa ma nau-naurika gea.

³⁰ Ho ma dawangeino o Musa wahingahu o Isiraele ma nyawaika wato, “Ngini niahowono ilamokoholi! Ho ngohi naa o lokuiye todoali la ka idadi mimakoketemo ngohi de Ma Jou. Ngohi ahao togahoko Ma Jou o Yaweika la Una nia howono gea waofi.” Hokogea o Musa wahingahu.

³¹ De ahao una widoali Ma Jou o Yaweiye de wihingahu wato, “Hiokoo, ani nyawa naa manga howono duru ilamokoholi hiadono yomadiai o gurasino manga pangao.

³² Masara ngohi duru tonganono Ngona noigo manga howono gea naofi. Abe nako nato, ‘Ngohi ko taofiua manga howono,’ gea ngaro ufa de to ngohioo ahi romanga naga ani gegetongo ma bukuoka abe genangoka notulihukuoka o Isiraele ma nyawa manga roma-romanga.” Hokogea o Musa o Isiraele ma nyawa waademo.

³³ De Ma Jou o Yawe wopaluhu wato, “Ngohi hokogenangua todiai, ani romanga ko taofiua, angamoi ona dika abe yahowonoka Ngohino ahao manga romanga taofi ahi gegetongo ma bukuoka.

³⁴ Ho naa Musa, noiki o Isiraele ma nyawa nahigila-gila o behehongo ma tonakika abe Ngohi tahibehehongoka. De abeika, ahi malaekata ahao ka ihikaika winihihira-hira nia dodagi ma goronaika. Masara ngaro hokogea ma, ahao naga ma oraha Ngohi tatutumu la tahohowono onangika, de gea ahao ihititi manga howono Ngohino naa.” Hokogea Ma Jou wihibehehongo o Musaika.

³⁵ De ahao Ma Jou o Yawe igoungu wahihohowono de o panyake ma dorou ho ona utu yohonenge mangale ma titi iwiribuutu o Harunika hiadono manga pangao o hapi ma ngofaka ma nauru waadiai de yomahuba enangika.