Huhupu 30 - Ma Jou ai Demo-demo o Totobelohoka

Ma Jou ai hingahu ma titi yodiai o Manyanyi ma Huhuba ma Ngi

¹ De Ma Jou ka wihingahuohi o Musaika daku ma lokuoka ma hiaturu abe adaene ai kiahonanga abe kiani naga to Una ai Tau o Ngoerino ma goronaka, wato, “De ngini nidiai o huhuba ma ngi ma eteteke moi o akasia ma gotaino abe genangoka niatufuku o manyanyi Ngohiye.

² O Manyani ma Huhuba ma Ngi gea kiani nidiai la o pahagi iata ma duduga imaketero ho ma gurutu o giama ma pangaino o senti moruata de motoa de ma ngoatoo o giama ma pangaino o senti moruata de motoa, de ma gurutiye o senti morihiwo abe ngade-ngade o badanga ma hononga ma gurutiye. De daku ma barene ma libuku iatoka gea niodiai ma rupa hoka o tataduku homoi-homoiika de nihipasi duru ikeketika la idadi moi de ma badanga.

³ De kiani o manyanyi ma huhuba ma ngi gea nihihawo de o gurasi ma dutu hiadono ma pahagi iata, de daku ma lokuoka, de ma tataduku gea mata-mataika nihihawo de o gurasi. De daku ma barenoka nihigilolitino ma igarino de o gurasi la idadi o huhuba ma ngi ma nguroto o gurasino.

⁴ De dau ma nguroto ma timiuku kiani naga o momoku ma gogoli niodiai o gurasino de ma gogoli iata gea nihipasi o huhuba ma ngi aridateke. De ahao ma momoku nihinoaika ma gogolika gea abe nihipasikaka o huhuba ma ngi arihonongaka.

⁵ De ma momoku gea kiani nidiai o akasia ma gotaino de ahao niahawoka de o gurasi.”

⁶ “De o Manyanyi ma Huhuba ma Ngi gea niakelenga o Debi-debini ma Ngi ma dobikoka ho ahi Tau o Ngoerino ma goronaka. De ma dadatoko o ngoerino yoarihononga de ahi Behehongo ma Peti abe ena gea naga doka ma honongaka abe duru Ngohi tomadingakino. De gea o manyanyi ma huhuba de ahi Behehongo ma Peti imakitingaka abe to ena ma dadamunu o Hikadame ma Ngi abe duru genangoka Ngohi naga de ahi hingahu o Isiraele ma nyawaika genangoka ahao tonihingahu ngonaika.”

⁷ De Ma Jou wogila-gila wihingahu o Musaika, wato, “De ahao o wange-wangeiye ma oraha o Harunu wowohama o ngoru-ngorumino la o hilo ma sumbu ma kuru wakokiteturu de kiani o manyanyi ma bounu ma rorahai wotufuku o Manyanyi ma Huhuba ma Ngioka.

⁸ De ahao o bobimaowakali ma oraha ma hilo watufukoli de kiani o manyanyioo wotufukoli Ngohi Ma Jou o Yaweiye abe o Manyanyi ma Huhuba ma Ngioka. Hokogea ma hiaturu ka hiadono o Harunu ai totoforaukuoo hokogea ka ihikaika yaniiki ma hiaturu gea.

⁹ De o manyanyi abe watufuku gea ena dika ka idadi wapake abe ahao tinihibehehongo nginika la nidiai. Ho ngini duru ko idadiua nia huhuba utu nimahihuba o Manyanyi ma Huhuba ma Ngioka. Ho ngaro o manyanyi utu eko o huhuba o aewani, eko o huhuba o datomino, eko o angguru ma teongino, ma duru ko idadiua niahihuba o Manyanyi ma Huhuba ma Ngioka ho ka o manyanyi dika abe nihidingakino Ngohino gea ena dika ka idadi nimahihuba ahi Manyanyi ma Huhuba ma Ngioka.

¹⁰ Masara o taongo moi ma moi o Harunu wohitunguu de o awunu o Manyanyi ma Huhuba ma Ngioka abe ena gea itebini Ngohi Ma Jou ahi himangoka. Ho kiani o Harunu waleino o awunu o huhuba ma aewanino abe o tao-taongiye ma moi dika nimahihuba la ti ngini o Isiraele ma nyawa nia howono niatamunu de o huhuba ma awunu la Ngohi ka idadi tahiapongo. Ho o aewani ma awunu gea, abe ihitunguu ngini nitebini ahi himangoka, ena gea o Harunu wapakeoo la wohitunguu o Manyanyi ma Huhuba ma Ngi enangoo itebini. Ho ma awunu gea wodopopoto ma tatadukika homoi-homoiika abe naga o Manyanyi ma Huhuba ma Ngi ma lolibukuoka. Hokogea kiani wodiai o tao-taongiye de ma hiaturu gea ilaku ka hiadono o Harunu ai totoforaukuoo ka ihikaika yodiai. Hokogea kiani nidiai angamoi o Manyanyi ma Huhuba ma Ngi gea to Ngohi Ma Jou o Yawe ahi huhuba ma ngi abe duru tomadingakoka Ngohino.” Hokogea Ma Jou wihingahu o Musaika.

Ma Jou ai hingahu ma titi yodiai o akere ma ngi ai tau ma loaka

¹⁷ De ahao Ma Jou o Yawe ka wihingahuohi o Musaika daku o lokuoka ma titi o akere ma ngi abe ahao o Harunu de ai ngofa-ngofaka yapake wato,

^18-20 “De ma oraha o Harunu de ai ngofa-ngofaka ihileleani de kiani ona yomaihorokahi de ahao ka idadi yomahitigi Ngohino. Ho kiani ngini nidiai o akere ma ngi ma amoko de gea ena niapake o tabaagaino abe niasapuroka de o hori. De o akere ma ngi gea niohapa hoka o bokolo ma bobululunu de kiani naga de ma gogogeroka abe enangoo o tabaagaino. De ena gea igogere ahi Tau ma loaka abe o haharongo ma huhuba ma ngi de ahi Tau o Ngoerino ma hidogoronaka. Ho niakelenga o Debi-debini ma Ngi ma himangoka ibooto de ahao nioguhe o akere ka hiadono niaomanga de o akere. De o Harunu de ai ngofa-ngofaka kiani yapake ma akere gea la manga giama de manga lou yaihorokahi la ufa yohonenge ma oraha yowohama ahi Tau o Ngoerino abe genangoka ahao Ngohi tinitemo nginika. De ka de yohupuoli ahi Tau ma Debi-debinino de ona kiani yomaihorokali de ahao o haharongo ma huhuba ma ngi yapake.

²¹ Abe nako yahihuba o haharongo ma huhuba de manga giama de manga lou ko yomaihorikaua de yapake ona gea ahao yohonenge. De ona kiani yaniiki ma hiaturu naa ka hiadono o Harunu ai totoforaukuoo ka ihikaika yodiai.” Hokogea Ma Jou ai hiaturu onangika.

O debi-debini ma minya abe Ma Jou womadingakoka

²² De Ma Jou o Yawe wihingahuohi o Musaika daku o lokuoka wato,

^23-24 “De ngini abe nihileleani Ngohi de o huhuba ma hiaturu kiani nidiai o minya abe ena gea duru tomadingakino Ngohino. Ho nialeino o saitunu ma minya ma gohaka o litere iata de niatoomuino ma hisapuru nenanga: o muuru ma tigono abe ka ma tau-taulohi ena o kilo butaanga, de o kayu manis biaha, ena o kilo hange, de o kayu manis o fara moioli ma romanga o teja, ena o kilo butaanga, de niodogo o ugaka abe ma teongo ma bounu irahai de duru iputurungu, ena gea o kilo hange ma teongo. De nena mata-mata niakilo de ahi Ngi ma Debi-debini ma kikilo.

²⁵ De ahao ona abe yodiai de ma hisapuru gea ka ona dika abe nairikino de nahikarajaanga gea mangale yososawaro yodiai o minya ma bounu ma rorahai. Ho ona gea yale o saitunu ma minya ma gohaka gea de ma hisapuru mata-mata ihisapuru de yodiai o debi-debini ma minya. Abe o minya gea niapake abe nihidingakino Ngohino la nihitunguu mata-mataika abe nihidingakino Ngohino. Ho ngaro ma kiahonanga eko ngaro ma nyawa abe ona gea ihitobaleleani Ngohino ma, ma minya naa abe kiani niapake ma oraha niatingaka manga karajaangika abe yokokarajaanga Ngohino.” Hokogenangoli Ma Jou ai hiaturu onangika.

O manyanyi abe Ma Jou womadingakoka

³⁴ De Ma Jou o Yawe wihingahuohi o Musaika wato, “De o manyanyi abe niapake o Debi-debini ma Tau ma goronaka hokonaa nidiai de kiani ma hisapuru iata nenanga: o molefaono ma hilo, de o bianga o lokana ma kai ma dofae, de o bokuwini, de o manyanyi ma gota ma tigono. De imaketero ma ngoe ma hisapuru amomoiika.

³⁵ De ahao ona abe ihioriki yodiai de ma hisapuru gea ka ona dika abe nairikino de nahikarajaanga mangale yososawaro yotobadiai o minya ma bounu ma rorahai. Ho ona gea yodiaioo ma manyanyi abe Ngohi Ma Jou tomadingakino Ngohino. Ho ma manyanyi gea duru itebini ahi himangoka de gea ena niatufuku Ngohino. De ona gea ahi manyanyi gea yodiai ibooto de ahao ihidogo o gahi la o manyanyi gea duru iumuru.

³⁶ De o manyanyi gea utu niagoraka de niatutuku hiadono idadi o dofae de gea niakelenga ahi Behehongo ma Peti ma himangoka abe genangoka Ngohi tinitemo nginika. De ma manyanyi gea nihidingaka Ngohino niato duru o Debi-debini ma Manyanyi.

³⁷ De angamoi o manyanyi ma hisapuru ma hiaturu enangoo tomahitongohi ho duru ko idadiua o nyawa utu yodiai la ma hisapuru imakadaene la yotufuku. Kiani nigoana hokogea angamoi to Ngohi Ma Jou o Yawe ahi manyanyi ho ena duru ma debi-debini.

³⁸ De nako o nyawa utu yapake ihowono abe ma titi yoigo dika ma bounu hiadono onangoo yodiai o manyanyi abe ma hisapuru imakadaene de ahao yatufuku, ona gea yahowonoka Ngohino hiadono ko idadiokaua taetongo to Ngohi Ma Jou ahi nyawa.” Hokogenangoo Ma Jou ai hiaturu onangika.