Biblia Todo Logo
Bìoball air-loidhne

- Sanasan -

Huhupu 3 - Ma Jou ai Demo-demo o Totobelohoka


O Musa wamake o gota itoka-tokara ma ko youkua

1 Ho naa o Musa wodadioka manga aewani o dofo ma gogoana abe ka wogogerohi ai toroa o Jitoro ai tauoka abe una o Midiana ma nyawa manga hidemo ma nyawa Ma Jouiye. De gea to una ai duduono o kabingi de o domba abe o Musa wotobagoana. De ma moiuku ma duduono gea wao o tonaka ma kakaaha ma honongaika hiadono womahiadonika o lokuoka moi abe Ma Jou womadingakoka. De Ma Jou ai loku gea ma romanga hinooto ho moi o Horebe ma loku de moioli o Sinai ma loku.

2 De genangoka Ma Jou o Yawe ai malaekata womahimatoko o Musaika ma rupa hoka o uku itoka-tokara o gota moi ma dodipokouku ma goronaka. De o Musa iwitodokana hiadono wodamaanoka genangika de duru woheranga angamoi ngaro o gota gea itoka-tokara hoka youkuika masara ko youkua.

3 Ho o Musa doka ai hiningaka womatemo wato, “Abeika, gea dokena moi o gota ma eteteke hoka youkuika! Ma adodoa ho ngaro duru itoka-tokara ma ko youkua? Ko togila-gilauahi de ngohi kiani toduluohi la hiadono tomahitigi-tigika la tatailako o wani o kia gea.” Hokogea ai heranga ma demo.

4 De wohitigi-tigika de Ma Jou wimake o Musa woboaino de witemo unangika de ai ilingi ihupu o gota gea ma dokara ma goronaino wato, “Musa, Musa!” De o Musa wopaluhu wato, “Iya, ngohi naga.”

5 De Ma Jou wihitiari o Musaika wato, “Ufa nomahitigino de kiani ani sandaala nahuputoka angamoi ma tonaka naa tomadingakino Ngohino ho duru itebini.

6 De Ngohi naa Ma Jou abe ani baba womahijou Ngohino. De to ngona ani tofora o Abarahaama, de o Isaka, de o Yakubu, onangoo yomatobahuba-huba Ngohino.” Ka de o Musa hokogea woihene Ma Jou wotemo unangika de ka womatatoko ai himanga angamoi wimodongo womalega Ma Jouika.

7 De Ma Jou wotemoli wato, “Musa, naa tonihingahu la duru nohioriki abe Ngohi tamakeoka ahi nyawa, o Isiraele ma nyawa, ona duru yokangelakaholi o Mesiiroka. Abe Ngohi toihenoka ona ihigari-gari manga kangela ma dubuho ma titi o Mesiiri ma nyawa de manga dualono yaribuutu yahikarajaanga. De manga gari ko itoa-toakua ona yomagahoko o duduhunu Ngohiye. Manga gogahoko gea Ngohi toihenoka ho naa ma oraha adonoka ona taduhunu.

8 Mangale gea, Ngohi o Horogaka de tauku touti la ona gea tahihupu o Mesiiri ma nyawa manga kuahaino. De ona tahihupuoka o Mesiirino de ahao Ngohi tao o tonaka moiikali abe duru ilamoko de ma joro duru ikutufuru genangoka. Ho manga inomo duru kohangoe ma tonakoka gea abe tahigogere genangoka. Naga o nyawa utu yogogere o tonakoka gea manga romanga o Kanani ma nyawa, de o Hete ma nyawa, de o Amori ma nyawa, de o Ferisi ma nyawa, de o Hewi ma nyawa, de o Yebusi ma nyawa.

9 Abeika, to Ngohi ahi nyawa o duduhunu yomagahoko Ngohiye de ihiboa-boaka! Ona gea ka yokangelakaholi de Ngohi tamakeoka o Mesiiri ma nyawa de manga dualono yahitubuhoholi yahikarajaanga onangika.

10 Ho naa ngona toniirikoka la tonihidingoto onangika ho kiani noiki nihimanga o Firaunu, o Mesiiroka manga koano, la ka idadi ngona nahihira-hira de nao ahi nyawa, o Isiraele ma nyawa, hiadono ona nahikokihupuoka o Mesiiri ma tonakino.” Hokogea Ma Jou wihikarajaanga o Musaika.

11 Masara o Musa womademo Ma Jouika wato, “Ahi Baluhu, mode ngohi naa onaguna ho hiadono ka idadi tihimanga o Firaunu de ka idadi tahihupu o Isiraele ma nyawa o Mesiiri ma tonakino?”

12 De Ma Jou wipaluhu o Musaika wato, “Ngohi naa tonihidingoto de duru toniniiki de toniduhunu. De ahao naga ma dodunguu Ngohioka de aino tonihidoaka la duru nohioriki abe Ngohi tagou-goungu tonihidingoto. De ma dodunguu gea, ahao ngona noboali nenangino. Abe ka de o Isiraele ma nyawa nahikokihupuoka o Mesiirino de ahao ngini mata-mata niboaino nenangoka la nimahuba Ngohiye o lokuoka naa.” Hokogea Ma Jou wihiputurungu o Musaika de ai behehongo.

13 De o Musa womulaenge womademoli Ma Jouika wato, “Ahi Baluhu, nako ma oraha mimakamake ngohi de o Isiraele ma nyawa de hiadono ona ihileha-leha ngohino marai tokangela tapaluhu. Abeika, ngaro ngohi ahao tahingahu onangika gea toboa tatutumu angamoi Ma Jou abe manga totofora yomatobahuba-huba Unangiye gea Una abe wohihidingoto onangika la ka idadi tahihira-hira. Masara done ngohino yoleha ato, ‘Ma Jou gea ai romanga ka onaguna?’ De nako hokogea ihileha sarakia de ngohi tapaluhu manga demo?”

14 De Ma Jou womahingahu o Musaika wato, “Ngohi Naga abe Ngohi Naga, ho nahingahu onangika nato Una abe wohihidingoto nginino naa womahiromanga, Ngohi Naga abe Ngohi Naga.” Hokogea Ma Jou womafetongo o Musaika.

15 De ahao wohigalioli wihingahu wato, “Musa, kiani ani demo onangika hokonaa nato, ‘Ma Jou o Yawe, gea Una abe nanga totofora o Abarahaama, de o Isaka, de o Yakubu yomahijou Unangika. Gea Una Ma Jou o Yawe wohihidingotino ngohi naa.’ Hokogea Musa, kiani nahingahu onangika la ka ihikaika ona ahao ihihiromanga Ngohi to Abarahaama, de to Isaka, de to Yakubu manga Jou. Hokogea ahi romanga Ma Jou o Yawe idadi manga hohininga onangika la ngaro manga tofora yolape-lapeuku ma ka ihikaika ihifetongo hokogea.”

16 De Ma Jou ka wotemohi o Musaika wato, “Ho naa ngona noikoka de o Isiraele ma nyawa manga balu-baluhu natoomuino de nahingahu onangika nato, ‘Ngini niwihioriki Ma Jou abe ma dodihiraino ti ngini nia totofora o Abarahaama, de o Isaka, de o Yakubu iwihiromanga to ona manga Jou, de naa ma duruino Una gea womahimatoko ngohino. De genangoka de naga to Una ai demo nginika wotemo hokonaa: “Ngohi Ma Jou tinigoana ngini ngaro nia kangela ma goronaka de tamakeoka abe de manga giama ma dubuho o Mesiiri ma nyawa inihikangela.

17 De naa tinihibehehongo nginika ahao Ngohi tinihihupu nia kangelaino o Mesiiri ma tonakoka de tiniao o tonaka moiikali abe ma joro duru ikutufuru genangoka ho duru kohaamoko ma hasili. Ona abe yogogerika ma tonakoka gea o Kanani ma nyawa, de o Hete ma nyawa, de o Amori ma nyawa, de o Ferisi ma nyawa, de o Hewi ma nyawa, de o Yebusi ma nyawa. Masara Ngohi tinihibehehongo ahao tinihigogere ma tonakoka gea.”’”

18 “Musa, hokogea Ngohi Ma Jou ahi demo onangika nahingahu o Isiraele manga balu-baluhika de ona ahao inihigihene ngona. De ahao ngona de manga balu-baluhu gea kiani nimakiniiki niloiki o Mesiiri manga koanoika de niwitemo unangika niato, ‘Mia koano, ngomi o Ibarani ma nyawa naga to ngomi mia Jou ai romanga Ma Jou o Yawe, de Una gea womitutumoka de womahimatoko ngomino. Ho naa ngomi mimagahoko la ngona nomihigunoa miloiki o tonaka ma kakaahaika, abe o wange hangeino mia dodagi, la genangoka mimahuba Ma Jou o Yaweika.’ Hokogea ngini nimagahoko o Mesiiri ma nyawa manga koanoika.”

19 “Masara Ngohi manga koano gea tihiorikoka abe ahao ko winihigunoaua ngini niloiki. Ho kiani Ngohi todiai ai hiningaka ka hiadono womodeke.

20 Ho Ngohi ahao o Mesiiri ma nyawa tahipoha de ahi buturungu. Gea Ngohi ona mata-mataika tahipoha de o heheranga ma ngoe manga himangoka o Mesiiroka hiadono manga koano gea winihigunoa la ngini nikokiloiki.

21 De ahao Ngohi todiai o Mesiiri ma nyawa manga kokihiningaka la ona de manga horomati nginika. De hiadono ma oraha ngini nimahidiai la hiadono nikokihupu manga tonakoka de ona yoigo manga kiahonanga inihikokidoaka la ma oraha nisobo de ko nimahomoaua.

22 De o Isiraele ma nyawa manga ngo-ngofeka ahao yomakokigahoko o kiahonanga o Mesiiri ma nyawaika abe yogogere manga datekoka de ngaro yokokurutika ma, ka idadi yomagahoko manga gurasi, manga haaka, hoka o ngaukuku de o rante de yomagahokoo manga pakeanga ma rorahai. De manga pakeanga gea ahao ngini nimagao de niahipake nia ngofa-ngofakika ma oraha niloiki. Ngini hokogea nidiai la nimagora to Mesiiri ma nyawa manga kiahonanga.” Hokogea Ma Jou wihibehehongo o Musaika la una wadofanga wahingahu o Isiraele ma nyawa mata-mataika.

Gereja Firman Allah, Yayasan Misi Masyarakat di Pedalaman

New Tribes Mission
Lean sinn:



Sanasan