Huhupu 25 - Ma Jou ai Demo-demo o Totobelohoka

Ma Jou ai Tau o Ngoerino Ma Jou ai Tau o Ngoerino ma hitararono ma hidogo Manga hidoaka Ma Jouika abe ahao yapake la yodiai ai Tau o Ngoerino de yodiai ma kiahonangoo abe ahao yakelenga ai tau ma goronaka.

¹ De daku o loku ma tubuoka gea Ma Jou o Yawe wihingahu o Musaika wato,

² “Hokonaa ahi behehongo abe nahingahu o Isiraele ma nyawaika. Ngohi Ma Jou toigo la naga manga hidoaka abe Ngohino ihihidingakino; masara gea onagona dika de manga hininga ma sanangioka de aino ihihidoaka Ngohino abe ka idadi gea ena nodafongo de natoomuino.

³ De manga hidoaka Ngohino gea ka idadi yale manga kiahonangino naa: o gurasi ma dutu, de o haaka ma dutu, de o tabaaga ihisapuroka de o hori.

⁴ De manga aewanino ma hasiloo abe ka idadi ihidingaka Ngohino, gea o lawe o domba ma gogoino abe yatonokau o solo ma bihi-bihi ma dutuku, de ma wuu-wuuku, de ma doka-dokaruku. De manga hidoaka ka idadi o kabingi ma gogo ma rorahai abe ahao yapake yodiai o ngoere ma biri-birini. De manga hidoakoli ka idadi o ngoere ma alu-aluhu ma lawe abe yodiai manga rami ma roehe ma rukitino.

⁵ De o domba ma nauru ma kai abe yodiai la ufa ikorofu de yatonokau o solo ma doka-dokaruku, enangoo gea ka idadi manga hidoaka. De ka idadioo o gahi ma kaho ma kai abe ena gea duru ibole. De o akasia ma gota enangoo ka idadi manga hidoaka Ngohino.

⁶ De ona ihihidoakoo o saitunu ma minya abe yapake manga posioka, de to ena ma hisapuru abe ahao ngini nihisapuru o minyauku la nihitunguu ma minya gea nihidingakoka Ngohino. De ma hisapuru abe ka idadi ihihidoaka Ngohino enangoo ma kiahonanga abe niapake la nidiai o manyanyi abe ma bounu duru ma rorahai.

⁷ De manga hidoaka utuohi gea o hakaru o fara muruono naga abe duru ileto-letongo ho enangoo gea Musa, nodafongo. O hakaru ma leto-letongo gea ahao yapake ma oraha yodiai nia hidemo ai baju abe una iwidingakoka Ngohino la ahi nyawa wahidemo Ngohiye ho ka unangohi o hidemo wokurutiye. Ho ahao o hakaru ma leto-letongo gea niperelu ma oraha niwidiai to una ai baju abe ma romanga o efodo, de to una ai alu ma dadatoko.”

⁸ “De ma kiahonanga mata-mata gea abe ahao ngini niapake nihidiai ahi Tau o Ngoerino. Abe ma tau gea ngini nihidingakoka Ngohino la ka idadi ma tau ma goronaka gea Ngohi tomahimatoko abe ka ihikaika Ngohi naga genangoka nia hidogoronaka.

⁹ Ahi tau de ma kiahonanga abe ahao niakelenga ma goronaka gea ngini ahao nidiai kiani nianiiki ahi hiaturu mata-mata abe naa tonihingahu ngonaika.” Hokogea Ma Jou o Yawe ai demo o Musaika.

Ma Jou ai hingahu ma titi ai Behehongo ma Peti yodiai

¹⁰ De hokonaa Ma Jou ai Tau o Ngoerino ma hiaturu abe wihingahu o Musaika, wato, “Ngini kiani nidiai o peti moi abe idadi o Behehongo ma Peti de gea nidiai o akasia ma gotaino de ma gurutu niatuga o senti o ratuhu moi de ngimoi de ma ngoata de ma gurutiye imaketero niatuga o senti moributaanga de butaanga.

¹¹ De ahao ma goronauku de hiadono ma poretino nihihawo de o gurasi ma dutu. De o Peti daku ma lokuoka niodiai ma pahitaaka de ma dimo-dimoka de nioguihi o gurasi ma pahitaakauku la gea ena idadi o Peti ma nguroto daku abe ihigilolitino ma igarino.

¹² De nihipasi o Peti arihonongaka o momoku ma ngi iata nihitigi-tigiuku dau ma barenuku, la arihonongaka naga o momoku ma ngi hinooto. De o momoku ma ngi gea ma rupa o gogoli abe niodiai kiani naga o pahitaaka la genangoka nioguihi o gurasi ma dutuino la ma gogoli gea imakadaene.

¹³ De ma momoku niodiai o akasia ma gotaino de niobululunu la duru nihipasika de ma gogoli. Gea ibooto de ahao ma momoku gea nihihawoka de o gurasi ma dutu.

¹⁴ De ahao ma momoku nihinoaika ma gogolika gea abe nihipasikaka o Peti arihonongaka la ka idadi niamoku ma oraha nitagi de niao.

¹⁵ De ko idadiua niahuputu ma momoku gea o Peti ma gogolino la ka ihikaika nihidogunoaika ma gogolioka.

¹⁶ De Musa, ko itedekanuahi de tonihidoakika o hakaru ma baka-baka hinooto abe genangika tohitulihukuoka ahi pareta abe nengokadau tonihingahuoka. Ho ngona ahao o hakaru ma baka-baka hinooto gea nohingohama o Behehongo ma Peti ma goronauku gea la nagogono genangoka.”

¹⁷ “De o Peti ma dadamunu ngini niodiai o gurasi ma dutuino de ma gurutu niatuga o senti o ratuhu moi de ngimoi de ma ngoata niatuga o senti moributaanga de butaanga. De ma Peti ma dadamunu gea idadi o Hikadame ma Ngi ngini mata-mataika.

^18-19 De ma Peti ma dadamunu o gurasi ma dutuino niodutuku de kiani nihiahumika de ma rupa hoka o malaekata o Kerubu abe ka enangohi de ma kuahaka. Nidiai la naga o malaekata hinooto daku o Peti ma dadamunu ma lokuoka yoaridobikino.

²⁰ De ma malaekata o Kerubu gea niohapa la de ma gafuufuoka de imarihimangino de imaboriponuku la ma gafuufu ihiboridoakika hiadono ngade-ngade imakadono ma gafuufu ma dekara. Ho daku o Peti ma lokuoka yatamunu de o Kerubu ma gafuufu iata.

²¹ Ho, Musa, o Petiuku ngona ahao nohingohama o hakaru ma baka-baka hinooto abe ahao tonihidoaka de ena gea naga ahi pareta tohitulihukuoka abe nengokadau tonihingahuoka. De ka de ngona nonoa o Peti ma goronaka ibooto de ahao natamunu de ma dadamunu gea.

²² De ahao o dadamunu ma lokuoka gea homakamake Ngohi de ngona abe o malaekata o Kerubu ma hinooto ma hidogoronaka. Abe genangoka o Kerubu ma gafuufu ma timiuku de o dadamunu ma lokuoka duru genangoka Ngohi naga de genangoka ahao tonitemo ngonaika. Ho o Peti ma dadamunu gea idadi o Hikadame ma Ngi abe o malaekata o Kerubu o gurasino ma hidogoronaka abe imarihimangino de imaboriponuku o Behehongo ma Peti ma lokuoka. Duru genangoka Ngohi ahao tonihingahu ahi behehongo abe kiani o Isiraele ma nyawa yaniiki.” Hokogea Ma Jou wihibehehongo o Musaika ai Peti ma hiaturu de ma duduga.

Ma Jou ai hingahu ma titi yodiai o Hohininga ma Roti ma Meja

²³ De Ma Jou ka wihingahuohi o Musaika ma kiahonanga abe kiani naga to Una ai Tau o Ngoerino ma goronaka, wato, “De ngini nidiai o meja moi o akasia ma gotaino de ma gurutu o senti moritufange de tufange de ma ngoata o senti moruata de iata, de ma gurutiye o senti moributaanga de butaanga.

²⁴ De kiani o meja gea nihihawo de o gurasi ma dutu de o meja daku ma lokuoka niodiai ma pahitaaka de nioguihi o gurasi ma pahitaakauku la gea ena idadi o meja ma nguroto daku abe nihigilolitino ma igarino.

²⁵ De o meja ma nguroto ibooto de ahao niodiai ma dadatoko o meja ma nguroto ma lokuoka la enangoo nihigilolitino. De ma dadatoko niatuga la o hoata ma ngoata ma gurutiye de to enangoo ma lokuoka niodiai ma pahitaaka de ma dimo-dimoka. Enangoo nidiai o gurasino abe nioguihi o gurasi ma pahitaakauku la gea ena idadi o meja ma dadatoko ma nguroto de ma bunga-bungaka daku ma igarino.

²⁶ De kiani naga o momoku ma ngi abe enangoo imaketero o gogoli iatoli niodiai o gurasino de ma gogoli iata gea nihipasi o meja ma lou nioaridobiki de nioarihononga daku o meja ma lou ma barenika.

²⁷ Ho ma momoku ma gogoli nihipasi o meja ma nguroto dau ma timika. De ahao ma momoku nihinoaika ma gogolika gea abe nihipasikaka o meja arihonongaka la ka idadi niamoku ma oraha nitagi de niao.

²⁸ De to ena ma momoku gea niodiai o akasia ma gotaino de nihihawo de o gurasi ma dutu.

²⁹ De ngini kiani niodiaioli o gurasino o dodai, de o bokolo abe niapake ma oraha nimahihuba Ngohino. De ipahaino de niodiaioli o gurasino o sere, de o mangko abe enangoo niapake ma oraha nioguhe Ngohino o angguru ma teongo ahi huhuba ma ngiuku.

³⁰ De o meja gea ma lokuoka kiani ka ihikaika o roti naga niakelenga to Ngohi ahi himangoka la gea idadi o dodunguu ma roti abe Ngohi, Ma Jou naga ka ihikaika nginioka.” Hokogea Ma Jou wihibehehongo o Musaika ai meja ma hiaturu de ma duduga.

Ma Jou ai hingahu ma titi yodiai ai Tau ma Hilo ma Ngi

^31-33 De naga ma kiahonanga utuohi abe kiani yodiai de yakelenga Ma Jou ai Tau o Ngoerino ma goronaka, abe Ma Jou wihingahuohi o Musaika, wato, “De o hilo ma ngi moi ngini nidiai de niodutuku o gurasi ma dutuino. De gea nidiai kiani naga ma badanga moi hoka o liate de ijaga-jaga dau de aiye de ma jaga ma lifunu ahohange imaketetoo-taanika arihonongaiye. Ho ma jaga mata-mata butaanga de daku ma dekara mata-mata itiaiika de ma liate ma dekara. De nidiai la o hilo gea ma gahumu ho ma badanga ma nanao, de ka hiadono ma jaga-jaga de ma posi ma ngi mata-mata gea idadi moi. De ma jaga mata-mata nidiai de ma dimo-dimoka abe ma rupa hoka o badama ma huri abe ko ihoheuahi. De o hilo ma posi tumidi abe moi daku ma liate ma dekaroka de naga butaanga ma jaga ma dekaroka amomoiika. De ma posi ma ngi tumidi gea hoka o mangko abe ma rupa o badama ma huri abe ihoheoka ho naga ma hoka de ma huri ma hahawo. De hokogenangoo de ma badanga daku ma dekaroka abe enangoo naga ma posi ma ngi imakadaene de ma rupa ma jagaika. Ho o posi ma ngi gea mata-mataika o gahumu tumidi.

^34-35 De ma liate abe idadi ma badanga enangoo naga ma dimo-dimo ma rupa o badama ma huri iata. Ho ma jaga hinooto ma lifunika naga ma rupa o badama ma huri. De ma jaga ma hinooto de ma hange hokogenangoli de ahao daku o posi ma ngi ma timiuku naga moioli imaketero ma rupa abe hoka o badama ma huri ipotoka ho naga ma hoka de ma huri ma hahawo. Ho o hilo ma liateoka ma dimo-dimo ma rupa o badama ma huri gea mata-mata iata.

³⁶ De nidiai la o hilo ma liate, de ma jaga, de ma dimo-dimo, idadi moi abe mata-mataika niodutuku o gurasi ma dutuino.”

³⁷ “De ahao nidiai ma posi tumidi de niakelenga homoi-homoiika daku o posi ma ngi-ngioka la gea ena idadi o hilo abe ihitararono ma himangika.

³⁸ De ngaro o hilo gea ma kiahonanga hoka ma sumbu ma dodobiki, de ma sumbu ma gogoraka abe gea ena niapake abe ma sumbu itinoka de niatauriyeoli, ma alata mata-mata hokogea ma ngi naga niodiai ma rupa o bobilangu de gea ena de ma alata mata-mata nidiai o gurasi ma dutuino.

³⁹ Ho Ma Jou ai Tau ma hilo gea kiani niapake o gurasi o kilo moruange de iata ma dubuho la ena de ma kiahonanga mata-mata idadi imaketero de yaniiki de to Ngohi ahi mau.

⁴⁰ Ho ngona Musa, kiani nahiaturu la ngini nianiiki nihidodiai ahi hidumutu nginika abe tonihingahuoka o lokuoka naa.” Hokogea Ma Jou wihingahu o Musaika.