Huhupu 24 - Ma Jou ai Demo-demo o Totobelohoka

O Isiraele ma nyawa ato yaniiki Ma Jou ai demo mata-mataika

¹ De Ma Jou o Yawe wihuloko o Musaika wato, “Musa, ngona naa kiani nodoa ahi lokuino naa de kiani o Harunu unangoo niao de to una ai ngofa-ngofaka o Nadaba de o Abihu nao. De o Isiraele ma nyawa manga hihira yamoritumidi onangoo kiani nakokiao. Masara ngini nidoaiye ko ikurutiyeuahi de genangoka kiani nimahubakahi.

² Ngini genangoka de ahao ngona dika ka idadi nogila-gila nomahitigino Ngohi Ma Jou o Yaweino. Masara ona utu ko idadiua yomahitigino Ngohino. De nia kokawaaha utu ka manga gurutikahi de genangoka dika yaino. Ona duru ko idadiua yodoaiye ma lokuino.” Hokogea Ma Jou wihibehehongo o Musaika.

³ De o Musa ko wodoauahi de wahingahuokahi o Isiraele ma nyawa mata-mataika abe Ma Jou o Yawe ai demo de ai pareta ma hiaturu abe kiani yaniiki. De ona yopaluhu ka ma moiiye ato, “Ma Jou o Yawe ai demo ngomino gea mata-mata mianiiki!”

⁴ De ahao o Musa wotulihuku Ma Jou o Yawe ai demo mata-mata gea abe Una wahingahuoka. De ma dawangeino duru o ngoru-ngorumino o Musa wodiai o huhuba ma ngi o loku ma lifunoka de genangoka waleino o hakaru ma guru-gurutu ngimoi de hinooto. De ma hakaru gea wahigokoiye la gea ena idadi o dodunguu ma liate ngimoi de hinooto abe ihitunguu o Isiraele ma nyawa manga dutu ngimoi de hinooto.

⁵ De ahao wahikarajaanga o Isiraele ma nyawa o nau-nauru ka o goo-goduuruohi la yoiki yale o hapi ma nauru ma goo muruono naga la gea ena yomahihuba Ma Jou o Yaweika. Ma hapi gea utu idadi iharo-harongo ma huhuba Ma Jouika ho yatoma de ahao yakelenga o huhuba ma ngi ma lokuoka de yaharongo ka hiadono itinoka. De ma hapi ma nauru utuoli idadi o dame ma huhuba.

⁶ De ma oraha ma hapi gea ma ngomahino yaluiti de ma awunu gea o Musa watakunu de o boko-bokolo wapake. De ma awunu gea waregu ho naga ma hononga abe wohituagi o huhuba ma ngiika de ma hononga watumungohi.

⁷ De ahao waleino o Behehongo ma Buku de wabasa ona mata-mataika. De ona ka de yoihene de ma moioli yokokipaluhu ato, “Gea Ma Jou o Yawe womihibehehongo ngomino gea mata-mata ahao miakokiniiki de mihingounu ai behehongo gea.” Hokogea ona ihitunguu la yoigo iwihingounu Ma Jou.

⁸ De ahao o Musa waleino o hapi ma awunu ma hononga abe nagahi de ena gea wahibarihi o Isiraele ma nyawa manga lokuino la ma awunu gea idadi to onangoo manga behehongo ma dodunguu. De wahingahu wato, “De naa ena ma awunu idadi o hitaana ma dodunguu. Abe Ma Jou o Yawe winihibehehongo nginika gea kangano tinibasa ibooto de nginioo niwihibehehongo Ma Jouika niato ai demo mata-mata gea nianiiki.” Hokogea o Musa wohibobaha manga huhuba de ai hitararono ma demo.

O Musa wodoali o Sinai ma lokuiye

⁹ De ahao o Musa, de o Harunu, de o Nadaba, de o Abihu, de o Isiraele ma nyawa manga hihira yamoritumidi gea, yomakutuono yodoa o Sinai ma lokuiye.

¹⁰ De o Isiraele ma nyawa manga Jou genangoka womahimatoko onangika. De ona yamake ai lou wohidokouku o hakaruku abe duru idodono de iletongo hoka o dihanga ma mododono.

¹¹ De ngaro hokogea ona iwimake masara Ma Jou ko wahohonengua hiadono wahigunoa la yolomo de yokere ai himangoka gea.

¹² De ahao Ma Jou o Yawe wibehehongoli o Musaika wato, “Musa, nodoa Ngohiye naa de nogogere nenangoka la ka idadi tonihidoaka o hakaru ma baka-baka abe todiaiokau de naga ahi pareta tohitulihikaka o hakaruika gea. De naa ahi behehongo de ahi pareta ngona nao de niadotoko o Isiraele ma nyawa mata-mataika.” Hokogea Ma Jou wiahoko o Musa la wodoa.

¹³ Ho o Musa wosobo de wiao ai duduhunu o Yosua ho ona yahinooto yogila-gila yodoa Ma Jou ai lokuiye.

¹⁴ De wahibehehongo o Isiraele manga hihira yamoritumidika gea wato, “Ngini naangokahi nimagoo-gogere hiadono miboali nginino naa. Abeika o Harunu de o Huuru naga nginioka ho nako naga o kadatoro idadi nia hidogoronaka de ona ka idadi iniduhunu.” Hokogea o Musa ko wodoauahi de wahibehehongo onangika abe yamoritumidika.

¹⁵ Ho o Musa de o Yosua yodoaiye masara ko yomahiadoniyeuahi o loku ma tubuiye de o Yosua genangoka winoaika angamoi o Musa dika Ma Jou wihigunoa wodoa hiadono o loku ma tubuiye. De ipahaino naga o lobi iuti hiadono atamunoka o loku ma tubu gea.

¹⁶ De naga Ma Jou o Yawe ai medebini ma dararono o Sinai ma lokuoka. De ma lobi gea atamunuku hiadono o wange butaangaino ma dekanino ho de ma wange ma tumidi de Ma Jou o Yawe witemo o Musaika ma lobino gea.

¹⁷ De o Isiraele ma nyawa abe ona dau ona yamake Ma Jou ai dararono dakena o loku ma tubuoka hoka o uku ihololomiye.

¹⁸ De gea o Musa wogila-gila wowohama o lobi ma goronaika ma oraha womapahaka wodoa o loku ma tubuiye. De genangoka una wogogere ka hiadono ai wange moruatino de ai futu moruatino ai dekana daku o lokuoka.