Huhupu 23 - Ma Jou ai Demo-demo o Totobelohoka

Ma Jou ai pareta abe yaduhunu yomakao itiai

¹ De o Musa wogila-gila wadofanga o Isiraele ma nyawaika Ma Jou ai pareta ma demo, wato, “Ufa ngini niadofanga o nyawa utuika. Abe nako ma titi ko nihiorikua o nyawa manga ade-ade igoungu eko ko igoungua done ngini niadofanga de nielu-eluku. De ona yahowonoka abe ma oraha yatailako ma titi manga howono de ufa niahipongono de nieluku la gea niato niaduhunu.”

² “De ufa ngini nimahisapurika de ona yomatotoomuika la ato yodiai itorou. De ufa nianiiki o nyawa manga demo abe ona yowoe-woeika, ngini kiani nia hiningaka nianiiki abe ma dumutu ma goungika ngaro ka nomatengo dika.

³ De ngini kiani duru nianiiki ma gou-goungu dika nia wowangoka de ko niairikua o nyawa. Ho ngaro naga ona o huha ma nyawa abe niato nioigo niaduhunu la ufa ona gea yadaene o hohowono ho hiadono niahipongono manga howonino ma, ko idadiua hokogea nidiai.”

⁴ “De nako ngini niamake o nyawa manga hapi eko manga keledai ihupuika de ma dutu ko wohiorikua gea kiani niataoko de nihigilio ma dutuika ngaro ma aewani ma dutu gea ti ngini nia musu ma kiani niwiduhunu hokogea.

⁵ De ngaro ona gea abe inidohata ma kiani niaduhunu ma oraha niamake yokangela abe nako ma oraha womatengo ai keledai ihidoruba ma gina de una gea ko wakunua woduhunu de ngini kiani niwiduhunu.”

⁶ “De kiani o nyawa mata-mataika nimakao irahai ho ngaro o nyawa yohuha ma ufa niafikiri niato ona gea manga dodipokouku ho ko adodoaua niahikangela. Ho gea ngini kiani nihidodiai abe ngini nitobatailako o nyawa manga howono done niato ngaro ko yahitaanua ma niato ko adodoaua niahohowono onangika. De ngaro itaana yahowonoka ma ufa manga hohowono nihidogo ifoloiholi.

⁷ De ngini ufa o nyawa niahidutugaika dika hiadono niahohowono nako ngini niahioriki ona ko yahowonua. De angamoi o kia dika nidiai la o nyawa yahohowono hiadono yohonenge masara manga howono ko iwa, gea Ngohi Ma Jou o Yawe ahao nginikali tinihohowono de nia hohowonino gea ko idadiua nimahihupu.”

⁸ “De ngini ufa nimakehewa de o tiwi la hiadono o nyawa niahipongono. Angamoi de o hewa gea inihirafioka ma totiaiika. De abe ona yoigo yaniiki ma totiaiika, onangika niahikangela angamoi ngini nirehenoka ma totiaiino.”

⁹ “De ngini ufa niahowono o homoa ma nyawaika abe yogogere nginioka hiadono niarusi eko ona niahikarajaanga abe itubuhoholi angamoi nginioo ma dihira inihikangela o Mesiiri ma tonakoka mangale nginioo o homoa ma nyawa genangoka. Ho kiani ka ihikaika nimahihohininga ti ngini nia kangela gea la ngini ka idadi niao irahai o nyawa ma homoa.”

O Hiaini ma pareta

^10-12 De Ma Jou ai pareta ma hitararono wohigila-gila wihingahu o Musaika abe kiani ahao wadofanga o Isiraele ma nyawaika wato, “Ngini o wange butaangaino nimakarajaanga masara ka de adono ma wange tumidi de nia karajaangino nimahiaini. De hokogea idadi nia hiaini de ti ngini nia hapi, de nia keledai enangoo mata-mataika nihiaini. De ngaro nia nyawa o huhuloko abe yomaboa nia tauoka eko o homoaino ma nyawa abe yogogere nginioka, onangoo yomahiaini la nia duduhunu mata-mataika manga buturungu ikokilioli.” “De ti ngini nia tonakoo kiani naga ma hiaini. O taongo butaangaino ka idadi nia redi niodatomo de ma hasili nialeino. Ma, ka de adono ma taongo tumidi de nia redi nianoaika dika hokogea ho ko idadiuahi niodatomoli eko ma hasili nimale. Abe naga nia redioka o inomo abe ena ma hininga iwangoiye ena gea idadi o huha ma nyawali manga inomo. De ma inomo abe ona ko aleua gea ena idadi o fuhuku ma aewani ma inomo. De ngaro nia angguru ma redi de nia saitunu ma redi ma enangoo kiani nianoaika hokogea o taongo ma tumiduku.”

¹³ “Ngini kiani nihidodiai nianiiki mata-mata naa abe tinihingahuoka. De ngini kiani nimahuba de nimaniata Ngohi Ma Jouino dika ho duru ko idadiua nimahuba eko nimaniata o popangaoika. De ngaro nifetongo o popangao ma roma-romangika ma ko idadiua.”

Manga rame-rame hange ma hiaturu

¹⁴ De Ma Jou wahitararono o Isiraele ma nyawaika manga rame-rame ma hiaturu, wato, “De Ngohi Ma Jou toigo la o taongo moi ngini ma hangeino nirame-rame Ngohino abe ma titi hokonaa nia rame-rame.

¹⁵ Abe ma dihira tinihidoakokau nginika nia rame-rame ma romanga o Roti ko Iwa ma Ragi ma rame-rame de gea kiani nihirame-rame o wange tumidino ma dekana. De gea nidiai o mede ma romanga o Abibi abe duru adaene de ma wange nikokihupu o Mesiiri ma tonakoka de niaino. De ngini mata-mataika kiani naga nia huhuba abe nimahihuba Ngohino nia rame-rameoka gea.”

¹⁶ “De nia rame-rame moioli tinihidoaka gea o Domoro ma rame-rame abe nimahihuba Ngohino nia dato-datomino ma hasili ma domoro. De ahao nia rame-rame ma hange abe tinihitararono naa gea o Gugutuku ma rame-rame. Abe ma oraha nia datomo hoka o pine eko o gandumu niautuku de hiadono ma hasili ma amokino niautuku niabootoka de ahao ma titi gea kiani nihirame-rame Ngohino.

¹⁷ Ho ma oraha o rame-rame ma hangeino gea o Isiraele ma nyawa o nau-nauru mata-mataika abe yobaluhoka kiani yoboa Ngohi Ma Jou o Yawe ahi himangino.”

¹⁸ “De nia huhuba abe o awunino ko idadiua niasapuru de o kia dika abe de ma ragioka de ahao nimahihuba Ngohino. De nia huhuba o aewani ma hakino kiani ma wange gea dika de niaharongo ka ma moi hiadono itinoka, abe ko idadiua utu niato ma dawangeino de ahao nimahihubali.”

¹⁹ “Ho ti ngini nia tonaka ma dato-datomino ma domoro ma hononga abe ka enangohi irahai kiani niao Ngohi Ma Jou o Yawe ahi tauino la gea ena idadi nia hidoaka Ngohino.” “De ufa nimaaduru hoka o nyawa utu manga biaha abe o kabingi ma ngofaka eko o domba ma ngofaka ma roehe ihihakai ka ma moi de to ena ma ayoino ma huhu ma teongo.” Hokogea Ma Jou wahidoaka o Isiraele ma nyawaika manga rame-rame ma hiaturu la ihirame-rame itiai Ma Jouika.

Ma Jou o Yawe wahibehehongo onangika waniiki manga dodagi ma goronaka

²⁰ De Ma Jou wahibehehongo o Isiraele ma nyawaika abe ka ihikaika waniiki, wato, “Abeika, ahi baliara nginika ma rahai! Abe Ngohi tihidingoto ahi malaekata la una duru wohira-hira nia dodagioka la winihigoana de winihihira-hira winiao o ngiika gea abe tinihidiaiokau la ngini nigogere genangoka.

²¹ Ho ngini niwitoihene Ma Jou ai malaekata la niwihingounu ai demoika. Ufa ngini niwilawana angamoi una to Ngohi ahi demo ma dodofanga nginika hiadono ahi romanga naga unangokaoo, ho nia howono ko waofiua.

²² Masara nako ngini nihidodiai niwihingounu ahi malaekatika gea, de una duru winiduhunu. Ho to Ngohi ahi demo mata-mataika abe ahao winihingahu nginika kiani niwihigihene. Abe nako ka ihikaika niwihigihene de ahao Ngohi todadi tamusu ti ngini nia musuika. De onagona dika inilawana nginika de Ngohi nia Jou talawana onangika.

²³ De ahi malaekata gea una winihihira-hira de winiao o tonakika gea abe ma oraha naa yonyawaika de o Amori ma nyawa, de o Hete ma nyawa, de o Ferisi ma nyawa, de o Kanani ma nyawa, de o Hewi ma nyawa, de o Yebusi ma nyawa, masara ona mata-mataika ahao takokiofioka o tonakoka gea.”

²⁴ “O nyawa mata-mata gea yomatobahuba-huba o popangaoika ho ngini ufa nimaaduru hoka onangoli hiadono nginioo nimahuba manga popangaoika gea eko nihitunguu o horomati enangika. Masara ngini kiani duru niakokiwedere manga popangao gea ma oraha ma nyawa gea duru niahikalaka.

²⁵ Ngohi ti ngini nia Jou ho kiani nimahuba ka Ngohi Ma Jou o Yaweino dika de ahao nia inomo de nia akere tohiowa abe Ngohi tinihidailako. De Ngohi tinihikatingaka o popanyakeino.

²⁶ De ti ngini nia feka-fekata mata-mataika yomamake manga ngofaka de ko moiua naga yokokilianga de ko moiua abe ko idadiua yodami. De ngini ahao niwango hiadono iniwedono nia wowango ma gurutu. De ma owa mata-mata gea Ngohi tinihibehehongo ngini mata-mataika ma oraha nigogere nia tonakoka gea ma titi nimahijou Ngohino dika ho kiani ngini nimahidodiai abe manga popangaoika.”

²⁷ “De o tonaka mata-mataika abe genangika tinihiboa ma ko nimahiadonuahi genangika de Ngohi tohitihira o hawana kohaamoko onangika de tahikapusaka hiadono ka de inimake de inikokiporetoka hiadono ona mata-mata inidokaowaroka.

²⁸ De Ngohi ahao tapake o ofungu kohangoe la ena imatihira nia ngekomika la o Hewi ma nyawa, de o Kanani ma nyawa, de o Hete ma nyawa yagoli ka hiadono ona mata-mata yokokiloara la ma oraha manga tonakika niwohama de ufa ona gea inihikangela.

²⁹ Masara naa tinihingahuoli nginika abe Ngohi ko o taongo moiua dika de tahikokihupu ona mata-mata abe o tonaka gea yogogerika. Ho ufa niafikiri niato ka ma moi tahihupu o tonakoka gea angamoi Ngohi tahigunoa ona utu la ka yogogerohi genangoka done nia tonaka gea ko niapoauahi niapaliara ma amokika ho idadi ihomoa de hiadono o fuhuku ma aewani abe ma dihiraino naga genangoka ifaa-faatuku hiadono inihikangela.

³⁰ Nia tonaka gea niwohamoka de ahao ona gea Ngohi tahihupu ma hutu ma hutu. Abe ka de ngini niaperelu o tonaka utuohi de ma oraha gea ahao ona utuoli tahihupu. Hokogea ka ihikaika tiniduhunu hiadono nia ngofa-ngofakuku de nia dano-danonguku yapoa yopaliara nia tonaka mata-mataika.”

³¹ “De Ngohi ahao nia tonaka ma batingi tohititi o Bongo-bongo ma gahioka. Genangoka de imulaenge itagi hiadono ma batingi itubuku doka o Filistina ma nyawa manga gahika. De nia batingi ihititi o Bongo-bongo ma gahioka imulaengoli itagi o tonaka ma kakaahaika de ihidehepi ka hiadono o Efaraata ma akerika itubuku. Ho ma tonaka gea abe Ngohi tabatingoka ahao ika-ika de ma nyawa genangoka tahikokihupu mata-mataika. Ho ma oraha nia gogere niawoata de genangoka ahao ona tahihupu.

³² De duru tinihigunoaua la ngini nimahidogogere moi de o nyawa genangoka ho ufa nimahiketehibehehongo de ona eko de manga popangaoika.

³³ Ko idadiua o nyawa gea niahigunoa yogogerohi ti ngini nia tonakoka gea angamoi nako nimahisapurika onangoka de ika-ika ona inihirehene hiadono niahowono Ngohino. Abe to ona manga popangao ahao idadi o higaro moi nginika ka hiadono nginioo nimahuba manga popangaoika gea.” Hokogea Ma Jou ai demo o Isiraele ma nyawaika abe wihingahu o Musaika abe una kiani wadofanga o Isiraele ma nyawaika.