Huhupu 22 - Ma Jou ai Demo-demo o Totobelohoka

Ma Jou ai hiaturu onangika abe yahowonoka

¹⁶ De Ma Jou wotemoli o Musaika, wato, nahingahu o Isiraele ma nyawaika hokonaa, “Nako o nauru womiribuutu o moholehika abe ko imipakituahi o nyawa utuino, de gea womiribuutu hiadono yomaidu de gea o nauru kiani wofangu ami dimonika manga ngofaka ami ija de womile la womihidadi ngoi fekata.

¹⁷ Ma nako ami baba duru woluku womihidoaka ma naurika gea, ko idadiua yoilaka masara ami moholehe ma bobangu kiani wofangu ami dimonika abe muna ma dihiraino ko ma moiuahi yomakitigi de o nauru. De ami bobangu imaketero hoka womile la womihidadi to una ngoi fekata ngaro ko idadiuali womile.”

¹⁸ “De o ngo-ngofeka abe ona yotobalingiri o wowango o ngidu-ngiduino abe yapake o mamaihi, de o tobahioriki de o dodunguu o tokatino, eko yotemo-temo abe yohone-honenge manga gomangika, kiani ona gea mata-mataika abe yodiai hokogea ko idadiua niahigunoa la ka yowangohi.”

¹⁹ “Onagona dika yomakitigi de o aewani ngaro o nauru eko o ngofeka ma kiani ona gea niahohowono ka hiadono yohonenge.”

²⁰ “Ngini kiani nimahijou Ma Jou o Yaweika dika ho onagona dika yomahijou o popangaoika hiadono manga huhuba yomahihuba enangika kiani ona gea niahihihangoka la ibootohi yowango o duniaka.”

²¹ “Ngini o Isiraele ma nyawa kiani nihidodiai o homoa ma nyawaika abe o kiaka dika nimahidogogere moi la ona niao irahai de ufa niahikangela eko niahitubuho hiadono ona ko idadiokaua yomahikaaturu. Ngini mata-mataika ufa niawohanga abe ngini ma dihira inihikangela o Mesiiri ma tonakoka mangale ma titi ngini o homoa ma nyawa genangoka.”

²² “Ngini ufa niahikangela o ngofeka o bao-baoika de o ngofa-ngofakika abe yogohi-gohihi la niato nimalingiri onangino nia utumu.

²³ Abe nako o ngo bao eko o ngofaka o gohihi niahikangela hokogea hiadono ihigari-gari manga huha de Ngohi togihene manga huha gea de tahibalaha.

²⁴ Abe to Ngohi ahi ngamo ahao itagi nginika abe niahikokangelaika hiadono tinihohonenge o parangioka la ti ngini nia feka-fekata onangoo yofao de ti ngini nia ngofa-ngofakoo yogohihi. Ho gea kiani ti ngini nia bao de nia ngofa-ngofaka o gohihi niao irahai onangika.”

²⁵ “Ngini nako nia tiwi niahibau nia gogianongoruika abe ona yohuha de ufa nogahoko la ma tiwi gea yaturuuru de nihifoloiika la naga nia utumu imaketero hoka ona manga biaha yomatiwi-tiwi hokogea. Masara nako ma oraha ihigilio ma tiwi gea abe ma dihira yomabauoka nginino, de kiani imaketero dika ma amoko ihigilio nginika.”

²⁶ “De nako o nyawa ani datekoka manga nagimi naga ngonaka de nato naribuutu la yofangu ho hiadono manga baju ihidodatahumuku nale la nato nasoino hiadono yofanguokahi de ahao nohigilio. De ngaro hokogea nodiai masara ma baju gea o wange ko itumunuahi de kiani ona nahininga de manga baju gea nohigilioka ma dutuika.

²⁷ Hokogea kiani nohigilio angamoi marai gea dika manga ngoere abe ka idadi gea ena yapake yomahikorobitino la ufa yamaata. Ho nako gea ena naleoka de ahao o kia yapake o futuoka ma oraha yomaidu? Ka de o futu de inihigurubungu ma titi manga baju ngona naleoka de yamaata. De manga huha gea Ngohi togihene de ahi dora ma hiokoo itagi onangika.”

²⁸ “Ngini duru ko idadiua niwingelo Ma Jouika. De ko idadiua niahikoboto eko niadoana ti ngini nia balu-baluhika abe inihipareta ngini o Isiraele ma nyawa.” Hokogea Ma Jou o Isiraele ma nyawa waduhunu la ufa yomahiketehikangela.