Huhupu 21 - Ma Jou ai Demo-demo o Totobelohoka

O Pasala 21 ma hitararono ma hidogo Ma Jou ai pareta o Isiraele ma nyawaika ma titi o doma

¹ Ma Jou wihingahu o Musaika wato, “De ahi pareta nenangoo abe kiani ngona nahingahu o Isiraele ma nyawaika la ona ka idadi yaniiki mata-mataika ahi pareta naa.”

¹² De hokonaa Ma Jou ai pareta abe o Musa wadofanga o Isiraele ma nyawaika, wato, “Onagona dika nginioka abe nako yapoha o nyawaika hiadono yohonenge, ona gea kiani niahohowono ka hiadono onangoo yohonenge.

¹³ Masara nako ko manga hininga ma dorouokaua de aino masara yapoha de hiadono yohonenge, ona gea abe yopoha-poha ka idadi yoara o ngi moiikali abe tohidadi o gogogono ma ngi. Abe nako genangoka ka idadi yomagogono la ufa o nyawa iwihibalaha abe wohonengoka gea. De Ngohi Ma Jou ahao tinihingahu nginika o kiaka ma ngi Ngohi tairikoka abe genangoka nimagogono la o nyawa ko idadiua initoma.

¹⁴ Masara o nauru abe ma dihiraino ai dohata itagi o nyawaika hiadono o nyawa gea watoma de ahao woara o gogogono ma ngiika gea ko tinihigunoaua niwigogono. Ho ngaro una womahigagao to Ngohi ahi huhuba ma ngiika la ufa niwitoma masara una gea kiani niwile de niwihikatingaka ma gurutika de ahi huhuba ma ngi de niwihohowono ka hiadono wohonenge.”

¹⁵ “Onagona dika abe manga baba eko manga meme de yapoha, ona gea kiani niale de niahohowono ka hiadono yohonenge ngaro manga dimono gea ko yohonengua.”

¹⁶ “Onagona dika abe o nyawa utu yataoko la ato yomabukunu la yomahitiwi-tiwi, ona gea kiani niahohowono ka hiadono yohonenge ngaro o tiwi yamakeoka eko ko yamakeuahi masara ona abe yotao-taoko hokogea kiani manga hohowono o honengika.”

¹⁷ “De onagona dika manga babaika iwidoana eko manga memeika imidoana ma kiani manga ngofaka gea abe yadoa-doana manga dimonika kiani niahohowono ka hiadono yohonenge.”

^18-19 “De ma oraha naga o nyawa yahinooto yomakangamo hiadono yomakopoha de nako womatengo ai dodiawoika wihiboha de o hakaru eko witidingi dika de ai bokoto hiadono wohidurubauku de hiadono ko idadiokaua womomiki kiani una gea abe wihikangela niwihohowono. De ngaro una wokangela gea ko wohonengua masara nako iwipoha hiadono ko idadiokaua wokarajaanga ma titi wokangela ka hiadono womaidu-idu dika. De ahao hokonaa ai hohowono abe una wopoha-pohaika, una gea kiani wihouru de witofo ai dodiawoika gea ka hiadono wotogumu la ka idadioli wotagi ngaro ka o tutukunu dika wapake. De nako ai karajaanga gea abe ko wodiaiua ma titi wihikangela de gea una wopoha-pohaika kiani wofangu ai dodiawoika abe wihikokangelaika gea ka hiadono duru wotogumoka de ahao ibooto widuhunu de wihidailako.”

²² De utuohi o Isiraele ma nyawa manga howono abe Ma Jou wihuloko o Musaika la wadofanga o Isiraele ma nyawaika ho Musa wahitararono onangika wato, “De nako o nau-nauru ngaro yahinooto eko yamuruono naga abe yomakopoha de naga genangoka o ngofeka de ami badangoka de munangoo imidaene manga boboha hiadono ahao mokilianga kiani yofangu. De ngaro utuoo de ko iwa ami odiri ma kiani ona gea yofangu ma amoko. De gea ami rokata o kia dika ai gogahoko ma gea kiani yofangu nako nia dimo-dimono abe yotobatailako o howono ato itiai ai gogahoko gea.

²³ Ma nako munangoo mohonenge de ahao una abe womipoha kiani niwihohowono hiadono unangoo wohonenge.

²⁴ De nako womatengo to muna ami lako wohirusakoka kiani to unangoo ai lako ihirusaka. De ngaro ami ingiri, eko ami giama, eko ami lou, ma nako ko idadiokaua mapake de ahao una gea abe womihikangela to unangoo ai ingiri atofioka, eko ai giama ma hononga atobikoka, eko ai lou ma hononga atobikoka.

²⁵ De nako o nyawa imihikangela hiadono naga ami nabo de gea kiani onangoo niahohowono ka hiadono onangoo naga de manga naboka, de nako ami nabo gea ma titi imiuku de gea ona kiani niahohowono ka hiadono to onangoo manga nabo o ukuoli. De nako imihikangela hiadono moloboho kiani ona niahohowono ka hiadono onangoo yoloboho.”

²⁸ De utuohi o Isiraele ma nyawa manga hiaturu abe Ma Jou wihuloko o Musaika la wadofanga o Isiraele ma nyawaika abe o Musa wahitararono onangika wato, “De nako o hapi ma nauru abe nako o nyawa yataduku ka hiadono yahohonenge, de gea ma hapi kiani yahohakaru ka hiadono enangoo ihonenge. De gea ihonengoka ko idadiua ma roehe niaolomo. De gea ma dutu ngaro ufa niwihohowono.

²⁹ Masara nako o hapi ma nauru ma dihiraino itobatadu-taduku ho ma dutu iwitemokau ato, ‘Kiani ani hapi gea nogoana duru nohidodiai la ufa hiadono o nyawa yahibodito.’ Masara nako manga hitiari gea ko waniikua hiadono ai hapi gea o nyawa ngaro o nauru eko o ngofeka yataduku hiadono yohonenge de gea ma hapi yahohakaru ka hiadono enangoo ihonenge. De ahao ma dutuoo kiani niwihohowono ka hiadono unangoo wohonenge.

³⁰ Masara una ka idadi womabangu nako ona yohonenge manga gogianongoru ato ka idadi ai bobangu yodafongo la ngaro ufa dika de una wohonenge. Masara o kia dika yogahoko kiani wofangu de gea kiani wangodumu wofangu la to una ai jiwa wobanguoka la ufa wohonenge de ka idadiohi wowango.

³¹ De o pareta hokogea ma dubuho ngaro nia ngofa-ngofaka o nauru eko o ngofeka. Ho nako yataduku o hapi hiadono yohonenge imaketero dika ma hohowono hoka o baluholi.”

³⁵ De o Musa wadofanga utuohi ma ngekomo de o hapi abe duru itualono wato, “De nako o hapi ma nauru o nyawa manga hapi yataduku ka hiadono ihonenge de ahao ma hapi abe ena yataduku kiani wafukunu de ma tiwi yaregu atotogorona. De ma hapi ma honenge gea enangoo ma roehe yomaketehonongaino.

³⁶ Masara nako o hapi ma nauru itualono hiadono itobataduku de ma dutu wogoana ko itiaiua hiadono o hapi utuika yataduku ka hiadono ihonenge de ahao o hapi itobataduku to ena ma dutu kiani o hapi ma honenge gea watagali de o hapi ma ngango. Masara o hapi ma honenge ma roehe ko yaregua ho mata-mata una ma dutu wapake abe to una ai hapi ihonenge.” Hokogea Ma Jou waduhunu ai nyawa de ma hiaturu de ma hohowono abe kiani yapake la ka idadi yomakao irahai.