Huhupu 2 - Ma Jou ai Demo-demo o Totobelohoka

O Musa womaboa de ka hiadono wobaluhiye

¹ De ma oraha gea naga womatengo o Lewi ai totoforaukuino woilaka ka yomahikokoona dika abe ngoi fekata munangoo o Lewi ma nyawa.

² De manga ngofaka yahinooto ibooto ma, naa ngoi fekata de ami badangokali ho hiadono momagerewoto de ami ngofaka o nauru. Ka de mimake ami ngofaka gea duru worahai de migogono ka hiadono o mede hangeino ma dekana.

³ Masara ai mede hange adonoka de ko idadiokaua migogonoli angamoi wolamokoka ho ngoi ayo male o roba moi abe yodumokau hoka o bongo-bongo ma roehino la mapake gea ena la ami ngofaka mihidalahini. Ho ma roba gea majumuoka de ahao ma goronaka de ma poretino mohilape de o hilo la ufa hiadono iwingohama o akere. Ho gea midiai ibooto de ahao ami ngofaka gea minoauku ai robauku gea de mihidogelenga de ai ngotiri o Nili ma akeroka. De naga o ruruubu o gohomanga ma ae-aehe o Nili ma akere ma datekiha de o ruruubu ma goronaka gea mikelengauku genangoka de ai roba gea.

⁴ De ngoi firanga o riaka momahitigi-tigika la migoana ami iranga la mamake ahao o kia idadi unangika.

⁵ De ahao o Mesiiri manga koano o Firaunu ngoi ora mato momaohiki o Nili ma akeruku ho muna de ami duduhunu yamuruono naga yoiki o akerika gea. De gea yotagi-tagi yomahiigo-igoriha de o koano ngoi ora mamake ma roba gea o gohomanga ma ae-aehe ma goronaka. De momihuloko ami duduhunika momatengo la o roba gea maleino.

⁶ De maoino o Firaunu ngoi oraino de ahao muna o roba ma dadamunu mafelengaiye de mimake o ngofaka gea o roba ma goronaka, woari-ari. De o Firaunu ngoi ora ami dora itagi unangika de motemo mato, “Hiokoo, maraioka naa o Ibarani ma nyawa manga ngofaka.” Hokogea motemo de ami hininga ma mobole unangika.

⁷ Ka de mamake ami iranga iwigoraka de ngoi firanga moboa o Firaunu ngoi oraino de momitemo de ami horomati munangika mato, “Ahi baluhu, nako ngona noigo, gea nipaliara dika de ngohi ka idadi toniduhunu tolingiri o Ibarani ma ngofekaino momatengo la muna ka idadi mihuhu ma ngofaka gea.”

⁸ De o Firaunu ngoi ora mosanangi ami demoika ho momihuloko mato, “Iya, ka idadi nolingiri ho noikoka.” Hokogea momihuloko masara muna moiki momile ka manga meme dika.

⁹ Ho manga meme gea moboaino de o Firaunu ngoi ora motemo manga memeika mato, “Ngona naa tonihikarajaanga abe kiani o ngofaka naa niaoohi la nohiduhunu de nihuhu hiadono wolamokoka. Ngohi tonihewa la ngona nipaliara ho ahao ani hewa namake.” Hokogea o Firaunu ngoi ora momihuloko o ngofaka ngoi memeika ho muna mihigilio ami tauika la mipaliara.

¹⁰ Ho ami ngofaka wolamoko ngoi memeoka ma, ka de hiadono ko wohuhuokaua de mingotaka o Firaunu ngoi oraika la wodadi to koano ngoi ora ami dofo. De o Firaunu ngoi orali mipaliara hiadono wodadi imaketero hoka ami ngofaka idodutu de mihiromanga o Musa abe motemo mato, “Ngohi tigoraka o akerino ho ma titi gea ngohi tihiromanga o Musa.”

¹¹ Ho o Musa wobaluhiye de ka ai dekanohi wogogere o Firaunu ai tauoka. De o wange moi wohupu woiki watutumu ai dutu-dutu o Ibarani ma nyawa, de wamake de ai huha hokokia manga kangela yokarajaanga ai dutu-dutu. De ma oraha gea naga genangoka womatengo o Mesiiri ma nyawa duru wipoha-poha o Ibarani ma nyawaika abe o Musa ai dutu adaene.

¹² De o Musa womalega arihonongaika de o nyawa ko moi-moiua ai datekoka ho ai dutu gea wihibalaha hiadono o Mesiiri ma nyawa gea witomaka. Gea witomaka de ahao ai honenge wipohuku o dowongiuku la ufa o nyawa ai honenge yamake.

¹³ De ma dawangeino o Musa woiki watutumoli ai gogianongoru manga karajaanga ma goronaika de genangokali naga o nauru yahinooto yomakopoha yomahikokoona o Ibarani ma nyawa. De o Musa watatoko de una gea abe wotiti wohira wopoha witaere unangika wato, “Ei, adodoa ho ani dodiawo nipoha? Unangoo gea o Ibarani ma nyawa.”

¹⁴ De o nyawa gea wipaluhu o Musaika wato, “Ngona naa, onagona inigoraka hiadono inihidadi mia baluhu de nato ka idadi nomihohowono hiadono naa nohitaere ngohi? De marai nato ngohioli nohitoma, hoka o Mesiiri ma nyawa gea kanugono nitomaka.” Ka de ai demo gea o Musa woihene de doka ai hiningaka womatemo wato, “Ei, marai o nyawa ihihiorikoka gea todiaioka.” De genangoka de wohawanoka.

¹⁵ De ahao o Firaunu, o Mesiiri manga koano gea, unangoo woihenoka abe o Musa witomaka o Mesiiri ma nyawa de wahuloko wato, “Nako o Musa o Mesiiri ma nyawa watoma kiani unangoo hihohonenge.” Hokogea o Firaunu ai huhuloko masara o Musa ko iwidaenua angamoi woaroka o Midiana ma tonakika. De o Midianoka womahiadonika de naga moi o humu ho genangoka wogogeruku womahiaini.

^16-17 De o humu gea yatobapake ihiokere manga duduono abe ona yotobagoana o domba de o kabingi. De naga womatengo to unangoo ai duduono ihiokere o humuoka gea, ai romanga hinooto, ho moi o Rehuele de iwihiromangoli o Jitoro. Una o Midiana ma nyawa manga hidimono abe wahidemo Ma Jouika. De to una ngoi ora gea o momoholehe yatumidi abe yotobagoana manga baba ai duduono o domba de o kabingi. De ma oraha o Musa naga genangoka de o Jitoro ngoi ora yatumidi gea yoboa ma humuino hoka manga biaha la o akere yomahionoko de yoguhe o aewani ma ngongokeruku la manga duduono ihikokiokere. Masara ahao naga o domba ma gogoana o nau-nauru onangoo yoboa de yakiniiki ma ngo-ngofekaika. Ka de o Musa wamake hokogea yodiai de o Jitoro ngoi ora yatumidi waduhunu manga kangelaino. De ahao ona o Musa waduhunu la manga akere woguiti hiadono ihikokiokere manga duduono.

¹⁸ Ho ma oraha o Jitoro ngoi ora yokokilio manga baba ai tauika de una waleha onangika wato, “Ngohi toheranga o wange naa ka itaitiholi ngini nilio. Marai naga moi ma titi eko sarakia?”

¹⁹ De ona iwiade-ade manga babaika abe kangano idadioka o humuoka, ato, “Kangano naga womatengo o Mesiiri ma nyawa duru womiduhunu o humuoka. Abe ka de o gogoana utu gea imihikangela de una womihihupu manga giamino hiadono ona kiani imidamaa miabooto mihiokere to ngone nanga duduono. De ahao o Mesiiri ma nyawa gea utuohi womiduhunu abe woguiti o humuino hiadono nanga duduono ikokiokere.” Hokogea yoade-ade manga babaika.

²⁰ De una wato, “Ho una o kiaka naa? Hokogea winiduhunoka de una niwidogunoaika dika o humuoka? O, ufa hokogea ngini nidiai, kiani nimataiti niwigilio la niwiahoko la woboa de wolomo ngoneoka.” Hokogea wahuloko ngoi oraika de yosoboka o Musa iwile.

²¹ De o Musa wosanangi iwiahoko manga tauika, de ipaha womanoa ai dekana onangoka. De ika-ika o Jitoro gea abe ai romanga moioli o Rehuele, una wahiketehimoloka o Musa de ngoi ora o ngo Sipora.

²² De ahao o ngo Sipora mamake manga ngofaka o nauru de o Musa wihiromanga, “o Homoaino” abe nako to ona manga demo o Gerosomo. Hokogea ai romanga angamoi ai baba o Musa wotemo wato, “Ngohi todadioka o homoaino ma nyawa abe naa ko to ngohiua ahi tonaka.” Hokogea ma titi hiadono ai ngofaka wihiromanga o Gerosomo.

²³ Ho de o taongo muruono ipopahaika ma dekana de o Mesiiroka manga koano o Firaunu una gea wohonengoka. Masara o Isiraele ai totoforauku gea ka yaribuutuohi yahikarajaanga hiadono ikiriakaholi ona ihigogururihi ma titi manga kangela ko yapoaua ma dubuho. De ona ka ihikaika o duduhunu yomagahoko Ma Jouiye.

²⁴ De manga gogahoko gea Ma Jou wagihene de ko wawohangua manga gogahoko. De ai behehongoo ko wawohangua abe ma dihira wahibehehongoka o Abarahaamika, o Isakika, de o Yakubika.

²⁵ Ho gea Ma Jou womalega o Isiraele ma nyawauku gea, de igoungu yokangelakaholi de duru ai dora itagi onangika.