Huhupu 19 - Ma Jou ai Demo-demo o Totobelohoka

O Isiraele ma nyawa yomahiadonika o Sinai ma lokuoka

^1-2 De naa manga ngi o Rafidimi o Isiraele ma nyawa yanoa la utuohi yomahitigi Ma Jou ai loku o Sinai ma timino. De ona ma wange gea yomahiadono ma dolaino o Sinai ma loku ma timino de adonoka manga dekana o mede hinootou abe ona yohupuoka o Mesiiri ma tonakino. Ho duru ma wange ihira manga mede hangeuku de ona manga tau o ngoerino ihigokokali la yomahidodogumu o Sinai ma tonaka ma kakaahaka gea.

³ De ahao o Musa wodoa o Sinai ma lokuiye gea la Ma Jou witutumu. De Ma Jou o Yawe naga o lokuoka gea de wiahoko o Musaika de wihingahu unangika wato, “Hokonaa ahi demo abe ngona kiani nahingahu o Yakubu ai totoforauku o Isiraele ma nyawaika nato,

⁴ ‘Ngini de ti ngini nia lako niamake mata-mata gea abe Ngohi todiaioka o Mesiiri ma nyawaika la tinihihupu to ona manga kuahaino. De Ngohi tiniao nenangino la tinitoomuino Ngohino. De gea Ngohi tiniao hoka o totaleo o rajawali ma dimono abe de ma buturungu ihihoho ma ngofaka. De hokogenangoli de Ngohi tiniao nenangino de ahi buturungu abe ko ti nginiua nia buturungoka de aino hiadono nimahihupu.

⁵ Ho nako ngini nihihingounu de nianiiki ahi behehongo ahao Ngohi tiniiriki o nyawa mata-mataino abe naga o duniaka la ka nginiohi tinihidadi ahi nyawa abe tomahitongohi. Ho ngaro o dunia mata-mata to Ngohi ma, ka nginiohi tinigoana de ahi dora.

⁶ De ngini o Isiraele to una ai totoforauku tomadingakino la nihileleani Ngohi abe ahao tinihidadi o hohidemo la ngini o dunia ma nyawa niahidemo Ngohino. De ngini tomadingakino abe duru tinihidadi o doomu moi ma debi-debini kohaamoko o duniaka.’ Hokogea o Musa, ahi demo abe kiani nahingahu o Isiraele ma nyawaika.”

⁷ Ho o Musa woutiuku o lokuku de o Isiraele manga balu-baluhu watoomu mata-mata, de wahingahu onangika Ma Jou o Yawe ai demo-demo mata-mata abe kanganoino wihibehehongoka o Musaika.

⁸ Ho ka de yoihene de ona mata-mata ka ma moiiye yopaluhu ato, “Ngomi naa duru miagou-goungu, abe ahao mata-mata Ma Jou o Yawe womihipareta gea mata-mataika mianiiki de midiai.” Hokogea manga behehongo Ma Jou o Yaweika ho o Musa ma lokuiye wodoali wao manga behehongo la ka idadi wihingahu Ma Jou o Yaweika.

⁹ De ka de wodoaiyeoli de Ma Jou o Yawe wihitodokanika o Musaika wato, “Abeika, Ngohi ahao touti ma lokuku naa de tomahihawoino de o lobi duru kohabirini de ahao Ngohi totemo-temo ngonaika de noihene ka o lobi ma goronaino dika ahi ilingi ihupu. De hokogea taamo-amokiye ka hiadono onangoo dau ma timiuku ka idadi yoihene ahi ilingi. Hokogea tomahimatoko de tonitemo de onangoo yokokiihene de ahao ngonaikaoo ona iningaku ka hiado-adonika.” Hokogea Ma Jou wotemo ibooto de ahao o Musa wihingahu Ma Jou o Yaweika o Isiraele ma nyawa manga behehongo gea.

¹⁰ De Ma Jou o Yawe wihibehehongoli o Musaika wato, “Ho naa Musa noutioli la ani nyawa nahiaturu la ona yotebini ma titi yomahidiai la manga hininga ma dumutu ka Ngohino dika abe o wange naa de ka hiadono itebini kiani yomahidiai la yomahuba Ngohino. De kiani manga pakeangoo yomakokibokaka.

¹¹ Ho de ma wange hangeoka de gea ona mata-mata yomahidiaioka angamoi duru o wange gea Ngohi touti o Sinai ma lokuku naa. De ona mata-mata yohimanga o lokuino la ihimake ma oraha touti o lokuku naa.

¹² De kiani Musa nohiaturu la o loku ma timiuku naga nodiai ma batingi de nahingahu onangika nato, ‘Ngini mata-mataika kiani nimagoana de nimahitiari la ufa ma batingi gea niatilakuru. Abe ka de onagona dika nako yomahitigino ma lokuino naa de kiani yohonenge.

¹³ Abe onagona dika yatilakuru de yoaguru ma lokuika ona gea kiani ngini niahakaru eko niatoimi ka hiadono yohonengoka de ko moiua nginioka ka idadi yagagao manga honengika abe kiani niahohowono hokogea. De ngaro o nyawa eko o aewani masara nako yatilakuru ma batingi gea kiani yohonenge.’ Hokogea Musa nahitiari onangika. De ma oraha yoihene ma ilingi kohaamokiye abe o domba ma tatadukino nia guguli abe awuwu de ma ilingi yogirangika, gea de ahao ka idadi yoboa hiadono ma batingino dika.”

¹⁴ Ho o Musa wouti la ai kokawaaha wahiaturu la yotebini ma titi yomahidiai la manga hininga ma dumutu Ma Jouika dika. De manga pakeangoo yomakokiboka.

¹⁵ De wahingahu onangika wato, “Kiani ngini mata-mata nimatingaka Ma Jouika la ma wange ma hangeoka ka idadi nimahuba Ma Jouika ho ngaro niilakoka ma ko tinihigunoauahi nimaidu de nia fekata.” Hokogea wahuloko ho ona yomahidiai.

¹⁶ Ho de o futu hinooto gea ipaha de duru ka o ngoru-ngoruminohi de dakea ma loku ma tubuoka yoleletongo de yokuruuhu duru kohagiria de o lobi duru kohabirini iuti o loku dakea ma tubuku. De naga hoka o guguli ma ilingi kohaamokiye de yogirangika ka hiadono o Isiraele ma nyawa manga tau-tauoka yokokihawana ka hiadono yokokifafara.

¹⁷ De o Musa o Isiraele ma nyawa gea wahihupu manga doomu ma ngiino de wao hiadono ma batingika de yomakokiokoino ma batingoka abe o loku ma timiuku gea la una ka idadi wahikamake ona de Ma Jou.

¹⁸ De o Sinai ma loku gea duru atamunoka de ma nofo angamoi Ma Jou o Yawe wouti de womahiduguti de o uku ma goronaka Una. De ma uku kohaamokika ho hiadono ma nofo kohaamoko ihaotiye, de ma loku gea ihikelu duru kohabuturungu.

¹⁹ De o guguli gea ma ilingi ka ihikaika idogo ma amokiye de o Musa wotemo-temo Ma Jouika de Ma Jou wopaluhu de ai ilingi gea hoka yokuruuhu.

²⁰ De ahao Ma Jou o Yawe wotemo o Sinai ma tubuoka de wibehehongo o Musaika la wodoa dakuiye. Ho o Musa wodoa hiadono daku o loku ma tubuiye.

²¹ De ka de womahiadono de Ma Jou wihingahu unangika wato, “Musa, ngona kiani noutioli la nahitiarioli o nyawa mata-mataika gea la ufa hiadono yatilakuru ma batingi gea, done ona manga ngoe yaribuutu la ato ihimake Ngohi Ma Jou o Yawe. De gea angamoi ona ka de ma batingi atilakuru de ka yohonenge.

²² De hongoli onangoo abe manga gogianongoru yahidemo Ngohiye done yomaputuhu yatilakuru ahi loku ma batingino angamoi ona ato, ‘Ngomi o hohidemo ho ka idadi abe mia biaha miboa Ma Jou o Yaweino.’ Masara ngona kiani nahitiari abe nako ona yotemo hokogea la ato yomahuba Ngohino masara ko yomahidiaiuahi ho ko yomatingakinouahi Ngohino onangoo gea kiani tahohonenge.”

²³ Hokogea o Musa woihene de wopaluhu Ma Jouika wato, “O nyawa mata-mata gea ko idadiua yodoa nenangiye, o Sinai ma lokuiye, angamoi Ngona nomihitiarioka nato, ‘O loku ma timiuku kiani nidiai ma batingi la duru nihidingakoka to Ngohi ahi loku.’ De ani behehongo gea mianiiki ho ngohi tohiaturokau. Ho ona ko yamoroinokaua yatilakuru.”

²⁴ De ahao Ma Jou wohigalioli o Musaika wato, “Ngona noutiohi, la nahihohiningali onangika ahi huhuloko ma hitiari. Ma nako o Harunu, ma oraha naa de ahao unangoo tibehehongo ho kiani una niaoiye nenangiye. Masara o hohidemo Ngohiye utu, ona de o kokawaaha utu ufa yomaketeribuutu la ato Ma Jou o Yawe iwimake angamoi ka de ma batingi gea yatilakuru de Ngohi ahao duru tahohowono onangika.” Hokogea Ma Jou wihulokoli o Musaika.

²⁵ Ho o Musa woutioli de wahikokingahu o Isiraele ma nyawaika Ma Jou ai hingahu ma demo gea.