Huhupu 18 - Ma Jou ai Demo-demo o Totobelohoka

O Musa ai toroa woboa la o Musa de o Isiraele ma nyawa warekata

¹ O Musa ai toroa o Jitoro una o Midiana ma nyawa manga baluhu abe wahidemo Ma Jouiye. De o Jitoro woihenoka ma ade-ade abe hokokia Ma Jou o Yawe widuhunu ai toroa o Musa de o Isiraele ma nyawa abe Una womadingakino wato wahidadi to Una ai nyawa, de onangoo duru waduhunu. Abe ma ngoe o Jitoro woihene ma ade-ade abe ma titi Ma Jou de ai kuaha wahihupu o Isiraele ma nyawa o Mesiiri ma tonakino.

^2-4 De o Jitoro duru woigo woiki watutumu o Musa de o Isiraele ma nyawa de wato ngoi ora o ngo Sipora de ai danongo yahinooto ka idadi wahigilio o Musaika. Ona yogogere o Jitoroka angamoi ma dihira ma oraha o Musa woiki o Mesiiri ma tonakika de ai dodagi ma goronaka womaputuhu wato ufa ngoi fekata de ai ngofa-ngofaka yogila-gila iwiniiki. Ho o Musa womihuloko la muna de manga ngofa-ngofaka yolio ami babaika de ma oraha yomahiadono o Jitoro ai tauoka de una de ai sanangi wadafongo. Ho naa ma dekana de ahao o Musa ngoi fekata de ai ngofaka yahinooto o Gerosomo de o Eliesere ka idadi yomakamakeoli de o Musa. De hokonaa ma titi hiadono ai ngofa-ngofaka yamake manga roma-romanga gea. Abe ai ngofaka o riaka o Musa wihiromanga, “o Homoaino ma Nyawa,” abe nako to ona manga demo o Gerosomo. Hokogea ai romanga angamoi ma oraha womaboa o Midiana ma tonakoka de ai baba o Musa wotemo wato, “Ngohi todadioka o homoaino ma nyawa abe naa ko to ngohiua ahi tonaka.” De ai ngofaka o dodoto o Musa wihiromanga, “Ma Jou Wohiduhunu,” abe nako to ona manga demo o Eliesere. Hokogea wihiromanga abe wotemo wato, “Ahi tofora manga Jou, Una gea wohiduhunu ngohioo ho hiadono ngaro o Mesiiroka manga koano o Firaunu wohihidee ngohino masara ko wohidaenua wohitoma.” De naa o Jitoro ai hininga la ka idadi yomakamakeokali o Musa de ngoi fekata de ai ngofaka yahinooto gea.

⁵ Ho naa o Musa ai ngofa-ngofaka gea manga ete o Jitoro wangotaka de manga meme o ngo Sipora munangoo molio ami rokatika. De gea yoboaino ma oraha o Musa de o Isiraele ma nyawa gea nagahi manga dingiioka abe yomahitigioka Ma Jou ai loku o Sinai ma timiuku.

⁶ De gea ko yomahiadonuahi de ai toroa o Jitoro wahidingoto o nyawa utu la watihira ai demo wato, “Ngohi naa ani toroa o Jitoro de ma oraha naa toboa de ngoni fekata de ani ngofaka yahinooto tangotaka ngonaika.”

⁷ Ho ka de gea woihene de o Musa woiki wabuhukika ai toroa. De duru womaponuku o Jitoro ai himangoka de ahao wibounu de hoka manga biaha yomakokeleha nako naga manga huha eko koua. Ho ipaha de ona o Musa wao ai tauika.

⁸ De yokokiwohamika ai tau o ngoerino ma goronaka. De ahao o Musa wiade-ade ai toroaika abe hokokia Ma Jou o Yawe wahohowono o Firaunu de o Mesiiri ma nyawaika la o Isiraele ma nyawa wahihupu manga giamino. De nagaoo wiade-ade hokokia manga dodagi ma goronaka manga kangela yamake masara Ma Jou o Yawe wao irahai de wahihupu manga kangelaino de hiadono wahidailako manga perelu mata-mata.

⁹ Ka de o Musa ai ade-ade gea woihene de o Jitoro duru wosanangi hiadono Ma Jou ai owa o Isiraele ma nyawaika wohigiriiri abe ma titi wahihupu o Mesiiri ma tonakino, wato,

¹⁰ “Ngohi naa duru tihigiriiri Ma Jou o Yawe, abe duru winiduhunu ngini hiadono winihihupu o Mesiiri ma nyawa manga giamino de o Firaunoo ai giamino winihihupu.

¹¹ Naa toihene de ngohi duru tohioriki abe nako Ma Jou o Yawe de ngaro o popangao mata-mataika, ma, ka Unangohi woputurungu abe gea duru womahitaana de mata-mata gea wodiai o Mesiiri ma nyawaika. Ona duru o Isiraele ma nyawa yahidadi manga huhuloko abe yahikarajaanga de ma dubuhoholi hiadono o Mesiiri ma nyawa manga sadeoo ka idogo-dogo, ma, abeika hokokia Ma Jou o Yawe wahohowono onangika.” Hokogea o Jitoro ai higiriiri ma demo.

¹² De ahao o Musa ai toroa, o Jitoro gea, una womahuba Ma Jouiye. Ho gea o Harunu de o Isiraele ma nyawa manga balu-baluhu yokokiboa ma oraha o Jitoro womahihuba o huhuba iharo-harongo de naga ai huhuba o aewani utuohi abe yatoaka ma ngomahino de to ena gea ma roehe ka idadi yaolomo. De ona yahidiai o aewani ma roehe de o roti de ahao o Jitoro de o Isiraele ma nyawa manga balu-baluhu yolomo yomakutuono o huhuba ma inomo Ma Jou ai himangoka.

¹³ De ma dawangeino o Musa naga ai karajaanga wotobatailako ai nyawa manga howono. Ho to ona manga doomuino abe yokadatoro ngaro ma titi o kia naga ma, yokokiboa unangika la manga kadatoro gea watailako la wohioriki naga ma titi de ahao ka idadi waurusu manga howono hiadono wahitiai de wahikadame. De ko manga ngoe yoboa ho gea dika o Musa wokarajaanga de o ngoru-ngorumino ka hiadono iwihidufutuoka.

¹⁴ De ka de o Jitoro wamake ai toroa ai karajaanga hokogea de wileha o Musaika wato, “Toroa, naa moi tonileha, o nyawa manga ngoe de adodoa ho hiadono ngona ka nomatengo dika o nyawa naa nahiaturu? Abeika, ngaro ngona noigo nato ani nyawa naduhunu masara gea ka nahikangelaoo angamoi ko manga ngoe manga dekana yomaokoino nenangoka inidamaa la ka idadi onangoo naduhunu. De ona utu o ngoru-ngorumino ka hiadono yofutu inidamaa.” Hokogea o Jitoro ai duduhunu ma demo ai toroaika.

¹⁵ De o Musa wopaluhu wato, “Ahi toroa, ona gea yoboa yolingiri Ma Jou ai mau onangika.

¹⁶ Ho ngohi taduhunu onangika abe tolingiri manga kadatoro eko manga liliara ma titi de tahitararono onangika Ma Jou ai pareta de ai hiaturu. De ona yomahinganono ngohino la taputuhoo onagona yahowono.” Hokogea o Musa wihitararono o Jitorika.

¹⁷ De o Jitoro witemoli o Musaika, wato, “Masara ngaro hokogea manga perelu ma, onangika ko yadonikaua ani duduhunu.

¹⁸ Abeika, ngona dika nomadiai o bole-bole angamoi onangoo yabole. Ho ko yadonikakaua onangika abe yoperelu o duduhunu. Ho ani karajaanga ko itiaiua abe ani duduhunu gea yadonikakaua angamoi o karajaanga gea itubuhoholi nako ka ngona dika nokarajaanga.

¹⁹ Ho naa, irahai nohihigihene ahi demoika, abe nako ahi demo ma owa naa naniiki de ahao Ma Jou woniduhunu. Igoungu, ngona nodadioka Ma Jou ai hidemo la o nyawa naa nahidemo hiadono manga kadatoro de manga ribuutu nao Ma Jouika.

²⁰ De kiani ngona nadotoko Ma Jou ai pareta onangika de ai pareta ma titi nahitararono onangika la hiadono duru ihioriki yomakao irahai de itiai. Kiani naduhunu la ihioriki to onangoo manga tagongo Ma Jouika yao itiai abe iwihingounu de yodiai mata-mata gea abe Una wonahibehehongo ngoneino.

²¹ Ho naa ngona kiani nalingiri o nau-nauru abe ka idadi iniduhunu de o karajaanga naa. Nalingiri ona abe iwimodongo Ma Jouika de duru yaniiki ka ma totiai dika ho hiadono manga dongohono naga la ngaro o nyawa yahewa ma, ka yoluku. De onangino nairiki ona abe homoi-homoiika yakunu yahidimono o tau o sana moi. De ukuoli naga yahidimonoli o tau o ratuhu moiinoli, de ukuoli naga yahidimonoli o tau moritoaino. De hiadono ukuoli naga yahidimonoli o tau angongimoiika.

²² Ho ngona nahiaturu la ona abe o tau angongimoiika yahiaturu de yatobatailako de yaurusu ona abe yahowono. Ma nako naga womatengoka abe o kadatoro de gea una ko idadiua waputuhu manga kadatoro gea, de ahao wahidoaka daku ai haekiye. De nako ko iwali ma putuhu gea yahidoakoli manga lokuiye de nako onangoli ko yaputuhua gea ka idadi yao ngonaika la ngona natailako de naputuhu. Ma nako o kadatoro ma biaha dika, gea ngaro ufa dika de ihidoaka ngonaika, ona dika ka idadi ihiaturu de yaputuhoka la ena gea ibooto. De nako ngini nianiiki o hiaturu hokogea to ngona ani karajaanga ahao namao iuwini angamoi naga ani duduhunu manga ngoe abe onangoo yamoku ani karajaanga naa.

²³ De nako hokogea nianiiki de gea Ma Jou ai mau adaene de ahao ngona napoa ma karajaanga naa. De ani kokawaaha mata-mataika abe yolingiri o duduhunu gea ka idadi yolio de manga sanangioka angamoi itaiti ibooto manga kadatoro.” Hokogea o Jitoro ai demo ma owa wohidoaka ai toroa o Musaika.

²⁴ De o Musa wihigihene ai toroa ai demoika gea de waniiki mata-mata.

²⁵ Ho o Isiraele ma nyawa mata-mataino wairiki o nauru o balu-baluhu abe yao o nyawa irahai de yaniiki ma totiai dika. De o nau-nauru gea wahikarajaanga la o nauru womatengo wahidimono o tau ngimoi, de ahao naga to onangoo manga hidimono womatengoli abe wahidimono o tau moritoa, de ahao naga to onangoo manga hidimono womatengoli abe wahidimono o tau o ratuhu moi, de ahao naga onangoli abe homoi-homoiika yahidimono o tau o sana moi.

²⁶ De ona yaleleani manga kokawaaha abe yahiaturu de yatobatailako nako naga manga hidogoronaka o kadatoro. De ahao o nyawa abe yahitaana yahowono ona gea ahao yaurusu de hiadono yahohowono. De nako naga o kadatoro abe duru itubuho gea yahidoaka o Musaika la una waputuhu. Ma nako o kadatoro de o liliara biaha ona dika ka idadi ihiaturu de yaputuhoka la ena gea ibooto.

²⁷ De ma hiaturu mata-mata gea ibooto de ahao o Musa wihigunoa la ai toroa o Jitoro gea wolio ho o Jitoro womahilooa de wosobo wolio to una ai tonakika.