Huhupu 17 - Ma Jou ai Demo-demo o Totobelohoka

Yamake o akere o hakaruino

¹ De o Isiraele ma nyawa de manga doomu yongodumu yanoa manga dingii o Sini ma tonaka ma kakaahaka gea de yoikoli de manga dodagi ma goronaka Ma Jou o Yawe wahihira-hira ho yotulu-tulu moduku abe hoka to Una ai mau. De ika-ika yomahiadono o ngi moiokali ma romanga o Rafidimi de genangoka wahiduluika masara o akere duru ko iwa genangoka.

² Ho ona duru iwihigurubungoli o Musaika ato, “Musa, nomihidoaka o akere la ngomi ka idadi miokere!” Hokogea iwiribuutu. De o Musa wapaluhu wato, “Adodoa ho ngohi nihiribuutu hokogea? Gea ibooto Ma Jou o Yawe niwitaili!”

³ Masara manga ngomaha yodudunguholi ho ka ihikaika yokurubungu ato, “Adodoa ho ngona nomihihupu o Mesiiri ma tonakino? Ngona duru itorou nomiao nenangino naa. Marai mihonenge ngomi de mia ngofa-ngofaka de mia aewanioo ka ma moi mikokihonenge nenangoka!” Hokogea manga gurubungu ma demo o Musaika.

⁴ De o Musa womahiboaka ai gogahoko Ma Jou o Yaweika wato, “Ma Jou, ka o kiahi todiai la hiadono ona naa tahiriidi? Abeika manga ngamo ngohino hiadono ngade-ngade ihihakaru naa!” Hokogea una womahingahu ai hininga Ma Jouika.

⁵ De Ma Jou o Yawe wihuloko o Musaika wato, “Musa, naa de napakeoli ani tutukunu abe ma dihira nohipohaka o Nili ma akeruku. Ani tutukunu gea nasoino de noiki o kiaka ma ngi gea ahao bootino tonihingahu. Masara ko noikuahi de kiani nahokino o Isiraele manga balu-baluhu la ona gea nahihira-hira ma ngiika gea de manga kokawaaha inihidoduruino.

⁶ De nimakiniiki o Sinai ma lokuhakaruika. De Ngohi naga o Sinai ma loku ma timiuku duru o hakaru ma datekoka. De ka de nomahiadonika o hakaruoka gea de kiani nohipoha de ani tutukunu! Abe ka de ani tutukunu nohipoha ma hakaruika gea de duru ma akere ka imahidataoino ikopoa ma hakaruino la hiadono ona mata-mata yaokere.” Hokogea Ma Jou wihuloko o Musaika de duru waniiki ai demo hokogea o Isiraele manga balu-baluhu manga himangoka.

⁷ De ma ngi gea o Musa wohiromanga hinooto. Ma romanga moi o Hitaili, de ma romanga moioli, o Ribuutuino. Abe nako to ona manga demo o Masa de o Meriba, hokogea wohiromanga ma titi ona duru iwitaili Ma Jou o Yaweika de manga ribuutu ma demo abe yotemo ato, “Sarakia, Ma Jou o Yawe gea, Una naga eko ko iwiwa ngoneoka?” Hokogea iwitaili Ma Jouika.

O Amaleke ma nyawa yaparangi o Isiraele ma nyawaika

⁸ De ona ka yoriidohi o akeroka o Rafidimoka gea de naga o Amaleke ma nyawa yangino yaparangi o Isiraele ma nyawaika.

⁹ De o Musa wihuloko o Yosuaika wato, “Yosua, kiani o nau-nauru yopoputurungu nairikino la ona gea nahihira niabuhukika niaparangi o Amaleke ma nyawaika gea. De itebini ngohi ahao todoa dakea ma lokuiye de Ma Jou ai tutukunu naga ahi giamoka tasoino.” Hokogea o Musa wihingahu o Yosuaika.

¹⁰ Ho o Yosua wodiai hoka o Musa wihulokoka de waparangi o Amaleke ma nyawaika. De o Musa ma loku gea wodoa de wao o Harunu de womatengoli ai romanga o Huuru de yodoa hiadono o loku ma tubuiye.

¹¹ De o Musa womalegauku abe ona yomaketeparangi ai timiuku de nako ai tutukunu wahitumutu daku manga lokuika de o Isiraele ma nyawahi yoputurungu yoparangi ma nako ai giama yaboleoka hiadono ai tutukunu wohiguti de ahao o Amaleke ma nyawahi yoputurungu yoparangi.

¹² Masara ika-ika de o Musa ai giama yaboleoka hiadono yakauku ikawewa ho o Harunu de o Huuru yaleino o hakaru la o Musa ai gogogere iwidiai de ahao iwigogeruku o hakaruoka gea. De ona yahinooto gea yoboa ai arihonongaino de yaso-soika ai giama la yatagaiye la ufa ai giama yakauku ikawewa hiadono ai tutukunu enangoo ikawewauku. De hokogea o Harunu de o Huuru iwiduhunu la ka ihikaika o Musa ai tutukunu wagorakiye de ka hiadono o wange yahidutumunu.

¹³ De gea ma titi hiadono o Yosua de ai tentara ka idadi o Amaleke ma nyawa yahikala de manga dia ma rupa hoka o dopo-dopo.

¹⁴ De ahao Ma Jou o Yawe wihibehehongo o Musaika wato, “Musa, la ufa niawohanga abe kangano idadi nenangoka kiani ma ade-ade gea notulihi o buku ma luluoka la gea idadi o hohininga o nyawaika. Ho notulihi ibooto de nohiaturu la o Yosua woihene ma ade-ade naa abe notulihukuoka. Kiani una wohioriki abe Ngohi ahao o Amaleke ma nyawa ka ihikaika taparangi ka hiadono o duniaka naa ko yahiningakaua o Amaleke ma nyawa.” Hokogea Ma Jou ai behehongo o Musaika.

¹⁵ De o Musa ahao o huhuba ma ngi wodiai genangoka de manga huhuba ma ngi gea wohiromanga: “Ma Jou o Yawe, Una to ngohi ahi Hilaku ma Bendera.”

¹⁶ De wotemo wato, “Hokogea tohiromanga mangale ma titi naga nanga giama hagorakiye de o gogahoko Ma Jou o Yawe ai kaderaiye. De Ma Jou o Yawe waparangi o Amaleke ma nyawaika ka hiadono de manga lape-lapeuku ahao waparangi.” Hokogea o Musa ai horomati ma demo Ma Jou o Yaweiye.