Huhupu 15 - Ma Jou ai Demo-demo o Totobelohoka

O Isiraele ma nyawa ihinyanyi Ma Jouiye to Musa ai higiriiri ma demo

¹ De ma titi Ma Jou o Yawe ai duduhunu onangika hiadono o Musa de o Isiraele ma nyawa mata-mata gea iwihigiriiri Ma Jou o Yaweika de manga nyanyianga hokonaa: “Ngohi naa tonyanyi, Ma Jou o Yawe tigorakiye, Duru wolakuoka abe ka Unangohi wokokurutiye, O kuda de ona o kudaka yokokifarenuku, Ka ma moi Ma Jou wahidotumoka o gahioko.

² To ngohi ahi buturungu ihititi Ma Jou o Yaweino dika, De ahi higiriiri enangoo ihititi Unangino dika. Una wodadioka to ngohi ahi hiluasa o boditoino, Gea Una to ngohi ahi Jou abe ka ihikaika tihigiriiri, De Una to ngohi ahi totoforaoo manga Jou abe naa tigorakiye.

³ Ma Jou o Yawe ka Unangohi woputurungu woparangi, De igoungu to Una ai romanga gea Ma Jou o Yawe.

⁴ Una o gahioko wakokiumo to Firaunu ai goroba parangi, Gea wahidotumoka de o Firaunu ai tentara ka ma moi, Ai tentara manga hidimono yokokurutiye wairikoka, Ma ka o kiakahi o Firaunu ai tentara naa? Ona yakokilutuoka.

⁵ Ona hoka o hakaruoli ho ka yogila-gilauku hiadono dau o dowongiuku, Kohabiriniye ma gahi manga lokuino de ona gea ga dau.”

⁶ “Hoka to Ngona ani niraka napake, Ma Jou o Yawe, Nomihimatoko ani kuaha ma buturungu hiadono minigorakiye. Ho ka de to Ngona ani niraka dika, Ma Jou o Yawe, Nanga musu manga buturungu Ngona duru nahiwedere.

⁷ Ngona nokokurutiye ho de ani kuaha kohabuturungu, Ngona nahikala ona gea abe ato ka idadi iniparangi, Ma, ka de ani ngamo nadipidili la itagi onangika gea, Abe imaketero hoka o uku aolomo o nguhumu ma doolenge.

⁸ Hoka Ngona nohanguru dika o gahika de ma gahi itaangaika, O gahi ilopaka de ma buturungu hiadono idadioka o dadaduhu, De ngaro ma lukuku ma, o gahi gea ibitumu imaokoiye, Hiadono o gahi ma goronaka iotuoka ma igara arihononga.”

⁹ “De nanga musu yomagorakiye de manga sade ihidemo, Ona o Firaunu ai tentara ato, ‘Ngone naa kiani hakiniiki, Hakiniiki hiadono hadaene o Isiraele ma nyawa gea, De homagora manga kiahonanga de homahikokodoku, Nanga hafini ma hibalaha itagi hiadono inawedono. Nanga dopo-dopo ma harumino hahiatino la hatoma, De ona gea hakokipairi hiadono hahikokibinaahaka!’ Hokogea ona yomagorakiye ato inamamataka ngone naa.

¹⁰ De ahao Ngona Ma Jou nawuwu de ani hidaloko, De ma gahi gea imaketegilioli ho yahidatamunu de o gahi. Nanga musu yalutu hoka o horioli manga hiapotuku, O gahi duru de ma buturungoka de ona naga ma goronaka.”

¹¹ “O nyawa yomahinganono manga popangaoika, Masara moioo de ko iwa de ma buturungu hoka Ngonali. Mangale ma titi Ngona Ma Jou o Yawe, Ngona duru notebi-tebini ho ka Ngonahi nokokurutiye, De ani dararono ihohailoaholi to Ngona ani gogeroka. Ho mia higiriiri Ngonaika mata-mata mia hawanoka de aino, Ngona nomihiheranga abe notobadiai o heheranga ma amoko.

¹² Ka de ani niraka nagoraka de natumutu ani musuika, De abeika o dunia naa alahiroka ho ona ko yaiwaka.”

¹³ “De to Ngona ani dora ngomino duru ko itoa-toakua, De ngomino itagi ani dora hiadono nomibanguokau, De to Ngona ani buturungu nomihihira-hira ngomi naa, Ka hiadono mimahiadonika ani ngi ma debi-debinoka.

¹⁴ O nyawa ahao yaade-ade abe o heheranga nodiaioka, Hiadono o nyawa manga dutu mata-mataika ahao yoihene, Ka de yoihene gea Ngona nodiaioka de ona yofafara, Ho yalufungoka o hawana ma dorou o Filistina ma nyawaoo.

¹⁵ De abeika o Edomo ma nyawa manga dimo-dimono, Onangoo ma yatomomonoka ma titi gea Ngona nodiai, De yahidulufungoka o hawana o Moaba manga dimo-dimono, Ka de miboa manga tonakika de duru yofafara onangoo. Hokogea o Kanani ma nyawa manga buturungu ihihangoka.

¹⁶ De o hawana de o mobole Ngona nadiodaka onanguku, Ho duru ko yomasikaakaua to Ngona ani himangoka, Ani kuaha ma buturungu abe duru yahihawana ona gea, Ho abeika Ngona nodiai Ma Jou o Yawe la nahihawana, Ona yorii-riidoka dika abe hoka o hakaru manga miriidi, Ho ko yokelu-kelua ka hiadono miatilakuru manga himangino, Hokogea ngomi ani nyawa nomiduhunu abe nomibanguokau.

¹⁷ Ngona ma hirete ani nyawa nahingohama manga tonakika, De genangoka Ngona nadatomuku, ani behehongo ma tonakoka gea, Ngona Ma Jou o Yawe ona nahigogere to ngona ani lokuoka, Angamoi ma ngi gea nairikoka la idadi to Ngona ani tau. Ngona Ma Jou o Yawe nodiai la ani ngi gea nomadingakokau,

¹⁸ De ka hiado-adonika ani nyawa nahikoano Ma Jou o Yawe!” Hokogea o Isiraele ma nyawa manga higiriiri ma nyanyianga.

O ngo Miriama mahihira-hira o ngo-ngofeka yoselo de iwihigiriiri Ma Jouika

¹⁹ Ma oraha o Firaunu ai kuda, de ai goroba parangi, de ai tentara abe yotobafarene o kudauku yokokiwohama o gahioko, de Ma Jou o Yawe ma gahi wohikahumoli la ona yahidatamunu ka ma moi de ma gahi gea. Masara o Isiraele ma nyawa o gahioko yowohamoko de yaniiki ma dudungika dika.

²⁰ Ho ka de yamake gea Ma Jou wodiaioka de o Harunu de o Musa manga biranga idodutu o ngo Miriama munangoo mihigiriiri Ma Jouika abe Una womihiakunu la muna modadi ai uru ma dodofanga. De manga gogereenge o ngo Miriama magoraka de momulaenge mohiboha-boha ami giamika de mahihira-hira o ngo-ngofeka de manga sanangi ihiboha-boha manga gogereenge de ihiselo-selo la iwihigiriiri Ma Jouika.

²¹ De o ngo Miriama monyanyi manga nyanyianga naa: “Ngohi naa tonyanyi - tihigiriiri Ma Jou o Yaweiye, Duru wokokurutiye ho ka Unangohi duru tigorakiye. O kuda de ona o kudaka yokokifarenuku, Ka ma moi Ma Jou wahidotumoka o gahioko.”

O akere ma romanga o Mali Ma Jou wodiai la imutiti

²² De ahao o Isiraele ma nyawa o Bongo-bongo ma gahi yoporete de o Musa wahihira-hira o Siuru ma dolaika. De manga wange hange yotagi o tonaka ma kakaahaka gea de o akere ko amakeua.

²³ De gea yomahiadonika o ngi moi ma romanga o Mali abe genangoka naga o akere ibubungiye masara duru kohamali ma akere hiadono ngaro manga ngomaha yodudungoka masara ko idadiua o akere gea yaokere angamoi kohamali. De gea ma titi hiadono nako to ona manga demo o akere gea ihiromanga, “o Mara” angamoi gea ma titi imali.

²⁴ De ahao o Isiraele ma nyawa gea duru yohuha hiadono duru iwihigurubungu o Musaika ato, “Ho naa done ngone ka o kia haokere?”

²⁵ Ho o Musa duru Ma Jou o Yaweiye wagahoko o duduhunu de gea Ma Jou o Yawe wihimatoko o Musaika o gota moi ma jaga abe ka idadi ena gea wapake ho wagorakino de wohitibako o akeruku de itodokanino o akere gea idadioka imutiti ho ka idadi yaokere. De genangoka Ma Jou o Yawe wahidoaka onangika o hitiari moi abe ka idadi wapake la wataili manga magawe Unangika.

²⁶ Abe ai demo onangika wato, “Ngini nako nihiao irahai de nihidodiai nihihigihene Ngohi Ma Jou o Yawe, ti ngini nia Jou, de Ngohi tiniduhunu. Abe nako nianiiki itiai ahi hiaturu de ahi pareta mata-mata de Ngohi ahao ko tinihikangelaua de o popanyake abe hoka ma dihiraino de tahihohowono o Mesiiri ma nyawaika. Ngohi naa Ma Jou o Yawe abe ahi kuaha naga o popanyakeika hiadono Ngohi ka idadi tiniduhunu.” Hokogea Ma Jou wahitiari o Isiraele ma nyawaika.

²⁷ De o Malioka de aino yosobo de ahao yoboa o ngi moioli ma romanga o Elimi. De genangoka naga ipooteke o akere ma lako ngimoi de hinooto de nagali o biso o lifunu moritumidi iwango genangoka ho ona yomahiaini de manga tau o ngoerino ihigoko o akere gea ma datekoka.