Huhupu 14 - Ma Jou ai Demo-demo o Totobelohoka

¹ De o Isiraele ma nyawa yomahidodogumu o Etamokahi de Ma Jou o Yawe ai hiaturu wihingahu o Musaika wato,

² “Musa, nahingahu o Isiraele ma nyawaika nato kiani yoiki la yomahirehene ma ngiika ma romanga o Pihahiro abe imakadateke de o Migidolo ma ngi. De ahao o Migidolo ma daanoko genangoka yomahidodogumohi abe o Bongo-bongo ma gahi de o Migidolo ma hidogoronaka. De doka o gahi ma honongaka naga moi ma ngi ma romanga o Baala Sefono genangoka.

³ Ka de o Firaunu winihioriki abe ngini naga o Migidolo de o gahi ma hidogoronaka de una ahao wafikiri wato bote ngini o Isiraele ma nyawa ka niahowono ma ngekomo. De ngini nia ngekomo utuika ko iwa angamoi naga o gahi nia himangoka de o tonaka ma kakaahaka nia poretoka.

⁴ De Ngohi ahao ma moioli o Firaunu ai hininga tohitogowinoli hiadono ahao ngini winihiduru. Hokogea Ngohi todiai la gea ahao abe o nyawa ihigorakiye Ngohi naa de manga horomati Ngohino. De manga horomati ihititi de gea Ngohi todiai ma oraha tomahimatoko o Firaunika de ai tentaraika to Ngohi ahi kuaha. Gea todiai ibooto de o Mesiiri ma nyawa duru ihihoromati Ngohi Ma Jou o Yawe.” Hokogea Ma Jou womahingahu o Isiraele ma nyawaika ho ahao ona yomahirehene la yomahidodogumu o Bongo-bongo ma gahi ma datekoka abe duru yaniiki Ma Jou ai behehongo gea.

O Firaunu de ai tentara ato kiani o Isiraele ma nyawa yahigilio

⁵ De ahao naga o nyawa iwihingahuika o Mesiiri manga koanoika abe itararono o Isiraele ma nyawa yokokiloikoka de ko yoliokaua o Mesiirino. Ho igoungu, ka de hokogea o Firaunu de ai popareta ma nyawa yoihene o abari gea de ona yomakokitoduba, ho yomakoketemo ato, “Ho naa done sarakia hiadono ngone hahigunoa o Isiraele ma nyawa yokokihupuoka nenangino ho hiadono nanga gogilaongo ko yakokiiwaka ngoneoka.” Hokogea o Firaunu de ai nyawa manga hininga ma toduba ma demo.

⁶ Ho gea o Firaunu wahuloko la to una ai goroba parangi iwihidiai de kiani ai tentaraoo iwiniiki la o Isiraele ma nyawa yahiduru la wato wahigilio.

⁷ Ho ai tentara yotobaao-ao manga goroba parangi abe yatauru de o kuda onangoo wapake hiadono ma goroba parangi o ratuhu butaanga ma ngoe yairiki abe duru de ma buturungoka. De o goroba parangi utu abe naga o Mesiiri ma tonaka ma amokika enangoo ma, wakokiaoka o Firaunu gea. De nagaoo o tentara manga hidimono o regu homoi-homoiino.

⁸ Hokogea Ma Jou o Yawe wohitogowinoli o Firaunu ai hininga hiadono ai hininga waturuuruoli de itaiti waniiki la wato wadaene o Isiraele ma nyawa abe yohupuoka yotagi-tagi duru de manga domoroinoka.

⁹ Ho o Firaunu waputuhoka la ai tentara manga buturungu wapake ho wao ai goroba parangi atauru o kuda gea, de ai kuda utu de o nyawa yobarenuku ma poretoka, de ai tentara utu yalou-lou, gea ona mata-mata iwiniiki manga koano la yahiduru o Isiraele ma nyawa. De yadaene manga dodogumu ma ngioka o gahi ma datekoka yomahitigika o Pihahiroka abe o gahi yohimanga de doka o gahi ma honongaka naga o Baala Sefono ma ngi.

¹⁰ De ahao o Firaunu de ai tentara gea yomahitigioka o Isiraele ma nyawaika. Ho o Isiraele ma nyawa ka de yamake yoboaino de ona duru yohawanoka. De yomulaengoka ihiboa-boaka yomagaho-gahoko o duduhunu Ma Jou o Yaweino.

¹¹ De yomulaengoo iwingamo o Musaika ho de manga gurubungu ma demo o Musaika ato, “Naa ngona ma titi hiadono ngomi miboditoka! Ho, o kia ma titi hiadono ngona nomiao nenangoka? Marai nato bote ko imiwedonua o lungunu ma ngi o Mesiiroka? De nomiribuutu misobo ma titi o kia?

¹² Ho sarakia Musa, gea ngone o Mesiirokahi de ko minihingahuahi abe ahao idadi hokonaa? Koua, gea minihingahuoka! Ngomi miato, ‘Musa, nolioka dika nominoaika nenangoka.’ De hokogea mitemo angamoi ngaro miwango ka o Mesiiri ma nyawa manga huhuloko dika ma ka enangohi irahai la ufa hokokihonenge o tonaka ma kakaahaka naa!” Hokogea manga ngamo o Musaika.

¹³ Masara o Musa woigo wahiriidi wato, “Ngini nimariidoka dika! Ngaro ufa dika de ngini nihawana, nia hininga niabitu-bitumu dika Ma Jou o Yaweika. Ngini duru o wange naa ahao de nia lako niamake ai duduhunu itagi ngoneino! O Mesiiri ma nyawa gea ko wahigunoaua la ona inahikokibinaaha! De ona naa niamake yoboaino ka o wange naa dika de ahao ko niamakeokauali ka hiado-adonika.

¹⁴ Ma Jou o Yawe Una dika waparangi onangika de ngini ko idadiua nimaduhunu ho ngini nimarii-riidoka dika.” Hokogea o Musa wahiriidi.

O gahi Ma Jou wohiregu la o Isiraele ma nyawa yomahihora ma dudungoka

¹⁵ De ahao Ma Jou wihingahu o Musaika wato, “Musa, ngaro ufa nomagahoko Ngohino o duduhunu, nahuloko dika la o Isiraele ma nyawa yoaguru dika manga himangika.

¹⁶ De naa ani tutukunu nohidoakiye de nohitumutu o gahioko de o gahi ahao iregu ka hiadono ma hidogoronaika gea naga ma dudungu la genangika ngini nianiiki hiadono nimahihora doka ma honongaika.

¹⁷ De ahao Ngohi todiai la manga hiningaka tohitogowini o Mesiiri ma nyawa hiadono duru iniribuutu ininii-niiki ngini o Isiraele ma nyawaika. De Ngohi ahao tahimatoko onangika ahi buturungu. De mata-mata Ngohi todiai o Firaunika de ai tentaraika abe manga goroba parangi yotobaao o nyawa utu ahao yahiade-ade. De hiadono gea abe todiai nia musuika ahao idadi ma titi hiadono o nyawa ko manga ngoe ahao manga heranga de manga horomati Ngohino itagi.

¹⁸ De gea idadiokau o Firaunika de ai tentaraikaoo abe ka ma moi de manga kuda tahikalaka de ahao o Mesiiri ma nyawa mata-mataika duru ihihioriki abe Ngohiohi toputurungu Ngohi Ma Jou o Yawe.” Hokogea Ma Jou wihingahu o Musaika.

¹⁹ De Ma Jou ai malaekata abe ma oraha yotagi de una biaha naga manga himangoka wahihira-hira masara ahao naa ma malaekata gea womahiwalimi manga poretoko la womanoa o Isiraele ma nyawa manga doomu ma poretoka. De o lobi ma louoli enangoo imahiwalimi manga poretoko ka ma moi de Ma Jou ai malaekata gea.

²⁰ Ho o lobi ma lou gea naga o Isiraele ma nyawa de o Mesiiri ma nyawa manga hidogoronaka de o futu moiino genangokali igogere ka hiadono yahidetebiniye. De o lobi ma lou ma hononga gea abe idateke o Mesiiri ma nyawaika duru yadofufutuoka, masara o lobi ma lou ma hononga idateke o Isiraele ma nyawaika ena gea ma dodararono. Ho gea ko idadiokaua o Firaunu de ai tentara yomahitigi o Isiraele ma nyawaika de o Isiraele ma nyawa ko idadiua yolio manga poretika.

²¹ De o futu gea ka de o Musa ai giama wohidoakiye de wohitumutu o gahioko de Ma Jou o Yawe wohiboa o hidaloko abe kohabuturungu italoko o wange ma hiwariha hiadono ma gahi yahuhuru hiadono itaanga ka hiadono doka ma honongaika de ma hidogoronaka idadi o tonaka ma duu-dudungu. Hokogea o futu moiino italoko ka hiadono ihidetebiniye ho de ma dawangeino de ma gahi ireguoka.

²² De igoungu naga ma dodunguu hiadono naga o Isiraele ma nyawa manga ngekomo o gahi ma goronaika de gea ena yapake la yomahihora doka ma honongaika. De gea manga arihononga ma gahi idadioka hoka o dadaduhu.

O Mesiiroka manga tentara Ma Jou wahidulutu ka ma moi

²³ Ho ka de o Firaunu ai tentara yamake o Isiraele ma nyawa yoaroka de yahiduruoli ho onangoo yaniiki o ngekomo o gahi ma goronaika. De o tentara gea yotobaao-ao manga goroba parangi abe atauru o kuda de utu yofarene o kudauku, ona mata-mata ka ma moi gea yokokiwohama o gahi ma goronaika.

²⁴ De Ma Jou o Yawe naga ona wagoana o lobi ma lou ma hidogoronaka de itigi-tigi itebini womalega wakauku de o Mesiiri ma nyawa ka yakiniikohi ho wahikapusaka.

²⁵ Ho wodiai la manga goroba wohihodoa hiadono ma bola iloliti ibole-boleoka hiadono utu ma kuda ko akunokaua manga goroba yatauru ho hiadono yokangela yogila-gila yakiniiki. De manga kangela ma goronaka de o Mesiiri ma nyawa duru yohawana ato, “Ei, kiani hoara dika! Naa Ma Jou o Yawe wonaparangi ngoneino de o Isiraele ma nyawa waduhunu ho kiani ngone hoara.” Hokogea manga hawana ma demo abe Ma Jou wahikapusakoka.

²⁶ De ahao Ma Jou wihibehehongoli o Musaika wato, “Musa, naa ani giama nohidoakiye nohitumutoli ma gahika gea la ma gahi imakahumoli. Hokogea nodiai la yakokilutu o Mesiiri ma nyawa manga tentara naa ininiiki. De ona manga goroba parangioka de abe yokokifarene manga kudauku ona mata-mata tahikokilutu.”

²⁷ Ho o Musa ai giama wagorakiye de wohitumutu o gahika de ka de o wange ipotokaiha de ma gahi imulaenge imaketegilio la imakahumoli hoka ihira-hirali. De ngaro o Mesiiri ma nyawa o ngekomo ma goronaka, ona gea ihitaili yoara masara Ma Jou o Yawe wodiai la ona yahihahuru dau ma ohuoko.

²⁸ De ma gahi yatamunoka hiadono yafuludi de yahibuaeliye ka manga honenge dika. Ho o Firaunu ai tentara mata-mata gea abe yakiniiki yokokihonengoka ngaro o goroba parangioka de ngaro manga kudaka ma, Ma Jou wamataka.

²⁹ Hokogea o Isiraele ma nyawa Ma Jou waduhunu manga ngekomo waadiai doka ma honongaika la gea ka idadi genangika yaniiki. De ngaro o gahi ma goronaika yomahihora ma gea o dudungu dika yaniiki ka hiadono yomahihora doka ma honongaika. Hokogea o gahi iregu ho idadi hoka o dadaduhu manga arihonongaka.

³⁰ De ma wange gea ma baha o Mesiiri ma nyawa yahipareta o Isiraele ma nyawaika angamoi genangoka Ma Jou o Yawe wahipipidili manga kuahaino. De o Isiraele ma nyawa yakokimake o Mesiiri ma nyawa manga honenge yotuu-tutukiha o gahi ma ngigorino.

³¹ Hokogea Ma Jou o Yawe womahimatoko de ai buturungu o Mesiiri ma nyawaika. De o Isiraele ma nyawa ka de yamake gea wodiai de duru yoherangaholi hiadono ona de manga horomati de ma hawanoka Ma Jou o Yaweika. Ho genangoka manga ngongaku ihititi iputurungu Ma Jou o Yaweika de ai gilaongo o Musaika, unangikaoo ma, ka iwingaku.