Huhupu 13 - Ma Jou ai Demo-demo o Totobelohoka

Ma titi o Roti ko Iwa ma Ragi ma rame-rame

¹ De Ma Jou o Yawe wahibehehongo ma moioli o Isiraele ma nyawaika abe wihingahu o Musaika wato,

² “Ngini o Isiraele ma nyawa nia ngofaka o domoro o nau-nauru kiani niatingakino Ngohino. Naa, ti ngini nia domoro gea tomahitongohi ngaro o nyawaino eko nia aewanino masara manga wowango mata-mataika tomadingakoka Ngohino.” Hokogea Ma Jou ai behehongo onangika.

³ De Ma Jou ai behehongo utuohi naga abe kiani o Musa wahingahu o Isiraele ma nyawaika, wato, “Ngone hohininga o wange naa la duru o tao-taongiye nako o wange naa adonokali gea idadi o hohininga ma wange hiadono nanga totoforauku. Naa o huhupu ma wange abe Ma Jou o Yawe winihikokihupu ti ngini nia kangelaino ma titi o nyawa gea inipake hoka o aewani inihikarajaanga. De Ma Jou o Yawe winihiluasa de ai kuaha ma buturungu de gea ngini ahao nihitunguu de o roti ko iwa ma ragi abe kiani nimahibohono o ragika nia rame-rameoka. De gea ma titi hiadono ngaro o inomo o kia dika abe ihisapuroka de o ragi ko idadiua niaolomo o hohininga ma wangeoka.

⁴ De angamoi o wange naa adaene ma tanggala abe ngini nikokisobo nihupu o Mesiiri ma tonakino ho ka ihikaika idadi o hohininga ma wange nginioka. De angamoi o mede naa ma romanga o Abibi ho o tao-taongiye ka de o mede o Abibi adonokali de ma wange adono ma ngimoi de ma iata de nihiromanga o huhupu ma wange la gea idadi ti ngini nia hohininga ma wange.

⁵ Ho o wange naa, abe nisobo niloiki o hibehehongo ma tonakika, ahao ma oraha ngini nigogere genangoka de o wange naa kiani ka ihikaika nihirame-rame duru o mede o Abiboka. Abe ma oraha Ma Jou o Yawe winiao o Kanani ma tonakika de winihigogere o hibehehongo ma tonakoka abe duru de ma hasiloka hiadono o inomo ma rorahai ma ngoe. De gea idadi imaketero hoka wahibehehongokau nia toforaika. Ho gea idadi ti ngini nia tonaka ngaro ma oraha naa genangoka yonyawaika o Kanani ma nyawa, de o Hete ma nyawa, de o Amori ma nyawa, de o Hewi ma nyawa, de o Yebusi ma nyawa, gea ona yogogerika ma tonakoka gea.

⁶ De nia hohininga gea nihirame-rame ka hiadono o wange tumidino ma dekana abe nia roti ko idadiuahi niaolomo de ma ragioka. De ahao o wange ma tumidoka duru nirame-rame de nia inomo ilamoko abe o rame-rame ma wange ma baha gea duru nimatingaka Ma Jou o Yaweino.

⁷ Ho o wange tumidino ma dekana kiani ti ngini nia tau homoi-homoiika niakokitebini ka hiadono o ragi o mui moioo de ko iwa nia tau ma goronaka. De ma hiaturu gea nianiiki hiadono duru ko iwaka o ragi ti ngini nia tonaka mata-mataika.”

⁸ De o Musa wahitararonohi o Isiraele ma nyawaika wato, “De o wange gea kiani ngini niade-ade nia ngofa-ngofakika abe nia rame-rame ma titi. Ho niade-ade homoi-homoiika nia ngofakika niato, ‘Ahi ngofaka nototoihene abe ma titi hohirame-rame o hohininga ma wange naa angamoi duru o wange naa adaene ma oraha Ma Jou o Yawe ngohioo wohiduhunokau. Gea tomahihohininga to ngohioo ahi duduhunu abe nako ngone o Isiraele ma nyawa Ma Jou ko wonahihupua o Mesiirino tanu ngohioo o huhuloko ma nyawa dika.’ Hokogea niade-ade nia ngofa-ngofakika.

⁹ O Roti ko Iwa ma Ragi ma rame-rame o hohininga ngoneika abe o tao-taongiye ka de ma oraha adono nanga rame-rame gea de ngone o Isiraele ma nyawa kiani hohininga ma titi. Abe o hohininga gea ka idadi hohiketero de o dodunguu o ukuino nanga badangoka abe ka de holega nanga bokekika gea de hohininga ma titi. Ho Ma Jou o Yawe wapake nanga rame-rame naa la o tao-taongiye ngini mata-mata niohininga ai behehongo nginika abe kiani nianiiki de nihingounu enangika. Ho ma titi gea niohininga de nimaketeade-ade ma oraha nihirame-rame, angamoi Ma Jou o Yawe winihiluasa de ai kuaha ma buturungu ka hiadono idadi naa winihihupu o Mesiiri ma tonakino.

¹⁰ Ho duru o tao-taongiye ngini kiani nihirame-rame o Roti ko Iwa ma Ragi ma rame-rame.” Hokogea o Musa wahitararono o Isiraele ma nyawaika.

Ma Jou wato manga domoro kiani yadingakoka Unangika

¹¹ De ahao o Musa wahitararono onangika Ma Jou ai mau manga domorika. Una wotemo wato, “De Ma Jou o Yawe winiao o Kanani ma nyawa manga tonakika de winihigogere o hibehehongo ma tonakoka gea abe wahibehehongokau nia totoforaika ho hiadono idadi ti nginioo nia behehongo.

¹² Ho ma oraha nginioli nigogere genangoka de kiani ka ihikaika nia domoro o nau-nauru niwidingakika Ma Jou o Yaweika. De nia aewani o dofo ma ngofaka ma nauru abe o domoro enangoo Ma Jou womahitouna ho ko idadiua ngini nimadumungu la niapake.

¹³ O duduonino ma aewani ma domoro nimahihuba Ma Jouika la nihitunguu ena gea to Ma Jou. Masara nako nia keledai ma ngofaka ma domoro ma tomara dika niatobiki la nihitunguu niahidoaka Unangika. Ma nako niato niapake nia keledai ma domoro gea kiani nimabanguokahi de nia domba ma ngofaka abe nimahihuba Ma Jouika de hokogea nia keledai gea idadiokali to ngona.” “De ti ngini nia ngofa-ngofaka o domoro Ngohi Ma Jou tomahitongohioka ho kiani onangoo niabangu.

¹⁴ De ika-ika nia ngofa-ngofaka ahao inileha o domoro manga bobangu o huhuba ma awunino hiadono yotemo ato, ‘O kia ma titi hiadono ngomi o ngofaka o domoro kiani nimibangu?’ Ho ngini manga babali manga leleha gea niapaluhu niato, ‘Ma dodihiraka ngone o Isiraele ma nyawa hogogere ma dekana o Mesiiri ma tonakoka abe genangoka ona inahidadi manga huhuloko de inahikarajaanga hoka o aewani. De ahao Ma Jou o Yawe de ai kuaha ma buturungu wato wonahiluasa nanga kangelaino.

¹⁵ Masara o Mesiiroka manga koano o Firaunu duru wilawana Ma Jouika hiadono wohigali-gali woluku wato, “Ngohi ko tinihigunoaua la ngini niloiki ahi tonakino nihupu!” Hokogea manga koano ai lawana ho o Mesiiri ma nyawa manga domoro mata-mataika Ma Jou o Yawe wakokitomaka ngaro o nyawa manga domoro de ngaro manga aewani ma domoro. De gea ma ngekomo wapake la hiadono wonahiluasa nanga kangelaino o Mesiiroka. Masara to ngone nanga domoro watilakuru ho gea nanga ngofaka o domoro womahitouna de nanga aewanioo ma domoro womahitounangoka. De gea ma titi hiadono ngone o Isiraele ma nyawa homahihuba nanga aewani ma ngofaka ma domoro Unangika. De ngini abe to ngone nanga ngofaka o domoro kiani ngomi nia dimono minibangu.

¹⁶ De ngaro ufa ngini o domoro niapake o dodunguu nia badangoka la nimahitunguu gea nimatingakoka Ma Jouika angamoi ka de o domoro ma bobangu gea ngomi nia baluhu midiai de gea idadi ti ngini nia dodunguu abe minitingakoka Ma Jouika. De nia bobangu gea ka ihikaika inahihohininga gea Ma Jou o Yawe abe Una de ai kuaha ma buturungu wonahihupu o Mesiiri ma tonakino.’ Hokogea ka ihikaika niahitararono nia ngofa-ngofakika.” Hokogea o Musa ai demo onangika abe wamake Ma Jouino.

O Isiraele ma nyawa Ma Jou wahiboa o tonaka ma kakaahaika

¹⁷ De ma oraha o Firaunu wahigunoa o Isiraele ma nyawa yohupu de naga ma ngekomo hinooto abe ka idadi yaniiki. Moi ma ngekomo abe o Filistina ma nyawa manga tonakika yoboa ihidotobiki ho enangohi itigi o Kanani ma tonakika. Masara ko genangikaua yoboa angamoi Ma Jou wahiboa o ngekomo moioli abe ma dumutu o tonaka ma kakaahaika. Hokogea Ma Jou wairiki manga ngekomo angamoi womatemo wato, “Done ahao o Filistina ma nyawa gea ona duru yaparangi o Isiraele ma nyawaika naa hiadono manga hininga yaturuuru de yolio ato ko yogila-gilaua o Kananika masara yolio dika o Mesiiri ma tonakika.”

¹⁸ Hokogea Ma Jou wahioriki manga hininga ho hiadono wahirehene la yaniiki o tonaka ma kakaahaika abe wahidumutu o Bongo-bongo ma gahika. Ma Jou wohiaturu hokogea ngaro o Isiraele ma nyawa o Mesiiroka ko yosobouahi de yomahidiaioka o nyawa yaparangi nako naga yalawana manga dodagi ma goronaka.

¹⁹ De ma oraha yoiki o Musa wohiaturu la o Yusupu ai kobongo yao angamoi ma dihirainohi abe o Yusupu ko wohonenguahi de wahuloko ai gogianongoruika la ona ahao yodiai hokogea. Ho kiani iwihibehehongo unangika de o behehongo ma demo ma gou-goungu, abe to una ai kobongo yao ma oraha o Mesiirino yohupu. Ma oraha gea o Yusupu wahingahu wato, “Ma Jou ahao winiduhunu ngini la winihigogere o Kanani ma tonakoka. De ma oraha o tonaka naa nianoa kiani to ngohioo ahi kobongo niao genangika.” Hokogea o Yusupu ai behehongo hiadono ai gogianongoru abe yolape-lapeuku ko yawohangua de ai kobongo gea yaoka o Kanani ma tonakika.

²⁰ De ona yohupu o Mesiirino yotowongi hiadono o Sukoto yomahiadono. Ho ahao o Sukotoka de yosobo yogila-gila hiadono yomahidodogumu o ngi moioka ma romanga o Etama abe ena o tonaka ma kakaaha ma datekoka.

²¹ De manga dodagi ma goronaka Ma Jou o Yawe ka ihikaika naga onangoka. De Una hoka womahihawo de o lobi ma lou la gea o Isiraele ma nyawa iwihikokioriki Una gea wahihira-hira. De ngaro o wange-wange eko o futu-futu ma ona ka idadi iwinii-niiki ai poretino. De angamoi nako o futu-futu o lobi ma lou gea idadi hoka o uku ho yahitararonuku la ka idadi yomahioriki yotagi-tagi. Ho ngaro o futu-futu eko o wange-wange ma ka idadi o Isiraele ma nyawa yogila-gila.

²² De Ma Jou o Yawe ai lobi ma lou gea ko yanoa-noaua o Isiraele ma nyawa ngaro o wange-wange eko o futu-futu abe nako yofutu gea idadiokali o uku ma dararono ho ka ihikaika ka idadi ona yakokimake Ma Jou ai dodunguu gea.