Hosea 11 - Ma Jou ai Demo-demo o Totobelohoka

Ma Jou wiahoko ai Ngofaka o Mesiirino O Hitararono ma hidogo

¹ De Ma Jou wotemo wato, “O Isiraele ma nyawa ona gea Ngohi taetongo tato ona gea yomaketero hoka ahi ngofaka ma dutu. De ma dihiraino gea abe ona ko yotedekanuahi yodadi ahi nyawa de Ngohi duru tidora ahi ngofakika gea hiadono tiahoko la tihihupu o Mesiiri ma tonakino.”

11:2-9 ko atailakouahi

² “Masara ngaro ka ihikaika tahoko onangika la ihiniiki Ngohi, masara ka utuohi yorehene Ngohioka ma homoaika. Abe ona yomahihuba-huba o pangao o Baalika de manga huhuba, de o manyanyi yotobatufu-tufuku o popangao utuika.

³ De gea Ngohi ma hirete abe ma dihiraino de tadotoko o Isiraele ma nyawaika gea, abe imaketero hoka ona o ngofaka womatengo, ho Ngohi taso manga giamino de ka ihikaika tao la hiadono ka idadi ona ihioriki yotagi. De ngaro tadotoko de tapaliara hokogea masara barikua de ona ko ihihiorikua abe gea Ngohi tapaliara onangika.

⁴ Abe ka idadi tahiketero ona hoka o hapi o dutu moi. De ahi hapi gea tohidodiai tohihira-hira de o tali, de to ena ma gina tagoraka ma poretino la yamao iuwini, de hongoli Ngohi ma hirete tomaponukuku la tatoofo.

⁵ De ngaro tapaliara duru irahai onangika gea, masara ona ka yoluku dika yolio Ngohino. Ho kiani tadotoko de ma dubuho onangika. Abe ona kiani yogilio dika o Mesiiri ma tonakika! De nagali ahao idadi onangika abe o Asuru ma nyawa yahikoano onangika!

⁶ Ho ahao o dia duru itagi to ona manga kota ma gogoronaka, abe manga musu yahidorihipanga manga kota ma ngorana de hiadono ahi nyawa gea yobinaaha.

⁷ De gea ma titi o kia hiadono o bodito yadaene ahi nyawaika? Angamoi ona manga hiningaka de duru yoigo ihiporete Ngohi! De ona yotobaahoko o Baalika, masara Ngohi ahi romanga ona ko ihigorakokaua.” Hokogea Ma Jou ai dadae ma demo o Isiraele ma nyawaika.

⁸ Masara ngaro Ma Jou ai hiningaka de duru wangamo onangika, gea wohigila-gila ai demo wato, “Masara Ngohi naa done sarakia de tinihidoaka ngini la ahao inihibinaaha? Ngini naa o Isiraele ma nyawa nidadioka ahi ngofaka, ho ko idadiua tinihihononga tinihihupu ma homoaika. Duru ko tadadiua tinihohowono de o bobinaaha abe imaketero hoka ma kota hinooto gea ma dihiraino o Adima de o Seboimi. Angamoi ahi hininga aturuuruoka ma titi ahi dora ma hiokoo duru itagi nginika!

⁹ Abe ngaro ahi ngamo duru ilamoko nginika masara ko idadiuali tinihibinaaha ngini o Isiraele ma nyawa! De ahi boboha gea ko tagorakauali mangale ma titi Ngohi naa Ma Jou abe duru totebi-tebini abe tomanoa nia hidogoronaka, de Ngohi ko o nyawa biahaua! Ho naa ahi bobinaaha ka idadi tatumungu dika la ufa itagi nginika!”