Himatoko 9 - Ma Jou ai Demo-demo o Totobelohoka

O malaekata ma motoa ai guguli wawuwu de gea ihiboa o bodito ihira-hira

¹ De gea ipaha de ahao ma malaekata ma motoa ai guguli wawuwu. De gea wawuwu ipaha de ngohi tamake o murumu moi abe ma dihiraino de iotakokau daku ma hoanoka de auku ma duniauku. De naga ihidoaka o kokusi moi ma murumika gea, de gea ma kokusi ka idadi afelenga o haara moi abe gea duru kohagurutuku ma haara.

² De ma murumu gea afelenga ma haara ma biono de gea ma nofo duru kohabirini ma haara ma bioniye ihupu, de ma nofo gea imaketero abe hoka o nyawa manga ngoe manga redi ihidutufuku ka ma moi ho ma nofo duru kohabirini. De ngaro o wange de ngaro o dihanga mata-mataika, ma mata-mata awoongoka de ma nofo gea abe o haaroka de aino ihupu, ho gea duru ifufutuoka.

³ De gea naga ihupu ma nofo ma goronaka de aino o kabotara kohangoe, de gea ikokiuti dau o dunia ma lokuku. De enangika ihidoaka ma kuaha la to ena ma biha ahao imaketero abe hoka o waitota inagoli ma biha.

⁴ De naga ma behehongo enangika ato, “Kabotara, ko idadiua ngini nihirusaka o ruruubu eko o gota eko ma bihi-bihi o kia dika naga iwangoiye o duniaka, masara nako o nyawa onagona dika abe ona ko iwa Ma Jou ai dodunguu manga pea ma nyore-nyoreoko, onangika gea ngini ka idadi niaruwae.

⁵ Masara gea ufa niahohonenge onangika, ma ngini niahikokangela dika abe o mede motoa ma dekanino.” Hokogea ihibehehongo ma kabotarika gea. De gea nako yagoli o nyawaika, gea ma biha duru ibihaholi abe imaketero hoka o waitota duru kohabiha inagoli ma mibiha.

⁶ De ma oraha gea o nyawa manga badanga ma odiri duru kohagiria hiadono yoigo ato yohonenge dika ma ko yohonengua. De ngaro manga hiningaka ato yosanangi manga bobaha adonoka, masara gea manga bobaha ko amakeuahi.

⁷ De ma kabotara gea ma rupa ngade-ngade hoka o kuda ma rupa abe ihidiaioka la o parangi ma goronaka yapake. De gea ma kabotara homoi-homoiika ma peauku naga hoka o koano ma sapeo o gurasino, de nako to ena ma himanga gea hoka o nyawali manga himanga.

⁸ De nako to ena ma tadauru gea hoka o ngo-ngofeka manga tadauru, de abe nako ma ingiri gea hoka o singa ma ingiroli, abe gea ma ago-agomo de kohamomodolomo.

⁹ De nako to ena ma aluino naga atatokino hoka o alu ma dadatoko o behino. De abe nako ma gafuufu ma koroongo, gea duru ilamokiye abe ngade-ngade hoka o duduono moi de imapopaata ma koroongo.

¹⁰ De nako gea ma bikini, gea duru imaketero hoka o waitota ma bikini, de ma bikinoka gea naga de ma hiakunoka la yahikokangela de yahiodiri o nyawaika abe o mede motoa ma dekanino.

¹¹ De ma kabotara gea naga to ena ma koano moi, de ma koano gea enangoo o haara ma malaekata angamoi ena gea abe ihikoano mata-mata o haara ma goronaka. De nako o Yahudioka manga demo gea ma koano ma romanga o Abadono, de nako o Yunanioka manga demo gea ma romanga o Apoliono, abe ma romanga gea ma titi o Bobinaaha.

¹² De gea ibooto ma bodito ihira-hira. Masara abeika naga ma bodito hinootohi naga iboaino!

O Yohanese wamake abe o malaekata ma butaanga ai guguli wawuwu de gea ihiboa o bodito ma hinooto

¹³ De gea ipaha de ahao ma malaekata ma butaanga ai guguli wawuwu, de ahao ngohi toihene o ilingi moi itemo. De ma ilingi gea iboa o huhuba ma ngi ma tataduku iatino abe aribarenino. De gea ma huhuba ma ngi abe o gurasino yodiai de imanoa Ma Jou ai himangoka.

¹⁴ De ma ilingi gea iwihibehehongo ma malaekata ma butaangika gea abe naga de ai gugulioka wasoino. De gea iwihibehehongo ato, “Noiki nahihoheoka o malaekata iata gea abe ma dihirainohi ena yahidapakitoka o akere ma amokoka abe gea ma romanga o Efaraata ma akere!”

¹⁵ De gea ahao ma malaekata ma butaanga gea woiki de ma malaekata iata gea wahihohe ma papakitino. Angamoi ma dodihiraka de ihiaturokau la kiani yahidapakitokahi hiadono ma taongo ingodumu abe ma dodihirainohi de yogetongoka, de ngaro ma medeoo, de ma wangeoo, de ma takoroo, ma mata-mata gea enangoo kiani ingodumu ma oraha abe ma dodihirainohi de yogetongoka la ato ahao ka idadi yahohonenge o nyawa ko manga ngoe. De naa yahihohe de gea yahibinaaha o nyawa ko manga ngoe, abe nako o duniaka ma nyawa haregu hange, gea ma regu moi ena yahohonenge.

¹⁶ De naga to ena ma tentara abe o kudaka yoboribarenuku, de toihene abe ma tentara gea manga ngoe yajuta o ratuhu hinooto.

¹⁷ De hokonaa abe ngohi tamake ma himatoko ma goronaka abe ma titi ma kuda gea ma rupa de abe yobare-barenuku ma rupa. De ma tentara abe yobare-barenuku naga ma alu ma dadatoko homoi-homoiika abe ma rupa naga ma doka-dokara hoka o uku ma dokara, de nagali ma bihi-bihi hoka o dihanga ma mibihi, de nagali ma gogurati abe hoka o uba ma mugurati. De nako ma kuda, to ena ma pea ma rupa hoka o singa ma pea ma rupa, de ma uruoka de aino naga ihupu o uku de ma nofo de o uba ma nofo.

¹⁸ De mangale ma titi ma uku de ma nofo de ma uba ma nofo gea abe ihupu ma kuda ma uruoka de aino, ma hohowono ma gahumu hange gea ma titi hiadono o duniaka ma nyawa mata-mata nako yaregu hange, de ona o regu moi yokokihonengoka ma titi gea ma hohowonino.

¹⁹ De ma kuda gea igoungu ma uruoka naga ma hiakunu la o nyawaika ka idadi yahohonenge. Masara hokogenangoo ma hiakunu naga ma kuda ma bikinoka, angamoi ma bikini gea ma rupa hoka o dodiha ma rupa abe de ma peaka la ka idadi yatuduku de yahikokangela o nyawaika.

²⁰ Masara ngaro o duniaka ma nyawa ko manga ngoe yohonenge ma titi ma hohowono gea ena, masara ona abe ma hohowono gea ipaha de ona ko yohonenguahi, ona gea hadongoo de amake de manga lako gea ma hohowono masara ka yolukohi yotoba manga datoro ma dorouino. De gea ona ka yogila-gilahi yomahuba abe o toka-tokatika de o popangaoika. De manga pangao gea utu o gurasino yodiai, de utu o haakaino, de utu o tabaagaino, de utuohi o hakaruino eko o gotaino yodiai. De ngaro ma pangao gea mata-mataika, masara ko iwa moi de ma kuahaka la imahioriki eko iihene eko itagi, de ngaro hokogea masara o nyawa gea ko yanoaua manga pangao.

²¹ De hokogenangoo ona gea ko yotobaua manga doma-domaino eko manga dodiaiino eko manga dohi-dohikino, de ngaro abe ma titi manga howono manga badangoka, ma enangoo ko yotobaua genangino, masara gea mata-mata yogila-gila dika yotobadiai.