Himatoko 8 - Ma Jou ai Demo-demo o Totobelohoka

O Domba ma Ngofaka wafelenga ma dabi ma guihi ma baha

¹ De gea ipaha de ahao ma Domba ma Ngofaka Una wafelenga ma buku ma lulu ma dabi ma guihi ma baha abe ma guihi tumidino gea. De gea wafelengaka de ma ilingi mata-mata o Horogaka duru irii-riidoka dika, de duru ko kia-kiaua ma ilingi abe o jam ma honongaino ma dekana.

² De ngohi tamake naga o malaekata tumidi abe yomaokoino Ma Jou ai himangoka, de naga yahidoaka o malaekata amomoiika o guguli tumidi.

³ De ahao o malaekata womatengoli woboa de womaokoino ma huhuba ma ngi ma himangoka, abe ma huhuba ma ngi gea o gurasino yodiai de imanoa to Una ai kadera ma hohailoa ma himangoka. De nako Ma Jou ai nyawa abe o duniakahi yomaniata, to ona manga niniata gea imaketero hoka o huhuba Ma Jouiye abe yomahihuba o huhuba ma ngioka, de manga niniata gea iwihisanangi Ma Jouika. Ho ma malaekata gea abe woboa de womaokoino genangoka, naga wasoino ai giamoka o ngi moi o gurasino, abe gea ma goronaka yatobatufu-tufuku o manyanyi. De ahao iwihidoaka ma malaekatika o manyanyi duru ma amoko la gea watufuku de wohidogo abe Ma Jou ai nyawa mata-mata manga niniatika abe enangoo ihihuba Ma Jouika. Ho ma manyanyi gea wohidogo manga niniatika abe ma oraha wohihuba gea o huhuba ma ngioka.

⁴ De gea ma manyanyi ma nofo imakasapuru de Ma Jou ai nyawa manga niniata, ho gea ka ma moi idoa ma huhuba ma ngioka de aiye. De ma nofo gea idoa daku Ma Jou ai himangiye de hiadono gea duru iwihisanangi Unangika.

⁵ De gea ipaha de ahao ma malaekata gea wale o ngaboho o huhuba ma ngioka de wohiomanga ma ngi gea abe de ma manyanyioka abe naga ai giamoka. Ho gea ma ngi aomangoka de ahao una waumo dau o duniauku. De gea ka de waumo de ahao naga o kuruuhu ma ilingi, de naga o leletongo, de naga ma tonaka ihikelu-kelu.

O momalaekata yawuwu manga guguli

⁶ De gea ipaha de ahao ma malaekata tumidi abe de manga guguli amomoioka, ona gea yomahidiai la manga guguli yawuwu.

⁷ De ma malaekata wohira-hira ai guguli wawuwu, de ahao naga o es ma awana ma dodogowini abe ipuraraha dau ma duniauku hoka o awana koharikimi. De nagali o uku abe imakasapuroka de o awunu, de enangoo ipuraraha dau ma duniauku. De gea nako o dunia naa haregu hange, gea ma regu moi youku hiadono ma regu gea ma gota-gota de ma ruruubu mata-mata akokitinoka.

⁸ De ipaha de ahao ma malaekata ma hinooto ai guguli wawuwu, de naga moi ma rupa hoka o loku kohaamoko abe itoka-tokara, de gea aumoka o gahiuku. De gea o gahi ma hononga idadioka o awunu. Abe gea nako o gahi mata-mataika o dunia ma amokika de haregu hange, gea ma regu moi idadi o awunu.

⁹ De abe o gahi ma goronaka, nako ma nawoko de ma aewani utuoli abe de ma wowangoka de gea mata-mata haregu hange, gea ma regu moi ikokihonengoka. De ngaro o nyawa manga kapa mata-mata o gahioka, ma nako gea mata-mata haregu hange, genangoo ma regu moi ikokirusakoka.

¹⁰ De gea ipaha de ahao ma malaekata ma hange wawuwu ai guguli, de wawuwu ibootino de naga moi ma rupa hoka o murumu kohaamoko, de gea itoka-tokara hoka o didaka, de ma murumu gea o dihangoka de auku iotaka dau o ake-akeruku. De nako o akere de o akere ma jobuubu mata-mata o dunia ma amokika haregu hange, gea ma regu moi ma murumu gea yakoronaka.

¹¹ De ma murumu gea ma romanga bari o Mali, de gea igoungu abe ma akere o kiaka dika akoronauku, gea ena ma akere idadioka imali, de o nyawa ko manga ngoe yohonenge ma titi ma akere ma mali gea yaokere.

¹² De ipaha de ahao ma malaekata ma iata ai guguli wawuwu, de gea o wange de o mede de o muru-murumu ihipoha de o fufutu la hiadono to ena ma dararono homoi-homoiika gea ma hononga ifufutuoka. Abe gea nako ma wange ma dararono haregu hange, gea ma regu moi ifufutuoka. Ho gea nako o wange-wangeiye ma dawange ma dekana haregu hange, de gea ma dekana ma regu moi ko ihitararonukuali, masara ifufutuoka. De hokogenangoo nako o futu-futu, abe ngaro ma mede ma dararono eko ngaro ma muru-murumu amomoiika ma dararono, masara enangoo nako to ena ma dararono haregu hange de gea ma regu amomoiika ifufutuoka. Ho gea nako o futu-futuiye ma fufutu ma dekana, abe nako gea ena haregu hange, gea ma dekana ma regu moi de o mede de o muru-murumu ko ihitararonokauali naa o duniauku, ho gea duru ifufutuholi ho idadioka o hagafutu.

¹³ De gea ipaha de ahao ngohi tomamatagaiye de o koloba moi tamake daku ma hoanino ihoho. De ma koloba gea ipoaka de ma ilingi ma amokiye ato, “O bodito! O bodito! O bodito naga iboa onanguku yogoo-gogere o duniaka, de ma bodito gea ma titi abe ma malaekata hangeokahi gea ahao manga guguli yawuwu, de naa ona yomahidiaioka la yawuwu.”