Himatoko 7 - Ma Jou ai Demo-demo o Totobelohoka

Abe ma titi hokokia o Isiraele ma nyawa utu yahitunguuoka de Ma Jou ai dodunguu la ufa ma hohowono yahidotadaene

^1-2 De gea ipaha de ahao ngohi tamake o malaekata iata abe amomoiika yomaokoino o dunia ma libuku iatoka. De ma malaekata iata gea yamakeoka manga kuaha la ka idadi yahibinaaha o dunia ma amokika ma titi o ratoino yapake, de gea ngaro o dudungoka eko o gahioka eko o akere ma ngootoka, ma mata-mataika gea ona manga kuahaka la yahibinaaha. Masara ngohi tamake abe ma oraha gea ko imulaenguahi ma hohowono ma ona yomatongohonohi ho yatumungohi ma hidaloko o dunia ma lokuoka ho ma hohutuloo de ko iwuwua ho duru iriidi. De ngaro ma koleharaiye eko ma koremiyeuku ma duru ko iwuwua, de ngaro o wange ma hiwariha eko o wange ma dumunoko ma duru ko iwa ma hidaloko, ho o gota ma hokaoo de ko ikelu-kelua. De ahao tamake o malaekata womatengoli abe o wange ma hiwaroka de waiye wodoa. De naga unangoka moi waoino abe ma dihirainohi de Ma Jou wotobawango wihidoakokau ma malaekatika. De gea abe waoino, gea ka idadi wapake la wahitunguu Ma Jou ai nyawaika de to Ma Jou ai dodunguu. De ma malaekata gea wopoaka de ai ilingi kohaamokiye abe ma malaekata iatika gea wato,

³ “Bole-boleohi ngini nihibinaaha de o hidalokino o dunia ma dudungika de o gahika de o akere ma ngootika de o fonganika. Angamoi ngomi kiani miahitunguuokahi Ma Jou ai gogilaongo abe manga pea ma nyore-nyoreoko, de gea miahitunguu ipaha de ahao ngini ka idadi nia tagongo nidiai.” Hokogea ma malaekata ai huhuloko ma demo.

⁴ De naga ihihingahu ngohino abe manga ngoe yamuruono naga abe yahitunguu onangika de Ma Jou ai dodunguu gea. De gea manga ngoe yasana o ratuhu moi de moruata de iata, de gea manga totofora yasana ngimoi de hinooto abe o Isiraele ai ngofa-ngofakino homoi-homoiino.

^5-8 Ho manga ngoe ma gegetongo hokonaa abe yahitunguu onangika. Abe o Isiraele ai ngofaka womatengo o Yehuda ai totoforaukuino, ona gea yasana ngimoi de hinooto. De abe o Isiraele ai ngofaka womatengoli o Rubene ai totoforaukuino, onangoo yasana ngimoi de hinooto. De abe o Gaada ai totoforaukuino, onangoo yasana ngimoi de hinooto. De abe o Asere ai totoforaukuino, onangoo yasana ngimoi de hinooto. De abe o Nafatali ai totoforaukuino, onangoo yasana ngimoi de hinooto. De abe o Manase ai totoforaukuino, onangoo yasana ngimoi de hinooto. De abe o Simeono ai totoforaukuino, onangoo yasana ngimoi de hinooto. De abe o Lewi ai totoforaukuino, onangoo yasana ngimoi de hinooto. De abe o Isakara ai totoforaukuino, onangoo yasana ngimoi de hinooto. De abe o Sebulono ai totoforaukuino, onangoo yasana ngimoi de hinooto. De abe o Yusupu ai totoforaukuino, onangoo yasana ngimoi de hinooto. De abe o Benyamini ai totoforaukuino, onangoo ma yasana ngimoi de hinooto manga ngoe. Ho ona o Isiraele ai totoforauku mata-mata abe yahitunguu de Ma Jou ai dodunguu manga pea ma nyore-nyoreoko, gea ona yasana o ratuhu moi de moruata de iata.

O nyawa duru ko manga ngoe iwihigiriiri Unangika ai kadera ma himangoka

⁹ De gea ipaha de ahao ma moioli ngohi tomalegaika de tamake naga o nyawa duru ko manga ngoe yomaokoino to Una ai kadera ma himangoka de o Domba ma Ngofaka Unangoo ai himangoka. De abe ona manga ngoe yamuruono gea ko hakunua haetongo angamoi duru yowoeholi. De ona gea o dunia ma amokino yokokiboa, abe naga utu o dutu amomoiino, de naga utu o bahasa amomoiino, de ngaro o pareta amomoi manga kokawaahaino o dunia ma amokika ma naga utu genangoka de aino mata-mata. De ona gea yomahinoaukuoka de o baju ma guru-gurutuku ma gare-garehe de naga amomoiika yasoino o biso ma hoka angamoi duru yososanangi.

¹⁰ De gea ona yopoa-poakiye iwihigiriiri de manga ilingi ma amokiye ato, “Hihigiriiri Unangika ma titi abe ngone wonaduhunoka! Hihigiriiri nanga Jou wogogeruku to Una ai kadera ma hohailoaka, de ma Domba ma Ngofaka, gea duru Onangoka dika de aino ngone hamakeoka nanga duduhunu!” Hokogea ona manga ngoe-ngoe manga higiriiri ma demo.

¹¹ De ma malaekata genangoka mata-mataika naga yomaokoino yahigilolitino to Una ai kadera ma hohailoa de ma dimo-dimono gea de ma aewani ma ngango iata, ho gea mata-mata yahigilolitino ma malaekata. De gea ma malaekata mata-mataika yomamotumuku to Una ai kadera ma himangoka de yomahuba Ma Jouika ato,

¹² “Amin! Gea duru igoungu o nyawa manga higiriiri ma demo gea Unangika! To ngone nanga Jou, Una gea duru wososawaro! Una duru de ai kuahaka ma amoko de duru ko ai buturungu! Ho kiani hihigiriiri Unangika ka hiado-adonika! To Una ai romanga kiani hohilamoko! De nanga tarimakase de nanga horomati kiani Unangika dika hihidoaka naa de ka hiado-adonika! Amin!” Hokogea ma malaekata manga higiriiri ma demo Unangika.

¹³ De gea ahao naga ma dimono womatengo wohileha ngohino wato, “Ona gea de manga baju ma gare-garehoka, ona gea onagona? De o kiaino ona yoboa?”

¹⁴ De gea ngohi topaluhu tato, “Ahi dimono, ngohi ko tahiorikua, ho marai ngona nahioriki.” De ahao ma dimono gea wohihitararono ngohino wato, “Ona gea abe o kokangela duru kohagiria ma gogoronaka de aino yokokihupu. De to ona manga howo-howono akokiofioka ma titi o Domba ma Ngofaka ai awunino ho hiadono ona gea duru yotebi-tebinoka, de gea imaketero abe hoka o baju yafokaka ho duru iarehoka o baju gea.

¹⁵ De mangale ma titi ona gea duru yotebi-tebinoka ho ka idadi ona yomanoa Ma Jou ai kadera ma hohailoa ma himangoka de gea o futu de o wange ona ka ihikaika iwileleani de iwihigiriiri abe to Una ai Tauoka. De Una wogogeruku ai kaderaka, Una gea ahao ka ihikaika wapaliara onangika, angamoi Una ka ihikaika wogogere onangoka.

¹⁶ De ona gea ahao duru ko amaokaua o hafini de ko iwaka abe manga ngomaha yodudungu. De ngaro o wange ma hauku eko o kia dika naga utu abe duru kohahauku, ma gea mata-mata ona duru ko amaokaua.

¹⁷ De gea manga kangela ko iwaka angamoi ma titi o Domba ma Ngofaka abe womaokoino ma kaderaka gea, Una ma hirete ahao wodadi manga gogoana de wahihira-hira abe hoka o domba ma gogoana womatengoani wahihira-hira ai domba. De gea Una wahihira ai nyawa de wao o akere ma jobuubuika abe nako ma akere genangino yaokere de gea yamake o wowango genangino. De Ma Jou Una ahao manga koongo mata-mata abe manga lakoka de aino gea wakokiehe, angamoi genangoka de imahikaika duru ko iwaka manga kangela de manga huha.” Hokogea ai hitararono ma demo ngohino abe ma titi o nyawa ko manga ngoe gea abe naga to Una ai kadera ma hohailoaka.