Himatoko 6 - Ma Jou ai Demo-demo o Totobelohoka

O Domba ma Ngofaka wafelenga ma dabi ma guihi butaanga

¹ De gea ipaha de ngohi tamake o Domba ma Ngofaka wafelenga ma dabi ma guihi moi abe ma buku ma luluoka. De gea wafelenga de ahao ma aewani ma ngango moi abe ma aewani iatino gea itemo de ma ilingi hoka yokuruuhu, de gea itemo ato, “Nainohi!”

² De itemo ibootino de abeika naga tamake o kuda ma gare-garehe iboa. De una abe wobarenuku ma kudaka gea naga wasoino ai toimi. De ahao iwihidoaka unangika o lalaku ma hadia ma sapeo. De ma sapeo iwihidoakoka de ahao una wosoboka la waparangi ai musuika hiadono wolaku, angamoi una gea wotobalaku.

³ De gea ipaha de ahao o Domba ma Ngofaka wafelenga ma dabi ma guihi ma hinooto. Ka de wafelenga de toihene ma aewani ma ngango ma hinooto gea itemo ato, “Nainohi!”

⁴ De ka itodokanino naga o kuda moioli ihupuino, de ma kuda naa ena duru ma doka-dokara ma dutu. De una wobarenuku ma kuda gea, unangika iwihidoaka ma kuaha la ka idadi o dame wagoraka o duniaka de aino la hiadono o nyawa yomakokotoma dika. De iwihidoakoli unangika o humaranga o dopo-dopoino moi duru ma amoko.

⁵ De gea ipaha de ahao o Domba ma Ngofaka wafelenga ma dabi ma guihi ma hange, de gea toihene ma aewani ma ngango ma hange itemo ato, “Nainohi!” De tomalega genangika de abeika naga o kuda moioli, o kuda ma hengo-hengo. De una wobarenuku gea naga wasoino ai giamoka o kikilo moi ma eteteke.

⁶ De ahao ngohi toihene o ilingi moi abe ngade-ngade hoka o nyawa manga ilingi, de gea ihupu to ena ma hidogoronaka de aino abe o aewani ma ngango iata gea. De ma ilingi gea iwihuloko moi abe unangika wobarenuku o kuda ma hengo-hengo ato, “Ngona nohiaturu la ahao o gandum ma tarigu o litere moi dika de gea ma ija o nyawa manga hewa yokarajaanga o wange moi ma dekana! De kiani o boteme o litere hange dika de enangoo ma ija o nyawa manga hewa yokarajaanga o wange moi! Masara nako o saitunu ma hofoko de o angguru ma hofoko, gea ena ufa nohikuranga la ufa hiadono ihuha o nyawa yamake!”

⁷ De ma demo gea ipaha de ahao o Domba ma Ngofaka wafelenga ma dabi ma guihi ma iata, de ma oraha gea toihene o aewani ma ngango moioli abe gea ma aewani ma iata de gea itemo ato, “Nainohi!”

⁸ De ngohi tomalega genangika de abeika naga moioli o kuda, de ma kuda naa ma rupa hoka o honenge ma mugurati. De una wobarenuku ma kudaka gea, to una ai romanga o Hone-honenge. De naga womatengoli abe wihidoduruino, de una gea iwihiromanga ato Yohone-honengoka Manga Ngi. De ona yahinooto gea yamake o kuaha la ka idadi yahohonenge o nyawa ko manga ngoe. De gea manga kuaha naga yamake la ahao o nyawa utu yomakokotoma de o humaranga o dopo-dopoino, de o nyawa utuoli yohonenge ma titi o hafini, de utuoli yohonenge ma titi o panyake yadaene, de utuohi naga abe ma titi o aewani o fuhuku yatoma onangika. Masara o dunia ma nyawa ko mata-mataikaua yahohonenge. Abe nako o dunia ma nyawa mata-mataika de yaregu iata manga ngoe, gea o regu moi yodadi ona yahinooto manga kuahaka la ka idadi yahohonenge. De hokogea o dunia ma nyawa o regu moi yokokihonenge.

⁹ De gea ipaha de ahao o Domba ma Ngofaka wafelenga ma dabi ma guihi ma motoa ma bukuino, de ma oraha gea tamake o nyawa manga jiwa abe ma huhuba ma ngi ma timiuku. De gea to ona manga jiwa abe ona gea yatomaka ma titi yomahinganono Ma Jou ai Demo-demoika de abe gea ena yahingahu-ngahu de duru yahigaro o nyawa utuika la ato yangaku enangika.

¹⁰ De ona gea yopoa-poaka ma amokiye ato, “Mia Baluhu nokokurutiye, Ngona duru notebi-tebini de natobagou-goungu ani hiningaka. De naa minileha Ngonaika miato, Hokokia ma dekanohi nodamaa hiadono ahao Ngona naurusu de nahohowono ona abe o duniaka yomanoa ma titi manga datoro ngomino? De hokokia ma dekanohi la ahao Ngona nomihibalaha onangika abe imitoma hiadono mia awunu iuihi?” Hokogea to ona manga leleha ma demo Unangika.

¹¹ De yotemo ipaha de ahao yahidoaka ona homoi-homoiika o baju ma guru-gurutuku ma gare-garehe, de yahibehehongo onangika ato, “Ngini kiani ma hohutulohi nimahiaini, abe igoungu Ma Jou ahao winihibalaha, masara ma oraha ko adonuahi. Angamoi kiani hadamaa nia gogianongoru utu abe ona o dunia ma lokuokahi. De onangoo Ma Jou ai gogilaongo hoka nginioli, de ko itedekanokaua de onangoo ahao yatoma abe imaketero hoka nginioli initomaka. Masara gea ma dodihiraino Ma Jou wabatingoka abe nia gogianongoru manga ngoe yamuruono ahao ka idadi yatoma. Ho nako ahao ma batingi adonoka, gea ma oraha abe Ma Jou wahitogumu o dunia ma nyawaika, de gea ahao Una wahohowono onangika. Ho ngini naa kiani niadamaaohi nia gogianongoru hiadono ngini duru ningodu-ngodumu nia ngoe abe initomaka.” Hokogea yahibehehongo onangika.

¹² De gea ipaha de ahao ma dabi ma guihi ma butaanga o Domba ma Ngofaka wafelenga, de ma oraha wafelenga de naga idadioka o tonaka ihikelu-kelu duru kohabuturungu. De gea o wange idadi ihengoka abe imaketero hoka ma fufutu ma mehengo, de nako o mede gea idadioka ma doka-dokara hoka o awunu ma modokara.

¹³ De o muru-murumu daku ma hoanoka de auku ikokipuraraha dau ma duniauku, de gea ipuraraha imaketero hoka o gota ma hofoko ka ma gilauohi de o rato kohabuturungu awuwu ma gotaika de gea ihikelu-kelu hiadono ma hofoko ma gilau gea ipurarahuku.

¹⁴ De dakena o dihanga ena gea ka aiaho angamoi imaluluoka imaketero hoka o buku ma lulu idiai, de o duniaka o loku de o nuuhu amomoiika enangoo yahelo-heloroka ma ngiino.

¹⁵ De ma oraha gea o dunia ma nyawa mata-mataika duru iwikokimodongoka o Domba ma Ngofakika, de ngaro o dunia ma kokoano eko utu yokokurutiye manga gogere eko ngaro o tentara manga hae-haeke eko ona yokaya-kaya eko ona yopoputurungu, ma ona mata-mataika duru iwimodongo Unangika. Ho gea ngaro o nyawa manga gogilaongo eko ngaro ko o gilaongua ma nyawa, masara o dunia ma nyawa mata-mataika yoiki yomagogonohi o aru-aruku ma goronaka de o lokuhakaru ma ago-agomo ma kokitimika.

¹⁶ De gea yomagogono de ahao ona yomagaho-gahoko o loku-lokuika de o lokuhakaruika ato, “Ngini o hakaru nimahikahumoka de nimitamunu la ufa Una gea wogogeruku ai kadera ma hohailoaka ufa womimake ngomi, de ufa o Domba ma Ngofaka ai hohowono imihidotadaene,

¹⁷ angamoi naa imulaengoka ma oraha abe ona yahinooto yahipoha o duniauku naa de manga hohowono ma ngamo duru kohaamoko. De nako gea imulaengoka, mode onagona de ka yakunu yapoa manga hohowono gea?” Hokogea o nyawa gea manga hawana ma demo.