Himatoko 5 - Ma Jou ai Demo-demo o Totobelohoka

Nanga Baluhu o Domba ma Ngofaka iwihigiriiri o Horogaka

¹ De ahao nagali ngohi o Yohanese tamake de ahi lako o buku ma lulu moi, de abe Una wogogeruku ai kadera ma hohailoaka Una wasoino ma buku gea ai giama ma nirakoka. De gea ma buku ma lulu naga ma dulihi abe arihonongaino, de naga ma bukuoka ma dabi ma guihi tumidi o lilingino ihitataulika enangika la ufa o nyawa onagona dika yafelenga.

² De ahao tamake o malaekata womatengo duru de ai kuahaka abe wopoa-poaka wato, “Ka onagona naga de manga kuahaka de naga manga gogere ikurutiye Ma Jou ai himangoka la ka akunu ma guihi o lilingino gea de yafelenga? Eko ka onagona dika yororahai hiadono Ma Jou wahigunoa la gea ma buku ma lulu ahohe?” Hokogea ma malaekata woleha.

³ Masara duru ko moiua de manga kuahaka la yahohe, abe ngaro yomanoa daku o Horogaka, eko o dunia ma lokuoka naa yomanoa, eko ngaro o dunia naa ma goronaka yomanoa, ma duru ko moiua de manga kuahaka la ma buku ma lulu gea yahohe de yabasa to ena ma dulihi.

⁴ De gea ngohi duru toari-ari ma amokiye angamoi moioo de ko yamakeua o nyawa abe yororahai Ma Jou ai himangoka hiadono naga de manga kuahaka la gea ma buku yahohe de yabasa genangino.

⁵ Masara o dimono womatengo wohitemo ngohino wato, “Ibootohi noari! Angamoi abeika genangoka naga womatengo abe naga de ai kuahaka la wahohe ma buku gea. De Una gea abe duru ma dodihiraka de Ma Jou wonahibehehongoka wato ahao Una gea woboa de wonaduhunu ngone. Abe Una gea iwihiromanga o Singa abe o Yehuda ai dutuino womaboa, de gea iwihiromanga o Singa angamoi Una ma koano duru ko ai buturungu. De Una gea o Yahudi ma nyawa manga koano ma dihiraino o Dautu ai totoforauku womatengo. De gea Una wahikalaka ai musu, de naga Unangoka ai kuaha la ka idadi ma guihi tumidi gea wafelenga de ma buku gea ka idadi wahohe.” Hokogea ma dimono ai demo ngohino.

⁶ De gea ngohi tomalegaika de o Domba ma Ngofaka tamake abe imahitigika de ma kadera ma hohailoa de abe ma aewani ma ngango iatikaoo. De gea mata-mata ma dimono yamonaoko de yaiata manga hidogoronaka. De ma Domba ma Ngofaka gea tamake abe ma dihiraino ihihubaka masara naa iwangokali. De naga to ena ma tataduku tumidi de to ena ma lako enangoo tumidi. De gea ena Ma Jou o Womaha duru wongodu-ngodumu abe wihidingotoka o dunia ma amokika.

⁷ De ma Domba ma Ngofaka gea imahitigika ma kadera ma hohailoaino de yodafongo ma buku ma lulu gea abe Una wogogeruku genangoka to Una ai giama ma nirakoka de aino.

⁸ De gea ma buku ka de wodafongoka de ngaro ma aewani ma ngango iata de ngaro ma dimono yamonaoko de yaiata, ma gea mata-mataika yomamotumukuoka o Domba ma Ngofaka ma himangoka. De ona amomoiika naga yasoino moi ma rupa hoka o hitar ma eteteke, masara naa ena o hitar o fara moi. De gea ena ka yapita-pitata dika. De nagali o mangko amomoiika yaso-soino abe o mangko gea o gurasino, de gea ena ma dola o manyanyi, de ma manyanyi gea Ma Jou ai nyawa manga niniata Unangika.

⁹ De ahao ma aewani iata de ma dimono yamonaoko de yaiata ona gea yomulaenge yonyanyi o nyanyianga ma hungi abe ma Domba ma Ngofakika iwihigiriiri de gea yonyanyi ato, “To Ngona naga de ani kuahaka la ma buku ma lulu gea nodafongo de nafelenga to ena ma dabi ma guihi. De gea angamoi ma dihiraino Ngona inihihubaka la genangino nabangu o nyawa manga ngoe manga bobangu! De ma titi to Ngona ani awunino hiadono o nyawa manga ngoe yodadi to Ma Jou ai nyawa. De ona abe nabanguoka, ona gea o dutu amomoiino de o bahasa amomoiino de o pareta amomoi manga kokawaahaino, ho gea o dunia ma amokika Ngona nabangu!”

¹⁰ “De Ngona nahidadi ona to Ma Jou ai kokawaaha o doomu moi la ona ka idadi iwileleani Unangika abe hoka ma dihiraino ona o hidemo ma nyawa Ma Jouiye onangoo iwileleani Unangika! De ona gea ahao yokoano o dunia ma lokuoka.” Hokogea manga higiriiri ma demo yonyanyi Unangika.

¹¹ De ahao ma moioli tomalega genangika de naga o malaekata duru kohangoe ihigilolitino ma kadera ma hohailoa de ma aewani ma ngango de ma dimo-dimono gea. De ma malaekata manga ngoe manga juta isana ho hiadono duru ko hakunua haetongo. De gea ngohi toihene to ona manga ilingi.

¹² De ona gea manga ilingi duru yaamo-amokiye yonyanyi ato, “Hohigiriiri o Domba ma Ngofakika abe ma dihiraino ihihubaka! Duru itiai de itaana nako miahigiriiri de miahoromati enangika! Ena gea duru de ma kuahaka ma amoko de duru ko iwa ma kuranga enangoka! De duru isosawaroholi, de duru kohabuturungu! De duru itaana abe to ena ma romanga mihilamoko de miahigiriiri enangika.” De hokogea ma malaekata manga ngoe-ngoe gea manga higiriiri ma demo.

¹³ De ahao ngohi toihene o nyawa de o aewani mata-mataika o dunia ma amokika manga nyanyianga ma ilingi. De gea ngaro yomanoa daku o Horogaka eko ngaro o dunia ma lokuoka naa yomanoa eko ngaro o dunia naa ma goronaka eko ngaro imanoa o ngooto ma goronaka, masara gea ma dola mata-mataika ngohi toihene manga ilingi yonyanyi ato, “Hihigiriiri Unangika abe wogogeruku ai kadera ma hohailoaka! De hihigiriiri o Domba ma Ngofakikaoo! Ona duru de manga medebini ma dararonoka! De ona gea manga kuaha duru kohaamoko! Ho gea kiani hahigiriiri de hahoromati naa de ka hiado-adonika!” Hokogea to ona manga higiriiri ma demo.

¹⁴ De ahao ma aewani ma ngango iata gea ipaluhu ato, “Hokogea igoungu. Amin.” De gea ma dimo-dimono yomamotumuku de yomahuba Ma Jouika de o Domba ma Ngofakikaoo.