Himatoko 4 - Ma Jou ai Demo-demo o Totobelohoka

O Yohanese wimake Ma Jou to Una ai pareta ma kadera ma hohailoaka

¹ De gea ipaha de ahao naga moioli ngohi o Yohanese tamake. De naga o Horogaka tamake de abeika o ngorana moi ifelengaka. De toihenoli ma ilingi gea abe kanganohi toihenoka. De gea ma ilingi duru ilamokiye abe hoka o guguli yawuwu. De ma ilingi gea itemo ngohino ato, “Naiyeohi nenangiye la ka idadi tonihimatoko ngonaika hokokia abe ahao ika-ika de kiani idadi.”

² De ma demo gea ka de toihene ibootino de ihilufungoli de Ma Jou o Womaha ai kuaha. De gea ngohi tamake o kadera ma hohailoa naga imanoa o Horogaka, de naga Womatengo wogogeruku ma kaderauku.

³ De Una wogogeruku gea ai rupa duru kohadararono de duru kohameletongo abe hoka o hakaru ma leto-letongo duru ma hohailoa ma meletongo, abe ma dararonoka gea naga ma doka-dokara de nagali ma bihi-bihi. De gea ena ma dararono ma bihi-bihi ihigororomino ma kadera ma hohailoa gea.

⁴ De naga genangoka o kadera ma hohailoa naga ma gahumu monaoko de iata de gea ihigilolitino to Una ai kadera abe naga ma hidogoronaka. De ma kadera gea amomoiika naga yogogerukuoka o dimo-dimono yamonaoko de yaiata. De ma dimo-dimono gea yomahinoaukuoka de o baju ma gare-garehe de naga manga pea homoi-homoiika o sapeo de gea ma rupa hoka o koano ma sapeo o gurasino.

⁵ De to Una ai kaderaka de aino naga ihupu o leletongo de gea ma ilingi hoka yokuruuhu yoliarika. De ai kadera ma himangoka naga o oboro tumidi itokara, de ma oboro gea ena Ma Jou o Womaha abe ko wokurangua ma duru wongodu-ngodumu.

⁶ De naga moioli to Una ai kadera ma himangoka abe ma rupa hoka o taaga o kahinaaino yodiai, abe gea duru ma doo-dodono hoka o hakaru ma leto-letongo moioli ma romanga o kristala. De abe to Una ai kadera ma liate homoi-homoioka naga hoka o aewani ma ngango iata, de gea homoi-homoi naga de ma lako kohangoeoka, abe to ena ma badanga mata-mataika ma himangino de ngaro ma poretino ma akokitamunoka de ma lako.

⁷ De gea ma aewani naga moi ma rupa hoka o singa ma rupa. De naga moioli ma rupa hoka o hapi ma rupa, de moioli naga abe to ena ma himanga ma rupa ngade-ngade hoka o nyawali nanga himanga ma rupa. De naga moiohi ma rupa hoka o koloba imawooto ma rupa.

⁸ De nako ma aewani ma ngango iata, gea amomoiika naga de ma gafuufuoka abobutaangaka. De gea ngaro to ena ma gafuufu dau ma timiye eko ngaro ma badanga ma amokika, ma gea akokitamunoka de ma lako. De ma aewani ena gea o futu de o wange duru ka ihikaika inyanyi ma higiriiri ma demo naa, itemo ato, “Una gea wotebini, Una duru wotebini, nanga Baluhu Ma Jou abe ngaro mata-mataika ma ka to Unangohi ai kuaha duru kohaamoko. Una gea ngaro ka hiado-adonino ma Una nagau, de Una gea abe ma oraha naa Una nagahi, de ngaro ka hiado-adonika ma Una gea ka wowangohi. Ho Una gea duru wotebi-tebini.” Hokogea iwihigiriiri Unangika.

⁹ De hokogea ma demo abe ma aewani ma ngango gea iwihigiriiri de iwihoromati de abe iwitarimakase Unangika abe wogogeruku ai kadera ma hohailoauku, abe Una gea ka hiado-adonika wotobawango.

¹⁰ De ka ihikaika ma ora-orahiye abe ma aewani gea inyanyi de naga o dimono yamonaoko de yaiata gea yomamotumuku to Una ai himangoka de ahao onangoli yomahuba Unangika abe wogogeruku ai kaderaka de abe wotobawango ka hiado-adonika. De ona gea yahuputokahi manga sapeo abe ma rupa hoka o koano ma sapeo ma rupa de gea ena yaumoika to Una ai kadera ma himangoka de ahao onangoo iwihigiriiri Unangika ato,

¹¹ “Nanga Baluhu de nanga Jou. Nako hoka ngomi miahigiriiri o jou utuika eko o kia dika naga utuika, gea ngomi duru ko miataanua. Ngomi minihigiriiri Ngonaika angamoi Ngona dika Jou mata-mataika notulaada! De minihigiriiri abe ma titi ani mauino dika la gea notulaada de hiadono ani dulaada mata-mataika naga idadi. Ho gea ngomi kiani minihigiriiri Ngonaika! Mia horomati minihidoaka kiani Ngonaika! Ma titi ani kuahaino ho to Ngona ani romanga kiani mihilamoko! Nako Ngonaika dika minihigiriiri, gea ngomi duru miataana abe mia higiriiri ma hidumutu Ngonaika.” Hokogea ma dimono yamonaoko de yaiata manga higiriiri ma demo Unangika.